رحلتي الى هونج كونج Hong Kong

صباح الخير
كل عام وانتم بخير

كانت رحلتنا اللي فاتت لسيرلانكا وكانت 5 اجزاء
رحلتي الى كولمبو Colombo
رحلتي الى نوراليا nuwaraelia
سياحة : رحلتي الى مدينة كاندي Kandy 
رحلتي الى دمبولا Dambulla
رحلتي الى سيقيريا Sigiriya

قلت لكم قبل كذا ان رحلتنا تأخرت 3 ساعات والرحله ماكانت مباشره كانت عن طريق بانكوك
طبعا رحلتنا اليوم لهونج كونج
كانت صالة الانتظار مليانه من الركاب واكثرهم خليجيين لان الرحله كانت ايام بطولة اسيا
كنا جالسين ننتظر الرحله وجو المضيفات وجلسوا بالكراسي اللي قدامنا طبعا لنا 3 ساعات بالمطار ننتظر ومليت من
سوالف خويي اللي كلها عن بطولاته ايام الدراسه ومطامره فوق الجدران وتكسير سيارات المدرسين مدري وشلون خلص الثانويه
وانا اللي حسبت له من ايام دراسته مايجي شهر ونص
قلت بغير شوي وكلمت المضيفه السيرلنكيه قلت له كم ساعه رحلتنا الى هونج كونج
قالت ساعتين ونص لبانكوك ومن بانكوك 3 ساعات لهونج كونج وبعدين رجعت تسولف مع خوياتها
ماش ماعطتني وجه
قلت لو سمحتي ممكن اقولك شي قالت خيييييييييير بنفس شينه تقولها
قلت تدرين انك اجمل سيرلنكيه شفتها
المسكينه قعدوا يرشونها ما ويسمون عليها من الصدمه
الظاهر ماعمر احد مدحها الخبله
انا طبعا اكذب عليها لان سيرلانكا منفى للشيون اصلا
بس كلامي مع المضيفه جاب النتيجه اللي ابيها تعالوا شوفوا الاهتمام بالطياره كل شوي جايه وش تبي وش اجيب لك
ناقصك شي بغيت اقولها رجعي خويي ورى
ولا انتهت السالفه يوم نزلت في بانكوك وصت رئيس المضيفين

عطتني المضيفه هالبطاقه قلت ماشاء الله متى العرس؟
قالت وش عرسه قلت هذا ماهو بطاقة دعوه عرسك قالت لا يابن الحلال هذي قائمة الاكل

قبل نوصل هونج كونج وزعوا علينا بطاقات الدخول طبعا لازم تعبي الكرت وترفقه مع الجواز
وصلنا مطار هونج كونج الساعه 9 بالليل

مطار هونج كونج من اضخم وازحم مطارات العالم

بعد ما انهينا اجراءات الجوازات اخذنا شناطنا وقبل مانطلع مرينا على مكتب حجز الفنادق
ماكان عندنا حجز وكنا مخططين نحجز من المطار كان مكتب الحجز قبل بوابة الخروج
وكان فيه شاشه اكترونيه كبيره ورى موظفين المكتب تبين حالة الفنادق تفاجأنا وحنا نشوف ان تسعين بالميه من الفنادق محجوزه
كانت اسامي الفنادق قدامنا على اللوحه قلت نبي فندق قالت مافيه الا 3 فنادق متوفره والباقي فل
قلت خيييييييير وش صاير قالت حنا بالويك اند
طبعا الاسعار كانت ناااااار كان ارخص فندق سعره 1000 ريال الليله
طبعا ماعندنا حل ثاني اخترنا فندق

علم هونج كونج

شعار هونج كونج

خارطة هونج كونج

Hong Kong

الجزيره التي لاتنام
جزيرة التكنلوجيا القابعه في نهر اللؤلؤ

المساحه 101 الاف كم مربع
عدد السكان 7 مليون غالبيتهم صينيين
اللغه الصينيه الكنتونيه والمانداران وهذي لهجه صينيه والانجليزيه
العمله دولار هونج كونج ويعادل نصف ريال تقريبا
الرئيس دونالد تسانغ
الديانه البوذيه وهي الاغلب والطاويه والكاثوليكيه وفيه بعض الديانات مثل الهندوس واليهود والسيخ
والمسلمين عددهم 50 الف تقريبا

تتألف هونج كونج من 236 جزيره اهمها هونج كونج وكولون
وزادت الان جزيره صارت 237 لاني اكتشفت جزيره صغيره مادروا عنها
احتلت بريطانيا هونج كونج بعد حرب الافيون عام 1841 م واستعمرتها 156 سنه ورجعت عام 1997 م
قبل 10 سنوات وقبل كم يوم كان فيه احتفالات بمرور 10 سنوات على استقلالها
يفصل هونج كونج عن الصين نهر تشان تشون وتقع جنوب بحر الصين
تشتهر هونج بصناعة الالكترونيات والبلاستيك والسفن
وصلنا منطقة كولون وقال سواق الباص يالله انزلوا قلت وين ننزل قال هذا فندقكم

انا قلت لايكون بيوهقنا السواق وجايبنا قصر الرئيس
جيت عند الباب والصراحه يخوف كله اجراس وتماثيل فتحته شوي شوي قلت بشوف

دخلت الفندق كان غريب 
جدران اللوبي وسقفه من البرونز المشغول الديكور غريب والاضاءه والاثاث والثريات

الرسبشن

كراسي من زجاج

 كملنا اجراءات الدخول وعطونا مفتاح الغرفه طبعا زي باقي الفنادق الكبيره المفتاح عباره عن كرت
كانت غرفتنا بالدور رقم 29 رحنا للمصعد وجا معنا واحد قال تعرفون للمصعد قلت وش رايك بغيت اخمه بالشنطه على جبتهه
قفل المصعد وجينا ندور الازرار عشان نطلع لغرفتنا مالقينا ازرار
ندور نتلفت حتى السقف دورنا فيه شوي الا يوم فتح المصعد مره ثانيه الا الرجال قدامنا قال ماشوفكم طلعتوا
قلت انت بس قولنا وين الازرار وانت ساكت قال قلت لكم منتم عارفين له قلت طيب تعال ورنا
قال هات كرت الغرفه عطيته وحط الكرت على شاشه وطلع اسمي على الشاشه وتكلم المصعد مرحبا فايز غرفتكم بالدور 29
وحنا نتلفت ببعض انا عاد استانست جلست 5 ايام في هونج كونج كل مامريت من جنب مصعد سلمت عليه احسبهم يعرفوني

وصلنا غرفتنا ولا انتهت الاشياء الغريبه
الغرفه اثاثها فخم وغريب حتى ستايرها غريبه
والغريبه مافيها تلفزيون معقوله فندق فخم ولافيه تلفزيون مع اننا حصلنا الريموت وراح الليل وحنا ندور التلفزيون بغيت اتصل على
 الرسبشن اقولهم التلفزيون مسروق قال خويي لا وش تبيهم يقولون عنا خلني بروح لجيرانا واسألهم
وقبل يطلع اخذت الريموت وضغطت عليه واشتغل التلفزيون

مرايه

طلعت المرايه هي التلفزيون وهي الانترنت
فعلا هالفندق غريب ومن المواقف اللي صارت قال خويي انا جوعان بطلب عشا قلت له اتصل عليهم
وطبعا الرجال متعود وهو يتصل يجمع له كم كلمه عشان يقولها لموظف الاستقبال اتصل وقفل بسرعه وهو يضحك
قلت وش فيه قال الله ياخذه رد بسرعه ماعطاني فرصه اجمع كلام
جلسنا يومين نضحك على هالسالفه كانت خدمتهم سريعه واذكر مره جيت بتصل بالمطعم الا الجرس يدق واطلع وافتح الباب
لقيت موظف المطعم قال سم طال عمرك بغيت تدق علينا
على النيه الفندق
سألتهم عن درجة الفندق قالوا لنا مصنف 5 نجوم

قمنا الصبح وبعد الفطور اخذنا جوله على المنطقه وكانت منطقه مزحومه

احد المجمعات الكبيره

جامع كولون والمركز الاسلامي كان قريب من الفندق ويقع على شارع ناثان

هاللقطه اخذتها من قوقل ايرث لموقع المسجد في منطقة كولون

كانت المنطقه اللي نسكن فيها كلها اسواق ومجمعات
كانت محلات بوسيني مصلحين خصم مميز على الملابس وكانت فرصه للرجال اللي مضيع ملابسه بسيرلانكا

الاكل في هونج كونج متعب جدا مافيه مطاعم عربيه في بعض المطاعم الصغيره خاصه بالباكستانيين
اهل الهونج كونج يموتون شي اسمه خنزير وخصوصا كرش الخنزير وكبده
الكرش تطبخ والكبد يقلونها زي اللي عندنا بس ريحة مطاعمهم تجيب الغثيان
جينا عند المطاهم الباكستانيه لانها حلال وتهاوشوا علينا كل واحد يقول تعال عندي واللي يسحبني من يمين واللي يسحبني من يسار
قلت خلااااااااص ماابي اكل عندكم وعناد لكم بروح ادوري مندي خنزير واكل عنده

شوفوا كرش الخنزير معلق مع البط والدجاج

الجهه المقابله هي هونج كونج

  كان الجو رطب لكن بالليل يصير لطيف
درجة الحراره في هونج كونج في شهر اغسطس توصل 27 وفي فبراير توصل 15 درجة مؤيه

وانت جالس على الكورنيش راح تشوف سفن كثيره كبيره وصغيره

هذي العبارت اللي تنقل الركاب من كولون الى الضفه الثاني هونج كونج

هنا يحطون بصمة يدين ممثلين صينيين مشهورين

بعض التماثيل على الكورنيش

شوفوا البنيه تصور اهلها

قائد فرقه محلات ابوعشره

لقطة فيديو لاستعراض الفرقه

اعضاء الفرقه اللي معه قدر واللي معه طشت واللي ملاس واللي معه قوطي

شعب هونج كونج شعب طيب والابتسامه كثير تشوفها من الكبير والصغير

هنا يسوون لك تمثال من الشمع ليد

اجمل المناظر تشوفها وقت الغروب على شاطيء كولون

اعجبني منظر السحابه بالليل

هونج كونج مدينة الانوار

اذا كنت في هونج كونج لاتفوت عروض الليزر كل يوم الساعه 8 تبدأ
واذا كنت موجود يوم السبت يكون فيه العاب ناريه

I.F.C
اطول بنايه في هونج كونج

 لقطات فيديو اثناء عروض الليزر

منظر للقمر سبحان الله زي اللي عندنا

منطقة هونج كونج منطقة عمل ومقر الشركات العالميه

كنت جايب معي ستاند للكاميرا بس عشان هالمنظر مع ان وزن الاستاند حوالي2 كيلو
طبعا بتشوف على الكورنيش مصورين محترفين كثير كل واحد معه شنطه كلها عدسات والله اني استحيت وانا صاف جنبهم
تعرفت على شاب من هونج كونج كان جنبي وحنا ننتظر عروض الليزر جلست معه يمكن 3 ساعات وكان معه امه كان خلوق جدا
رجعنا من الكورنيش حوالي الساعه 10 بالليل وحسيت بألم ببطني وكان يزيد الالم ولاقدرت اتحمل اتصلت على الاستقبال

وقلت بطني يعورني ابي الطبيب قالت لي الموظفه الطبيب يجي بعد ساعه قلت لها كم قيمة الكشف
قالت لي تقريبا 1500 دولار
قالت لي طبعا على حسب المرض اللي عندك
قلت طيب وشو ارخص مرض عندكم>>>ياشين الطفره
قلت اصلا هو مايعورني مره اقدر اتحمل
بعد ساعه جاني مدير الفندق ومعه الموظفه وقالوا تبي الطبيب قلت ايه بس غالي قالوا طيب روح للمستشفى ارخص
قلت يعني بكم قالت قالوا تقريبا 750 دولار الكشف من غير العلاج
قلت وش دعوه انا محصل بطن سيرلنكي كامل ومعه الكبد والبنكرياس بـ100 دولار بس
قالت اقولك احسن شي تروح للصيدليه وتاخذ دوا

طلعت ادور صيدليه وهناك مايعرفون الحيه اللي ملتويه على الكاس شعار الصيدليه
شوفوا اللوحات وين الواحد يقلى صيدليه هنا

دخلت اكثر من محل وكلهم مافهموا علي مالقيت احد يتكلم انجليزي كلهم صينيين
اخر محل دخلته لقيت عجوز وقعدت أشر على بطني وحسيت انها مستغربه مني وعطتني دوا اكتشفت انه حبوب حمل
فضلت اني ارتاح بالفندق وكانت فرصه لخويي ينام لاني كرفته في سيرلنكا ولاينام الا 5 ساعات باليوم
كان اليوم الثاني عندنا رحله سياحيه مدفوعه قيمتها 1500 دولار
كلمت المكتب وقلت لهم مانقدر نروح قالوا ماهي مشكله بس تدفعون ضريبه 100 دولار
واليوم الثاني خف الالم ولله الحمد

بعض المحلات لوحته اكبر من المحل

احلا شي في هونج كونج لوحات المحلات خصوصا بالليل

بالليل رحنا لمجمع ضخم اعتقد اسمه اوشن سنتر

المجمع من الداخل

المجمع منظم كل منتج له دور خاص والدور هذا مخصص للاجهزه الالكترونيه

 المجمعات تقفل الساعه 8 وبعض المحلات تقفل الساعه 10
من الاماكن اللي تستحق الزياره جبل فكتوريا
قرية الصيادين
دزني لاند

بالاضافه الى العديد من المتاحف منها متحف الشمع

 وسائل المواصلات في هونج كونج التكاسي والباصات والسفن والمترو والترام اللي تشوفون بالصوره
 النظام في هونج كونج يشبه النظام في بريطانيا السيارات دركسون يمين
يعني اذا بتقطع الشارع التفت يمين ماهوب يسار وحتى لو قطعت الشارع مع مكان غير الاماكن المخصصه للمشاه
راح تشوف كل السيارات توقف لك

مشكلة هونج كونج السكن لان مافيه مساحه
تصور توك ساكن وجيرانك اخذينك بالدور كل يوم واحد معشيك مايخلصون الا منتهي اجار الشقه

احلى شي عندي ادخل بين البيوت واشوف اهل هونج كونج مع ان خويي مايحب هالاماكن اضطر اروح لحالي

 كل هذي دعايات

احد الحدائق الجميله

شجره معمره يقولي واحد صيني انه عروق هالشجر شايفها باليابان

مصور منسدح>>>

هنا تشتري تذاكر السفن السريعه وبعدها تختم جوازك وتركب السفينه

السف السريعه واللي تنقل المسافرين الى الصين والدول المجاوره
وهذي السفينه اللي سافرنا فيها لوجهتنا القادمه

الرحله القادمه الى دوله استغربوا اهلها  وجودونا وجميعهم لايعلم اي تقع السعوديه
 اعتذر عن التقرير اذا ما اعجبكم لاني سويته بسرعه