رحلتي الى نوراليا nuwaraelia

نوراليا

  صباح الفل والكادي
كانت رحلتنا الماضيه لكاندي ومنها غادرنا لنوراليا

فيه ناس يقولون انت رحت خمس ايام ومقسم الرحله على 5 اجزاء ليه
السبب بسيط هذي رحله لمدينه وحده فيها حوالي 100 صور من غير الفيدو
لو حطيت الرحله في جزء واحد بتصير الصور اكثر من 300 صوره مين عنده استعداد يفتح ايميل فيه 300؟

روحوا صلحوا شاهي وتعالوا ترى الايميل طويل

قبل نطلع من حدود مدينة كاندي كان فيه مطر خفيف والجو روعه والهوا منعش>>>سفن اب ماهوب هوا
كانت الساعه تقريبا 12 الظهر
نوراليا تقع جنوب كاندي تقريبا
بعد فتره بدأ الطريق بالارتفاع التدريجي والطريق كثرت فيه المنحنيات والجو يبرد اكثر

نوراليا

الطريق كان شبه خالي لكن كانت منحنياته كثيره بس مانوقف الا للقطارات
واكثر شي عندهم القطارات كل ربع ساعه نوقف عند سكة قطار وننتظر لين يمر القطار
قطارهم يمشي 40 بعض الركاب ينزل من العربه اللي ورى ويركض ويكلم سواق القطار يقوله وقف عشان ينزل
طيب دام نزلت ليه تكلمه روح بيتكم

نوراليا
عادي القطار يمر بين البيوت والورعان يلعبون واللي يتعلق يتعلق

نوراليا
هذا القطار شوفوا الكبينه مافيها احد السواق نزل من القطار وهو يمشي راح يشتري دخان وبعدين يلحق القطار

نوراليا
اكثر القطارات مافيه شبابيك ولا ابواب اللي يبي يركب يركب واللي يبي ينزل ينزل الظاهر انه سبيل

نوراليا

واصلنا رحلتنا وكانت الامطار تزيد كل ما ارتفعنا
السواق يقول ان شاء الله الجو يكون حلو بنوراليا ولايكون فيه مطر
وحنا طبعا نبي العكس نقوله ان شاء الله مطر قال اذا فيه امطار بتكون الشلالات كثيره

كنا نشوف طلبة المدارس يمشون مع بعض بنات واولاد لانه وقت خروجهم المدارس

نوراليا
كان الكل يمشي على الطريق

نوراليا
كثير من الشاحنات محمله اشجار يقطعونه ويرسلونه للمصانع

بدينا نشوف مزارع الشاي لان الشاي ماينبت الا بالجبال

نوراليا
بعد فتره قفلنا شابيبك السياره لان الجو بااااارد

نوراليا
مزارع الشاي

وقفنا نتفرج على المزارع والمناظر الجميله

نوراليا

وفجأه طلعت لنا ام الشباب
نوراليا
طلعت هالعجوز من بين الاشجار
اول ماشفتها دفيتها وقعدت تدحرج لين وصلت تحت والسواق يطالع لي وعيونه كذا
قال وشفيييييييييك على المره قلت ياخي ماتشوف النقطه الحمرا اللي على جبهتها قال الا اشوفها
قلت هذا واحد مصوب عليها بندق ليزر بيذبحها وانا انقذتها
قال اي ليزر انت وراسك هذولي هندوس هم اللي يحطون النقطه زي الهنود
قلت عاد وش دراني انا ناوي افزع
المهم شوي الا هي طالعه زي الجني مره ثانيه وتضحك بعد الظاهر متعوده على هالحركه

 نوراليا

واصلنا طريقنا لين وصلنا شلال صغير ووقفنا عنده

نوراليا

شلال صغير
كل ماشفنا شلال قلنا للسواق وقف وكانت الشلالات كثيره وعصب السواق قال انتم اول مره تشوفون شلالات
ماعندكم شلالات يعني قلت الا عندي بس مافيه ماء

نوراليا
ابتسامه سيلانيه بريئه
والله عاد مدري هي بريئه والا ناوي يسرقنا بس ما امداه

نوراليا

 مناظر ولااااا اروع والجو مع انه بااااارد بس حلو

نوراليا

نوراليا
هذا الظاهر مصلى للبوذيين المسافرين

نوراليا
بدت الامطار تهطل بغزاره والضباب يزيد مع ان الساعه 1 الظهر
حتى الطريق صار اخطر منعطفات خطيره وامطار غزيره وضباب

نوراليا
هذولي البنات اللي يقطفون اوراق الشاي

مايشتغل بقطف الشاي الا البنات ليه مدري
يمكن لان البنت ناعمه تقطف الاوراق اللي فوق والرجال دفوش يسحب الشجره من جذورها

نوراليا
بيوت وسط حقول الشاي

نوراليا
هنا الطريق صار ضيق مره

نوراليا
يزرع في نوراليا الشاي والفراوله بس حقول الشاي اكثر

نوراليا
احد الشلالات
طبعا كانت نيتنا زيارة مصنع الشاي عشان نشوف كيف طريقة تصنيعه
 وكل السواقين يتفقون مع احد المصانع انهم يجبون لهم سياح مقابل وجبة غدا او كوب شاي
والسياح اكيد بيشترون من المصنع وهالطريقه موجدوده في اغلب دول شرق اسيا

نوراليا
البنات يحطون على روسهم غطاء نايلون لان المطر بالمنطقه هذي مايوقف ابداااا

نوراليا

وصلنا لواحد من اكبر المصانع في لابوكالي
مصنع بلو فيلد

نوراليا
وتعني الحقل الازرق الظاهر راعي المصنع عنده عمى الوان

نوراليا
 اول ماوقفنا عند المصنع بدت الامطار تهطل بشكل عجيب

بسرعه دخلنا المصنع وجا معنا واحد وقعد يشرح لنا طريقة صنع الشاي
البدايه تكون من المزارع واللي يشتغل فيها البنات يقطفون اوراق الشاي بطرق خاصه ومن العاده يكون عدد
البنات اللي يشتغلون بالمزرعه الوحده من 200 الى 300 بنت طبعا يجيبون الشاي بسلال يشيلونها على روسهم

نوراليا
محد مربح شركة لبتون الا هالبنت

ويحطون اوراق الشاي بحاويه مستطيله سعتها طن
ويكون فيه مراوح تجفف الشاي من الرطوبه

نوراليا
الشاي اثناء تجفيفه

بعد تجفيف اوراق الشاي ينزل من الطابق الاول الى الطابق الارضي من خلال فتحه بالسقف وينزل على طول
وسط مكينه ضخمه لتقطيعه الى قطع صغيره وهرسه

نوراليا

بعد كذا يحطونه في مكينه لفرزه حسب نوعه وحجمه
وبعد الفرز ياخذون اوراق الشاي الجيده والباقي يباع على انه سماد

نوراليا
يوضع الشاي هنا لحرقه في فرن درجة حرارته 270 درجه فهرنهايت

نوراليا
هذا الشاي بعد حرقه يطلع من الفرن طبعا كان حار

نوراليا
احس ان ابوسيقان هذا متخصص الشاي الاخضر يمكن عشان الفنيله

نوراليا
بعد كذا يحطونه بمكينه لفرز انواع الشاي الذهبي والاخضر والاسود وغيرها

نوراليا
وهذي انواع الشاي اكثر من 10 انواع

نوراليا
بعدين يحطونه بأكياس كبيره للتصدير لانه شاي خام ويشترونه المصانع اللي تضيف عليه بعض النكهات
وتغلفه بأغلفه صغيره مثل شركة لبتون وغيرها

نوراليا
هنا يحملون السماد

بعد هالجوله على المصنع رحنا لمقهى خاص بالمصنع لتذوق الشاي وفيه محل لبيع الشاي والتحف للسياح

نوراليا
 مقهى ومطعم مصنع بلو فيلد

نوراليا
قلت لهم ابي اذوق كل انواع الشاي اللي عندكم وصاروا يجيبون من الاكواب ويحطون قدامي وانا اشرب واذا قالوا لي هالنوع
يشرب مع الحيب قلت جيبوا لي حليب المهم صارت الاكواب رايحه وجايه هذا حليب وهذا شي اخضر وذهبي واحمر وبالنعناع
وبالليمون وقفوا نص عمال المصنع عندي

نوراليا

كانوا يطالعون فيني بعد كل كوب ويقولون هاه طال عمرك عسى جاز لك وانا اقول لااا جيبوا غيره
المهم يوم صرت ماعاد اقدر اتحرك من الشاي قلت لهم الشاي الاسود قالو سم طال عمرك كم تبي صندوق
قلت اي صندوق ابي باكيت صغير قالوا هااااه
بس؟
قلت ايه بس
كملت كلمة بس بالشارع طبعا وانا طاير وخويي وراي وقع على شجره
وشوي الا السواق من فوقنا يمشي 200
ويطلع لنا واحد قال لعنبو بليسك موقفين المصنع ونص عمالنا يصبون لك شاي وحنا نقول الرجال بياخذ خط انتاج كامل
 واخرتها علبه صغيره
حذفوا علي علبه صغيره وقالوا هذي لك ومانبي منك فلوس
قلت طيب عطوني سكر >>>له وجه بعد
خويي المسكين مايدري وش السالفه كان بالمحل يتفرج مادرى الا هو بالشارع معي
يقول وش السالفه قلت عادي هذي من الطقوس عندهم

نوراليا
الشاي الازرق اللي بالوسط هذا احسن شاي عندهم

نوراليا
 انواع الشاي بالفواكه والنعناع وغيرها

نوراليا
يوم شف العلب قلت ماشاء اله تزرعون جراك بعد
قال اي جراك هذا شاي فواكه

نوراليا
B.O.P.F اقوى شاي عندهم اسمه
B.O.P والشاي الخفيف

نوراليا
ممكن تشتري شاي من خارج المصنع بسعر ارخص لك المصنع يبيع اجود الانواع ولا عندهم شاي مغشوش

نوراليا

نوراليا
خرجنا من المصنع وكملنا رحلتنا الى مدينة نوراليا

مواضيع ذات علاقة
1 من 4٬991

نوراليا

نوراليا

نوراليا
ممنوع قطف الشاي اجل وشوله زارعينه

نوراليا

نوراليا

مناظر ولا اروع وخضره على مد البصر

نوراليا

نوراليا

نوراليا

نوراليا

نوراليا

واحد من اكبر الشلالات في نوراليا

نوراليا

لقطة فيديو لاحد الشلالات

نوراليا

نوراليا
المقهى هذا كان يطل على اجمل مناظر نواليا واكبر شلالتها

نوراليا
افضل شاي شربناه كان في المقهى هذا كانوا يصلحون شاي التلقيمه وجلساتهم روعه
وش رايكم بالكوب وعلامته اللي كنها دخان ابوبس

نوراليا
بس الامطار حرمتنا من الجلوس مع اني معي مضله بس كان الكرسي مبلول والجو باااااارد

نوراليا

نوراليا

واصلنا رحلتنا وكان السواق يقولنا بوديكم اجمل منظر للشلالات واخيرا وصلنا لها
وصلنا الشلال وكان فيه سياح اوروبيين نزلنا مع منحدر وكانت الامطار قوووويه ووصلنا مطعم تحت الشلال
وكانت جلسات المطعم راااائعه

نوراليا
الصور من داخل المطعم

نوراليا

 لقطة فيديو للشلال

نوراليا

 صورت لكم هاللقطات لبعض الاشجار والاغصان

نوراليا

نوراليا

نوراليا

نوراليا

نوراليا

نوراليا

نوراليا
‘Little’ England’

نوراليا بريطانيا الصغرى كما يطلق عليها
ترتفع نوراليا 2000 متر عن سطح البحر وتعتبر المصيف الرئيسي في سيرلنكا وقلب صناعة الشاي
واذا شاهدت المنازل في نوراليا والفنادق تعتقد انك في وسط انجلترا بسبب الاستعمار البريطاني
لهذه البلده واكتشافهم للشاي حيث  كانوا يملكون العديد من مصانع الشاي ولكن بعد
ان استقلت سيرلنكا صارت المصانع ملك للدوله
تعتبر هذه المدينه من اكبر المدن المصدره للشاي بالعالم
يوجد العديد من الاماكن الجميله في نوراليا على سبيل المثال حديقة فيكتوريا وبحيرة جريجوريا
تبعد نوراليا 76 كم عن كاندي و180 كم عن العاصمه كولومبو وفيه طريقين للوصول لها
طريق كاندي وطريق هاتون وكل الطريقين خطيرين

نوراليا

وقفنا  في هالمكان عشان ناخذ صوره لمدينة نوراليا
دخلنا مدينة نوراليا في حدود الساعه 3 بعد الظهر وكان حجزنا في فندق جراند
  وصلنا فندق جراند وهو من مخلفات الاستعمار الانجليزي
الفندق اربع نجوم قديم لكنه نظيف وغرفه تطل على مناظر جميله

نوراليا
كانت غرفتنا بالدور الثالث وتطل على حديقة الفندق

 يوم وصلنا غرفتنا قالوا هذي الدفايه وهذا اللي يشغلها
قلنا مايحتاج نشغلها قال مايحتاج طيب بعد شوي تتصل علي وتقول تعال شغلها
وفعلا كان الجو كل شوي يزيد بروده لين وصلت الحراره اقل من 10 درجات

نوراليا
هذي غرفتنا من داخل وتلاحظون الثريه اللي نازله ودي اعرف من الغبي اللي مسوي فيها كذا
تصدقون طلعنا من الفندق كل واحد براسه 10 غرز من هالثريه

نوراليا
ارتحنا شوي بالفندق وبعدها طلعنا نستكشف نوراليا على رجلينا طبعا انا معنا مضله ماعندنا مشكله
ونصيحه لاي شخص بيسافر لاي بلد لازم يبحث عن اجوائها هل هي بارده ممطره حاره
طبعا كان عندنا علم بالجو وجايبين معنا ملابس ثقيله

نوراليا
مقهى تابع للفندق
الصراحه انه راااايق خصوصا ان كل جدرانه زجاج وتتفرج على منظر المطر
وداخل المقهى فيه دفايه على الطراز الانجليزي

نوراليا
الدوار الوحيد عندهم

نوراليا

نوراليا
حلوه هالدعايه طبعا معلقين سياره وسط اللوحه وهالدعايه فوق معرض سيارات

وصلنا لبوابه حديقة فكتوريا وكنا مترددين ندخل والا ماندخل وحنا واقفين عند شباك التذاكر
كان رجال وولد وبنته اشكالهم اوربيين وكانوا مترددين مثلنا يتفرجون على الحديقه من برى ويشاور عياله
بس يوم شافونا شرينا تذاكر راحوا واشتروا مثلنا والله بغيت اقهرهم واقطع التذاكر ونمشي
بحيره قكتوريا قديمه جدا وعمرها اكثر من 100 عام

نوراليا
منظر جميل لاحد النوافير المهجوره
مايحتاج نوافير الامطار ماتوقف

نوراليا
حلو منظر الورده طالعه من وسط الما وصايره كأنه منوره

الحديقه جميله وكبيييييره وفيها انواع الاشجار والورود والنوافير
وكان في زاوية الحديقه قصر

نوراليا
احد النوافير

نوراليا

نوراليا

نوراليا

نوراليا
هالورده لها سالفه الله لايعيدها

انا كنت سامع ان نوراليا فيها حشره تمص الدم يوم شفت هالورده توقعتها هي
وانا اقوم لك عليها وذببببح ودعس وضرب قال خويي وش تسوي قلت هذي الحشره اللي قالوا لنا عليها انتبه
وقلت له ابدا من الاشجار اللي على اليمين وانا ببدا من يسار المهم جلسنا 10 دقايق ذبحنا حوالي 20 حشره
مادرينا الا الرجال اللي جاي يركض يقول خييييير؟
قلت الحشره
قال اي حشره؟؟
قلت هذي ماهي اللي تمص الدم
قال دم
قال هذي ورده ومن اندر الورود بالحديقه
قلت ايه بس تمص الدم صح>>بيرقع
قال اقول هالحين تدفع عن كل ورده 50 روبيه
طبعا كان الرجال دب والعضلات حتى خشمه فيه عضلات
قلت طيب بندفع بس لاتتهور الله يهديك
المهم حسبناها وطلعت قيمة اللي ذبحناه من الحشرات>>>للحين مصر انها حشره
المهم طلعت حوالي 850 روبيه
عطيته عمله من فئة 1000 روبيه
قال ماعندي صرف
قلت اجل بروح اذبح لي 3 بالباقي
قال اقول انثبر بس

نوراليا
وصلنا عند الورده هذي وخويي يقول ماتقول انها هذي الحشره؟
قلت اقول والله هالحين لو اشوف ضب لاقول ورده امش بس طفرنا

نوراليا
حتى هم عندهم نفس حركاتنا يكتوب ذكرياتهم  بس ماهو على كباري على الاشجار
شوفوا على اليمين ذكريات شباب كولومبو

نوراليا
وصلنا اخر الحديقه وطبعا كانت كبيره كنا ندور باب لان السوق مايفصلنا عنه الا باب بس للاسف مقفل
يعني لازم نرجع مع البوابه اللي دخلنا معها والبوابه بعيده اقل شي نص ساعه لين نوصل للسوق
قلت بروح ادور مكان نطلع معه
رحت ولقيت فتحه بالجدار وتحسفت على التذكره
ليتني داري انه فيه فتحه

نوراليا
طلعنا مع الجدار وكان قدامنا سوق عباره عن دورين وجنبه محطه للباصات
كان الجو شديد البروده والوقت قبل الغروب بدقايق

ماكان لنا هدف ولا محتاجين شي بس فضول وحب استطلاع
دخلنا السوق وكان السوق يتفرع منه اسواق كثيره شعبيه
خويي قال ماني داخل روح انت وانا عاد احب الاسواق الشعبيه

نوراليا
دخلت السوق وكان كل الناس يطالعون لي باستغراب لانه ماهو مكان سياحي
وانا داخل ومعي كاميراتي واصور كل شي

نوراليا
دخلت سوق الخضار والفواكه وسألتهم عن الموز الاحمر قالوا مافيه منه
فيه 3 انواع من الموز في سيرلنكا الاحمر والاصفر والاخضر

نوراليا
دخلت سوق التوابل وجلست ساعه الاربع اعاطس
وتعالوا شوفوا انواع الفل
ياناس اللي يجينا ماهو فلفل الفلفل عندهم 30 نوع
اصلا الفلفل الاحمر عندهم حلى

نوراليا
اسماك مجففه الظاهر هذي المزه حقتهم
 للناس اللي يدققون بكل شي ترى الريال 30 روبيه

نوراليا
ودخلت بعدها سوق الاسماك واسأل عن الاسعار لا واكاسر بعد
قال خويي طيب لو باعوك وانت تكاسرهم قلت عادي اوديه مطبخ الفندق واخليه يسويه لنا

نوراليا
جانب من السوق

نوراليا
والدواعيس كان لها نصيب وهذا اهم شي احب امشي فيها

نوراليا
معروضات السوق تدل على درجة الحراره

نوراليا

 اغلب منازل نوراليا وبناياته على الطريقه الانجليزيه
بعد غروب الشمس صار البرد شديد والامطار اصلا ماتوقف رجعنا للفندق
وتعشينا بمطعم الفندق وكان اكلهم لذيذ بالاضافه الى الحلويات
في اليوم التالي غادرنا نوراليا الى العاصمه كولومبو
الرحله القادمه مدينة كولومبو

تعليقات
تصميم وتطوير: شركة كَلِمْ