من حوالي شهر او اكثر مرت بي اسوأ حالات الاشتراك الرقمي DSL
ايوه عندي DSL لكننا و قسم بالله نعاني زي ما تعانون يا اصحاب الدايل اب
او كما يسميه بعض معارفي "ايزي زفت"
اتصلت على سعودي نت وقتها و اشتكيت لهم سوء الخدمه و بطء الاشتراك
قالي عندنا مشكله في السيرفر في الرياض و الشرقيه نحاول حله
و مره اخرى اتصلت و قالي انه المشكله في الغربيه و الشرقيه
و كمان مره و قالي جده و الرياض .. وبعد ما قلتله اني في الشرقيه قال "ايوه ايوه صح حتى في الشرقيه"
و هاتك يا تنوع ..
قلتلهم مالي شغل في مشاكلكم انا ابغى تعويض عن الايام المضروبه اللي دفعت عليها نص مكافآتي
قالي ولا يهمك بس ارسل ايميل للشركه تشتكي فيه و طالب بالتعويض هناك
dsl@saudi.net.sa
عشان اللي يبغى يشتكي
وقتها كان خلص اشتراكي و قلت اجدده عشان ما يقولون اني بغيت التعويض بعد ما خلص الاشتراك
و فعلا ارسلت الايميل و ماشاء الله ردوا بسرعه
عزيزي العميل :
نفيدك بأنه تم النظر بإيميلك المرسل والتأكد من اشتراكك وجدنا انه يوجد عندك اتصال ممتاز واتصالك بالانترنت ساعات طويله , وبهذا لاتوجد اي مشكلة .
وبالنسبة للمشكلة العامه التي حصلت مع الاتصالات تم رفع بها خطاب للأدارة بخصوص تعويض جميع العملاء وحتى الان لم يردنا اي شي بخصوص التعويض .
فاذا كان هناك تاريخ محدد بوقت الانفصال الذي حدث كما ذكرت وهو مدة يومين الرجاء تحديده .
والان اخرجوا انفسهم زي الشعره من العجينه و قالوا "احنا مالنا شغل.. الاتصالات"
ولا " كلم الاعطال 904 "
طيب ليش سعودي نت بس اللي صار معاها المشكله؟
ليش اول نت ولا جيل مثلا ما تتمشكل معاكم << لحد يسألني اي شركه احسن فكلهم لهم عيوبهم… يعني مادري
هذا و انتوا الشركه الام ..
الاسئله هذه يقف امامها موظفي الاتصالات و سعودي نت بلا إجابه…
و يبقى الوضع على ما هو عليه الى اشعار اخر
و الان الخبر الجديد من سعودي نت
فبعد الاسعار المبهره اللي شفناها و اللي اعتقد صعبه احد يتحداهم فيه
زادت الايرادات على الشركه و كثر مشتركينه
و اختفت بطاقات التجديد لشهر واحد من مكتبه جرير و الموزعين الاخرين
توقعت الموضوع مؤقت
ولكن بعد ما رحت لمقر الشركه و اخذت من الموظف بطاقه التجديد و سألته عن سبب قله الانتاج
قال : بعد الدراسه و التمعن .. توصلت الشركه لقرار سحب بطاقات التجديد لشهر واحد تماما و الاكتفاء بتلك ذات الثلاثه شهور
فهل سبطبق القرار فعلا؟
سألت الموظف عن السبب فقال نحن نريد الاكتفاء بعملائنا المخلصين … و ليس الذين يقتصرون على التجربه و السلام
فكثره اسماء المستخدمين تضر بسيرفراتن
المفروض كونك عميل قديم يعني راح تجدد ثلاثه شهور لانك ماراح تستعمل غير اشتراكن
قلتله : و انا من اقدم العملاء عندكم فكنت عميلكم لمن كنتوا اغلى شركه و افضل في الخدمه قبل اكثر من ثلاث سنوات
و ما زلت معكم حاله الشده الان وما عمري جددت ببطاقه ثلاثه شهور
اكتفى الموظف برفع كتفيه و حواجبه استغرابا من كلامي و لم ينطق بكلمه..
ماراح اعلق على القصه لاني تعودت صراحه و ماهي اول مره ولا راح تكون اخر مره
….
بس اقدم نصيحه للكل…
قبل ما تشترك انظر في الخدمه ثم السعر
سعودي نت ارخص لكن مو دايما هم الاحسن..
……..
كان عندي موضوع تاني يخص الجوال بس قلت كفايه حش في الاتصالات دحين و خليه لايميل ثاني
اخوكم
سمــ@ــعه
مجموعه ابونواف
