صباح الفل والكادي
كانت رحلتنا الماضيه لكاندي ومنها غادرنا لنوراليا
فيه ناس يقولون انت رحت خمس ايام ومقسم الرحله على 5 اجزاء ليه
السبب بسيط هذي رحله لمدينه وحده فيها حوالي 100 صور من غير الفيدو
لو حطيت الرحله في جزء واحد بتصير الصور اكثر من 300 صوره مين عنده استعداد يفتح ايميل فيه 300؟
روحوا صلحوا شاهي وتعالوا ترى الايميل طويل
قبل نطلع من حدود مدينة كاندي كان فيه مطر خفيف والجو روعه والهوا منعش>>>سفن اب ماهوب هوا
كانت الساعه تقريبا 12 الظهر
نوراليا تقع جنوب كاندي تقريبا
بعد فتره بدأ الطريق بالارتفاع التدريجي والطريق كثرت فيه المنحنيات والجو يبرد اكثر
الطريق كان شبه خالي لكن كانت منحنياته كثيره بس مانوقف الا للقطارات
واكثر شي عندهم القطارات كل ربع ساعه نوقف عند سكة قطار وننتظر لين يمر القطار
قطارهم يمشي 40 بعض الركاب ينزل من العربه اللي ورى ويركض ويكلم سواق القطار يقوله وقف عشان ينزل
طيب دام نزلت ليه تكلمه روح بيتكم
عادي القطار يمر بين البيوت والورعان يلعبون واللي يتعلق يتعلق
هذا القطار شوفوا الكبينه مافيها احد السواق نزل من القطار وهو يمشي راح يشتري دخان وبعدين يلحق القطار
اكثر القطارات مافيه شبابيك ولا ابواب اللي يبي يركب يركب واللي يبي ينزل ينزل الظاهر انه سبيل
واصلنا رحلتنا وكانت الامطار تزيد كل ما ارتفعنا
السواق يقول ان شاء الله الجو يكون حلو بنوراليا ولايكون فيه مطر
وحنا طبعا نبي العكس نقوله ان شاء الله مطر قال اذا فيه امطار بتكون الشلالات كثيره
كنا نشوف طلبة المدارس يمشون مع بعض بنات واولاد لانه وقت خروجهم المدارس
كان الكل يمشي على الطريق
كثير من الشاحنات محمله اشجار يقطعونه ويرسلونه للمصانع
بدينا نشوف مزارع الشاي لان الشاي ماينبت الا بالجبال
بعد فتره قفلنا شابيبك السياره لان الجو بااااارد
مزارع الشاي
وقفنا نتفرج على المزارع والمناظر الجميله
وفجأه طلعت لنا ام الشباب
طلعت هالعجوز من بين الاشجار
اول ماشفتها دفيتها وقعدت تدحرج لين وصلت تحت والسواق يطالع لي وعيونه كذا
قال وشفيييييييييك على المره قلت ياخي ماتشوف النقطه الحمرا اللي على جبهتها قال الا اشوفها
قلت هذا واحد مصوب عليها بندق ليزر بيذبحها وانا انقذتها
قال اي ليزر انت وراسك هذولي هندوس هم اللي يحطون النقطه زي الهنود
قلت عاد وش دراني انا ناوي افزع
المهم شوي الا هي طالعه زي الجني مره ثانيه وتضحك بعد الظاهر متعوده على هالحركه
واصلنا طريقنا لين وصلنا شلال صغير ووقفنا عنده
شلال صغير
كل ماشفنا شلال قلنا للسواق وقف وكانت الشلالات كثيره وعصب السواق قال انتم اول مره تشوفون شلالات
ماعندكم شلالات يعني قلت الا عندي بس مافيه ماء
ابتسامه سيلانيه بريئه
والله عاد مدري هي بريئه والا ناوي يسرقنا بس ما امداه
مناظر ولااااا اروع والجو مع انه بااااارد بس حلو
هذا الظاهر مصلى للبوذيين المسافرين
بدت الامطار تهطل بغزاره والضباب يزيد مع ان الساعه 1 الظهر
حتى الطريق صار اخطر منعطفات خطيره وامطار غزيره وضباب
هذولي البنات اللي يقطفون اوراق الشاي
مايشتغل بقطف الشاي الا البنات ليه مدري
يمكن لان البنت ناعمه تقطف الاوراق اللي فوق والرجال دفوش يسحب الشجره من جذورها
بيوت وسط حقول الشاي
هنا الطريق صار ضيق مره
يزرع في نوراليا الشاي والفراوله بس حقول الشاي اكثر
احد الشلالات
طبعا كانت نيتنا زيارة مصنع الشاي عشان نشوف كيف طريقة تصنيعه
وكل السواقين يتفقون مع احد المصانع انهم يجبون لهم سياح مقابل وجبة غدا او كوب شاي
والسياح اكيد بيشترون من المصنع وهالطريقه موجدوده في اغلب دول شرق اسيا
البنات يحطون على روسهم غطاء نايلون لان المطر بالمنطقه هذي مايوقف ابداااا
وصلنا لواحد من اكبر المصانع في لابوكالي
مصنع بلو فيلد
وتعني الحقل الازرق الظاهر راعي المصنع عنده عمى الوان
اول ماوقفنا عند المصنع بدت الامطار تهطل بشكل عجيب
بسرعه دخلنا المصنع وجا معنا واحد وقعد يشرح لنا طريقة صنع الشاي
البدايه تكون من المزارع واللي يشتغل فيها البنات يقطفون اوراق الشاي بطرق خاصه ومن العاده يكون عدد
البنات اللي يشتغلون بالمزرعه الوحده من 200 الى 300 بنت طبعا يجيبون الشاي بسلال يشيلونها على روسهم
محد مربح شركة لبتون الا هالبنت
ويحطون اوراق الشاي بحاويه مستطيله سعتها طن
ويكون فيه مراوح تجفف الشاي من الرطوبه
الشاي اثناء تجفيفه
بعد تجفيف اوراق الشاي ينزل من الطابق الاول الى الطابق الارضي من خلال فتحه بالسقف وينزل على طول
وسط مكينه ضخمه لتقطيعه الى قطع صغيره وهرسه
بعد كذا يحطونه في مكينه لفرزه حسب نوعه وحجمه
وبعد الفرز ياخذون اوراق الشاي الجيده والباقي يباع على انه سماد
يوضع الشاي هنا لحرقه في فرن درجة حرارته 270 درجه فهرنهايت
هذا الشاي بعد حرقه يطلع من الفرن طبعا كان حار
احس ان ابوسيقان هذا متخصص الشاي الاخضر يمكن عشان الفنيله
بعد كذا يحطونه بمكينه لفرز انواع الشاي الذهبي والاخضر والاسود وغيرها
وهذي انواع الشاي اكثر من 10 انواع
بعدين يحطونه بأكياس كبيره للتصدير لانه شاي خام ويشترونه المصانع اللي تضيف عليه بعض النكهات
وتغلفه بأغلفه صغيره مثل شركة لبتون وغيرها
هنا يحملون السماد
بعد هالجوله على المصنع رحنا لمقهى خاص بالمصنع لتذوق الشاي وفيه محل لبيع الشاي والتحف للسياح
مقهى ومطعم مصنع بلو فيلد
قلت لهم ابي اذوق كل انواع الشاي اللي عندكم وصاروا يجيبون من الاكواب ويحطون قدامي وانا اشرب واذا قالوا لي هالنوع
يشرب مع الحيب قلت جيبوا لي حليب المهم صارت الاكواب رايحه وجايه هذا حليب وهذا شي اخضر وذهبي واحمر وبالنعناع
وبالليمون وقفوا نص عمال المصنع عندي
كانوا يطالعون فيني بعد كل كوب ويقولون هاه طال عمرك عسى جاز لك وانا اقول لااا جيبوا غيره
المهم يوم صرت ماعاد اقدر اتحرك من الشاي قلت لهم الشاي الاسود قالو سم طال عمرك كم تبي صندوق
قلت اي صندوق ابي باكيت صغير قالوا هااااه
بس؟
قلت ايه بس
كملت كلمة بس بالشارع طبعا وانا طاير وخويي وراي وقع على شجره
وشوي الا السواق من فوقنا يمشي 200
ويطلع لنا واحد قال لعنبو بليسك موقفين المصنع ونص عمالنا يصبون لك شاي وحنا نقول الرجال بياخذ خط انتاج كامل
واخرتها علبه صغيره
حذفوا علي علبه صغيره وقالوا هذي لك ومانبي منك فلوس
قلت طيب عطوني سكر >>>له وجه بعد
خويي المسكين مايدري وش السالفه كان بالمحل يتفرج مادرى الا هو بالشارع معي
يقول وش السالفه قلت عادي هذي من الطقوس عندهم
الشاي الازرق اللي بالوسط هذا احسن شاي عندهم
انواع الشاي بالفواكه والنعناع وغيرها
يوم شف العلب قلت ماشاء اله تزرعون جراك بعد
قال اي جراك هذا شاي فواكه
B.O.P.F اقوى شاي عندهم اسمه
B.O.P والشاي الخفيف
ممكن تشتري شاي من خارج المصنع بسعر ارخص لك المصنع يبيع اجود الانواع ولا عندهم شاي مغشوش
خرجنا من المصنع وكملنا رحلتنا الى مدينة نوراليا
ممنوع قطف الشاي اجل وشوله زارعينه
مناظر ولا اروع وخضره على مد البصر
واحد من اكبر الشلالات في نوراليا
لقطة فيديو لاحد الشلالات
المقهى هذا كان يطل على اجمل مناظر نواليا واكبر شلالتها
افضل شاي شربناه كان في المقهى هذا كانوا يصلحون شاي التلقيمه وجلساتهم روعه
وش رايكم بالكوب وعلامته اللي كنها دخان ابوبس
بس الامطار حرمتنا من الجلوس مع اني معي مضله بس كان الكرسي مبلول والجو باااااارد
واصلنا رحلتنا وكان السواق يقولنا بوديكم اجمل منظر للشلالات واخيرا وصلنا لها
وصلنا الشلال وكان فيه سياح اوروبيين نزلنا مع منحدر وكانت الامطار قوووويه ووصلنا مطعم تحت الشلال
وكانت جلسات المطعم راااائعه
الصور من داخل المطعم
لقطة فيديو للشلال
صورت لكم هاللقطات لبعض الاشجار والاغصان
نوراليا
‘Little’ England’
نوراليا بريطانيا الصغرى كما يطلق عليها
ترتفع نوراليا 2000 متر عن سطح البحر وتعتبر المصيف الرئيسي في سيرلنكا وقلب صناعة الشاي
واذا شاهدت المنازل في نوراليا والفنادق تعتقد انك في وسط انجلترا بسبب الاستعمار البريطاني
لهذه البلده واكتشافهم للشاي حيث كانوا يملكون العديد من مصانع الشاي ولكن بعد
ان استقلت سيرلنكا صارت المصانع ملك للدوله
تعتبر هذه المدينه من اكبر المدن المصدره للشاي بالعالم
يوجد العديد من الاماكن الجميله في نوراليا على سبيل المثال حديقة فيكتوريا وبحيرة جريجوريا
تبعد نوراليا 76 كم عن كاندي و180 كم عن العاصمه كولومبو وفيه طريقين للوصول لها
طريق كاندي وطريق هاتون وكل الطريقين خطيرين
وقفنا في هالمكان عشان ناخذ صوره لمدينة نوراليا
دخلنا مدينة نوراليا في حدود الساعه 3 بعد الظهر وكان حجزنا في فندق جراند
وصلنا فندق جراند وهو من مخلفات الاستعمار الانجليزي
الفندق اربع نجوم قديم لكنه نظيف وغرفه تطل على مناظر جميله
كانت غرفتنا بالدور الثالث وتطل على حديقة الفندق
يوم وصلنا غرفتنا قالوا هذي الدفايه وهذا اللي يشغلها
قلنا مايحتاج نشغلها قال مايحتاج طيب بعد شوي تتصل علي وتقول تعال شغلها
وفعلا كان الجو كل شوي يزيد بروده لين وصلت الحراره اقل من 10 درجات
هذي غرفتنا من داخل وتلاحظون الثريه اللي نازله ودي اعرف من الغبي اللي مسوي فيها كذا
تصدقون طلعنا من الفندق كل واحد براسه 10 غرز من هالثريه
ارتحنا شوي بالفندق وبعدها طلعنا نستكشف نوراليا على رجلينا طبعا انا معنا مضله ماعندنا مشكله
ونصيحه لاي شخص بيسافر لاي بلد لازم يبحث عن اجوائها هل هي بارده ممطره حاره
طبعا كان عندنا علم بالجو وجايبين معنا ملابس ثقيله
مقهى تابع للفندق
الصراحه انه راااايق خصوصا ان كل جدرانه زجاج وتتفرج على منظر المطر
وداخل المقهى فيه دفايه على الطراز الانجليزي
الدوار الوحيد عندهم
حلوه هالدعايه طبعا معلقين سياره وسط اللوحه وهالدعايه فوق معرض سيارات
وصلنا لبوابه حديقة فكتوريا وكنا مترددين ندخل والا ماندخل وحنا واقفين عند شباك التذاكر
كان رجال وولد وبنته اشكالهم اوربيين وكانوا مترددين مثلنا يتفرجون على الحديقه من برى ويشاور عياله
بس يوم شافونا شرينا تذاكر راحوا واشتروا مثلنا والله بغيت اقهرهم واقطع التذاكر ونمشي
بحيره قكتوريا قديمه جدا وعمرها اكثر من 100 عام
منظر جميل لاحد النوافير المهجوره
مايحتاج نوافير الامطار ماتوقف
حلو منظر الورده طالعه من وسط الما وصايره كأنه منوره
الحديقه جميله وكبيييييره وفيها انواع الاشجار والورود والنوافير
وكان في زاوية الحديقه قصر
احد النوافير
هالورده لها سالفه الله لايعيدها
انا كنت سامع ان نوراليا فيها حشره تمص الدم يوم شفت هالورده توقعتها هي
وانا اقوم لك عليها وذببببح ودعس وضرب قال خويي وش تسوي قلت هذي الحشره اللي قالوا لنا عليها انتبه
وقلت له ابدا من الاشجار اللي على اليمين وانا ببدا من يسار المهم جلسنا 10 دقايق ذبحنا حوالي 20 حشره
مادرينا الا الرجال اللي جاي يركض يقول خييييير؟
قلت الحشره
قال اي حشره؟؟
قلت هذي ماهي اللي تمص الدم
قال دم
قال هذي ورده ومن اندر الورود بالحديقه
قلت ايه بس تمص الدم صح>>بيرقع
قال اقول هالحين تدفع عن كل ورده 50 روبيه
طبعا كان الرجال دب والعضلات حتى خشمه فيه عضلات
قلت طيب بندفع بس لاتتهور الله يهديك
المهم حسبناها وطلعت قيمة اللي ذبحناه من الحشرات>>>للحين مصر انها حشره
المهم طلعت حوالي 850 روبيه
عطيته عمله من فئة 1000 روبيه
قال ماعندي صرف
قلت اجل بروح اذبح لي 3 بالباقي
قال اقول انثبر بس
وصلنا عند الورده هذي وخويي يقول ماتقول انها هذي الحشره؟
قلت اقول والله هالحين لو اشوف ضب لاقول ورده امش بس طفرنا
حتى هم عندهم نفس حركاتنا يكتوب ذكرياتهم بس ماهو على كباري على الاشجار
شوفوا على اليمين ذكريات شباب كولومبو
وصلنا اخر الحديقه وطبعا كانت كبيره كنا ندور باب لان السوق مايفصلنا عنه الا باب بس للاسف مقفل
يعني لازم نرجع مع البوابه اللي دخلنا معها والبوابه بعيده اقل شي نص ساعه لين نوصل للسوق
قلت بروح ادور مكان نطلع معه
رحت ولقيت فتحه بالجدار وتحسفت على التذكره
ليتني داري انه فيه فتحه
طلعنا مع الجدار وكان قدامنا سوق عباره عن دورين وجنبه محطه للباصات
كان الجو شديد البروده والوقت قبل الغروب بدقايق
ماكان لنا هدف ولا محتاجين شي بس فضول وحب استطلاع
دخلنا السوق وكان السوق يتفرع منه اسواق كثيره شعبيه
خويي قال ماني داخل روح انت وانا عاد احب الاسواق الشعبيه
دخلت السوق وكان كل الناس يطالعون لي باستغراب لانه ماهو مكان سياحي
وانا داخل ومعي كاميراتي واصور كل شي
دخلت سوق الخضار والفواكه وسألتهم عن الموز الاحمر قالوا مافيه منه
فيه 3 انواع من الموز في سيرلنكا الاحمر والاصفر والاخضر
دخلت سوق التوابل وجلست ساعه الاربع اعاطس
وتعالوا شوفوا انواع الفل
ياناس اللي يجينا ماهو فلفل الفلفل عندهم 30 نوع
اصلا الفلفل الاحمر عندهم حلى
اسماك مجففه الظاهر هذي المزه حقتهم
للناس اللي يدققون بكل شي ترى الريال 30 روبيه
ودخلت بعدها سوق الاسماك واسأل عن الاسعار لا واكاسر بعد
قال خويي طيب لو باعوك وانت تكاسرهم قلت عادي اوديه مطبخ الفندق واخليه يسويه لنا
جانب من السوق
والدواعيس كان لها نصيب وهذا اهم شي احب امشي فيها
معروضات السوق تدل على درجة الحراره
اغلب منازل نوراليا وبناياته على الطريقه الانجليزيه
بعد غروب الشمس صار البرد شديد والامطار اصلا ماتوقف رجعنا للفندق
وتعشينا بمطعم الفندق وكان اكلهم لذيذ بالاضافه الى الحلويات
في اليوم التالي غادرنا نوراليا الى العاصمه كولومبو
الرحله القادمه مدينة كولومبو
والله حلوه سفرياتك وبغيت اقولك اني انتظر ايميلاتك بفارغ الصبر ولو خيو استفدت ن سفريتك لماليزيا كثير اوكي خيو الله يوفقك ولا تبخل علينا بجديدك سي يو
ماشاءالله عيني عليكم بارده ,, ماتبوون وحده تكويلكم ملابسكم كل فنيله بـ10 هع ,, يالله ماعلينا البطاله مأثرهـ علي خخخخخخخخخخخخخخ والله رحلتكم رااااااااااااائعه وحسستوني بالجو قاعده اتحسف على جو مكه الله يعمرها ,, ماشاءالله جنه بالارض ,, خياليه ,,, طيـب ممكن اسأل رحلتكم هذي كم كلفتكم تقريبا ,,,,,,,,,,,,؟؟ تصلح للعوايل ,, ابووي ازعجنا بمصر والله تعبت نفسيار مصر مصر مصر ,, تصدق انه ابها مارحت لها ,, بس مصر ,, خلاص مليناااااااااااااااا ,, باخذ كل رحلاتك ان شاءالله واوريها ابوووي ,, كوود يقتنع ,,, ياااااااالله تلين رويسه ,, بس ترا امانتن معاك لابغيتوا تروحون ,, تراي طباختن ماهره ,,, خذوني معاكم سكتم بكتم ,,, حطوني اقطف الشاهي ,, وردوا تلاقوني مجمعتن حريمهم اسويلهم نيووو لوك ,,, وحدتن فيهن لمحتها شعرها يبيله تهجيد بسم الله تقل مكنسه خخخخخخخخخخخخخخخ <<== لايكثر ,, عاد موتتني سالفتك حقت الورد قصدي شفاطت الدم خخخخخخخخخخخخخ والله ضحكت من تسبدي هع الله يوسع صدرك ياخووي مثل ماوسعت صدورنا ,, لاتنسى تعلمنا كم كلفتكم الرحله ,, وفمان الله ,,
تسلم الايادي..ماشاء الله.. شغل عدل مدل ..صور جناااااااااااااااان.. مااقول الا يالله نعيم الجنه..يارب.. اممممممممممم..تقل شايفه الصور من قبل!! ايييييييييييييييه تذكرت خالتي كانت رايحه لسيرلانكا وراحت لهالمدينه الباارده وصورت الطريق والحقول الشاي وتصدق حتى الفندق 🙂 الله يعطيك العافيه اخوي فايز.. الصراحه هالايميل غير شكل لانه سيرلانكي 🙂 اغلي هالدوله من غلات شغالتنا خخخخ.. بس من جد جنه الله في ارضه والصور خير دليل..اتمنى اطير لسرلانكا 🙂 تشكراااااااااات خوي..
اخوي فايز احس ان كتابة الائميل وتحضيره اكثر من سفرتكم والله ياهو طوووووووويل تعبت وانا اقراءاه بس من جد والحق يقال من جد اتعبت من بعدك واشكر حبيب قلبي ابو نواف على ها القروب اللي كلن يحاول يقلده بس بدري عليهم والله اني ادخل على القروبات الثانيه واضحك من سخافاتهم. الف شكر
بصراحه اخوي تقريرك ولا اروع منه والاجمل من الصور هو تعليقاتك .. ومن جد رائعه رائعه بمعنى الكلمة .. يسلمك ربي يالغلا واسلوبك الرائع الخفيف المرح .. لك كل الحب واجل الاحترام ..
لا لا لا لا الرحله هذي مسكتتتتتتتتته فايز انت فعلااااااااا غير نخلي الصور والمناظر الحلوه على جنب سالفة الورد مت عليها ضحك اللللللله يرجك ياشيخ والله صرت انتظر رحلاتك تسلم والله هالاصابع لاعدمناها
ياسلاااااااااام عليك عيني عليك بارده والله محد عارفه متعة السفر الا انت ماشاء الله عليك اخوي فايز بس سالفة القطارات رهيبه خخخخخخخخخخخخخخخخ والعجوز حقت الشاهي هههههههههههههه
الحين يومك متمشي بذا المناطق اللي وش زينها ورى ماجبت لنا شووي من ازهارهم وبهاراتهم <-- عجبتها الورده اللي قتلتها انت خخخخخخخخخخخخخ وبصراحه فيوز كرهت الشاي يوم شفت معداتهم.. الاصدق بسألك فيووز الحين هم يقولون الجمال والزين بالهند وسيلان وطقتها بس كل صور الحريم اللي انت مصورهن مابهن زود فهل ياترى في مزايين <-- ياهم بيشطبون عضويتس خخخخخخخ الله يعطيك العافيه وننتظر باقي رحلتك 🙂
مشكور اخوى على الموضوع مرة حلو بس كان ودى اعرف تكلفه الرحله كامله . وبصورة عامه البلد غالى ولا رخيص ؟ وهل تصلح للعويل ؟ الصراحه اجمل تقرير سياحي قريته بكل المنتديات
الف شكر لك يامبدع فعلا سريلانكا رائعه جدا لاحظت وضوح الصور ماشاء الله فياليت تخبرنا عن نوع الكاميرا اللي التقطت فيها الصور… ومشكور مره اخرى
روعة من جد روعة أعجبتني رحلتك وأهم شي الحشره ههههههه والله إنك عيشتني معك أهنيك على سردك الرائع وبالله عليك لا تتأخر بالباقي ترانا ننتظر التفاصيل ولا تحرمنا من أدق التفاصيل وخصوصاً في المناطق والفنادق تحياتي لك
ما شاء الله عليك أخوي Fayez صور ومناظر جميله ،،، لكن الأحلى ثم الأحلى تعليقاتك ،، تفقعت سـبدي من الضحك كل ذوق والله لا يحرمنا
والله استمتعت بهالصور الحلوه والطبيعه الخلابه …… ياليت تقولي نوع الكاميرا اللي اسخدمتها ؟؟؟؟
موضوع رائع وتصوير وقفشات اضافة للموضوع طعم خاص كطعم الشاي السيلاني ….من جد كنت احتسي شاي جعلني الموضوع احتقر البياله وما فيها ننتظر المزيد بارك الله فيك
شكرا اخي علي هذه الصور الرائعه وبصدق منذ فتره وانا اختار الدول التي اقضي فيها اجازتي بناء علي صورك وتعليقاتك ..مزيد من التقدم
ما شاء الله عليك والله الرحلات معك ممتعه تصدق ما ودي أسافر ودي أتابع سفرياتك بس ههههههههههههه جعلك كل يوم في دولة وتحكيلنا قصصك يا إبن بطوطه ههههه
ما شاء الله وش الصور دي ما شاء الله عليك بصرااحه روعه مو ضوع رائع بس وين البلد دي
بو الفوز شغــلاتنــا تسلـــم عليــك قصــة العجــوز مووتتني من الضحك بس وش نـــــوع الكـــاميـــرا ؟؟
الله الله .. جمال .. جمال اللقطات .. حلاوة التعليق … خفه وأنشراح . جعلتنا نتجول معك .. في الرحله .. نتفاعل بأحداثها ومقالبها … مروك عليكم أتمام السفر .. ونبقى ننتظر منك كل السفر .. وبأشتياق .. حياك الله .. وشكرا
فايز فايز فايز اووووووووووووووه اووووووووووووووه تراه جااااااااكم ياخي تقريرك يجيبلي كثيرن من الوناسة وساعة الصدر ؟ نعم نعم لا تتفاجأ؟ وش رايك بالفصحى ؟ انحش والله تبي الصدز شغلن متعوب عليه بالحيل الله يعطيك العافية اما ام الشباب ام دقشه في جبهتها . ههههااااااهههههههي والله ياني انسدحت من الضحك الذي جعله مايجيك بس والله اني مشبهن عليها تسنها عاملن عندنا بالمزرعة . تسلم يافايز والى الامام دووووووووووس والله يوفقك.
اخويا يعطيك الف عافيه انا من اشد المعجبات في طريق سردك للرحله ومشكور اخويا علي الصور الجميله التي سوف تعطيني دافع في زيارة نوراليا انا زرت كولمبو لكن ما تثنأ لي زيارة المدن الي انت صورتها لكن الرحله القادمه باذن المولي راح تكون لنور اليا لك مني جزيل الشكر وفعلا انت استاذ في تصوير المعالم السياحيه دمت لنا اخويا ويعطيك العافيه
الله يعطيك الف عافيه على هالمناظر والله انك شوقتني ازور سيريلانكا هالمرة
سنونو تسلم اخوي والحمد لله اني افدتك لولو البلد رخيص وآآآمن وطبعا مناسب للعوايل بالنسبه للطبخ اخاف ماتعرفين الا كشري بس هههههههههه اقنعي ابوك بس ترى تكلفة رحلة سيرلنكا ربع تكلفة مصر كراث الله يسلمك ويعافيك ويخلي لكم شغالتكم مدري وش تبون فيها بعد ماشفت اشكالهم هناك هههههههههه عاشق قروب ابونواف>>>عنوان ذا ماهو اسم انا وباقي الاعضاء تحت امرك واهم شي ان الرحله اعجبتك وبالنسبه لتحضير الايميل والله متعب بقوووه بس لعيونكم كل شي يهون نصوري تسلم اخوي وكلك ذوووق متعب ترى سالفة الورد جد ماهيب مزح خخخخخخخ فهد كنها كاسره خاطرك هالعجوز ترى متعوده كل الناس يسوون فيها كذا خخخخخخخخ سحليه احمدي ربك ماصورت الاشياء الباقيه والا كان ماهوب بس الشاي اللي ماتشربينه حتى القهوه تكرهينها>>>وش دخلها ليان البلد رخيص وتصلح للعوايل ونص هنداوي تسلمين وهذا اسم الكاميرا Panasonic Lumix DMC-FZ30 منصور ابشر اخوي والقادم اجمل عاش صدفه الله يسلمك ويعافيك رحال نوع الكاميرا Panasonic Lumix DMC-FZ30 مطر تصدق كرهت اسمك يمكن عشان الامطار هناك كثيره خخخخخخخخخ اخي الكريم لماذا تحتقر البياله لم يعجبك الشاي اذا اصمخها بالجدار وتعال اعطيك من اللي جبت ههههههههههه سلوى شكلي باخذ عموله منك هههههههه ابن العرب وانت بعد باخذ من عموله اجل تسافر على حسابي هههههههه تسلم اخوي كلك ذوووق ماجد انت اروع اخوي علي محمد الله يسلمك واياها كان علمتني قبل اسافر اخذ رسايلها اوديها لاهلها هههههههه نوع الكاميرا طال عمرك Panasonic Lumix DMC-FZ30 والله المفروض اخذ فلوس من بانسونك مسوي لهم دعايه مجانيه ايام زمان تسلمين واهم شي انها اعجبتك الثرمداوي اووووووه اووووووووه>>>تحمس خخخخخخخخخخ يعطيك العافيه ياخي حسيت اني محمد نور هههههههههههه تسلم اخوي وحيا الله اهل ثرمدا ملكة سبا كلك ذووق والصراحه كولمبو تعطي السايح انطباع سيء عن سيرلنكا لكن عوضيها بالمره الجايه ولاتفوتك بس حطي ببالك سالفة الجو البارد والامطار نونا ان شاء الله تزورينها ليه لا يعطيك العافيه
ابو الفوز يعطيك العافية اخوي وتسلم الايادي الي كتبت الرحلة وتعبت عليه في انتظار الرحلة الجايه على احر من الجمر
ألله يعطيكككككككككككككككككك العافيه عساك أستأنست
أخي العزيز فايز ألف شكر على هذه الصور الرائعة والجميلة .. لقد أبدعت في تصويرك أيها العزيز فحلقت و أمتعت .. و كان لزاما أن أقدم لك التحية و الشكر على ابداعك يا مبدع …. سلمت يداك … و كاميرتك …
الحمد لله على السلامة بعض الدول من اسمه تدري انه دجة بس اذا طبيته ماشاء الله كل شي يشرح الصدر والله ابدعت يافايز وكلها كوم والتعليق كوم الله يوسع صدرك ياشيخ
السلام عليكم االكريم اسمح اقولك انت مجنون فيه احد يصل لها الطبيعة ويرجع؟؟؟ سبحان العظيم جنة الدنيا شرح والتقاط موفق واحب اسالك عن طعم ورق الشاي الطازج؟؟؟ ولدي ملاحظة اتمنى ان تقبلها بقلب رحب وجميل من المسلم ان يخرج من بلده معتز بعقيدته فلا ارى تصوير النساء ونشرها بارك الله فيك
مجنوووووووووون انت يافايز صحيح انك مغامر وشلون تدخل هالاماكن المضلمه وهالاسواق ماشاء الله عليك والله انك محلل السفر اول مره اشوف سعودي يسافر كذا حنا اذا سافرنا دورنا بالمحلات السياحيه وبس==>بيعلمك انه يسافر وزيارة مصنع الشاي ونااسه وسالفة القطارات هههههههههههه الله يقطع ابليسك اجل السواق يشتري دخان والحديقه وسالفتكم شي اجل لو تشوف ضب قلت ورده هههههههههههههههههههههههههههههههههههه محنووووووووووووووووووووون انت
ما شاء الله على ها المناظر الرائعة ولكن حاب اني اسالك: اولا كم سعر ها الكاميرا اللي هي الباناسونيك, ثانياهل هي فيديو وكاميرا تصوير فى وقت واحد وهل تنصحني بشرائها وشكرا جزيلا لك ….
يعطيك الف عافيه…….. اما صور اكواب الشاهي تفقع ضحك بس عاد اللي مافهمته هواية المشي بالدواعيس هذي عجزت افهمها :$ بديرتنا ومانسويها وشلون عاد بسيريلانكا وبصراحه ثلجت برد من الصور بس ماتوقعتها كذا حلوه يعطيك الف عافيه
قمر جده الله يسلمك يارب طربان الله يعافيك والسفر اصلاااا وناسه دكتور علي الله يسلمك ويعافيك تمارا صح انا كنت اتوقع سيرلنكا كذا عبدالرحمن الباحوث لاتخليني اتحسف اني رجعت هههههههههه جزاك الله خير اخوي عبدالرحمن ناصر ياخي ترى الوناسه كلها بهالاماكن والمغامره حلوه ذالك الرجل الكاميرا سعرها بحدود 2500 ريال والان نزل موديل احدث منها واكيد فيها فيديو والصراحه انصحك بالموديل الجديد منها الصافي هلا وغلا فيك الظاهر الرحله الجايه باخذك معي وامشيك بهالاماكن عشان تحس بالمغامرات هههههههه
تسلم اخ فايز على الجهد الجبار والمميز وعندي كم سؤال الله يعافيك هل تنصح بها في عيد الاضحى؟؟ وهل تصلح للعائلة .. وهل تنصح بالعاصمة كولمبوا او هناك مدن او جزر اخرى تنصح بها … وبصراحة كيف الخدمات فيها؟
هذا الي بيعيش صح يتهنا بدنيته ويسافر ولا يحاتي شي عليك بالف الف عافيه ورحلاتك احنا المستفيدين …عطيتنا معلومات مفصله عن هالبلدان وخباياها الله يحفظك ويحرسك
اولا سلامه رويساتكم من الغرز 🙂 وبعدين غيروا الطاوله , الا لازم تقعدون فهالمكان << ناقدة عليكم بس بصراحه جو خياااااااااال , مانبي الامطرهم وجوهم والباقي لهم مساكين ياشين الفقر بس حلوة بذبح ثلات وردات بالباقي 🙂 رحمت بناتهم , احس انهم يتعبوووون 🙁 واليوم اللي حستهم فيه وعلى بالك تذوق الشاهي اكيد مانمت من كثر التردد 🙂 ميرسي فايز
يالله بالجنه .. والله اني أحسدك على الروحه لذا الأماكن ( ماشاء الله عليك )
آآآآه يافايز اشتقنا لرحلاتك والله لا أخفيك أن مواضيعك ورحلاتك هي ما ابحث عنه بالقروب لانها باختصار تذكره مجانيه للسياحه على النت انت رااااااااائع راااااااااائع في سرد التفاصيل والتصوير والقفشات العجيبه والخفيفه وترى معجبينك كثير وانا اولهم ننتظر الباقي تحياتي لك سلطان الجوفي..
بقدر الشعور بأن لا شيء فوق ما كُتِب ولا أجمل من مرورٍ هنا .. ولا أروع مما قرأت بقدر شيءٍ مفرحٍ أحسسته في كل الرحلات الماضية .. قديمها .. و جديدها و أنا أقرأ .. أتأمل .. وكأني أنا التي قمت بالرحلة سردٌ ممتعٌ حقاً يعطي كل شيءٍ حقه معلومةً .. و .. ابتسامة و خبرة لمن أراد السفر fayez رحالة .. يسطر .. بقلمٍ ممتعٍ جداً ،، أتمنى لو أكون يوماً .. في إحدى تلك الأماكن و ربما وقتها .. سأشعر أني أزورها للمرة الثانية ،، حيث كانت الأولى .. أنت ،، .. سفراً موفقاً .. و تخليداً .. شامخاً ،، دمتَ بخير ،،
خخخخخخخخخخخخخخخخخخخخخخخخخخخخخخخخخخخخخخخخخخخ مصصصصاااااااااااااااااااااص دماااااااء ااه يا تسبيييييييييييييدتي تسلم على الرحله الي اكثر من تهول العقل 😛
بصراحه يافايز انك شوقتني انا بالصيفية طلعت صلالة وبغيت اشقق جوازي وارميه بالبحر اجل لو انا رحت سيرلانكا وش بأسوي؟ بصراحه شوقتني اني اسافر لها وفي وجهة نظري انها احلى من اندونيسيا والا انا غلطان؟ تحياتي لك و اتمنى لك التوفيق وان حصل ان حصل لاحظ ابي اعرف كيف رحتوا عن طريق مكاتب سياحية والا معرفه لان معروف المكاتب اسعارها غالية جدا؟ ويعطيك العافية
اسامه تقدر تدخل على موقع وذر وتشوف الجو في ديسمبر وبالنسبه للعايله طبعا تصلح ولا انصحك بكولمبو ابدا ماتستاهل والخدمات في سيرلنكا عموما معدومه فاطمه تسلمين كلك ذووق مها الله يسلمك اي والله بالنسبه لبناتهم عرفت ان اللي عندنا ملكات جمال خخخخخخخخخخخ ام ريما امين يارب وشكرا لك الجوفي كلك ذوووق اخوي وان شاء الله الرحلات القادمه اجمل هتلره وش دعوه ماني خابر هتلر عنده بنات تسلمين ويعطيك العافيه افحمتيني خطرف له الموضوع ياخوي على هالاسم احسب عنوان نحو هههههههه الله يسلمك ويعافيك دحومي اخوي كل دوله لها طابعها وجوها مافيه مقارنه بين سيرلنكا واندونيسيا لان اندونيسيا بلد متحضر ومتطور وكل شي موجود فيه بس سيرلنكا مافيه الا الطبيبعه وبعض المناطق بس سيرلنكا ارخص بكثير طبعا لو تابعت الجزء الاول كان عرفت كيف خططنا للرحله لك انا مانصحك تاروح مكتب سياحي هنا انت بس اشتر تذكرتك وروح ومن مطارهم تحجز الفنادق والسياره وكل شي
رحلتك روووعه وشكل الجو يجنن وشهيتني اشرب شاهي لوووووووول داااايم متألق
سائح مع مرتبة الشرف.. سلمت يداك اخي الكريم ابدااااع بكل ماتحتويه الكلمه من معنى وفقك الله وبارك فيك
woooooow It’s realy nice I love this Thank you very much Fayez
يعطيك العافية .. و الحمدلله على السلامة و صور رائعة جدا .. حقيقي مين يتوقع إن سيريلانكا جميلة كذا و الطبيعة رائعة فيها.. سبحان الله يعطيك ألف عافية .. و صباحك شاهي أصلي.
جزاك الله خيرا أخي fayez على هذا الجهد الجبار نسأل الله ان يكتب لك الاجر أخي سؤال بسيط ماهي المكاتب السياحية التي تنصح التعامل معها لعمل برنامج سياحي وحجوزات الفنادق خاصة للذاهب أول مرة لانني اعتقد عند الذهاب للفنادق مباشرة تكون التكلفة أكثر وياليت ارقام هواتفهم ومواقعهم ،،، حفظك الله
مشكور والله على هالابداع وعلى خفة الدم تقرير أكثر من رائع ماشاء عليك لاحظت انك تتنقل كثير و كثرة التنقل بالنسبة لي شي متعب والله كنت حاقره هالديرة بس بعد اللي قريته وشفته شكلي بغير رأيي عندي عدة استفسارات طال عمرك هل تنصح فيها كـ شهر عسل ؟
مرررهـ نايس الرحله .. أحس كل مكان يبيّن أحلى من اللي قبله ! رايحه رايحه بـ إذن الله .. : d متابعينك .. وبـ انتظار كولومبو .. ( F )
الزعول لو دريت جبت لك شاهي معي من اللي مسويه ابوسيقان ابونوره الله يسلمك اخوي ويعافيك sonea تسلمين ويعطيك العافيه شوكولاته بيضاء الله يعافيك وسيرلنكا فيها مناظر اروع بس هذا اللي جيته انا ساري طبعا اخوي لو تروح للفندق مباشره بيصير غالي عليك لكن مافيه مكتب معين المكاتب كثيره شوف اللي سعره مناسب ولاتاخذ من اول مكتب لف عليهم كلهم نجديه ما اعتقد انها تصلح كشهر عسل لان فيها تعب والعرسان يبون الراحه والتسدح خخخخخخ snow cold الله يوفقك وان شاء الله تنبسطين هناك
يعطيك العافية يا أمير ،، الصراحة مواضيعك متعوووب عليها ,, لكن على القوة وحن نستاهل 🙂
تقرير رائع جدا
صراحه جو ابداع وكل شي فيه حلو انا جيتها شهر 5 الي راح صراحه دولة جميلة جدا وشعب محترم ودولة امان بكل صراحه وانا اشجع الي يروح لها ودلة مو غاليه بالعكس رخيصه وتذكرة طيران رخيصة وافضل شي الي يجيها يروح لنوراليا وكاندي مدن مميزة ومناظر خلابــة واسفف عع التعليق المتاخر ه1 ه2