تطورت منفوحة وحنا ما تطورنا

مساكم الله بالخير أعضاء قروب أبو نواف الغالين

تحياتي لكل الشباب    الي منورينا براسايلهم الأيام الي فاتت

  وتحياتي للأعضاء الجدد الي ابدعو برسايلهم

وتحياتي وسلامي لرسام الكاركتير المميز ( سعد الهويدي ) واقوله مشاركتك كانت مميزه

وتسلم يدينك يارب

والله يبلغنا وياكم الشهر ولا يحرمنا ولا اياكم الآجر

وعساة شهر خير علينا وعليكم وعلى جميع المسلمين يارب العالمين

منيب مكثر عليكم الدندرة خلونا نبدى بالموضوع

الـتطور

اذكر انا أول ما دخل الأنترنت مريت بمراحل لتطوير نفسي

بذكر جزء منها بس واحطه مثال ….. توقيعي

هذا توقيعي الأخير

اول شي كانت صوره عاديه اخذتها من كاركتير المميز الرسام عبدالسلام الهليل

ثم طورناها بمساعده الأخوان اليييين صرت الحين افتح النفس

الحياه لازم نواكبها وش نسوي لو تلاحظون في الصوره الثانيه الأزاراير مذهبه

اضطريت انقل الزرار في عام 2004 للضرس في عام 2005 عشان اواكب التطور

لعاد تتطور الله يرحم والديك

الزبدة في الكلام

التطور التطور التطور

فية أشياء معينه نشوفها يوميا ومو راضيه تتطور ابد أبد

على بركه الله بدينا

 الطيارات العمودية

 انا هالطياره ام مروحتين قاهرتني من يومني صغير

بالله عليكم قد شفتو باص نقل جماعي يطير ::: الرياض لديها ذلك

بالله عليكم قد شفتو مريض ينقلونه للمستشفى بباص ::: الرياض لديها ذلك

بالله عليكم قد شفتو سياره شرطه باص تلاحق إرهابي ::: الرياض لديها ذلك

من عرفت الدينا ومافيه الا هالهيليكوبر في الرياض

((على فكرة الحين هي اسمها .. هيلي كوبتر.. ولا .. هيلو كوبتر ))

والله ياجماعة الخير ان ماقد شفت غيرها

هي الي اذا صار فيه ارهابي يلاحقونه يشغلونا

اذا صار فيه اخلاء طبي يشغلونها

حتى حرايق يربطون فيها توانك مويه ويشغلونها

الزبدة ان هالطيارة هي الي تسوي كل شي

 الطيارة وقت الغروب

انا ادري هالي مشرف على هالطياره كان راعي بعارين اول ولا وش قصتة

كل يوم يسرحها مع الفجر ونشوفها المغرب راجعه

وش القصه مدري كل يوم على هالحال

وعلى فكره تراني دخلت على موقع الدفاع المدني أشوف مزايا الطياره عشان اكون مطلع

لقيتهم يقولون الطياره تتمتع بمزايا عديده منها ان لها مراتب اكثر ولها تانكيين بنزين

طيب مايخالف ليش ما تشترون طياره  ثانية صغيره تلاحقون فيها الحراميه بدل هالباص

قسم بالله اني على اعصابي كل صبح اخاف تهبد على سطحنا

وش ذنبي ياخي ان بيتنا في الروضة … قبلها تطير فوق بيتنا ..

عيال خالي شكو فينا يحسبون لنا علاقة بالقاعدة

مرة من المرات جاني ضيف من الخليج

قال ماشالله عليكم تطورتو خط البلده عندكم في السماء

نعن ابوكم فشلتونا

على الأقل صبغوها  حسسونا انها تغيرت

خلاص يسد لا تعليق

كل ذا ولا تعليق

صوره مع التحيه لأداره المشتريات في الدفاع المدني

نعن ابوكم اشترو … انتم اكتبو التعميد ويوقعونه الرجال مالكم شغل

ولا لازم يعني يفتح مصنع هيليكوبترات في صناعيه الخرج عشان تاخذون نصيبكم

اشارات المرور

اول مره في حياتي اقول الله لا يجزاك بالخير يا اديسون قريح يومنك تخترع اللمبات

ما دريت ان فيه ناس عنز بدو طاحت في مريس

الأشارات في الرياض اكثر من شعر راسي

كل قرنه فيها إشارة ما امشي خمسميه متر الا واشاره

تدرون بقولكم شي

 تدرون ورا ذا اليابنين فرحانين

وش تتوقعون

ظنكم فرحانين عشانهم بيكشتون في التنهات الويكند …. هاه

اليابان قبل أشهر سوت فيه إحتفال بشيله آخر إشاره في اليابان

خلاص قضو على الإشارات كل الي عندهم كباري ودوارات

الواحد يطلع من بيته لشغله ما يوقف في طريقه ولا دقيقه

وشو له نقول اليابان محناب مبالغين …. البحرين مثال حي

على صغرها وعلى الزحمه الي فيها الا ان الواحد ما يطول واقف عند اشاره

وبعدين حتى لو طول الواحد عند الأشاره عادي تلتفت يمين تلقى الطخوم يسوقون

اما في شارع نكاس قدامك ددسن عمال في الصندوق ويمنينك واحد ينغف

ويسارك واحد يحتري بس الأشاره تخضر عشان يضرب بوري

ارجع واقول ياناس شوفو لنا حل مع هالأشارات

ولا ترى بشنق نفسي في إشاره تقاطع خالد بن الوليد مع عقبه بن نافع نهايه 2005م

صوره مع التحية لأداره المرور

صوره مع التحيه للمهندس الحمار مع اعتذاري للحمار طبعا

ياخي ما عندك فكرة غير الأشارات لتنظيم السير

المظاهرات

انا ما ادري لية الفرحة عندنا تكسير سيارات

اجل لو بنسوي مظاهرة وش بيصير بالله

 اذا فاز الهلال ما ودك تطلع للشوارع يجيك بزرين يسدون الشارع ويقعد يرقص

المشكله دب وشين وثوبه وصخ لعن ابو حيك متميلح عمرك يومنك تهز مقفاك

ولا عاد اذا فاز النصر تعال شف

عاد النصر الله حق اذا فاز عاقلين ما يسوون شي …. تدرون ليه؟

ما تعودو مساكين على الفوز ما يستوعبون الا متأخر

 بعد ثلاث ايام تلقى بعضهم معلق أعلام في الثمامه

سوالف بيلعن جدفه على هالفقرة .. ما علينا منهم

اليوم الوطني … شفتو كيف فرحو الناس باليوم الوطني

الثمامة مليانه والناس رافعه اعلام السعودية

وحقين النظيم جايين يفحطون يحسبون المنتخب فايز

هذي مشكله بعض الناس ما ودك يفرح

 صورة مع التحية لشعبة مكافحة الشغب في وزاره الدفاع

قسم بالله اني ارحمكم ما يطلبونكم الا في فرحه عيد ولا فرحه فوز ولا أي فرحة

المفروض يسمونكم شعبة مكافحة الفرحة تراني اقولها صادق

عساكم على القوة وتكفون كثرو العجاري ويا حبذا مستقبلا تتوجهون للخيازرين

لأنها سلاح فتاك ضد المبزرة خصوصا اذ جت اللشطة مع أسفل الظهر

ختاما

تذكورون المثل الي يقول تطورت منفوحة

ترى ابشركم تطورت منفوحة وحنا ما تطورنا

وترى هذا غيضن من فيض والله لو اقول من هنا لبكرة ما قضيت

وسامحوني على القصور

.
.
.

تحياتي لكم

ابو محمد

 لايفوتكم اقطو والفار عقب العصر في ام بي سي 3

قسم بالله فلللللللللللللللله

تذكرنا ايام التبطح قدام التلفزيونات