.:مأساة حاشي 6 صور خاصه :.


بسم رب المزون

يامراحب

كيف حال قروب أبو نواف الي دمهم ينأط عسل
تفضلو شاهي علبال ما تتحمل الصور وتقرو مأساتي قبل مأسات الحاشي

::مأساتي قبل مأسات البعير ::




قبل فتره كان زواج ولد عمي وحيد أبوه يعني ما عنده أخوان يفزعو له
يعني الطقه فروسنا حنا أولاد عمه .. وبالاصح فراسي أنا
لانو دايم سوى
التعب علينا والوناسه له

المهم .. قال أبوي لعمي الحواشي علي أن شاء الله أجيبها
بأروح أنا ونور لا تشيل هم — أبد في هذي الحضه ما كرهت ولد عمي

فجر يوم الزواج
راجع من صلاة الفجر منننننتهي مواصل لي يوم ونص ما نمت
قالي أبوي يالله مشينا نجيب الحواشي علشان ولد عمك
قلت يبه قسم بالله ما أشوف الدرب أبغى أنام
قال والله شكل الجوال بيجيك ماشي مليون ويطبع أسم المتصل في جبهتك
قلت يبه وش فيك صدقت ترى امزح — أبد ما خق
أنواع المطبات لين وصلنا لواحد يعرفه أبوي عنده حواشي
صغيييره حبوووبه خدودها ورديه لحمها زي الزبده –يمدكم على الوصف

المهم ودينها الحواشي الطباخ علشان يزهبها في الليل ..
رجعت اللفراش حول الساعه تسعه الصبح أبد مو مفنجله عيوني
وطنننن طننننن — صوت الفكره يوم جت فراسي
قلت ليه ما أنزل صور الحاشي في النت
اذكر اني كنت أبتسم بخبث ..ونمت والابتسامه كانت مهنقه في وجهي

الساعه عشره صباح
توي مالي ساعه نايم
وتخش علي بنت أخوي منول حبيبت البي
عاد هي واسطه تخش غرفتي متى ما تبي
قربت مني وتقول عمو عمو قوم بابا يبغاك يالله قووووم علشان طمار
يالله قووم علشان طمار
التفت عليها ووجهي ابد مو مخلبطه معالمه من التعب
وأحس أن ودها تقول عمو هذا وجه ولا قرطاس معفط
قلت وش طمار حبيبتي
قالت مدري بابا يقول علشان الطمار — يا حبي لها ذي البنت
ودق أخوي على الجوال يقول يالله الساعه 11 بيجون ناس من الجماعه
أستقبلهم في المطار ..
تهي تهي تهي طيب ليه ليه هو زواجي ولا زواج ولد عمي
قال أخوي أقول أنثبر اذا ما دلعناه اليوم متى ندلعه
قلت والله أبي أدلعه بس خلوني أناااااام
يرحم أبوكم
بس 4 ساعات كفايه والله كفايه

وقت الظهر
جبت الضيوف ودخلتهم المجلس أخواني الكبار عندهم
رحت للغرفه أبي أحضن المخده قسم بالله توي أدري أنها غاليه وعزيزيه
أول ما رميت نفسي على السرير إلا أسمع صوت أبوي نووور وصمخ
أبد ما حسيت في ذاك الوقت أني مطهد — المشكله يقولو أخر العنقود مدلع أيه هين
يالله صب القهوه وأتصل على الطباخ يجيب الغدى …
تهي تهي طيب أبشر
والله وأنا أصب القهوه من زود التضييع بغيت أصب على رجل واحد من الضيوف
علشان والله ياااااأهو أبوي بيدعسني بالسياره

بعد صلاة العصر
راح الضيوف لبيت عمي بعد ما تقهوو وتغدو ..
قلت هذا وقتك يا نور النوم الله لا يعوق بشر
ما أمداني أدخل الغرف إلا يدق الجوال وأشوف رقم ولد عمي العريس
قلت حلوووو خلني أطفي حرتي فيه
الووو وينك ما غير نايم وأنا الي أتعب –أنواع المذله
قالي : يا هلا نور وووو –من الكلام المعسل حقه وترو أبد ما خقيت
قلت : ولو حبيب البي عبدالعزيز هذا حق وواجب –نسى كل شي مخفات
قالي : ترى وديت سيارتي للمغسله وأبيك الله لا يهينك تمرني علشان أروح للحلاق أتضبط
قلت : وششششش أقول أنثبر ترى عطيتك وجه ومن زين الخشه سمكري ما يعدلها
قالي : سيارة أبوي موجوده بس أحب أخاويك بصراحه
وقتها أغرورقت عيني وبغيت أصيح ما تحملت الموقف العاطفي هذا –نصاب
قلت ياخي تعرفني مخفات خلاص بأجيك
قالي توك تدري

وقت العشى
قبل ما يخشو المعازيم نجهز الصاله ونشيك عليها
وأنو كل شي زاهب من صحون وفواكه ومويه وببسي والحلى وغيره ..

قلت لابوي ترى بأصور الحاشي
قالي صوره
قلت بأصوره قبل ما ياكلونه واثناء ما يكلونه وبعد ما يكلونه
ناضر فيني بنظره ورفع حاجبه –عاد اذا رفع حاجبه تشهد
قال بتصور الناس وهم ياكلون
قلت هه هه هه أيه عادي — أبد ما كان خايف
التفت علي وأبببببد ما شالني من خشمي
وقال تذكر القطو الي دعسته أمس –يلمح أنه يبي يدعسني
تبي تفضحنا لو شافك واحد من الي على الحاشي وانت تصوره
وهو ما يبي يتصور وقام من على العشى متضايق .. وش بيكون وجهي أنا وعمك
أأأأأبد ما بلعت ريقي خمس طعش الف مره
قلت هه هه أحم ترى امزح يبه ووووششش فيك صدقت ترى بأصور الحاشي الحين
وبأصوره بعد ما يروحو الناس

الزبده أني كملت يومين ونص ما نمت وولد عمي مستانس 

…::: صور مأساة الحاشي قبل وبعد :::….

مأساة

مأساة

مأساة

مأساة

مأساة

مأساة

مأساة

على الهامش
————–
ترو السالفه الي سارت فيني صدقيه
ما عدى حوارات أبوي ملفقه ..تروه مررره هادي
بس وش نسوي المخرج عاوز كده
 
تحياتي الحاره
نور البدر


اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

.:مأساة حاشي 6 صور خاصه :.

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول