يوميات قصمنجي

المهم اول ماوصلنا للقصيم..كان في استقبالنا العم ابومحمد وولده الكبير خالد===( ليش مسمينه ابومحمد مدري)…المهم ان كنت صغير في الابتدائيه ذاك الوقت…ونزلت من السياره وانا لابس نظارة شمسيه ام ريال…على بالي جاي من الرياض متطور …نزلت من السياره وابوي يقوللي سلم على عمك ابومحمد وحب راسه…ويجي عمي يدنق علشان احب راسه…واقوم وابوس خده..واحتريه يبوس خدي (( تخبرون جاي من الرياض وياااي))….فماكان من الوالد الا ان تفضل مشكورا بمنحي رفسه محترمه من نوع F15…ومسكني مع رقبتي وخلاني احب راسه..

المهم عقب هالموقف صرت كل من اشوفه احب راسه. كائن من كان..ماابدأ كلامي معه الا وانا حاب راسه.حتى راعي البقاله الهندي لازم احب راسه…وحتى البزارين..يشوفوني يقولون وش ذا انهبل..بس مافيه..لازم احب راسه يعني لازم..=== يحسب حبة الراس عرف عند القصمان

المهم..كنا نجلس مع العم ابومحمد..وكان وسيع صدر..راعي نكت ووجه سمح…دايم يجلس معي ويبدا يسولف علي…كان ماشالله عليه حكيم..واحيانا عمرو دياب..بس الغالب كان حكيم

كان الله يطول بعمره يحب يتابع المسلسلات…وخصوصا خصوصا..المصريه والسوريه والكويتيه لا ياشيخ
 
بس من قرادة حظه..دايم تفوته الحلقه الاخيره

والمسكين تعقد من هالشئ…مره من المرات جلس معي يتكلم في هالموضوع وقعد يقوللي يا صويلح انا لي 15 سنه اتابع الاخبار…الا ان عندي احساس ان الحلقه الاخيره بتفوتني

جلست معه نتكلم في امور الحياة…وهو ماشالله عنده حكم واجد…..وسواليف ماامل منها..مره من المرات جلست انا وياه..وقاللي

 ياولدي يا صويلح

سم.. واقوم احب راسه..لازم..صار عرف خلاص
 
ياولدي انت توك صغير== وفيه احد قاللك اني باتزوج الحين
 
والحياة قدامك طويله…ولازم لك اللي يوجهك..والمثل يقول اذا كان صاحبك عسل..فالسكوت من ذهب
 
ياسلام عليك ياعمي كلامك درر..

وياولدي يا صويلح…الدنيا غداره ومالها امان وانت ياولدي ماتدري عنها..والمثل يقول.. ان كنت لاتدري فتلك مصيبة وان كنت تدري فبشر امك
 
 والله ياعمي انك حكيم

وياولدي..كل شئ لازم تعمله حساب..والمثل يقول ماكل مايتمنى المرء ذهبا

قسما بالله انك حكيم ياعمي
 
 وياولدي الدنيا اخذوعطاء والمثل يقول

خلاص عاد تراك مصختها..قلنا انك حكيم..بس لاتقعد تغثنا ==انا

!!!!عمي
 
احم…..اا..احم ههاااه…احم…ياحليله عمي…دايم يحب يلعب معي
ملاكمه..هه..اااو
>>>—–(¯`·.M A J N o O o N.·`¯)—->
 
المهم…بعدين تعرفت على عيال عماني في الحوطه..واللي عرفوني على عيال الحاره…وقالولهم هذا صويلح جاينا من الرياض..وانا ماغير أفز واحب روسهم واحد واحد..المهم كونا فريق كرة قدم..وصرنا نباري الحارات الثانيه…صحيح ننخق في كل مره بس اهم شئ سعة الصدر..

بس انا بماإني في الرياض..واسمع عن التكتيك..عرضت عليهم فكرة اننا نسوي خطه خاصه..ونثبت عليها طول مبارياتنا…قالوا لي حلو..واحنا موافقين..بس وش معنى خطه ؟؟
المهم جلست افهمهم وش معنى خطه..وكانت الساعه حوالي 4العصروماجت الساعه 7 المغرب الا وهم فاهمين

المهم..قلنا خلنا ندور مكان نتفق فيه على خطه…فرحنا لغرفة ورى المسجد حقت افطار الصائمين..وجلسنا نتفق فيها على خطه…لكن خفنا ان الفريق الثاني يرسلون جاسوس علشان يسمع خطتنا..فسكرنا الباب..وجلسنا علشان نتفق لكن خفنا انهم يتسمعون من ورى الباب..فرحنا وقفلنا الباب بالمفتاح علشان محد يسمع تصرف نبيه
واتفقنا على خطه…صحيح ماسوينا منها شئ في المباراه..كل يركض ورا الكوره وبس ..لكن اسم انها خطه
المهم ترقعنا ب6 صفر في الشوط الاول….والفرقه كلهم عصبوا علي وعلى خطتي اللي ماجابت نتيجه اللي يشوفهم يقول منهبلين على تطبيقها
المهم في نص اللعب..انفقعت الكوره….وفلوسنا ماتكفي نجيب كوره جديده..وش نسوي وش نسوي وبماان القصمنجي انسان عملي..ومايقف عند المعضلات البسيطه زي هذي..فكرنا اننا نجمع شراريبنا كلنا ونسوي منها كوره..وتصير كوره بالشراريب..وفعلا..نفذنا الفكره..وجمعنا الشراريب وسوينا منها كوره…واحنا في نص اللعب تسطحت كورة الشراريب عند الجيران اللي ورا….وبعدها طلع ابوهم وهو ماسك الكوره..ويقول والله ثم
والله لو سطحتوها مره ثانيه اني لافقعها
والصراحه احنا خفنا على الكوره لايفقعها..فاعتذرنا له..واستسمحنا منه.. وجيت عاد انا مااااغط وماشي مليون والقط راسه واحبه..المهم رجع لنا الكوره وكملنا اللعب وبدينا نلعب وجاء فاول لنا…جاء السلمي وقاللي..انت مررلي الكوره برجلك اليسار وانا بشوتها على طول…عاد انا الصراحه مااعرف رجلي اليسار من اليمين..بس يديني اللي اعرفها..لكن رجليني لا…وحتى يدي اليمين اذا بغيت اعرفها لازم اخلي واحد يجي يسلم علي علشان امدله يدي اليمين واعرفها المهم مررت الفاول وضيعه الشين السلمي
لكن وحنا في نص اللعب لمحت بنت تطل من شباك بيتهم..وتراقبنا وحنا نلعب…عاد خويكم(( اللي هو انا)) === واحد قال انه ولد الشغاله
قمت اتميلح قدامها..وحبيت اوريها يعني اني انا الزعيم للفريق..وانا اللي كلمتي ماشيه..فقمت ونفخت صدري===( بلونه مهب صدر)..ومشيت وانا راز عمري..وقمت اسوي نفسي الكابتن واهاوش اللاعبين…

ياالسلمي ياخوي العب زي الناس…حاول انك تغطي خانتك ياخوي واناظر البنت بطرف عيني..يعني شوفيني ويرد علي السلمي اقول يا صويلح انثبر وعلى تراب لاقوم واتوطا في بطنك..ترا ماودانا في داهيه الا انت وخططك اللي زي خشتك…الشرهه مهب عليك..الشرهه على اللي يلعب مع مبزره مثلك

!!!!==== انا
–
هه اا..احم…..وش فيك يا السلمي معصب..ههه الله يقطع سوالفك..ياخوي انت هاليومين مانت رايق..

واللي يشوف وجهك من وين تجيه الرواقه شديد الولد

يا السلمي الله يرحملي والديك..بس….تراني والله طاح وجهي..ياخوي العب على كيفك..== قلتها بيني وبينه

المهم صرت في كل لعبه ارتز..واسوي اني انا الفنان قدام البنت…..وكان فيه بزارين يشجعونا ويتفرجون علينا..هذولي كانوا اخوان عيال الحاره…كل واحد جايب اخوه يشجعه..الا اخوي انا الله يفشله جالس في البيت مع امي…

المهم قام واحد من ذا البزران وراح يم الشعيب اللي ورا الملعب…والبنت قامت وتحركت من مكانها وقمت تناديه من الشباك

 كااااالييييييييد مافي روووح بئيييييد

!!

!!!

وااااااااااااه اااااااه…طلعت شغاله تنادي البزر خالد وتقوله لاتروح بعيد
رحت لسلمي ونصيته…وقلتله

 
السلميانا

 تبن…وش تبي؟؟هو

 ارجوك..شوتني ..رفسني..سو اللي تبي انا

 غريبه!!!..العاده اشوتك من دون ماتطلب هو

(( الله ياخذك..حتى وانا منذل عندك تفشلني))

بس انا استاهل..انا غبي ..انا صويلح..تكفى شوتني انا

قام السلمي وقاللي انت مهما كان عزيز وغالي..وتراك غالي عندي..وانا ماارضا عليك هو

>>>—–(¯`·.M A J N o O o N.·`¯)—->

ياسلام..ياسلام…شايفين…شفتوا وشلون القصمان روحهم رياضيه=هذي روح ولا قناة اي ار تي
المهم اني قضيت ايام سعيييييييده هناك وتمنيت اني طولت…لكن لكل شئ لابد له من نهايه…المهم جاء يوم الوداع وجاء العم ابومحمد وولده الكبير خالد==== من ذاك اليوم وانامنقهر ابي اعرف ليش يسمونه ابومحمد

المهم ودعته وتعنقطت في راسه وحبيته…هذا طبعا بعد ماخذيت جوله في مناطق القصيم وحبيت روس اللي فيها كلهم ومن عقبها جلست 8 سنين ما طبيتها لا تسألوني ليش اسئلوا هالي متسدح بالصاله وراه ما يودينا
وش فيك عصبت