علمتني وشلون أحب.. علمني كيف أنسى!!

السلام عليكم ورحمة الله وبركاته..
صباحكم صيام ودعاء وقرآن..
ومساءكم شوربة وسمبوسه ولقيمات..
شخباركم إن شاء الله بخير وعافيه؟؟
الشهر عليكم مبارك,
وتقبل الله صلاتكم وصيامكم وقيامكم ودعاءكم,
اللهم آمين,
,
هالموضوع إن شاء الله بيكون غير~
يعني بنكهة رمضانية, دينية, شاعريه, طبيعية, فكاهية..
والله يعينكم ياللي تقرون الموضوع فالنهار.. أنواع السعابيل هع..!!
الله يتقبل صيامكم بس ههههه..
,
على طاري الفكاهية..
هذي فاكهة ماليزية إسمها (دراقون فروت) اللي معناها فاكهة التنين..
بس من لونها ما بيّن عليها ههههه
سبحان من خلقها, طعمها زي الكيوي حقنا (يالسعوديين والخليجيين ) هذاك الأخضر,, بس لونها هنا فوشي, الظاهر من كثر المويه والأمطار والجوّ الحلو طلع لونها الأصلي..
وتاكلها زي الآيس كريم.. يعني تقسمها نصفين, وبالملعقه تغرف وتاكل منها.. بدون تقطيع ولا شي,,

نروح لفقرات الموضوع..
بسم الله نبدأ..

][م ـدخل][
.
علمتني وشلون أحب..
علمني كيف أنسى!!
يابحر ضايع فيه..
الشط والمرسى!!
علمتني وشلون أحن..
علمني كيف أقسى!!
سيّر علي..
بس أمسح دموعي.. وروح!!
سير علي..
جب لي معك قلبٍ وروح!!

][مطبخ رمضان][
.
شهر رمضان يتميز عن غيره أنه فيه (طقوس) وجبات معينه ما تحلى إلا في رمضان..
مثلاً: السنبوسه – اللقيمات – الشوربة – الفنتو … ألخ
وللعزّاب والمتغرّبين بالذات (طقوس خاصة)..
ممكن الكثيرين يستفيدون منها..
أول شي:
السنبوسه
شريناها من كارفور جاهزه, ومايبغى لها الا زيت قلي وشوي تحريك..
بوريكم الخطوات عشان اللي وده يسوي شي منها تكون سهله ان شاء الله عليه..
<والله من الحواق ههههه
وشسمه.. تشبّون على الزيت.. لما يغلي..

تجهزون السنبوسه.. وتخلونها قريبه,

تمسكونها حبه ورا حبه.. وترمونها فالزيت حبه ورا حبه بشويش, عشان ما يطشرّ في خششكم الزيت الحار.. <تراها أبد ماصارت لي ههههه
صورة لياسر وهو يتفنن بالرمي هع هع

في البداية يجب تجهيز أدوات المطبخ, وبحكم أن مطبخنا ناقص إستعنّا بالشاخوله حقت القهوة لتحريك السنبوسه (شخبارك ياسر؟) ههههه

يرجى الانتباه من بعض ادوات الطبخ البلاستيكيه, انها ماتنفع للزيت المغلي, فقط للبيض والاشياء الخفيفه يعني.. عشان ماتميع عليكم!!

مرحلة تحريك السنبوسه وتقليبها وكأنها بلسان حالها تقول (واتقلب على زيت الشباب.. واتقلب واتقلب واتقلبببب طمبق طمبق )

بعد ما أحترقت نص السمبوسه هذا اللي نجى منها.. وبحكم أننا شريناها ماندري وش داخلها.. قلنا نجرب..!!
وأبشركم طلعت سنبوسة بطاطس بالدجاج مع الخضار.. ويازين سنبوستنا السعوديه ياناس!!

بعد مانخلص السنبوسه.. نضبط الجلسه حقتنا.. نشبك السلك الملوّن فاللاب توب عشان يطلع الصوت فالتلفزيون والصوره فاللاب توب هههههه..
لأن التلفزيون صار مايدعم خاصية تشغيل اللاب توب عليه.. بس يدعم الصوت, لذلك عشنا جو السينما على شاشة لاب توب صغيره!! وكل واحد يحمّس الثاني: رح اشتر فشار, ووخر راسك شوي (مع اننا جنب بعض فالكنبه) ههههه.
وبالهناء والعافيه.. مطبخ الشيف بدر العالم <على وزن الشيفه منال العالم هع!!

الوجبة الثانية:
مقلقل دجاج
المقادير:
طماط – بندوره يعني – حسب الرغبة
بصل – حسب الرغبة
فلفل أخضر – حسب الرغبة
ملح – حسب الرغبة
دجاج – حسب الرغبة
مويه – حسب الرغبة

الطريقة:
عزيزي الشيف.. وعزيزتي الشيفه <
أغسلوا يديكم بالماءِ والصابون قبل البداية..
وأغسلوا مواعينكم بـ فيري..
قطعوا الفلفل الأخضر قطعاً صغيرة..

وقطعوا الطماطم قطعاً صغيرة..

وقطعوا البصل.. قطعاً صغيرة..

ثم ضعوه في إناء الطبخ.. وولّعوا النار.. وحركوه قليلاً قليلاً حتى تطلع رائحة الكشنه.. ويازينها من رائحة!!
ثم ضعوا الطماطم وحركوه قليلاً قليلاً..
وضعوا بعده الفلفل الأخضر وحركوها مع بعضها البعض كثيراً كثيراً..
بعد أن تطلع رائحة هذا الخليط الرائع.. هاتو الدجاج المقطع أوصالاً صغيرة.. (دجاج فيليه) وأنكبوه بداخل هذا الاناء..

وقلبّوا الكشنه عليه.. وصبوّا شوي مويه معها.. ولاتنسون الملح – حسب الرغبة
حركوا الدجاج وقلبّوه.. يمنه ويسرة.. فوقاً وتحتاً.. حتى يستوي ويحمرّ وكذا..
وحتى تنشف المويه اللي فيه.. أيضاً – حسب الرغبة – في درجة نشفان المويه والدجاج..
بعد ذلك نطفّي الغاز ونشيل الدجاج من فوقه..

بعد كل هذا نضبط وضع الطاولة والشيء الذي سنتفرّج عليه هذا المساء..
وبالهناءِ والشفاءِ <داخل مستشفى الأخ؟ هع هع

][ماليزيات][

بالقرب من هذا المكان الرائع والجميل.. والذي نسيت وش اسمه.. أخترعت وجبة الساتيه

وهي عبارة عن قطع من الدجاج واللحم تشوى بطريقة معينه وبخلطة معينه من أهم ما يميزها صلصة الفول السوداني الذي يغمس به الدجاج واللحم..

تغدينا في هالمطعم ساتيه + رز ملفوف بهذاك ورق الشجر اللي ع اليسار + عصير جوز الهند رايحن في خرايط أمها, وعصير برتقان..

في هذا السوق الرائع سوق بافليون قضينا أجمل الأوقات برفقة كأس العالم للمنتخبات, فكنّا نحضر كل ويكند ونتفرّج على ما نتفرّجه, ولو كانت مباراة السنغال وجيبوتي, المهم نستمتع وبس!! ولحدّ ينط علي يقول واحد من هالفريقين مالعب في كأس العالم, مدري أصلاً من فاز بالكاس هههههه

لقطة أخرى

من تحت لفوق – الناسات اللي يتفرجون ع الشاشة الكبيرة والمباراة..

مباراة البرازيل وهولندا

كيكة مع المباراة, تفتح النفس.. وتعيّشك جوّ ثاني!!

صورة لدورات المياة في ماليزيا (أكرمكم الله).. كرّموا الانسان وماحطوّا الا صورة جزمته أو كعبها!!

بعض الفرق الموسيقية منتشرة في شوارع المدينة, الله يكفينا شرّهم!!

اللي يروح ماليزيا ولا يذوق هذي كأنه ما راح ماليزيا!!

روتي بوي, فطيرة بالسكر والعسل ومدري وش بعد, لكن حلاتها تنوكل وهي حاره.. وهي هدية للجميع!!

][رمضانيات][

وأنتم تتصفحون المواقع والمنتديات, فقط أتركوا هذه الصفحة مفتوحة وإستمتعوا بأعذب الأصوات في تلاوة القرآن الكريم:
www.tvquran.com
لمن يريد قراءة القرآن الكريم على جهاز اللاب توب:
www.quranflash.com
الإستماع للقرآن الكريم
www.4quran.com

][م ـخرج][
.
ياجرح من وين أبتدي؟؟
وأنت معي من مولدي!!
وعيّت يدي..
على وداعك تهتدي!!
بس أنت علمني الجفاء!!
دامني عجزت أعلمك..
كيف الوفا!!
علمتني كيف السهر..
ونسيتني الممسى..
علمتني وشلون أحب..!!
علمني كيف انسى..!!
.

][خ ـاتمة][
.
سبحانك اللهم وبحمدك, أشهد ألا إله إلا أنت, أستغفرك وأتوب إليك
لا إله إلا الله وحده لاشريك له, له الملك وله الحمد وهو على كل شيء قدير
اللهم صلي على سيدنا ونبينا محمد وعلى آله وصحبه أجمعين
.
طلب بسيط مني لكم.. أتمنى دعاءه في ظهر الغيب,
دعواتكم لأم سلطان بالشفاء العاجل وأن يخفف عنها ويجعل ما أصابها تكفير لها يوم القيامه
اللهم في هذه الأيام والليالي العشر المباركة أن تشفي أم سلطان شفاءاً لايغادر سقماً.. اللهم آمين
.
أتمنى من كل قلبي أن تعجبكم فقرات الموضوع, وأعتذر عن التأخير لظروف خارجة عن إرادتي..
لاتنسوني من الدعاء في ظهر الغيب,
واللهم أرزقهم أضعاف أضعاف ما يتمنوّنه ويدعونه لي..
.
شكراً لكل من مرّ من هنا.. ولكل من وضع بصمته هنا..
إهداء لكم:

منتديات فهاوة
www.fhawah.com/vb
مدونة بدر الشوق
www.b-alshoq.com

كتبه وأملاهـ:

بدر الشوق
أبو سعد

وإلى لقاء آخر بإذن الله تعالى~

تابعوا جديد شبكة أبونواف على فيس بوك وتويتر