الســلام عـلـيـكــــم ؛
كيف احلى اعضاء بالعالم ؟ وكيفكم مع كأس العالم ؟ هالبطوله رهيبه اغديهم كل سنه بس يلعبون في اوروبا اجل المره الجايه في جنوب افريقا , الظاهر نص المنتخبات تبي تتعمد تطلع من التصفيات علشان مايروحون هناك .. الا عاد البنات الي ودهم يدعون على مخترع كأس العالم ترا اسمه جولز ريميت علشان يصير دعائكم مركز اكثر على الي اخذ ازواجكم منكم لمدة شهر
ماعلينا من كأس العالم هالمره جايب لكم كم مقطع فيديو وصور ان شاء الله تعجبكم
نبدأها بالفيديو الي رايت كلك على الصوره وحفظ الهدف بأسم ويكون على جهازك
المشهد الأول .. هذا واحد كان في سباق سيارات وطاح جواله تحت ونزل يجيبه وهي النزله ماعاد قام الظاهر خخخخخ
لذلك عزيزي سائق السيارة اذا طاح جوالك لا تحاول تجيبه الا اذا وقفت السيارة لأن الي قدامك يا بيكون تريله ووقتها الله يغفر لك او بيكون نذل معه كابرس 84 وبيسجنك 11 سنه لين تدفع قيمة تصليح سيارته .. خصوصاً ان نص الشعب سوا تأمين أول مره وبعدها خلاص قال مايحتاج (( الا انا شركة التأمين للحين يسددون عني اقساط خخخخخ ما وفقهم ربي بزبون يعرف يسوق )) .. وبالتالي لا تنزل تجيب جوالك الا وانت رابط الحزام ومأمن الرخصه بس لا تصدم عائلة عاد .. شوفوا المشهد
عزيزي الموظف .. مع الفراغ وقلة الشغل وبعد ما تقرأ كل الجرايد حتى نيودلهي نيوز تقراها وتخلص ترمس الشاهي تبدأ عاد المواهب تطلع حاول تتأكد مافيه احد يراقبك او يصورك .. هذي وحده موهوبه الله يصلحها بس مو في وقتها الموهبه
جت الاجازة وبدأ شبابنا الجميل يشغل الأنشطه الموجوده عندنا .. وبما ان نص الأنشطه عندنا في البر .. هذا مشهد لغشيم في دباب
الصحافه وما ادراك ما الصحافه .. مع احترامي لاخواني الصحفيين لو ينقاله فيه بقريح تغطيه شغل سيارته وقالهم وين قريح ؟ (( قريح = جهنم بلغة القصمان )) .. في مصورين يتعرضون للموت مقابل صورة مميزه او حصريه .. هذا واحد منهم ويستاهل ماجاه
قبل فتره قريبه نشر واحد من الاخوان صور للطفل الشرق آسيوي (( مدري وين بالضبط )) الي مولود بثلاثة أيدي .. وسبحان الله كلها تتحرك مثل مايوضحها هالمشهد ..
ههههههههه كل ما اتذكر الحفريات عندنا يضيق صدري .. مثل مايقولون رحلة البحث عن الكنز مستمره .. يحفر الكهرب يدفن الكهرب يحفر التلفون يدفن التلفون يحفر الصرف الصحي يدفن الصرف الصحي .. والضحية انت يا صاحب المنزل الي شوي ويطيح بيتكم من كثر الحفريات والسبب للأسف مافيه تنسيق بين كل هالجهات (( أصلح ناقد ؟ ) .. عموماً هذا مشهد ما اعرف اوصفه لان ماقد صار مثله عندنا المهم انهم سوو شي رهيب !
بعد الفيديو ننتقل للجزء الأخف شوي وهو الصور
قنديل بحر كبير .. اذا الصغير يلسع هذا وش يسوي .. ياكلك ؟
هالصوره علشان كأس العالم .. انتبه توقف سيارتك تحت اي شي متحرك لان هالأيام كل شي مؤهل للسقوط حتى العماره ممكن تطيح على سيارتك
ههههههههههههههههههه هذا الخال مجنون او مجنون وحده منها .. يقول النينجا قتلوا عائلتي وابغى فلوس علشان اتعلم الكونغ فو .. هههههههههه هذي الطراره ولا بلاشي , ودائماً الشحاذه بالخارج جميله الشحاذ يستعرض لك مواهبه حتى تدفع له , هنا للأسف اجمل ما يقدر يسويه يفجعك عند الاشاره ويطق عليك القزازه ويصيح , شكلي بدخل مفهوم جديد للشحاذه عندنا وبعزف غيتار على طريق الملك فهد خخخخخخخ اقرب دوريه انا وغيتاري
يرحم والدينك الا هالغلطه .. شكلهم مايبغون إيران تخصب يورانيوم علشان مثل هالغلطات لا تصير , يجي هالإيراني يسمع محمد عبده حق ايران ويرجع ريوس بالسيارة ويصدم له مفاعل بعدين نرجع كلنا صحراء
وين اروح طيب ؟
عسى ما تكلفت بالزواج والورده بس ههههههه .. ان شاء الله يارب يتغير مفهوم الزواجات عندنا لمثل هالصوره يصير الواحد يلبس اي شي وأقرب ورده ويروح يتزوج .. مو الحين نص الي يتزوجون ينتقلون لطبقة الفقر بسبب مصاريف الزواج
خلاص انتهى الإيميل الدفع عند الكاشير هناك
تحياتي
Yazeed
غفر الله له ولكم
