رسالة صعيدي لسه واصل السعودية

ولد عمى العزيز.. بسطويسى..
تحية طيبة و بعد..
عاكتب لك من الأرض الطاهرة.. السعودية ..
كيفك عاد و كيف ام العيال..و كيف الأهل و الأحباب جميعا.. ان شالله يكونوا بخير..
آنى دلوك فى الرياض.. و نحمده .. الحمد لله استقريت خلاص..و آدينى باكتب لكم اطمنكم على احوالى..
وصل مطار الرياض الساعة تسعة بالليلل.. و أول مانزلت م الطيارة.. جلت الف حمد و شكر ليك يا رب انى وصلت بالسلامة..بعد ماكنت فى الطيارة متشعلج بين السما و الأرض !!
و على حس الطيارة.. آنى زعلان جدا منك.. كان لازم تتأخر فى حجز الكذكرة؟؟ آدينى ما لاجيتش مكان جنب السواج !! كت عايز اركب جدام علشان اتفرج على الطريج!! يلا .. تتعوض
و انا راجع ان شاء الله عاحجز جبلها بشهر .. المهم..
وصلت المطار و عينك ماتشوف الا النور.. جلت الطيار غلط و طلع بينا ع الهند؟؟؟؟؟؟
هنادوة ملغمين المطار!! المهم سألت اتأكد.. ده مطار الرياض يا ردالة؟؟؟ رد عليا واحد منهم..: ” ايه فيه سديك؟؟ انت ما فى مخ؟؟ ده متار رياد!!”
المهم.. وجفت فى الطابور علشان الجوازات و اللذى منه…
و اول ماوصلت لظابط الجوازات لجيته عايبحلج لى بعنيه الإتنين.. و يجول للى جنبه..” ما هادا “عز الدين “حج “يوميات ونيس”؟؟
جلتله يا سيدى من بجك لباب السما.. اكيد هاحج فى اول فرصة ان شاء الله..
رد عليه التانى.. اى والله.. هادا “عز الدين” حج ونيس!!!!.. يا هلا يا هلا..” المهم الجماعة رحبوا جدا جدا بيا و لا لمسوش الشنط و خلصت اجراءاتى سريع سريع و خرجت م المطار و اتكلت على الله…
المهم سألت بعد كده على ترجمة الكلام اللى سمعته من ظباط الجوازات.. عرفت انهم افتكرونى “عز الدين”..ابن ونيس “محمد صبحى” فى مسلسل يوميات ونيس للشبه العجيب اللى بينى و بينه..طبعا فطست على روحى م الضحك.. و قلت الحمد لله جت سليمة.. مصلحة!!!
بس لاجل الحظ!! الجماعة من فرحتهمم و انشغالهم بالترحيب بى نسيوا يختموا لى فى البزابورت إنى دخلت السعودية اساسا .. و الحمد لله ان مافيش حد وجفنى و سألنى على اوراجى وإلا كنت رحت فى ابو سيف!!! “هنا مافيش ابو حديد”
طبعا اضطريت ارجع المشوار تانى للمطار بعد يومين علشان اختم البزابورت علشان السخام الإجامة!!!
لحد اكده.. و الحمد لله كل شى تمام…
البلد جميلة.. بس حر شوية.. عايجولوا احنا فى الربيع!!!
اما الناس و الشباب اهنه فى منتهى الروشنة.. بيجروا ورا الموضة جرى!! تخيل ان لو واحد لبس حاجة تلاقىالكل لابس زيه؟؟؟ هنا واحد لبس جلابية و غترة.. لقيت لك البلد كلها لابسة جلاليب بيضا و غتر!!!!تلاقى كل الرجالة لابسن زى بعض!! و ماتسألنيش عن الستات لأنى ماشفتش ستات اهنه واصل.. اعتقد ان هنا رجاله بس.. هاتسألنى طب و بيخلفوا ازاى؟؟ افهمها يا فكيك!! بالإنقسام الميتوزى زى الخلايا!! ماخدتهاش فى الأحياء دى؟؟؟ .. انت اهنه تبجى ماشى و تشوف الواحد من دول راجل طول بعرض ماشى لوحده فى امان الله..يا دوبك تحود عينيك و ترجع له تانى تلاجيه بقى اتنين رجالة صغيرين شوية..!!
و العجيبة يا أخى برغم انه مافيش ستات.. لكن تلاجى فى الأسواج محلات مكتوب عليها “محل للتقبيل” !! تخيل محلات عامة علنية للبوس !!!! طيب مين اللى هايبوس؟؟؟ رجالة بيبوسوا بعض؟؟ أكيد المحلات دى مش شغالة و هاتقفل قريب ان شاء الله!!
بس اللى يخوف هنا فعلا ان المخبرين كتار جدا … ماشيين فى كل حتة و لابسين اسود.. بس العجيبة انهم مابيمشوش بالليل!!! ماعلينا!!
من الحاجات العجيبة برضك اهنه.. فى السوبر ماركو.. تخيل.. سمك زينة مجفف!!! يعنى انت بس تجيب الحوض و تملاه مية و تحط فيه تجاوى السمك.. يجوم السمك يحيا و يتلعبط تانى!!! خطيرة والله دى!!!
تخيل كمان ان السعوديين عندهم عضو فى جسمهم ماخابرش مكانه بالتحديد.. كل اللى اعرفه انه مش موجود عند حد تانى غيرهم تقريبا.. اسمه “التسبد”.. بيجولوا جريب من الطحال..عافكر ازرع واحد.. ابربما هو اللى مخليهم مستحملين الحر ده!!!
المهم.. مش هاطول عليك.. سلم لى على الكل كليلة.. و يجعله عامر..
أخوك..
هريدى de derda
!!