رحلتي الى كولمبو Colombo

 صباح الخير
هذي اخر رحله في سيرلانكا
طبعا الرحله مخصصه للعاصمه كولومبو في الحقيقه ان العاصمه لاتستحق الزياره
وقد كان مخططنا عند وصولنا لسيرلانكا البدء من منطقة سيقيريا صائبا
وبما ان مغادرة سيرلانكا لابد ان تكون من العاصمه كولومبو لذا يجب عليك العوده لها
ولا مانع من التوقف يوم واحد فقط لاكتشاف كولومبو وزيارة مايستحق الزياره

كانت رحلتنا اللي فاتت لنوراليا
غادرنا فندق جراند بعد الفطور لان السواق ابلشنا يقول لازم نمشي بدري لان الجو مطر والطريق زحمه وطويل
بس الظاهر انه نصاب لانه كان يوم جمعه ويبي يروح لاهله مدري وش مستعجل عليه
كان الجو مطر والجو باااااارد

طبعا فيه طريقين لكولومبو اما تسافر عن طريق كاندي وهذا الطريق اللي جينا معه قبل 5 ايام

او طريق هاتون وهو اجمل بس متعب لانه ضيق وزحمه

لقطة للطريق وواضح تعرج الطريق

طريق هاتون روعه بس ضيق يعني بعض المرات اذا شفت قدامك تريله تجيك ام الركب
ام الركب = قمة الخوف يعني ركبك تصافق ببعض ماتقدر توقف هذا والله اعلم
مثلا هالنفق اللي بالصوره تتوقعون بنجي مسرعين وندخله ماااااااااافيه امل
قلنا له وقف نروح نشوف فيه سيارات ولا لا اجل تبونا ندخل تحت باص والا قطار والا اقل شي تصدم لك بقره
عاد من يفكك من الهندوس داعس رابهم مايكفي العجوز اللي بغت تموت في نوراليا

مشينا وكانت سرعتنا ماتتعدى 40 كم عادي انزل والسياره تمشي واصور وارجع اركب

 لكن بعض المرات تتفاجأ بحادث قدامك مثل ابو الشباب اللي كان يقرا رساله بالجوال وطلع من الطريق

كانت الشاحنه مسكره الطريق ونزلنا طبعا مافيه امل نفزع بس عشان نصور

لكن راعي الشاحنه يحسبنا نبي نساعد جا يركض ومع حبل
قلت خير ياخوي سيارتنا كورلا بس الرجال كان مصر اننا نساعده ويمد لنا الحبل بغينا نربطه بحبله ونمشي مااايفهم

واصلنا رحلتنا لين وصلنا هالديره جلسنا فيها اكثر من ساعه بسبب راعي الباص موقف وسط الطريق وطالب شكشوكه من الكافتيريا وعااااادي عنده حنا طفشنا وقلت بنزل اشوف وش السالفه
قال السواق اجلس ترى الدعوى عادي ماهي اول مره تصير قلت يعني مستانس انت لنا اكثر من ساعه واقفين
قعد يضحك السواق قلت خيييييير قال مره جلست بالشارع 3 شهور >>>قويه صح

الصراحه كان الطريق روعه جبال وانهار وغابات بس طويل الطريق

باص مدرسات سيرلانكيات متعينات بعيد

واصلنا رحلتنا لين وصلنا شارع كله زينات ولافتات وقطع قماش لونها ابيض
قلت للسواق نزلنا هنا الظاهر انه عرس>>>جازت له عروسهم

قال اي عرس انت هذا عزا
يقول اذا في ناس عندهم واحد ميت يحطون قطع القماش الابيض عشان الناس تعرف ان عندهم عزا
واصلنا رحلتنا ومرينا من عند رجال يبيع فواكه على الطريق قلت للسواق وقف وقف بسرعه
السواق مايدري وش السالفه وقف السياره بسرعه خويي كان نايم ورى ومع البريك جا عندي قدام
قال خير وش فيكم قلت الظاهر اني شفت ابوبكر سالم يبيع فواكه

طبعا الرجال يشبه ابو اصيل والشبه واضح

الصراحه اللي ماجرب فاكه الرامبوتان لاتفوته
والفاكهه هذي استوائيه يعني اللي راح ماليزيا واندونيسيا اكيد شافها

واللي يغطيها ترى ماهوب شوك
 
 
تفتحها بسهوله

طبعا اللي يوكل منها النوى الابيض وطعمه حلو مع شوي حموضه وفيه نوعين منه احمر واخضر بس الاحمر هو الغالب

وهذي فاكهة الجوافة واصلها مكسيكي وتزرع بكثره في البرازيل بس طعمها مايعجبني

اكلتها مره وضاق صدري مدري ليه
 واصلنا رحلتنا واخيرا وصلنا كولومبو
لاتتوقع انك بتشوف مدينة متطوره ولاتقارنها بعواصم شرق اسيا مثل كولالمبور اوجاكرتا

بداية دخولنا كولومبو

اعجبني هالبيت

كان حجزنا بفندق انتركونتنتال بمنطقة فورت

 
هذا هو فندق انتركونتنتال وهذي منطقة فورت

مع ان منطقة فورت تعتبر منطقة الفنادق الفخمه والقنصليات والمكاتب الدبلوماسيه والبنوك والشركات الكبيره
لكن الافضل انك تبتعد عن هالمنطقه لانها منطقة مهدده بالعمليات الارهابيه وراح تشوف التفتيش بكل مكان وبكل شارع
نقاط تفتيش دقيقه اذا مشيت على رجولك تتوقع انك وسط ثكنه عسكريه والتصوير ممنوع
حتى غرفتك اذا فتحت الدريشه يرمونك العسكر
والله ابتلشنا بهالفندق
 ما انصح بفندق الانتركونتنتال رغم انه 5 نجوم الا انه متواضع جدااااا
الصراحه انهم اشغلونا يوم قالوا ترى هالمنطقه خطيره اذا شفنا واحد يركض ركضنا معه
واذا واحد دخل يده بجيبه قلت بس حزام ناسف حط رجلك

صوره من خلف زجاج الغرفه طبعا الفندق يطل على المحيط الهندي

اطول برجين في كولومبو واحد خاص بمركز التجاره والثاني بنك سيرلانكا

التوك توك ياسلام احلا شي بالزحمه حتى الرصيف يمشي عليه

احلا مافيه انك تعبيه فل بريال وربع

وصلنا للفندق قبل الظهر واستلمنا غرفتنا المتواضعه بالنسبه لفندق 5 نجوم بس بما اننا بنجلس يوم ماتفرق معنا ولا نبي نضيع
وقتنا ونروح ندور فندق ثاني نزلنا اغراضنا وقلنا للسواق يودينا للسوق
قال السواق بنمر على بعض الاماكن المشهوره في كولومبو

الصراحه يوم مرينا من هنا قلت لخويي والله اني اول احسب البيت الابيض بامريكا بس طلع بسيرلانكا
حتى خويي نصاب يحلف انه شاف بوش يكلم بجواله مع الدريشه
طبعا هذا مبنى الحكومه

جامع الاظفر

المسجد الكبير او زي مايسمونه قراند موسك
ODEL

رحنا لمجمع او محل اوديل وهو عباره عن محل كبير كل شي فيه المحل مرتب وهو عباره عن عدة محلات
وماركات مختلفه لك الكاشير واحد واغلب بضاعته عاديه مع ان سعرها غالي والمحل هذا لهم فرع بالاسواق الحره بالمطار
الصراحه مالقينا شي يستاهل الواحد يشتريه الا بعض التحف والملاعق التذكاريه
وبصلح لكم تقرير كامل ان شاء الله عن هالهوايه المخسره

هذا المدفع جنب الفندق واذا سمعوا العسكر ان فيه دريشه انفتحت لفوه جهت الفندق

طلعت العصر على الكورنيش وكل ماشغلت الكاميرا جاني عسكري قال ممنوع التصوير قلت طيب للجهه الثانيه قال ممنوع
قلت طيب بصور البحر قال ممنوع قلت طيب برجع الكاميرا قال ممنوع
 

مسجد ديواتاقاها
هالمسجد قديم جدااا ويرجع تاريخه لـ200 سنه بني المسجد عام 1820م

والصراحه قصة بناء المسجد اعتقد انها من الخزعبلات اللي ماتدخل المخ
قصته باختصار كان فيه بنت سيرلانكيه تبيع الزيت وكانت كل يوم تمر على هالمنطقه هذي تبيع الزيت وترجع
ومره طاحت الجره اللي فيها الزيت وانكسرت وضاق صدر البنت ونامت تحت شجره
وفجأه طلع لها شايب وقالها روحي جيبي جره جديده وتعالي قالت له من وييييين قال روحي كارفور من السوق يامال العمى
المهم راحت البنت وجابت جره وضرب برجله الارض وطلع زيت قالها الشايب روحي وقولي للمسلمين بالبلده عن الزيت وجو المسلمين وبنوا مسجد وحطوا فيه فانوس وسط المسجد الى اليوم
طبعا السالفه احس انها من الاساطير وياكثر هرج السيرلانكيين اللي مايدخل المخ
اخص يالشايب لو يدرون عنك ارامكوا كان وظفوك

تحسون ان المقاول كان مدرس فنيه
 

مبنى البرلمان القديم طبعا واضح الطابع الاوربي على هالمبنى

تمثال بوذا يتوسط احد الحدائق

الصراحه ان سيرلانكا على صغر حجمها الا انها ارض المعابد والاصنام والتماثيل والخزعبلات
والمهرجانات وش كثرها اصلا الموظفين والطلاب مايداومون الا شهرين بالسنه والباقي اجازات ومهرجانات
اسمع بعض من الاعياد والمهرجانات طبعا مو كلها هذا بس اللي سمعت فيه
عيد الكنيسه وهالعيد للمسيحيين وعيد الحصاد خاص بالهندوس ويسمونه مكراتا سنكرانتي وعيد الشفق خاص بالبوذيين ويسمونه
 فيساكا والعيد هذا رهيب يطلعون بالشوارع واي حيوان ناوين يذبحونه يعتقونه يمرون على المسالخ ويطلعون الحيوانات اللي مابعد انذبحت والله من الفضاوه
وفيه عيد اسمه ايسالا وهو عيد القمر والعيد الاكبر واللي كل الناس تنتظره اسمه فيراهارا وتشارك فيه الفيله
والعيد الغريب عندهم والخاص بالهندوس اسمه كفادي يقومون الشباب الفسقانيين يعلقون انفسهم بخطافات ويمشون على الجمر
واي حدث يصير يسوون له عيد يعني لو هم عندنا وطاحت الاسهم سوو مهرجان الاسهم
بالعربي ماينافس اهل الرياض بالاجازات الا السيرلانكيين واعيادهم تراني الحين افكر انقل للرياض والسبب كثر الاجازات
بس اعرف حظي لو انقل للرياض كل المؤتمرات يحطونها بالشرقيه
 

رجعنا للفندق وزي العاده خويي يبي ينام وانا مافيه امل انام طبعا سواقنا راح لاهله وقال اجيكم بكره الفجر اوديكم للمطار
نزلت للرسبشن وسألتهم عن الاسواق والمجمعات وقالوا لي احسن شي تركب توك توك يوديك بـ200 روبيه
طلعت من الفندق ورحت امشي لين لقيت واحد وقلت له ودني ماجيك سيتي وبعد المكاسر وداني بـ150 روبيه
طبعا يوم وصلنا قال عطني 200 روبيه قلت خييييييير انا متفق معك على 150 قال ابداااا ماهو صحيح
المهم نزلت ورحت لعسكري وقاعد اشرح للعسكري السالفه وهو يضحك بغيت الفه بكف اطير سنونه
قلت وش فيك انت اقولك الرجال بينصب علي قال انا مانيب عسكري انا سكيورتي بالمجمع واتركه واروح لواحد ثاني لبسه يختلف
واكلمه قال انا مانيب عسكري قلت لاحوووول وارجع لراعي التوك توك واعطيه 200 قلت احمد ربك ان العسكر كلهم عند الفندق
حقنا والا كان ما اعطيك 200

Majestic City
مجمع مجيك سيتي في منطقة بامبالابيتيا يتكون من اربع ادوار وبعض المطاعم مثل كنتاكي وغيره والدور الرابع فيه سينما
اللي يقدر قول اسم المنطقه ثلاث مرات بسرعه له جائزه
مدري من وين يجيبون هالاسامي احس اللي يسمي المناطق والشوارع شايب بالبلديه منسدح وينصب عليهم

the House of fashion
محل كبير متخصص بالملابس والصراحه ان اسم المحل اكبير منه لان بضاعتهم من النوع الرخيص موقعه قريب من ماجيك
سيتي اخذت توك توك مره ثانيه وقلت له ودني سوق بيته
سوق بيته الشعبي عباره عن مجموعه من الدكاكين والاكشاك كل شي يباع في هالسوق واغلب المحلات يمتلكها المسلمين

هذي فاكهة الدوريان

اخذونا من المطار ودخلنا بهالغابه توقعنا بيسكنونا بكوخ

لكن تفاجئنا بوجود منتجع روعه

منظر من غرفتي

هذي غرفتي يقولون اذا جا فيضان بهالمنطقه تطلع من غرفتك سباحه

 مناظر ولااااا اجمل

بعد 11 يوم رجعنا مره ثانيه لسيرلانكا وكانت الرحله ترانزيت لمدة 10 ساعات
طبعا كان الفندق على حساب الخطوط السيرلانكيه ويحجزون لك بالفنادق القريبه من المطار
والفندق عباره عن منتجع على المحيط الهندي وكانت المناظر روعه

 مناظر ولااااا اجمل

اليوم الاخير لنا في سيرلانكا مشينا للمطار
والصراحه اذا كنت ساكن في كولومبو وعندك رحله لازم تطلع قبل الرحله بـ4 ساعات على الاقل لان المطار بعيد
وفيه تفتيش قبل توصل المطار يفتشون السيارات تفتيش دقيق جدا

وصلنا المطار الساعه 6 الصبح وكانت رحلتنا الساعه 9

طبعا مثل ماعبيت كرت الدخول لازم تعبي كرت المغادره بعد ماتاخذ البوردنج تروح للجوازات وقبل الجوازات
بتحصل كروت المغادره
ختمنا جوازاتنا وجلسنا ننتظر الرحله لكن اعلنوا عن تأخر الرحله 3 ساعات
قلت اروح اتمشى بالاسواق الحره وفجأه شفت كل الناس وقفوا محد يتحرك منهم

كل الناس واقفين

 
طبعا كان فيه اغنيه بسماعات المطار وانا اقول وش السالفه مايتحرك الا انا ومعي كم واحد

جيت عند واحد اقوله وش فيه والرجال مايرد علي بس يأشر بعيونه يعني اقلب وجهك
عاد انا جازت لي الحركه قعد استهبل عليه يوم شفته مايتحرك بس خفت الاغنيه تخلص ويمردغني
 انا توقعت انها اغنيه خاصه بالهندوس يوم خلصت قلت له خير وش السالفه
قال هذا السلام الوطني حقنا قلت يعني هذي سارعي حقتكم ههههههه
قلت عاد بالمطار قال مو بس بالمطار قال كل يوم الساعه 9 يعزف السلام الوطني بكل سيرلانكا ولازم نوقف
 

  هالشايب فالها هو وولده وبنته ومرته وقاعدين يلعبون بلوت قلت لهم بصوركم قالوا اوكي  يوم خلصت
علمت الولد والبنت قلت ترى الجوكر مع امكم وزعل الشايب بغى يصفقني

وانا قاعد انتظر رحلتنا كانت الرحله اللي قدامنا جايه من الرياض وطبعا ينزلون الركاب اللي جايين من الرياض ويطلعون الركاب
اللي بيسافرون الرياض ولفت نظري شي
 

طبعا كلهم سواقين وشغالات اللي بيسافرون شوفوا شناطهم كل واحد معه شنطه صغيره وبعضهم ما معه شي
 

وهذولي الركاب اللي نزلوا يالله يشيلون شناطهم والاجسام مربره هههه
عادي فضاوة واحد متأخره رحلته

لقطه اثناء الاقلاع

بختصار سيرلانكا تستحق الزياره ولكنها تفتقد لبعض الخدمات الضروريه والبلد رخيص جدا

اي واحد عنده استفسار عن سيرلانكا انا حاضر سواء بالايميل او هنا
تبون تعرفون وين كانت وجهتنا انتظروا الرحله القادمه وهي مميزه