رحلة في ربوع الثمامة

في البدايه ارحب بالجميع وعلى رأسهم اخونا وقائد الكتيبه ابو نواف .
قبل ان اطرح القصه الجديده لصديقنا عواد احب ان انوه ((يمديكم بس على انوه )) انه تم اضافة قصه من قصص عواد بالقسم الخاص فيني وهي على الرابط التالي

:: عواد صار معوق وياقلب لاتحزن ::

وهي قصه قديمه بس حبيت تكون في ارشيفي بالموقع عشان ماتضيع علي.
اخليكم مع القصه واتمنى انها تنال على اعجابكم ورضاكم ونقدكم وردودكم محل تقدير مني وهي الوقود الحقيقي لي للمواصله لتقديم الأفضل .
.

(( رحله في ربوع الثمامه ))

بطوله :
عواد

ام عواد

ابو عواد

في البدايه احب اقول لاصحاب القلوب الضعيفه الابتعاد كل البعد عن هذه القصه لما فيها من مؤثرات بصريه وخياليه قد تجعلهم لاينامون الليل<< يسمع بالتشويق

سالفتي باختصار صارت قبل 10 سنوات يوم كان عمري 12 سنه
بعد نجاحي من صف ثاني ابتدائي << يلعن شكلك 12 سنه وبصف ثاني

المهم بعد مابشرت امي ابوي ان كل البيت ناجح قرر ابوي اطال الله بعمره وبعمر كل ابهات الوطن انه يطلعنا البر طبعا ابوي كان محجر لنا بالبيت يقول مابي عيالي يختلطون بالمجتمع لان ابوي يعتبر المجتمع سلاح ذو حدين يمكن يخلينا نطلع منه كويسين ويمكن نطلع منه دشير عشان كذا فضل ابوي عدم استخدام سلاح المجتمع نهائيا

جاء وقت الطلعه ولا اخفيكم شعوري اني ماقدرت انام يومها ماني مصدق اني بطلع البر كنت افكر وش ابي اسوي بالبر وكيف اقدر اسهر مانام بالبر مابي اضيع وقتي بالنوم ابي استغل كل دقيقه بالبر<< تراك طالع البر يابو موو تركيا

اذن الفجر وقمت من فراشي ورحت لولد جارنا ابي اقوله اننا نبي نطلع البر اليوم تعرفون حركات البزران يعنني باقهره الحين … ورجعت وانا اركض واركض ولم اكن اعلم اني اركض الى ……<< يعنني اثاره

لم اعلم اني اركض الى بيتنا << لاياشيخ

جهزنا العفش واللي يشوف سيارتنا يحلف اننا ماخلينا شي بالبيت لدرجة يوم نزلنا العفش بالبر لقينا امي ماخذه معها الرسيفر حق الدش مع انه مافيه لا كهرباء بالبر ولا فيه تلفزيون اصلا.

نزلنا اغراضنا ونزلنا خروفنا وكل ماقول لابوي يالله خلنا نذبح الخروف عشان نتغداء منه يقول لالا ماحنا ذابحينه اليوم لو ذبحناه الحين يبي يروح الحماس حق الطلعه<< سلامات رايحين تلعبون بطوله على الخروف

بعد ماصلينا صلاة المغرب جلسنا نشرب شاهي وحنا بقمة سعادتنا مع ان الجلسه ماتفرق بينها وبين الجلسه بحوشنا نفس الاشكال نفس الملابس نفس الفرشه اللي جالسين عليها ماعليناااا المهم وحنا نشرب الشاهي نادت امي اطال الله عمرها وعمر كل امهات الوطن اختي الصغيره حصه قامت امي تدور عليها بالسياره وقمت انا ادور معها وماحصلناها وحنا ندور وابوي كان جالس ببرود لاتستغربوا لان ابوي كان بطبعه بارد بكل شي وزيد على البرود انه ماتفرق معه لو فقد واحد من عياله لان عنده ماشاء الله 22 << معسكر منتخب لعن ابو بليسكم

جلست امي تصيح وانا اصيح واخواني 20 الباقين يصيحون والجبال تصيح معنا << هذا الصدا يالدلخ شكلك تسمع بالقصص الحزينه

شوي قام ابوي ولما قام حسيت بأن الامل اقترب

قال بصوت واطي :: ان شاء الله بس بكرا جابر الكاسر لما يسوي اغنيه ببنتنا حصه انه يجيب صورتي يارب<< تحسون ابو عواد اعلامي والله لو انه غازي القصيبي << مادري وش دخله غازي القصيبي كركركركر

جلسنا ندور بالبر انتشروا اخواني كلهم بالبر ولا فيه اثر لاختي

شوي سمعنا صوت جاي من بعييييييد

(( اوووووع << صوت ذئيب شبعان ))<< واحد بالغصب يبي يسوي القصه تخوف كركرككركركرر
ابوي : انا نسيت اقولكم شي بس الله يخليكم لاتزعلون مني ياعيالي…. وانتي يا ام العيال لاتأخذين بخاطرك مني ..

الصراحه

ان ….

الديره اللي جبتكم فيها مسكونه وفيها جنون تجي على شكل اذيابه وعقارب<< مادري وش تبي العقارب

كلنا سكتنا ولا احد قدر يفتح فمه بكلمه اول مره احس اني بالع العافيه جلسنا نطالع ببعض وبدال مانحاول ندور اختنا جلسنا نراقب بعض وكلنا خوف وكاننا نقول لبعض فداء للذيب اختي حصه بس اهم شي يكون شبع منها ولا عاد يدور غيرها << مالهم خاتمه كرككركركر

ام عواد :طيب يابو عواد يوم انك عارف انها ديره مسكونه وراك جايبنا فيها؟؟ << عصبت ام عواد

ابو عواد:الصراحه … انا كنت ابي عيالي يطلعون رجال ويعتمدون على نفسهم قبل ماموت وفكرت و قلت مافيه احسن من انهم يمرون بالرعب هذ
ام عواد : يامال الذئب اللي يأكلك.. والحين لاجاء الذئب وأكل عيالنا وش نبي نستفيد من هالحركات والتخطيط حقتك يانيبوشا زمانك<< كانت تلعب بالاهلي ام عواد زمان ايام دابو كركركركركر

عواد : يمه يعني خلاص نبي نموت كلنا؟؟

ام عواد :والله ياعواد ياخوفي ان نهايتك انت واخوانك على يد ذئب مسعور<< يقاله فاهمه ام عواد الحين

انا صراحه كنت اسولف مع امي وانا منسدح تحت السياره وبالتحديد ورى الكفر الايمن للسواق
ابو عواد : اصص اصص كأني اسمع صوت ذئب جاي من بعيد؟ << طالع يخوفهم موو يونسهم كرككركر
هو ماكمل كلمته الا كلنا سوينا نفسنا ميتينيقالنا نبي نلعب على الذئب خخخخخخخخخخخخ

يجي ابوي يكلمنا ماحد رد انا بغيت اموتجد كاتم نفسي بقوه لاعب الدور من قلب

شوي يوم عرفنا ان الذئب موو جاينا الحين قمنا كلنا وتوضينا وعينك ماتشوف الا هذا يسلم وهذا يركع وانواع الدعاوي ويارب نجينا يارب نجينا واللي يقراء قران وام عواد تصيح وابو عواد منسدح على بطنه ولا كأنه بيموت معنا

جلسنا ساعه كامله وحنا نصلي … بعدها رجعنا وجلسناا جنب بعض وكل واحد ماسك معه شي اللي ماسك سكين واللي ماسك عصا واللي ماسك ملعقه خخخخخخخخخ

شوي وحنا بصمت قالت امي لابوي

ام عواد : ابسالك يابو عواد حنا يوم جينا نطلع مرينا على بيت اختي فضيه .. ليه وش بغينا منها ؟؟<< وش هالام الفاهيه

ابو عواد : ايه مرينا عشان نحط عندها بنتنا حصه …<< ماقلت لكم ابوي مافيه ابرد منه
كلنا بصوت عالي:: وشووووووووو؟؟؟

ام عواد :ايييييييييييييه الحمد الله يعني بنتنا بخير ماجت معنا البر؟؟؟<< باقي ماستوعبت الموضوع ام عواد

انا صراااحه قمت بدون عقل انت تستهبل ولا شكلك كذا ؟؟<<يكلم اابوه
ابو عواد : ياورع انقلع لانتفك باصبع رجلي الكبير
عواد : الحين من المغرب وحنا جالسين برعب وخوف اخر شي بكل برود تقول اختي عند خالتي ومافيها شي ؟؟
بعد هالكلام رااح الرعب والخوف اللي كان مسيطر علي ونجلس نتجمع على ابوي وانواع التريقه اللي يجي من وراء ابوي ويقول (( اوووووو)) وانا اقول لابوي تصدق عاد انا سمعت ان الذئب اللي هنا اعتزل مع سامي صح هالكلام ولالا ؟

انا من الفرحه والحماس ماعاد ادري وش بسوي مو مصدق من جد امي وهي امي وهي كل انواع الثقل يوم عرفت السالفه واننا نبي نعيش قامت ترقص سامري قدام ابوي والعشرين الباقين من اخواني مسوين صفين ويلعبون محاوره وانا جالس قدام ابوي واتريق عليه << عيله محششه رايحه فيهااا خخخخخخخخخخخخخخخخخخخخ

ثاني يوم قمنا الصبح بدري ونمسك الخروف ونذبحه وانواع الشوي والوناسه
وجلسنا بالبر ثلاث ايام واستانسنااا فيها وناسه بنت كلب<< يسمع بالاسلوب كركركركركركر

انتهى …

مايستفاد من الموضوع:

اكيد كلكم عارفين وش اللي مايستفاد من هالموضوع هو اننا مانتذكر الله الا وقت الشده وقت المصيبه نتذكر وندعي ونتذكر الصلاه ونتذكر القران واكبر دليل وقت الاختبارات تحصل ولا واحد يترك صلاه والكل يدعي …. بس انا اللي خلاني اكتب هالقصه هو بعد قراتي كتاب الشيخ عائض القرني وقفت عند هالكلمات وفكرت فيها كثير اتمنى اننا نصحى على انفسنا ونفكرباللي حولينا .. واذا ماجانا الموت اليوم بيجينا بكرا خلونا نستغل كل دقيقه وساعه ويوم وشهر بطاعة الله لاتخلون الدنيا والاسهم والمباريات والمنتديات تشغلنا عن اللي احنا مخلوقين عشانه…اتركم مع بعض كلمات الشيخ عائض القرني من كتابه لاتحزن واللي هي السبب الاول بكتابتي هالموضوع
إذا وقعت المصيبة وحلت النكبة وجثمت الكارثة ، نادى المصاب المنكوب :يا الله
إذا ضل الحادي في الصحراء ومال الركب عنالطريق وحارت القافلة في السير ، نادوا:يا الله.
إذا أوصدت الأبوابأمام الطلاب، وأسدلت الستور فيوجوه السائلين ، صاحوا:يا الله.
إذا بارت الحيلوضاقت السبل وانتهت الامال وتقطعت الحبال ، نادوا :ياالله.
إذا ضاقت عليك الأرض بما رحبت وضاقت عليك نفسك بما حملت ، فاهتفت : يا الله.

اتمنى اني وصلت لهدفي منهالموضوع واسف على الاطاله ولكن تعرفون عواد نشبه وياكثر بربرته عاد شلون لو كان مع ابوه وامه واخوانه هع هع هع

يالله اشوفكم على خير ياحلوين…

اخوكم :عملاق الصرقعه