السلام عليكم والرحمه
مساء الطاعه
لكل متابعي قروب بونواف …
عدنا لكم بخطوط سريعه 2
واتمنى انها تنال اعجابكم مثل خطوط سريعه1 ..
~ / خطوط سريعه 2 / ~
1
يوم الاربعاء
الساعه 12 ظهرا ..
بوابة مدرسة الأصمعي الثانويه للبنين
قاعد ينطر اخوه يطلع من المدرسه النوم كابس عليه مغمض عين وفاتح الثانيه شكله جد ضحك
غير الغتره الي ما يدري شلون حاطها على راسه يعني مأساه من قلب
غمض عيونه ياخذه قيلوله على ما يطلع اخوه وماصارله ثواني الا ويفتح عينه على جرس الهده المزعج تأفف و تململ و تعدل بقعدته وقعد يحوسه بأشرطته الي كلمالها وتنقص شوي شوي ما يدري شلون تختفي
رفع راسه وطاحت نظراته على منظر خلى شوي و عيونه تطلع من مكانها قعد يطالع مو قادر يستوعب شنو هالي يشوفه وين قاعدين احنى لدرجه انه شك انه قاعد يطالع فلم اجنبي مو منظر بمدرسه ثانويه حق لصبيان
من كثر ماهو مصدوم ماحس بأخوه الي صعد السياره وما انتبه الا على كفخه خفيف على الجتف
حمد : هووووووو خلود شفيك ؟
لف على اخوه وتعابير الصدمه واضحه : حمود ويهد يهد العدو شالمسخره وين قاعدين احنا
حمد ببراءه : شنو ؟ شسالفه؟
خالد : شوف بس شوف جدامك وبعدين قول شسالفه؟
لف حمد يطالع جدام ويوم شاف الي شافه اخوه ضحك من قلب وقال : هه انت جذي وعصبت شلون الي يصبح بهالاشكال الخايسه
خالد : وانتو ساكتين؟
حمد وهو يحذف جنطته السيت الوراني : شوف احنا اول شي خاصه الي نعرفه ننصحه واذا شفنا ماكو فايده
بصراحه نمسخرهم تمسخر
خالد : وين الناظر والاداره ؟
حمد : تكفى اي ناظر و اداره اذا مو من الاهل ماكو فايده شوف مره أبوي راح حق الناظر وبصراحه ناظرنا رايته بيضه بس البلى من الاهل تدري يوم كلمه ابوي شقاله قاله انه استدعى ولي امر واحد من هالطلبه ويت الأم ويوم كلمها شوف اذا هذا رد الام شنو تتوقع يطلع الولد خله يستانس توه صغير
خالد ضرب بريك قوي لدرجه ان حمد شوي ويطق الجامه الي جدام بس الله ستر جيور خالد و رجع صوب الولدين فتح الدريشه وعطاهم من عطايا ربي هزأهم تهزيئه محترمه طبعا الشباب ماقصور و مسحو فيهم القاع ..
المشهد الي شافه خالد وهو فعلا حقيقه من أرض الواقع
واحد واقف و متسند على الطوفه ريل فاردها والثانيه رافعها ومثبتها على الطوفه
والثاني مجابله مايل صوبه شوي وساند ايده على الطوفه
قال رسول الله صلى الله عليه و سلم لعن الله المتشبهين من الرجال بالنساء والمتشبهات من النساء بالرجال
وقال عليه السلام (ألا كلكم راع وكلكم مسؤول عن رعيته، فالإمام الذي على الناس راع وهو مسؤول عن رعيته، والرجل راع على أهل بيته وهو مسؤول عن رعيته، والمرأة راعية على أهل بيت زوجها وولده وهي مسؤولة عنهم، وعبد الرجل راع على مال سيده وهو مسؤول عنه، ألا فكلكم راع وكلكم مسؤول عن رعيته)
2
البحر
قاعد اوهو مجابل التلفون و يدزز مسجااااااااااات
اما رفيجه فمن كثر ادمانه على النت ساحب اللاب معاه و شابك و يهذر على المسن طبعا اللست مفوله وشوي والا رفيجه يصرخ :واخير ما بقيتي
لف عليه : شنو الي ما بقت ؟
سالم : شوف هذي وحده من اسبوع ضايفها وتوني اشوفها على المسن
قرب بدر صوب الشاشه ودقق بالايميل مجرد فضول لا اكثر بس كان فضول قاتل قااااااتل
حس جنه احد صاب فوق راسه ماي حار ومليون شيطان فوق راسه كل الي حس فيه انه الحين بسيارته و ماغير يتعدى السيايير والوجهه بيتهم ..
قاعده فمان الله بعد ما بلكت وحذفت الايميل الي صاره اسبوع ترفضه و يرجع وقبلته عشان تعرف شسالفته
وكالمعتاد تشارك بمنتداها و تسولف مع رفيجاتها ولا بالباب يتبطل شافت اخوها ومن كثر ماهو معصب ماتت من الخوف ما امداها تقول حرف الا وهو طايح فيها طق ولوما الله ثم اخوها جاسم الي توه داش البيت جان الله يرحمها ..
حاس بندم فضيع بقى يذبح اخته بيده و السبب رفيجه الزفت قعد يتذكر الي صار له من بعد ما نقل اخوه اخته حق المستشفى..
طلع مو عارف وين يروح بباله انه سوى الصح وان اخته لازم تتأدب وبيسحب منها كل شي
ولا التلفون يرن حقره بس بالاخير رد
سالم : وينك ذلفت ؟
بدر و نفسه بخشمه : شتبي ؟
– ابد اسال شفت الي قتلك عنها
وهو يغلي من داخل ويسب : شفيها لحظه انت شعرفك فيها ؟
– شعرفني فيها ما اعرفها هذي دازه ايميل حق القروب الي انا مشترك فيه عاد ضفتها عندي وتوني اشوفها على المسن سالتي وقتلها من القروب قهرتي قالت لو سمحت احذف الايميل وعلى طول ماوهلتي بلكتني و حذف
كل الي سواه بدر لحظها انه سد التلفون بويه رفيجه وتذكر كلمة واحد من عيال فريجهم دوم ينصحهم يبطلون لعب على بنات الناس و ان الدنيا دين ويوم لك ويوم عليك
وكما تدين تداااااااااان
طبعا الي يرد عليه ويقول ( انا خواتي متربين عدل ) ويقولهم يعني هالبنات كلهم بنات شوارع مو متربين ؟ والله ثلاثة ارباعهم بنات عوايل واهلهم معروفين والي يقول ( الحمدلله ما عندي خوات ) ويرد عليه ابد مقطوع من شيره ماعندك بنات خوال عمام ماراح تتزوج و يصير عندك بنات ..
ياما وياما نصحهم بس اذون من طين و اذون من عيين
تنهد من اعماقه وتعوذ من ابليس
واقر بنفسه هالمره ربه ستر و فهم غلط لو كانت السالفه صج
شراح يسوي ولا شراح يصير لو دروا اهله ..
شوي بحقها ( مصيبه )
3
قاعد يقرى الجريده ولفت نظره صوره ظل مده يطالعها وشوي ولا رفيجه يقوله : شفيك علقت على الصفحه لف على الي وراها
رفع راسه و ابتسم وقال وهو يوري رفيجه الصفحه الي قاعد يطالعها : شوف هالصوره
شافها : انزين شفيها هذي صورة المسيد الكبير برمضان الي طاف صلاة الجيام
– تدري ودي تكون المسايد دوم جذي زحمه على طول مو بس يوم ايي رمضان ليش الناس بعضهم الله يهديهم ما يذكرون الصلاة وان عندهم دين الا من رمضان لي رمضان اهو ضامن عمره مايموت الا برمضان ؟؟!
– استغفر الله الله يهديهم ويثبتنا على طاعته وعسى الله يرزقنا حسن الخاتمه دنيا زايله ماراح تاخذ منها غير عملك
– وانت الصاج عسى الله ينور دوم قلوبنا ويحفظنا من معاصيه ويبعدنا عنها ولا يفتنا بدنيانا
– آمين ولجميع المسلمين …
دمتم برضى الرحمن
جزاك الله خير
احب ان اشكرك على الموضوع الرائع واتمنى لك التوفيق وإلى الأمام دوماً خالص تحياتي
فديتك وردة .. فعلا ورده بكتاباتك اللي تنثر عبيرها وتفيدنا باهدافها من ناحية السالفه الاولى ,, ففعلا الشذوذ كاثر ولا حول ولا قوة الا بالله لكن يبــــــــــــــــــقى الكثير الكثير من الخير في شبابنا 🙂 اما من ناحية الموضوع الثاني فأنا أؤيدك بشــــــــــدة صحيح ولا تزر وازرة وزر اخرى لكن سبحان الله اللي يلعب بذيله يجي من يلعب ع محارمه وياما شفنا كثييييير ومثل ما يقولون دقة بدقة ولو زدتَ لزاد السقا أما المساجد فحدث بلا حرج ولكن يبقى في الامة الخير 🙂
اذا كانت من كتاباتج .. ف قو هد ؟؟!! الله يوقفج والى الامام يارب ؟؟ واذا كانت من اختياراتج .. اهنيج على المستوى الرفيع والراقي .؟؟
موضوع جدا رائع .. و ممتع وفيه النفع .. يعطيك العافيه
ايميلك خطير ورهيب صراحة لكن للأسف انا من السعودية وما قدرت افهم القصص الحلوة عشانك كاتبها بالعامي . ياليت تكون ايميلاتك بالفصحى في المره القادمة عشان يكون اسهل للجميع ومثل ما انت عارف ان اعضاء القروب من مختلف انحاء العالم العربي . شكراً لك
فديتك مرة حلو الموضوع..بانتظار جديدك
بارك الرحمن فيكي نديم الروح كتبتي فابدعتي ادامك المولى عزاً وذخراً لمن احبك اغلاك … الريم
كل القصص تبدا بكلمة قاعد ماقرا شي خخخخ تسلم يدينك
يعطيك العافيه (( وردة شقى )) وإن شاء الله ماتشقى موضوع جميل وراقي ويستحق الإشاده لا تحرمينا من جديدك لاعدمناك