توصّي شي؟ أنا بكرا مسافر.. وأبي الليله أسافر.. قبل باكر!!‎

مـ][ـدخـ][ـل
.
توصي شي أنا بكرا مسافر..
وأبي الليله أسافر, قبل باكر..
.
لكن قبل ما أرحل, ودي تعرف..
ترى موتي ولا موت المشاعر..
.
أنا رتّبت جرحي مع ثيابي..
وأخذت أحزاني وآلامي تذاكر..
.
يروح العمر وما راحت همومي..
صحيح اللي يقول الهمّ كافر..
.

.
.
.
بسم الله الرحمن الرحيم
السلام عليكم ورحمة الله وبركاته
والحمدلله الذي لايحمد على مكروه سواه
واللهم اجعل لنا في كل خطوة بركة
.
في البداية, أعتذر عن التأخير في هالموضوع, وأني أنقطعت عن النت هالفتره كلها,,
لكن كلها بسبب ظروف قاهرهـ, كانت بدايتها سفر لدولة الكويت الحبيبة,
وختاماً بدولة ماليزيا الشقيقة,
.
المووووهم.. وشسسسمه,,
إنه في يوم الأحد بتاريخ 11/5/1431هـ
وبحمد الله وفضلٍ منه وصلنا الى دولة ماليزيا الشقيقة انا وصديقي العزيز ياسر
الملقب في العمل بـ البطل المغوار
كانت الرحلة بالطياره <<اكيد طياره اجل سياره انت وخشتك؟؟
كانت الرحله متعبه حبتين, ولم يكن يوسع صدورنا سوى بعض السواليف والذبات, ورؤية الشاشه والافلام, والتعليق على المضيفات..
وكانت الرحلة على دفعتين..
.
الرياض- البحرين
ركبنا في الدرجة الأولى بعدما شبّكنا ذلك الشخص الذي يقص البوردنق
وكانت قمة في الرفاهيه حيث لم ندفع الا ثمن السياحية – ويخب علينا
أولاً قدموا لنا بعضاً من الكاجو والموالح مع كوب عصير برتقان وماءن بارد
ثم اعطونا فوطة لنمسح بها خششنا البهيه
حيث كانت خشة صديقي ياسر شهباء ورايحتن فيها
لكن لم يستخدمها للأسف.. لصغر المنشفة وكبر خشمه..
جاءت المضيفه واخذت الكاجو والعصير
وكانت غاية في الجمال – حسب قول صديقي ياسر<ايه هين
وكنا نلتفت الى الخلف ونرى المضيفات المخيسات في الدرجات التي خلفنا
سبحان الله خلق وفرق
كانت هناك بعض الشطحات في البداية
حيث قال البطل ياسر لأحد المضيفات مشيراً على رقم المقعد:
ذس از حدعش
حيث خبص أم الدنيا بين العربي والانجليزي
وقال عن كابتن الطياره:
المذيع يقول اربطو الاحزمه
متأثر بالتلفزيون والاذاعه شكله هههه
وأنا جيت بحاتسي المضيفة وقلت لها:
بليز قيف مي ون شاهي
لكن الحمدلله فهمت علي هههههه
.
البحرين – كوالالمبور
بعد ذلك العزّ الذي رأيناه في الدرجة الاولى
آن لنا أن نصطدم بالواقع المرّ
ركبنا في الدرجة السياحية
أو أحرى مايمكن القول عنها درجة (مكتب استقدام)
كلها طقم ماليزيات وماليزيون
كأننا دخلنا مكتب ترحيل خادمات شرق آسيويات
والكراسي ضيقة جداً , حيث توهق صديقي ياسر في مقعده توهيقتن مهيب صاحيه
بحكم الوزن الزائد, وبحكم كبر الارداف <ماشاء الله عليك ياياسر هههههه
أما عن نفسي فلم يمنعني من الاستمتاع بالرحلة الشيقه سوى تلك الكرشة التي لم أأخذ راحتي بدون أن أرجف المقعد الذي قدامي كل شوي.. وحسيت أنه أنغث منّي وقال يعنبوها رحلة مخيسسسه
قدموا لنا في البداية .. لم يكن هناك بداية.. بل وجبة غداء(ن) علاطول..
كانت تحتوي على رز برياني حار – شعيريه بارده – كوب فاضي – خبز يابس – كريمه بالبقدونس
ولما مرّت عربة الشراب احترنا مابين اصنافها المتعددهـ..
سفن اب – بيبسي – عصير مشكل – قارورتين من الشراب المحرّم
بيني وبينكم من الكآبه اللي جتني كان ودي آخذ من الصنف الآخير ههههه يمكن أنسى شوي..
لكن الحمدلله كان مكتوباً على القوطي – نو بيبي
وصلنا بالسلامة بعد ماعشنا فالجوّ قرابة 10 ساعات غير متواصله
قاطعها الكثير من المطبات الهوائية وأنواع الروعات تقول راكبين قطار الموت
.
بعد ذلك وصلنا الى المطار..
مطار كوالالمبور الدولي..
ما أشبهه بمطاراتنا.. عدا أنه:
مطارهم اكبر من ناحية المساحات المستغله والمستفاد منها
ومطاراتنا اكبر من ناحية المساحات الفاضية
مساحاتهم كلها خضراء وجميله ومنسقه
ومساحاتنا كلها تراب وغبار واراضي فضاء
يوجد لديهم مترو وقطارات في المطار توصل من مكان لآخر ومن مبنى لآخر
يوجد لدينا أرصفه متعثره ورايحتن في خرايط أم أمها تتعب وأنت تمشي عليها
يوجد لديهم موظفين يحترمون المكان والمهنه اللي هم فيها
يوجد لدينا بعض الموظفين فيهم شوفة نفس تقول وزير مهوب حق نقل عفش
عندهم مبنى يوفي كل الخدمات وبأقل التكاليف مبني
عندنا مطارات مقبولة لكن تكاليف انشاءها وصيانتها تسعطعش ضعف أطلق مطار فالعالم
لو بكمل بيروح الموضوع كله فالمقارنات..
.
كان فيه شخص استقبلنا.. اسمه زين العابدين.. وينادونه في ماليزيا زينل.. اختصار يعني
وأحياناً ينادونه الحجي زينول يعني هو الشيخ حقهم وكذا
كان شخص طيب وحبوب وكل شي فالعالم..
أخذنا بجوله في ربوع ماليزيا.. تقول تسننا عرسان رايحين شهر عسل ههههه
طبعاً انا العريس – ياسر شخبارك؟ ههههههه
وجلس يبربر على روسنا وكلنا دايخين.. لما وصلنا الفندق..
كان فندق خاص ومغلق واجراءاته حوسه مرّه.. وكله أمن وكاميرات وحرّاس
وكانت غرفتي تطل على حديقه ومباني وسعة صدر..
.
وهذا مكاني يوم بديت اكتب الموضوع..

.
وهذي بعض المناظر من الشباك المطل على الحديقة والمواقف..

.

.

.
لكن ماعجبنا الوضع وطلبنا منه ينقلنا شقه ثانيه من اليوم اللي بعده..
رحنا بعد كذا لعمارة طول بعرض مليانه طلاب وطالبات خليجيين وعرب
لقينا شقه حلوه الحمدلله وخلصنا كل الاجراءات.. وطلعنا نتمشى في سوق اسمه:
Sunway
ثالث اكبر مجمع عندهم.. حسب كلام الحجي زينل..

.
وهذي صالة التزلج فالمجمع, وانواع الفله والبرررد..

.
جلسنا ندور فالمطاعم لأنه طقنا الجوع ولقينا مطعم رز ودجاج ههههه وحلفنا على الماليزي محد يغديه غيرنا..
يعنبو بليسه ذبحنا بالأكل , أجل أحد يفطر همبرجر لحم وهوت دوق..
واليوم اللي بعده يفطر بيتزا؟؟
يازين فطورنا فالسعودية بس.. جبن وبيض وعسل وحليب وكورن فليكس وزيتونتين..
<يعني يقال لك فطور انتركونتيننتال هههه
يعنبو اسمه ما أصعبه ..
.
فيه صور كثيرة بنزلها ان شاء الله كل ماصورت شي وكل ما رحت وجيت.. وسوالف اكثر ان شاء الله
لكن بسرد الموجود منها ألحين, والباقي في وقتن لاحق ان شاء الله
ودعواتكم لنا بالتوفيق في الايام القادمه.. لأننا داخلين على مرحلة جديده وطويلة
اذكر اني كنت اكتب بالفصيح مدري وش جابني للعاميّه ههههه
الموهم وشسمه.. هاكم الصور مع التعليق عليها..
.
اول شي ببدأ بشقتنا الجديدة,,
الصالة مع صالة الطعام على يمين الكاميرا موب واضحه..

.
صورة للمطبخ المفتوح على الصالة ومع سطح الغسيل ومدخل الشقه ع اليمين.. كأننا من طقة هالشوام..

.
إطلالة من الخلف على المسبح والحديقة ع اليسار والمناظر الحلوة..

.
وهذي صورة لأقرب مول عندنا, فيه كل شي الحمدلله وجنبه كارفور,, والمدينه اللي سكنا فيها إسمها سوبانق جايا حلوه وفيها كلش الحمدلله,, لكن عيبه يسكر من 10 تقريباً,, حلّة بن دايل واسواق العويس تجلس اكثر منه هههه

.
هذي صورة لشوارعهم ومنظر الغيوم قبل ينزل المطر..
دول ينزل المطر عليهم كل يوم وبعد ساعه تختفي اثاره.. من روعة التصريف..
ودول يصرف عليها ملايين الملايين فالتصريف.. ويغرق عندهم نفق ويطيح سقف جامعات وبيوت ومدارس وتطفح السيارات ويموتون أوادم.. ويقولون/ قضاء وقدر!!

.

.
.
.
.
مـ][ـخر][ـج
.
خسارة أنت والدنيا عليّا..
تكابر والزمن مثلك يكابر..
.
حبيبي كل من حولي ظلمني..
وتبغاني بعد هذا ما أسافر؟!
.

.
.
.
هذا اللي عندي دلوأتي وان شاء الله القادم يكون احلى واجمل,,
لكن اعيدها مره ثانيه دعواتكم بالتوفيق وان ربي يسهلها علي الفتره الجايه,,
ولكم مني جزيل الشكر والتقدير,
وعذراً ع التنسيق بس لاب توبي فاضي مافيه برامج ولا صور, بس ان شاء الله الجزء الجاي من الموضوع بيكون تنسيقه احسن من كذا, لكن ان شاء الله هالختم الأحمر المتعوب عليه يكفي ههههه
 

كان معكم من وراء المايك:
بدر نقشبندي<يعني اني نبيل نقشبندي معلق الكوره..
وشسمه بدر الشوق
وفي رواية:
أبو سعد
ومن ماليزيا تغير اسمي وصار:
حكيم أرشد
ولكم منا كل السلام.. في الختام..
سبحانك اللهم وبحمدك, أشهد ألا إله إلا أنت, أستغفرك وأتوب إليك,

.
.
مدونة بدر الشوق:
هـنـا

تابع جديد رسائل المجموعة على تويتر

twitter.com/AbuNawafNet