{ بالصور وبحدعشر نفر .. نواصل رحلتنا لبرشلونة }

وصلني عدة استفسارات عن التكلفة للشخص وعن الأمور المادية .. لكني ماقدرت اعطي اجابات مفيده لعدة اسباب اولها ان المبالغ دفعتها على اجزاء ولا اقدر اتذكر الإجمالي بالضبط كم يوصل ..
أما السبب الثاني وهو اختلاف المصاريف من شخص لآخر .. يعني في نفس رحلتنا ممكن واحد دفع اكثر من الثاني بكثير على انها نفس المده فلذلك كل شخص ادرى بنفسه هل هو يصرف او لا .. وكأمثله لو ناخذ المواصلات ممكن الشخص يصرف ألف يورو على المواصلات ! أو ممكن انه يصرف اقل من مية يورو عليها وهالشي يختلف بين الي يستخدم التاكسي او الي يستخدمون مثلنا الميترو او الاندرجراوند وهو الاقل تكلفه طبعاً .. لكن بنفس الوقت العائلة خصوصاً الخليجية يمكن صعب عليهم الميترو لكن كـشباب لو على حمير تكرمون ماعندنا مشكله نركبها ونروح هههههههههه
وايضاً شغله ثانيه الأكل فيه ناس تحب تاكل في مطاعم الفاست فود مثل برجر كنج وماكدونالز وناس ثانيه تحب تجرب وتكشخ بالمطاعم وماتهتم بالثمن بقدر الأكل نفسه ؛
فـ موضوع الصرف يختلف من شخص لآخـر وبالاخير التكاليف شطاره كيف تحصل الافضل بأقل الاسعار ؛

وهالشي يخليني أأسف على حقيقة اشوفها دائماً في المسافر الخليجي وهي الخوف او صعوبة الاعتماد على النفس .. يعني تقوله تعلم على الميترو ! يقولك لا والله صعب خليني على التكاسي اسهل .. تقوله جرب خطوط الطيران الاقتصادية دامك في رحلات قصيره ! يقولك لا لا اضمن لي اسافر على الطيران الفرنسي ولا السعودي .. وعلى هالحال لو تقوله رح اشتر مويه يقولك مويه ؟ شلون يعني شقوله ؟ متى ؟ كيف ؟ طيب لو طلع لي صورة بنت وقالي تبيها وش اقوله ؟ خخخخخخخخخخخخ فـ أرجوكم ياعالم وخصوصاً الشباب الي يسافرون لحالهم بدون اطفال وعائلة .. التجربة مافيها شي طالما انت شاب ومافيه احد ينخاف عليه معك فـ جرب لو تضيع اليوم بكـرا ماراح تضيع لو تتصفق اليوم بكرا مش حتتصفق ههههههههه ؛

وبرضوا بعض النصايح للمسافرين في اثناء رحلتهم وأهمها نقطة وهي المظهر البعض للأسف من ربعنا لما يطلع في دول برا كأنه يقول للناس شوفوووووني ترا انا غني ودولتي فيها بترول .. يعني تحصلونه لابس كبك مع التي شيرت من الفشخره خخخخخخخخ , فـمظهرك عزيزي المسافر هو مايحدد كيفية تعامل الآخرين معك .. انا ما اقـول تفشخرو ( عجبتني  ) ولا ايضاً اقول اطلع بفنيلة علاقي وبزبيريات .. إنما حاول تشوف اهل البلد وزواره كيف لبسهم وتصرفهم وصلح مثلهم حتى ماتحس انك منبوذ في الخارج ؛ والأهم لا تجلس تسحب معك كل فلوسك واوارقك الرسميه والجواز ورخصة السواقة حقت السعودية وصورة شغالتكم .. يعني انا استغرب من الي يشيل معه بطاقة الأحول في جيبه وهو في مدينة خارج البلد !! انما فكر كم بتحتاج اليوم كاش وحطه معاك و الباقي اتركه في مكان آمن .. وانصح بوضعها بين الملابس الداخليه ولا الشرابات هههههههههههههههههههههههه والي بيسرقها من هالمكان ماهي حسوفه عليه ؛ وكمان اذا جيت مثلاً تحاسب في مكان لا تجلس تنثر دراهمك قدام العالم يعني تشوف الواحد حسابه يورو ونص ومطلع على الطاولة ألف يورو فراطه ! وآخر شي مايخالف يا أمتنا العظمى تناظرون الناس لكن نظره وحده وخلاص مو تنسى الي معك منهو من كثر ما انت تسوي سكان للمكان و العالم الي فيه .. صح ان الشقار زين بس ولو شوية ذوق  ؛

وآخر نقطـه قبل مانبدأ .. الغلطه الي دائماً أكررها هي الكاميرا دايما اقول مايحتاج كاميرا ويكفي كاميرا الجوال وهالشي خلا الصور قليله جداً الي صورتها وماعندك احد الصفاوه .. لكني استعنت من النت بصور للاماكن الي ماعندي لها صور حتى ادخلكم الجو <<– شدعوه بنحشش ؟  .. يالله نكمل رحلتنا لا الظاهر الصور مو طلعت الا تعتقت بعـد ..

وقفنا عند السكن في الجزء الماضي .. و طبعاً كـ سكن محجوز عن طريق النت وكمان شقه .. فمن الطبيعي الواحد يتخوف منه ووش بيطلع وهل بيكون مناسب للجميع او لأ , الا ان الصدمه كانت ايجابيه لما شفنا السكن ! شقه كامله مكونه من خمس غرف نوم وصاله وملحقات الشقه كلها مؤثثه بالكامل من إيكيا وكأنك في اورلاندو الامريكيه مو برشلونة الاسبانيه .. وهالشي طبعاً سببه مالكة الشقـه الي صارت امريكية من حظنا بالتالي كان ستايل الشقه بالكامل رائع ..

وموقع شقتنا كان في منتصف المدينة تقريباً على شارع فالنسيا ويبعد دقائق من شمال الداونتاون أو المنطقه الي تعتبر مركز المدينة , و العمارة الي كنا في دورها الرابع او الخامس المهم انه الاخير كان فيها شقتين في كل دور ومافيها غير اصانصير واحد وصغير .. مما يعني بحسبه بسيطه لو كل شخص بيستخدمه علشان يطلع بعفشه للدور حقنا نحتاج اليوم كله ههههههههههههههه .. فـكان ضروري نتركه لأصحاب الاوزان الثقيله ونسحب شنطنا بالدرج .. وبرجع اتكلم اكثر عن منطقتنا الي ساكنين فيها من خلال الاحداث الجايه ؛

 موقع الشقة على الخريطه

والحين السؤال كيف بنروح ونجي في المدينة ؟

مثل أي بلد اوروبي ثاني فيه الميـتـرو الي هو قطار الانفاق والي يوصلك لأي نقطة في المدينة .. مع مراعاة طبعاً عامل المشي الله لا يهينك من المكان لمحطة الميترو يعني مافيها مثل خط البلده وين ماتكون تلقاه .. ومقارنة بميتروهات العالم او الي شفتها على أقل تقدير فهو جداً معقول وخصوصاً من ناحية الأمان وايضاً من ناحية التوقيت والتنظيم فهو مميز .. ففي كل نقطة توقف للميترو تحصل عداد وقت تنازلي يوضح كم المتبقي لوصول القطار القادم .. لكن السلبيه الوحيده انه حررررررررر يسمعون بالتكييف يعني لو تجلس خمس دقايق في انتظاره خلاص تخيس ؛
ومع الميترو دائماً تحصلون المتعة خصوصاً لما تكونون 11 شخص يمشون ورا بعض مما يعني احتمالية ان الأول ركب الميترو و الاخير توه ماطلع من الشقه ههههههههههههههه .. فمسكين يالاخير لو قرر الأول انه بيلحق على الميترو لانه نصف دقيقة يمكن هي المدة الي يفتح فيها القطار ابوابه وبعدها وصل ربعك او ماوصلوا ماله شغل ماشي ماشي ..
عاد في البداية كنا ننتظر لين يوصل آخر واحد الي جالس يسحب رجلينه بعدين نركب سوا .. وهالشي خلانا مثل الدلوخ العالم تركب وتنزل بسرعه وحنا نفوته وننتظر الي بعده علشان نركب سوا وبإنتظـار آخر الناس .. والسبب للأسـف الي ذكرته ببداية الموضوع صعوبة الاعتماد على النفس ؛
فـقررنا انه خلاص اذا وصل اول الناس للميترو وهو توه موقف يعطي الي وراه خبر انه يالله اركضوا خخخخخخخخخ وماعلينا يلحق الاخير ولا مايلحق .. وهالشي فعـلاً تم وبعد ماسحبنا على آخر القافله في البدايات .. بعدها صاروا هالأخيرين اول الناس من الروعه يركبون الميترو .. حتى خطر انهم يركبون محل السواق من الحماس ؛
الميترو طبعاً له وقت محدد يقفل فيه بالليل وهو 12 او 1 ما اذكر لكنها تزيد ساعه بالويك اند .. فـ الي يحب يسهر او يتأخر عن موعد آخر قطار من السهل تركب اي تاكسي .. أو حتى تمشي على رجلينك بعد مافيها مشكلة طالما معك عدة اشخاص ؛

.. واترككم مع هالكم صـوره للميترو مع التعليقات 



 

وين كان أول مشوار ؟ وثاني وعاشر مشوار ؟ وأحلى مشوار ؟

على قولة ابونـوره كل اجاباتك انا لا تسألي

 اجابات السـؤال مكان واحد وشارع واحـد .. الرامبـلا

بعـد ما تعرفنا الحين على اهم وسيلة مواصلات في المدينة .. باخذكم معنا في مشوارنا الأول بعد ماوصلنا لأهم شوارع المدينـة وابرزها وهو الرامبـلا أو لا رامبلا مثل ماينطقونه .. أو شارع الرمله اذا بنترجمه للعربية

عموماً مالكم بالطويله وماظنتي يهمكم اسمه لكن ذكرته للي حاب يوزر المدينة فقط , المهم من قبل مانروح هناك الجميع كان متفق على ان الرامبلا هو اشهر شوارع مدينة برشلونة لكن فيه معلومة كانت مخيفه شوي ! أن الشارع بعد الساعة الثانية بالليل الشرطة غير مسؤولة عن أي سرقة تحصل فيه ! وهالشـي فعلاً كان مبـرر وبتعرفون ليش بس مو الحين

نرجع للرامـبـلا الشارع الأطـول في المدينة .. والي يتكون من رصيف واسع بالنص وطوال الطريق الأشجار العملاقة تظلل المشاة فيه ومتفرع من الرامبلا شوارع فرعية فيها ساحات او محلات .. وطوال ما انت تمشي في الرامـبـلا يمينك ويسارك محلات منها المطاعم ومنها للتسوق وغيره .. لكن أغلبها يتمثل في محلات رياضة صغيرة جداً يسيطر عليها العمالة الهندية و الباكستانية ومتخصصين ببيع ملبوسات برشلونة الفريق لكن تقليد !! بالإضافة لتذكارات واعلام تي شيرتات بمختلف الأشكال و الأنواع .. وهذي المحلات فعلاً من أغرب ما لاحظته على المدينة والي بدون مبالغه تزيد عن الخمسين محل وفي كل واحد فيها مالا يقل عن ثلاث او اربع بنغاليين والمحل كله مايشيل ولا ثمانية اشخاص ! ولي رجعة للعمالة هذي ووش سالفتهم لكن بعد مانكمل جولتنا بالشارع .. والي على الرصيف بالمنتصف المخصص للمشاة تترامى أكشاك بيع الجرائد و المجلات .. بالاضافة للعشرات من الباعة المتجولين ومثلهم من الرسامين والكثير من الاستعراضيين وكل ما يخطر في بال السائح راح يجده في هذا الشارع .. واتركم مع كم صورة حتى تتصورين بأنفسكم المنطقة

وعلى ذكـر الرسامين والي اعجبوني كثير في منطقة معينة من الشارع ينتشر عدد كبير من الرسامين يمينك ويسارك بمختلف اتجاهاتهم فالبعض يرسم رسومات كاريكاتيريه والآخر رسوم فعلية و البعض مفهي يرسم شجر ولحد معطيه وجه .. وكل واحد فيهم يرسمك بسعر معين تبدأ هالاسعار من خمسه يورو وتصل للخمسين و أكثر .. وطبعاً حسب سرعة الرسم ودقته فبعضهم يرسمك في دقيقتين رسمة استهبال وياخذ عليك مبلغ زهيد والآخر مثل واحد تركنا عنده صاحبنا جلس ساعه ونص ههههههههههه وخذ منه خمسين يورو و بالأخير طلعت خايسه الرسمه

عموماً بذكرهم حصلنا موقف في يوم من الايام مع احدهم وهو اللوح الي في هالصـوره

الرسامين متراصين جمب بعضهم بحيث مثل ماتشوفون بالصورة فيه ثلاث رسامين أو اربعة مو رسام واحد .. وكنا بعد الأخ الي بالصوره يمكن برسامين عند رسام كاريكاتير يرسمنا .. واثناء الرسم كنا نضحك بشكل هستيري على رسامنا وهو يرسم ربعنا خصوصاً انه يمحط بأبرز معالم وجهك في الرسمة فـ مايحتاج افصل اكثر هههههههههههه .. عموماً مع الضحك الناس انبسطو على الي صاير وصار فيه تجمع زغنطوط عند رسامنا المنسم وجالسين العالم يتفرجون على الرسم .. وفي هالاثناء بيكاسو زمانه الي بالصوره من الرسامين الي يرسمون رسم تصويري يعني مافيه كوميديا بس محاولة لنسخ صورة الي قدامه للورق .. فـالأخ ماكان عنده احد مافيه الظاهر الا عجوز متورطه فيه ويرسمها خخخخخخخخ .. و حنا فالينها جمبه ونضحك ونتطنز على اشكال بعض بالصور وخوينا ينرسم .. وفجأة وقف الي في الصوره وقال بلغته العربية هيييه يا عرب هدوووء شوي شوي طبعاً الأخ عربي ودون ذكر لجنسيته !! انا فنجلت عيوني مثل مايقولون عسى ماشر ؟ وش هدوء والله لو انا داخلين متحف .. فـ رديت عليه بالانجليزي <<– كل هالسالفة علشان يقولكم انه يحكي انجليزي .. المهم رديت عليه انجليزي فيما يبينا نحاكيه عربي .. وقلت له الفقه بس هالمكان عام وللترفيه ومسموح فيه الضحك واللعب وكل شي .. تبي تتفنن يا بيكاتسو تقلع في مكان ثاني وارسم على هدوء يالماصل خخخخخخخخخخخ .. طبعاً كل شوي كان يذب كلمة عربي ولا عطيته وجه ومسكت خط انجليزي لين العالم حقدو عليه وتضامنو معي بما انهم مايدرون وش هو يقول .. وعطوه نظرات حقد بلع بعدها العافية وجلس يكمل رسمته الماصله وحنا كملنا ضحك وبأسف على وجود عربي مثل هذا في مثل هالمكان

عموماً اواصـل الحديث عن الرامبـلا .. والي نسيت اقولكم انه يبدأ من ساحـة بلازا كتلونيـا الواسعة والي اكثر احتفالات المنطقة تكون فيها .. ويتجه نزولاً بشارع الرامبلا بإتجاه البحـر حتى تمثال وميدان كولومبوس ومن بعده البحر الي ينقلك جسر مشاة من فوقه لمجمع تسـوق مش بطال عبارة عن دورين وفيه محلات حليله للي يحب التسوق ويمتد على امتداد هالبحر مجموعة اماكن سياحية بذكرها بالقريب ان شاء الله .. وهذي صـورللي ذكرته

تمثال كريستوف كولومبوس والي تشوفه من طوله من اغلب مناطق المدينة

ويعتبر نهايـة الرامـبـلا

ساحـة بلازا كتلونيا والي يلتقي فيها أكثر من شارع رئيسي من ضمنها الرامبلا

ودام جبنا طـاري ساحة كتلونيا .. اتذكر موقف حصل معنا في هالساحة كنا واقفين انا وواحد نصـور .. فـ جانا شخص كبير بالسن شوي عرض علينا انه ياخذ لنا صـورة جماعية انا وياه فـقلت اوكي وعطيته الكاميرا .. بتقولون سرق الكاميرا وهج ؟ خخخخخخخ لا سلمكم الله  .. المهم بعد ماصورنا الرجال شكرناه ويوم جينا نمشي قال مع السلامة بالعربي ! وقالنا معلومة خطيره انه درس العربي في مدينة نابولي الإيطالية .. ان الجامعة هناك تدرس العربية .. وفي هالوقت كانت باقي القافله توها واصله فخقينا على الشايب ههههههههههه وبدا يعصر عمره وحمر وجهه يحاول يجمع كلمات عربي وسولفنا شوي عن البلد وكذا .. وعاد يوم جينا نروح قالنا اااااااااا اممممممممم يحاول يطلع كلمة بعدين قال أنت ديوث هههههههههههههههه وحنا بدينا نطالع في بعض ونضحك عليه ونقوله عيب ومن هالكلام وهو اول ماضحكنا عرف انه كع بالكلمة وقال كلمة غير المقصوده وجلس يتأسف ويتأسف ويحاول يرجع الكلمة الي يبيها ماقدر حتى مع محاولاتنا معاه .. بائت بالفشل واعتذر بالانجليزي وراح 

مشينا شـوي يمكن خمس دقايق قطعنا فيها الساحة رايحين للرامبـلا .. الا واحد جاينا يركض من بعيييييييييييييد ويقول لطيف لطيف لطيف هههههههههههههههههههههه طلع هو صاحبنا الشايب تذكر الكلمة الي كان يبي يقولها وجلس يدورنا والحمدلله لقانا وقدر يوصلها

الواجهة البحرية .. وفيها الجسر الي يربط الواجهة بالمنطقة الي تشوفونها وفيها مجمع التسوق ومجموعة مطاعم .. و في نفس هالواجهه فيه رحله حلوه بواسطة البوت تاخذ فيكم لفه مدتها ساعة او نص ساعه حسب اختيارك .. تكون تمشي فيها بموازاة الواجهة البحرية للمدينة وطبعاً واجهة المدينة البحرية ما تقتصر على الي ذكرت فوق إنما فيها اماكن كثير راح اذكرها مستقبلاً وماتكلف الشخص اكثر من 6 يورو .. وماشاء الله اول ماركبنا البوت وابعدنا شوي طلع في وجيهنا مركب عليه علم السعودية ومكتوب بالإنجلش برنس عبدالعزيز بن فهد .. يعني واصلين هههههههههههههه

أرجـع للرامـبـلا والي احب اذكـر انه مو رحلة وحده إنما مشوار شبه يومي نروح له بعد انتهاء اي مشوار لنا في اليوم .. فمثلاً اذا بغينا نتغدا او نتعشى نتوجه بشكل تلقائي للرامبلا إلا ماندر .. وبعدها نختار في الرامبـلا المطاعم الي تناسب كل واحد فينا , ونفس الشي لو طلع معنا في اليوم ساعه او ساعتين فاضين نتوجه فيها للرامـبـلا للتمشيه .. لذلك الاحداث الي ذكرتها وراح اذكرها مستقبلاً ماحدثت في يوم واحد او أول يوم انما تحدث طوال ايام الرحلة .. ولا تهون محلات الآيسكريم في الرامبلا عندهم شي رائع حتى ولو انه يجيب البرد

والآن صـار لازم اخـتـم لانـي تعبت والله هههههههههههههه لي اسبوعين اكتب الرسالة وشكلي طولت عليكم فـ ننحاش عن المـلل .. واوعدكم باجزء قادمه راح اكمل فيه الحديث عن الرامبـلا ووضعها في الليل .. وباخذكم للمعالم السياحية بالبلد الي للآن ما تطرقنا لها ولا تهون المناطق المميزه وايضاً بسولف لكم عن رحلاتنا وكل شي في الرحلة <<– ابن بطوطه

اعذروني على الإطـالـة وعن اي خـطـأ لاني ماقدرت حتى اراجع الرسالة غير مره وبشكل سريع

أطـيـب تحـيــة .. أديــوس

Yazeed