شوفوا هذا المشهد – وخفضو الصوت لأنه فيه موسيقى – .. هذا المشهد بالنسبة لي أعظم مشهد درامي سعودي حتى الآن..
هذا المشهد من مسلسل اسمه (ليلة هروب).. قصته واحد يطلع هو وزوجته الحامل للبحر يتمشون ويركبون لنش او قارب وينسى شي في الشالية وراح بيجيبه وزوجته في القارب داخت وانطلق بها القارب – الظاهر فيه جني – مدري كيف انطلق بها المهم انه دعس بها في وسط البحر .. ورجع لها لقاها في وسط البحر وقام يصارخ هو والمقوصر اللي لابسه (يانججججوى يا نججججوى) … والله يا جاء على المقوصر ذب.. الظاهر مابقى سعودي ماقلد هالمشهد ذيك الايام..
مع اللخمة انحاش وجت الشرطة واتهمته بانه قتل زوجته، طبعا امداه ينحاش برا البلد وراح مصر.. وتعرف على ناس هناك وطلعوا عصابة وكالعادة عند المصاريا لازم دور الشرير يطلع واحد مسوي انه مدرك الوضع ويضحك ضحكات شريرة وحتى الاسم مدري وش يبي اجل اسم الشرير (مزراحي) ههههههه تحسه اسم ثاني للمساك -اعزكم الله- هههههه ماابي عاد احرق عليكم المسلسل <<< على اساس بتروحون تشوفونه … اصلا حتى لو رحتوا ماله مقاطع في يوتيوب هههههههه كيف التشويق؟ …
المسلسل كان من بطولة الممثل السعودي الكبير (محمد حمزة) .. وحصد في وقته نجاح كبير جدا .. صحيح اننا في ذاك الوقت ماعندنا الا القناة الاولى والثانية وبعد المناطق قناة وحدة بس .. لكن على الاقل قدمو مسلسل ناجح.. صحيح ان الممثلين الحريم وبعض الرجال موب سعوديين وكلامهم مكسر ودك لو يتكلمون بلهجتهم الاصلية عشان ماتنزعج اذنك هههههههه … بس يكفيهم انهم قدموا قصة درامية جميلة .. صحيح ان محمد حمزه مابقى احد في عايلتهم ماجابه في المسلسل … على طاري عياله .. محمد حمزة يتميز انه في كل اعماله لازم يجيب عيال لؤي ووائل .. ليه ماادري بس مااذكر اني شفتهم في مسلسل ثاني الا واحد من عياله طلع مؤخرا في مسلسل مدري وشو …
حتى فيه مسلسل ثاني لايقل تميز عن الاول اسمه (أصابع الزمن)
هذا المسلسل قصته ان واحد اناني اسمه اسعد (محمد حمزة) يهمل زوجته وعيال ويتزوج وحده ثانية ويتشتتون عياله وواحد منهم يضيع وتلقاه عايله تونسيه راحت به لديرتهم وبعد سنييين رجع عشان يسوي بزنس في السعوديه وبالصدفة سبحان الله يسوي البزنس مع شركة اخوه وبالصدفة سبحان الله اخوه يصير معلق لوحة فيه صورهم وهم صغار في الشركة .. اعنبوا بليسك من عرفت عمري ماقد علقنا صورتنا في البيت عشان نعلقها في الشركة ههههههه .. وشاف صورته وهو صغير وقال هذي صورتي وانا صغير ( تخيلوها بلهجة واحد موب سعودي غصب يحكي سعودي ) المهم يتعرف على اهله ويندم الابو ويصيرون حبيبين اخر شي والحياة تصير حلوة ..
اللي استغرب منه محمد حمزة موب يطلع في مسلسلات مع احد ثاني .. لازم هو البطل .. وله مسلسلات كثيرة موب بس هالاثنين .. بس هذي ابرز شي له .. بس بصراحة كان يقدم مسلسلات قوية في وقت ضعف الانتاج وضعف القنوات المنافسة … الخ .. وهذا يدل ان الانتاج الدرامي موب لازم يكون مكلف وان الاهم ان القصة تلامس الناس واحاسيسهم ..
وش افضل لقطة درامية عندك؟
هههههههه انت من وين احيت هالمسلسل.. وقته كان عمري تسع او عشر سنين
لكن اذكر اني خفت وقمطت يوم طاحت حرمته ورزحت ف القارب وشكلة وهو يركض ههههه
فيه مسلسل ثاني بدوي مطرب فواز ومدري من معاه لكن اشتهر المسلسل بمقوله : ايه ي حزم الضامي وانا ورع يسولفون لي عنك
هههههه اثري انا ههههه
ابشر بمسلسل حزم الضامي إن شاء الله قريبا