ذكريات: أحد بيجرني؟

من يذكر البيجر؟ ههههههههه اووووم الخطمة ههههههههه

من جد .. فيه أحد يتذكر البيجر؟.. بس قبل اسهب في موضوع البيجر خل أوضح وش البيجر للي مالحقو عليه.. البيجر جهاز صغير له  تتصل عليه ويطلع في الجهاز الرقم الي اتصلت منه ويقوم الي معه البيجر ويتصل بالرقم .. وغالبا تبدأ بعبارة (احد بيجرني؟) في بعض دول الخليج يسمونه (بليب) … فكرته سطحية جدا بس كانت في وقت من الأوقات مهمة .. سمعت أن الاطباء يستخدمونه للحين .. بس ماادري ياليت يفيدونا الاطباء عن هالموضوع.

الغباء في الموضوع ان الجهاز مامنه فايدة اذا صار صاحب البيجر ماحوله تلفون ثابت والا كبينه اتصال ( اوووه يبي لنا نشرح لكم عن الكبينه لأنها انقرضت هي بعد هههههه ) هذي هي صورة الكبينة عشان تتذكرونها ..

نرجع للبيجر.. كان الجهاز ذا ممكن يتقاط فيه خمس اشخاص او ست اشخاص وكل واحد ياخذ رقم بحيث بعد ماتدق رقم البيجر تحط بعدها رقم ١ او ٢ او ٣ وكل رقم لشخص ..

تحسبه رخيص ؟ لا والله الا كان غالي يوصل لألفين وفيها اول ماطلع كان فيه بيجر بيدأ ب ١٩ وكانت كميته قليله تلقى الناس مذابح عليه .. وبعدين طلع بيجر يبدأ الرقم حقه بـ ١١٥ .. كانو اللي معه ١٩ يبزون على اللي معهم ١١٥ وانهم اقدم منهم وانهم لاحقين على العز من زمان ههههههههه ياشيخ طير انت والعز حقك (<<< واضح انه كان منغبن هههههه ) ..

كان البيجر واحد من ضروريات الحياة عندنا رغم انه موب ضروره بس كذا حنا نحب نضخم الامور ههههههه شي كشخة لدرجة بعضنا يضيفه في البزنس كارد حقته ..

اللي معه بيجر بعض البياجر يجي معها حاجة سوداء عشان تعلقه بالجيب الجانبي كنها قضابة ملابس حبل الغسيل ههههه هذا اول ماطلع .. بس بعدين طلعت بياجر اشكال ثانية وكانت لها سلاسل وتعال شف البدع اللي يحط سلسلة ذهبية والي فضية والي عليها حرف .. ابد كنك تشوف اغطية الجوالات اللحين .. لدرجة كان فيه ناس يحطون سلسلة بدون جهاز بس يعنني معنا بيجر..

ياحبيبي عشان تطلع جهاز بيجر يبي لك تجمع مصروفك حق شهور، اول ماطلعت بيجر كان مع اخوي وكل منا له رقم انا رقمي ٢٧ مدري وش ذا المزاج حاط رقمي كذا .. المشكلة محد يعرف ارقام بياجرنا مايعرفه الا اهلي واذا دقوا على اخوي مثلا تلقاني اتصل عليهم انا يقالك يعنني احد مبيجرني .. المشكلة انهم يدقون من تلفون البيت وانا معهم في البيت هههههههه سباكة .. عاد بعدين طلعت رقم لحالي كشششششخة وش يعرفك ههههههه ..

طبعا ولأننا شعب مبدع وذو عقلية خلاقة طلعنا اختصارات للبيجر بمعنى لو حطيت لك ٩٩٩ معناها الاتصال ضروري جدا .. وغالبا هالضروري ( وينك ؟ ) .. تلقى راعي البيجر منخرش يدور تلفون وكل شوي قاط وجهه عند احد عشان يتصل واذا اتصل قال وينك تأخرت هههههه ..  اعرف ناس حاطين قائمة بالارقام ومعانيها يعني ١ يعني ارجع اتصل بي و ٢ يعني جب خبز و ٣ الوعد في المكان الفلاني وهكذا .. كان فيه مبدعين بصراحة يكتبون بالارقام كلمات مثل (I LOVE YOU) ومن هالكلمات ..  ايضا مع الوقت تطورت الشغلة وصارت الشركات تحط مع جهاز البيجر اختصارات معينة تخلي البيجر يكتب عربي مثل (اتصل حالا ) .. الخ.

عموما البيجر ماطولت فترته بسيطة ثم بدت تطلع الجوالات وكان الكشخة اللي معه بيجر وجوال أبو أنتل.. وطحنا في اسعار الجوالات الغالية وهذي لها سالفة لحالها بعدين اذا الله شاء و أراد..

ونحمد الله على نعمه الكثيرة التي لاتعد ولاتحصى ومنها نعمة الجوال والتطور التقني الي قرب البعيد .. الحمد لله رب العالمين من قبل ومن بعد.

الله يالدنيا .. معليش هذرت واجد .. من عنده ذكريات عن البيجر يوسع صدورنا بها ..

مصدر بعض الصور: جريدة الرياض