رحلة إلى مدينة بينانج في ماليزيا – الجزء الرابع والأخير

بسم الله الرحمن الرحيم
السلام عليكم ورحمة الله وبركاته
وأسعد الله صباحاتكم ومساءاتكم بكل حب ومودة..
وجعل أيامكم كلها تفاؤل وطموح وفلّه وكلش!! <خانه التعبير!
وشسمه, شخباركم ان شاء الله تزقحون وكلش؟
.
واحد يقول لي أني من تالي صاير أكتب مواضيع وكأني مستعجل فيها!! كأنك تكتب وأنت تركض!! ههههه
الموهم هذا الشي.. هذا آخر جزء من مدينة بينانج, أتمنى أني أعطيتها حقها وزياده..
حبيت أني أغطيها بالكامل مهوب مثل تغطية شركات الاتصال عندنا ويا أبراجها البايخه!!
والله يا عندي اتصال في البيت يشبك دقيقتين ويفصل خمس دقايق!! تحسّ أن الديل أب أسرع وأطلق!!
على طاري السرعات, والله يا هالزمن زمن تسارع الأحداث, وطالعين من قضية ل قضية!!
مدري من وين أبدأها لكن ناخذ على سبيل المثال ارتفاع الطماط ووصوله ل 100ريال للكرتون!! بعدين أرتفع سعر القمح!!
بعدها طلعت ثورة تونس, همّن مصر, همن البحرين وليبيا واليمن وسوريا…. ألخ
همّن جونا هالمتخلفين ب ثورة حنين.. وما طلع أحد فالشارع هههههههه.. بعدين أرتفع سعر الحديد!!
همّن جتنا قضية ارتفاع أسعار الشعير – زي كل سنه – وطلع الوزير وقال كلوا أندومي!! <يعني فيه تغيير شوي عن السنة اللي راحت, يعني لا تاكلون تبن هه!!
همّن جت قضية منال الشريف!! همّن سالفة وحش جدّه!! وألحين طايحين فـ الدكتور طارق الحبيب!! وبكرا فالهيئة والمطاوعة!!
صدقوني اللي يبي يصير كاش هاليومين يصير كاتب صحفي هههههههه القضايا عندنا على قفى من يشيل!!
وحنا مجتمع ما تخلص مشاكله للأسف الشديد!!
ألحين مجتمع منغلق وكله مشاكل, لو أنفتح المجتمع وش بيصير فينا؟ هههههه
المهم ما علينا من هذا كله, نرجع لتقارير السفر لعل وعسى تبرّد على قلوبنا شوي في هالحرّ المخيس!!
وعلى طاري المخيس, طلع تقرير قبل أمس يقول أن فصل الربيع بـ ينتهي وجمرة القيض تبدأ من الأسبوع الجاي, وان الصيف مابعد دخل!! وباقي على نهايته كم يوم, لذلك أنبه وأشدد وأندد وأهدد وأطالب كل عائلة سعودية يفلونها ويطلعون للبر ويستمتعون بالاجواء الربيعية المتبقية لدينا هههههه!!
وشسمه, التقرير اليوم بيكون غير شوي, المرات اللي راحت كانت أنشطة بحرية وتسذا! اليوم معظمه بيكون أكل وبلع وتسذا! فـ اللي جوعان الآن لا يكمل الموضوع, يروح يحشّي له خبيزه فيها جبينه وكويب حليبّه مع شُويهِي ويجي يتفرج!! <<مشروع شايب!!
بسم الله..

][مدخل][
.
الشوق ماله عمر, يفنى وينعاد..
له في الضلوع إن عاد وإن غاب رجفه!!
.
مع كل فرقى, له ورا الجفن ميلاد..
وإن ماتت الفرقى لقى الشوق حتفه!!
.
جيت أقتل الفرقى من بلاد لـ بلاد..
ملّ الطريق يشيلني فوق كتفه!!
.
وأنا بعد ملّيت من كثر ما أرتاد..
هالشارع اللي كان لك فيه شرفه!!
.
تظمآ عيوني شوفك, وتشبع سهاد..
عيّا الزمن يقطع ظماها بـ رشفه!!
.

][فطور ماكدونالدز][
.
هالجزء بيكون سفرة ثانية وخاصة, كان يرافقني الصديق والأخ العزيز أبوعبدالعزيز, وبيكون فيها أشياء جديدة وأشياء متجددة وإن شاء الله يكون خفيف لطيف..
بدايته ب وجبة فطور صباحية في مطار “طيران آسيا” KLCC

][فندق فلامنجو][
.
وصلنا الى الفندق في مدينة بينانج, كنا متفقين مع سائق خاص, وكانت سيارتهم حاطين عليها علم السعودية! طبعاً كان سائق السيارة إمرأة والعياذ بالله, تخيلوا حرمه تسوق؟؟

من شفت علم السعودية واللي تسوق حرمه بديت أشك بالعلاقه بينهم وبين منال الشريف!!
المهم أننا من ركبنا أنواع المضايقات وكل شوي جاي واحد جنب السياره ويغازلها ويتميلح عليها!! لدرجة كنا بنوقفها ونطلب سائق رجل!!
وصلنا للفندق الحمدلله بعد معاناة كبيرة وتسذا مع الشباب الهمج المغازلجية الغير متربّين!!

صورة لبهو الفندق الجميل..

المسبح المطل على البحر <حلوها عاد ههههه!!

البار , والعياذ بالله!! ذكرت بعض مقاهينا يحطون “هالبطول” في الواجهة ويقولون عصير تفاح!! أو أقل شي يقولون فاضيه!! ههههه

طلعنا لغرفة النوم وكانت هذي إطلالتنا الجميلة..
ألعاب الأطفال.. مهوب الحدايق اللي في حواري الرياض!! اول مره اشوف حديقه مافيها شجر ولا عشب!! والشجره الوحيدة اللي عايشه للحين تجيب الحساسيه ههههه!! المراجيح مكسره!! الكراسي مافيه!! الرمل وصخ!! العشب يابس!! الحارس طالع ومقفل الحديقه دايم!! والأمانة فقدت الأمانة ونامت!!

الشاليهات البحرية.. ولحدّ يقول لي مافيه شاليهات بريّه!! هذي هي موجوده في الثمامه!! شاليهات على 1500 تطل على مسبح وصخ وثيّل أصفر!!

المشي على البحر.. طبعاً سبحان الله ذكرت بحر جدّه ونظافته وكذا!!

الدبابات البحرية التي امتلأت بها المنطقة الشرقيه وكورنيش الخبر بالذات!!

إطلاله تذكرنا بالفيصلية والمملكة!!

نرجع للمسبح اللي تطل عليه من داخل المطعم أو الكوفي كما يسمونه الماليزيين..

دخلنا لهذا الشي..

الفطور.. بوفيه مفتوح..

بيض مقلي, في الهواء الطلق..

فطورنا الكويّس بعد ما جلسنا برّا..

أنا أخذت بيض مسلوق.. يعني يحطونه فالمويه وكذا لما يستوي.. المهم كان وللأسف الشديد نص إستواء..

,
بعد الفطور طلعنا للغرفة نخمد للظهر..

][فاصل][
.
لا وجهك أسقاها, ولا ذاقت رقاد..
ما غير طيفك, طيفك اللي أعرفه!!
.
كنّه ظبي, وعيوني ظلال صيّاد..
يجفل قبل يرتدّ للجفن طرفه!!
.
مشكلته أنه كل ما أشتقت يزداد..
حتى ملآ جدران وقتي وسقفه!!
.
وأصبحت أشوفه فـ أول الغين لا جاد..
وفـ أقصى الشفق لا طاحت الشمس خلفه!!
.
وفي الأرض لا نامت عقب صوت رعّاد..
وفي كل شباكٍ صحت منه درفه!!
.

][غداء ماليزي][
.
صورة أبعد ما تكون عن الفوتوغرافيه لكن هي محاولات وخرابيط وتسذا!! ولا تدققون بالجوال طالعن بالغلط!!

شوربة الفطر لذيذة أوي – نصحني فيها خويي يوسف ^_^

الطبق الرئيسي, إسمه “ناسي قورن أيام” وهو طبق ماليزي عبارة عن أرز مخلوط معه خضار ودجاج وذرة وبعضاً من الأشياء التي لا أدري ما هي!!
جاء مع هالطبق ربيان مشوي, وقرص مدري وش اسمه بس يابس, وبيض عيون, وساتيه “يعرفونه أهل الحجاز” وهو عبارة عن دجاج مشوي وتسذا, وبعضاً من الخرابيط الأخرى!!
الزبده مايصلح لكم أبد هههههههههههه,, ينفع للي عايش ف ماليزيا وأكل من الأشياء اللي ما تنوكل!! بيطلع هالطبق عنده “كافيار الشيوخ” ههههه

][عودة لمحل القهوة مرةً أخرى][
.
بعد ما شفت الحماس مع محل القهوة واللوحات والذكريات اللي كانت مكتوبة, قررت أخليه ضمن جدول رحلتنا وأصور لكم الذكريات كلها اللي ما أنعرضت!!
قهوة لذيذة جداً جداً صدقوني <<قولي قسسسسم!!

أرحبوا يا عرب, لا تفوتكم القهوة, أشتر وأنت مغمض, ما تلقاها في ديارنا<< مركزين على العرب بشكل ماتتصورونه!!

ياهوووهـ لا تفوووتك القهوووهـ <<أقدع يا راقل!!

هذا المكان رائعة جداً, وكل بياعين يتكلمون عربية <<من بعد هالكتابة حسيت أن الماليزيين كاتبين نص اللوحات!! ههههه

جربوها.. شوكولاته صدقية <<توني أدري فيه شوكولاته كذبية!! ههههه

لاتنسى تعزمني لا رجعت الرياض <<أبشر والله!!

إلى كل من زار هذا المكان, رجاءي لا تنسوهـ أبداً << يصير خير ان شاء الله!!

أفضل قهوه جربتها عندهم هي التراميسو.. بعض القهوات مضروبة ترى, وبعضها مايفرق عن النسكافيه شي!!

وتقولون السعوديين ماعندهم رومنسيه؟؟ مظلومين والله ههههههههههه!!

][مخرج][
.
أتعبت طيفك لوم, واللوم ما فاد..
ويوم الأمل في شوفتك مات نصفه!!
.
نويت أسافر عنك بجروحٍ جداد..
وعمرٍ من أوراق الزمن حان قطفه!!
.
نويت, لكن جابني الشوق منقاد..
وجابك حنينك, والزمن سال عطفه!!
.
شفتك تبسّم لي خجل مدري عناد..
وفي نظرتك شوقٍ من الظلم وصفه!!
.
حسّيت كني طفل, وعيونك أعياد..
يا عيدي اليل له ورا الصدر رجفه!!
.
سمّ اللقاء صدفة, وأسمّيه ميعاد..
أنا أنتظرتك, وأنت مرّيت صدفه!!
.

][خاتمة][
.
بهذا التقرير ننهي معاً الجزء الرابع والاخير من مدينة بينانج, أتمنى أن التقارير كانت مفيدة وأسلوبها شيّق وغير ممل..

الجزء القادم بيكون عن جزيرة لنكاوي, بحاول أختصر فيه قدر الإمكان, ولأن الصيفية جايه ان شاء الله, أتوقع نص السعوديين مهاجرين على ماليزيا وتركيا “حسب إفادة بعض المكاتب السياحية”!!
ملاحظة:
ترى فعلاً الحرمة كانت تسوق بنا السيارة, لكن ما شفنا مضايقات ولا ملاحقات ولا أشياء علمانيه مدري تغريبيه وتسذا!!
كل اللي شفناه إحترام, رحنا وجينا معها, كانت محترمه معنا, وكنا كذلك معها أيضاً..
.
شكراً للخالة سباكه خاتون ع الكلمات..
وشكراً للجدة ريحانة ع التصميم..
.
سبحانك اللهم وبحمدك, أشهد ألا إله إلا أنت, أستغفرك وأتوب إليك..
اللهم إغفر وإرحم من هم تحت التراب, وأسكنهم فسيح جناتك يارب العالمين..
وإشف وعاف من هم فوق التراب.. وإجعل ما أصابهم تكفيرٌ لهم يا ذا الجلال والإكرام..
اللهم صلي وسلم على سيدنا ونبينا محمد, وعلى آله وصحبه أجمعين..

تابعوني:
مدونة بدر الشوق
www.b-alshoq.com
بدر الشوق على التويتر
كتبه وأملاهـ:
باء نقطة شين
بدر الشوق
.
شكراً لمتابعتكم..
أحبكم يآ مخيسين..