الجحاده .. وما أدراك مالجحاده .!! 
لها سنام طويل وقدام كبيرة تسمى حوافر 
… << معليش شكلي تحمست وتذكرت حصة التعبير 
.!! الموضوع الوحيد اللي اعرف اعبّر عنه الجمل 
.. مدري ليش احس بيني وبينه علاقة حب وطيدة .!! 
المهم الجحادة لغير الناطقين بالقصيمية .. معناها إخفاء أمر واقع وحاصل .. خوفاً من عيون خلق الله 
.!! أو بمعنى أصح إخفاءه تسذا دباشه 
.!! الجحاده بهالوقت كل مالها تزود أكثر وأكثر ..! وبحكم إني انسان فاضي وما عندي لا شغل ولا مشغله ..! فقلت خل احلل العوامل الفسيولوجية المنبعـ << صب دم من حلقي ما عرفت انطقها 
.! وتم الاستعانة بصاحبي الله لا يعيدها من صداقه [ ابو راس 
] .. ليكون المساعد لي في دراسة هذه الظاهرة .. ! << عز الله ما فلحنا ..
أول شي لازم نوريكم مظاهر الجحاده .. فمثلاً حصيصة اللي هي أم ابوراس صديقي 
.. طبعا هي صديقة امي .. ولا اجتمعن الا عشان جلسة الصبحية وهالحش بهالعالم .. لدرجة انهن تسد قعدن يحللن الوضع الاقتصادي لمدينة نواكشوط …!! 
<< لا تسألونن وين هي به .!!
حصيصة تعتبر من أكبر أعمدة الجحادة 
.! لدرجة انه اذا اكلوا من مطعم ما تخليهم يجدعون الاكياس والقراطيس عند الباب .! لا تحطهن بكيس زباله اسود وتجدعهن .!! عشان محد يشوف من الجيران وش ماكلين 
.!! << لكن هيّن يا حصيصة جاب الله الانستقرام نشوف وش انتي طابخه .. الله يخلي بنتس هالدبشة كل شوي ترزز صور اكلكم .. << من أقوال أمي .!!
حصيصه يوم جت تبي تعرس بنته .. جاحدتن عن كل هالحريم اللي كانوا بالمؤتمر الصباحي .! وبدت تختفي لأنه منشغلتن مع بنته .. تسنعه وتضبطه .!! مع اني احس مافيه امل تحطه زينه هكالبنت 
.. كل عيوب خلق بالله .!! 
<< لا تعلمون ابوراس اني قد مريت من عند بابهم وكان مفتوح شوي امر اشوف .. وتوحش ويجين فوبيا من بيتهم .!!
الحريم ما دروا الا قبل العرس بيومين 
.. وزعلن عليه وتسذا وبدن ما يدقدقن عليه ولا يكلمنه بقروب الواتس اب 
<< طبعا هالقروب هو المؤتمر الصباحي ولكن بدوام ليلي ..! لمين اعتذرت منهن واعزمتهن باستراحة وعلى طول رضن عليه .!! احسن هذي الجحاده وما تسوي .!!
الحالة الثانية .. هي ام فهد .. ولده فهد الدبشة اللي كل عمرنا نضحك عليه 
.. جاب نسبة 98 بالثانوي .. وبشكل اتوماتيكي امه جحدت عن العالم كله .. حتى اقاربهم وقالت له لا تعلم اححد .. اكيد جا ببالكم حنا وشلون درينا .. !!
ابوفهد كعادته .. ضحك على تفكير ام فهد وقال له بكل صراحة [ اقول انثبري انتي وتفكيرتس السقيم .!] .. وعلم العالم كله باجتماع الحارة واجتماع اقاربهم .. بعد ما دريت اميمتي راحت للمؤتمر وقالت لام فهد مبروك نجاح وليدتس بتفوق .. بهالوقت ام فهد غصة بفنجال القهوة .. امر تقول اللي يبارك بايامتس 
.. لكن مب تقل الجو غبار خل اروح اشوف .!! << تبي عشان ما يتكلمن عن فهد ..!!
اجل لما تحمل وحدة .. اعوذ بالله حتى امه مهيب تعلمه .. العالم ما يدرون إلا اذا انتفخ بطنه .!! ومن زود التسذب تقول .. لا اصلا انا سمنت شوي .. توي على الحمل .!!
الى متى هالجححاده .!! يعني خلاص بطلوها .. وش هالحتسي واذا جحدت أو جحدتي وبعدين .!! بالعكس علموا العالم تفرح لكم .!!
لكن أهل الجحاده تعريفهم بكل بساطة .. أناس معتلّة اجتماعا .. لا يخطر لها إلا أن الناس تكترث لأخبارها وتهتم لأمرها .. بينما في الواقع .. مزلبينهم ولا جابوا خبرهم ..!
وهالحين ابرسل هالحتسي لام فهد وحصيصة .!! اقولهن اقرن وتعلمن .!! بس امي تقول لا لا ترسله لهن .. همن يدرون انك تكتب ويعطونك عين .!!!!!
عطون رايكم بالجحادة .. ومواقفكم اكتبوها تحت بالتعليقات سولفوا .. دمتم بخير .,,
ـــــــــــــــ
.. د.لايـف ..
[ يرجى عند النقل ذكر المصدر ]
[ مدونة د.لايـف @ Dr.Live’s Blog ]
– 
–
أول شئ جحدت إسمي ! 8) ثانياً بعض الناس والله يقهروننا بكل شئ يتكاثرونه علينا ! لو نطلب من بقالة !!! :~ بعذرنا لو نجحد عنهم ! وثالثا أمي تمشي على الحديث الشريف إقضوا حوائجكم بالكتمان << هذا إذا جيت تطلع من البيت تلقاه بلوحة مقاس 6*6 تصدق مره طلعنا لمطعم ويوم رجعنا قلنا لناس من قرايبنا جأ ولدهم وقال لآخوي قل لخواتك لاعمرهن يقولن هالسوالف لخواتي :$ المهم هذولا الناس جحدنا عنهم كل صغيرة وكبيرة دامهم تكاثروا علينا طلعتن لمطعم !! المهم هذا الي عندي عموما إذا الناس يجحدون والله لنجحد أكثر منهم 😀
عن نفسي ماحب اجحد كلشي اقوله ولاهمني الموهيم اني استانس واونس الي يحبوني معي ..واذاه عالعين محافظه عالاذكار الحمدالله وعارفه محد بيصيبني بشي دامي اذكر الله .. اجل الوضع على كذا ممل لا اخبار حلوه ولا شي كله جحد بجحد .. الحسد زايد بهالديره وزايده الخرافات تقل بنرجع العصر الجاهلي ونركب لنا عين تحمينا من العين خصوصا مع ذا الواتس وسوالف الحريم الكبار الي كلها انتبهو واحذرو …
ما نجحد إلا خوفاً من العين حتىئ ب الدرجات تخيل /ي تقولئ للأب أني أنا مأخذ بالمدرسة 98% بيضيق صدره وبعطيني عين بيقول بيحسسد ليه ولد الناس درجاته زينه ؤانا ولدي تسسسسود الوجهه
مشكوووور ..ويعطيك العاافيه . …. 😀
العين حق هذا لاشك فيه لكن ماتصل الجحادة لأقرب الناس الأشياء الخاصة بينك وبين الناس اللي تثق بهم. . أما المبالغة والوسواس فمرفوض لأنو بيوصلك لأنك تجحد عن روحك 😀
مع كل الاحترام الموضوع لم يعجبني
ماحب اجحد احد الا اذا كنت بموقف محرج اجحد لتفادي الاحراج او اجحد واحد فاقع تسبدي هههههههههه بس العجايز جحداتهن ارهابيه هههههه ياحبي لعجوزي الله يطول بعمرها وحبي لجحداتها المكشوفه ههههه مشكور اخوي صالح ع الموضوع الشيق تقبلو مروري باي
السلام عليكم .. انا حقيقه كنت مع نظام الي مايجحد لكن شفت الناس من جد يجحدون بالصغيره والكبيره وهذا الي اثر فيني وانا صار لي كذا موقف تخيل انا كنت اساعد واحد من اقاربي عن البحث عن وظيفه الى درجة اني حسيت ابحث لنفسي وظيفه وانا ماغير اراسله على ايميله وعلى جواله اعطيه الوزارات والشركات الي تعلن عن وظيفه على نفس مجال تخصصه ويوم من الايام عزمته على قهوه وجاء عندي ومن هالكلام وش صار عليك بالبحث عن وظيفه وهو يقولي الله ييسر وان شاء الله خير وجاء الوالد ودخل علينا وتكى معنا وبحكم ان الوالد طولي بعمره يشغل منصب باحد الشركات تم وعده انه يوفر له وظيفه قدر المستطاع والله انه طلع من عندنا وكان جايني يوم الاثنين واجتمعت معه يوم الخميس وقلت تراني ارسلت لك اليوم شركه تبحث عن نفس تخصصك قالي وهو ماوده يقولي وواضح من اسلوب كلامه اني حلصت وظيفه قلت انا ماشاء الله ومتى قال يوم الثلاثاء الماضي يعني ماشاء الله مخطط الرجال ومسوي مقابله وتم قبوله والوالد مواعده وانا ساعي له بكل لحظه ومع ذلك جاااااحد ولا قال اي كلمه انا بعدها غسلت ايدي منه ومن اشكاله وعندي كذا سالفه صارت معي مع نفس هالاشكال وبعدها صارت عندي قاعده عام الناس كما يعاملونك وماخفيك انا اتعامل بالجحاده مع ناس والعكس صحيح وهناك حديث عن الرسول صلى الله عليه وسلم (استعينوا على قضاء حوائجكم بالكتمان فإن كل ذي نعمة محسود)صححه الألباني في السلسلة الصحيحة 3/436 (حديث رقم 1453 ) لكن ماتصل لهذي الدرجه لان من يسعى لك بالخير فانه يتمنى لك الخير وليس بحاسدك صحيح ماذكرت بان بعض الناس فاهمه الجحاده دباشه!!
والله مالومهم مره كنا حاجزين وقلنا لقرابتنا بنسافر برا ؤحاسو سفرتنا وحاسو ابوي وبعده صرت اجحد كل شيء حتى شربة الماء لاحد يلومنا ناس زاد الحسد بهم وانتم الي تقولون لاتجحدون جربو ينحاس شيء لكم بتحرمون مثلي
اما انا بالنسبه لي فيه اشياء تستاهل اني اجحد وفيه اشياء ماتستحق الحين الناس اعووذ بالله صار فيهم وسواس من كثر مايفكرون بالعين لدرجة انه لو يطيح طفل من اطفالهم قالوا عين والمشكله ان الطفل شيييين يجيييب المرض وقبيييح يعني ماادري وشو الحلو اللي فيه علشان تصيبه العين يعني نكون واقعيين مو كل شي يجحد ولا كل شي يقال يعني على حسب الشخص اللي قدامك اذا هو من النوع الحسود فأنا اجحد اما ان كان من الناس الطيبه واللي تتمنى الخير فأنا اقول له