السلام عليكم ورحمه الله وبركاته
أسعد الله جميع اوقاتكم
قبل فتره زرت القرية التراثيه في محافظه المذنب
اعجبني ما شفته فيها منازل طينيه رممت واثثت وكانك تعيش في ذلك الزمان الماضي الجميل
نبذة عن المذنب من ويكيبيديا :
المِذْنَبْ, إحدى محافظات منطقة القصيم.
وهي الوجهه الجنوبية للمنطقة, عدد سكانها 70 ألف نسمة في 2010،
وتبلغ مساحتها ما يقارب (11800) كم²,
وتبعد عن العاصمة الإدارية مدينة بريدة ما يقارب 65 كم.
وهي من أشهر جهات القصيم الزراعية لتوفر المقومات الزراعية من تربة خصبة ومياه وفيرة،
وقد سمِّيت بهذا الاسم لأنه تلتقي فيها بطون الأودية فقد ورد في القاموس المحيط أنّ المِذنب هو مسيل الماء إلى الأرض.
طبعا الصور متواضعه لانني مو محترفه والتصوير على قد الحال بس حبيت تشوفوا شيء بسيط من هذه القرية اللي يمكن البعض ما يعرف عنها شيء صور بسيطه وما صورت القريه كامله لان فيها حاجات كثير ماقدرت ازورها واصورها لضيق الوقت
قرية المذنب التراثية
Al Methnib Traditional Village
صورة من قووقل لموقع القريه بالنسبه لمحافظه المذنب
اول ما تدخل للقرية تقابلك هالسيارتين القديمات
جينا بوقت كان العمال يشتغلون واكثر الساحة ادوات وقراشيع ماليتها الساحه تحتوي على دكاكين ومحلات للحرفيين لكن بوقت جيتنا كانت مسكره ويوجد بالساحه مجلس يجتمع فيه كبار الرجال من الحرفيين بالسوق بوقتها استحيت ولا صورت مجلسهم
بعض من المحلات الموجوده بالساحة اترككم معها
هنا نشوف المجلس خلف حوض السيارة اللي عليه الدرج
ابواب قديمة للمحلات
بعض من المعروضات بالسوق
مراكي خشب ومسامير قمورة ومرايا
سفر طعام ومقرصه وعكازات ودنانه
عاد الصور الجايه من داخل بيت يسمونه القصر والتصوير مو واضح
هنا المجلس وفيه الكمار(اللي فيه الدلال والرادو والاباريق) والوجار (مكان شب النار)
البيت اول ما تدخله تحس بهدوء وراحه لانه من الطين ولا فيه صدى زي بيوتنا الحين
الفاغره وهي تجويف بالجدار وضع فيها علب من البيبسي والتيم
وهنا وضع فيها المطابيق مفردها مطبقه (ما اعرف المسمى الحقيقي لهن اسال اللي حولي وما ادري صدقها من كذبها 🙂
رادو على ما اعتقد روسي
يجيب اذاعة لندن
مرش و مبخرة
غرفة النوم وفيها ملابس قديمه واثاث ومطرحه ومرايا مثل التسريحه الحين وحاجات كثيره ما اعرف اسمها
ماكينه خياطه ام فراشة موجوده بمكان بحوش المنزل هي والرادو
رادو من النوع الحديث نسبيا
كان فيه جصه بالبيت لكن الكام خذلتن ولا طلعت الصور والجصه مكان لحفظ التمر لمده طويله
وزرت المطبخ وهنا قبل ما تدخل له تحصل بزاويه موضوع فيها الرحا وهو طاحونه للقمح وبعض المحادر
المطبخ من الداخل
سفرة معلقه على الجدار ومثبته بغطيان قوارير البيبسي ديكور بسيط لتزيين الجدران
فرق عن هالحين 🙁
هذا الباب الله يكرمكم كانوا يسمونه قديما الصهروج(الحمام)
والدرج يوصلك لفوق للروشن بس ماصورته لان ما كان فيه اثاث غرفه فاضيه
نرجع للحوش وطبعا كان فيه الحارس وساعدنا اننا نشوف بعض الادوات
لقطه لخارج القريه من الاعلى
طبعا القريه فيها حاجات كثيره لكن لضيق الوقت ما شفتها
هنا القريه من الخارج
اعذرون لان التصوير موب ذاك الزين واكتشفت ان 95% من اسماء الاشياء اللي نشوفه فيها ما نعرفه 🙁
ارجو ان تكون مشاركتي خفيفه عليكم
لمحبي التراث بصراحه لاتفوتكم واللي عنده احد كبير بالسن وحاب يشوف حاجات الماضي يروح به لها
طبعا التصوير له مده واكيد تغيرت عن الصور الحين
ودمتم بخير
