الـســـلام عـلـيـكــــم ؛
إزيكو يا حلوين ؟ اليوم ناوي أبهذلكم في فيلم رومانسي رياضي غير طبيعي , ومن اجمل الافلام الي مقتبسـة من قصة حقيقيه صارت في الثلاثينات
Cinderella Man
2005
-: إخـــــراج
Ron Howard
مخرج الرائعة الأخيرة ذا دافينتشي كود ومشارك في إنتاج فيلم بيوتيفل مايند و ممثل ومنتج ومخرج عشرات من الافلام الي تبرهن على نجاحه وله عدد من الجوائز منها أوسكار على انتاج بيوتيفل مايند, بالعربي يعني هو رهيب مره هالمخرج ولا يخدعكم شكله وشعره الأحمر خخخخخخ
-: بـطـــولــــة
Russell Crowe AS Jim Braddock
بطل هالفيلم هو الاسترالي ( من مواليد نيوزلاند ) رسل كرو بطل فيلم بيوتيفل مايند و الفيلم الأسطوري قـلاديتر ( حسبي الله عليك يابطارخ هي جلاديتر ولا قلاديتر ولا غلاديتر ) و ذا إنسايدر و ماستر آند كوماندر و كثير جداً من الافلام المميزه والفايز بالأوسكار مره ومترشح لها مرتين ايضاً وعـدد من الجوائز الي يمشي ويقشح منها ماشاء الله عليه
Renée Zellweger AS Mae Braddock
ويشارك رسل في هالفيلم البطولة كـزوجته الممثله الأمريكية الطخمه رينيي زيلوجر ( اسمها صعب ) بطلة فيلم مي ماي سيلف آند ايرين مع جيم كيري , وفيلم بريدجيت جونز دايري والفيلم الأوسكاري الي ربحت عنه جائزة الأوسكار عن افضل ممثلة مسانده فيلم كولد ماونتن مع نيكول كيدمن وجودي لو وناتالي بروتمن وادائها كان خاثر في هالفيلم
Paul Giamatti AS Joe Gould
ومعهم المسبوه هو وعيونه بول جايماتي الي كسب الأوسكار عن فيلم سايد وايز قبل سنتين , ومثل في فيلم إنقاذ الجندي راين وشارك في كثير افلام بأدوار غير أساسية .
:
-: الســــالفـــــة
جيمس ج. برادوك والملقب بساندريلا مان هو صاحبنا الملاكم الأشهر في الثلاثينات والي كان يعتمد على الملاكمة بشكل أساسي في مصدر عيشة هو وزوجته ميي وابنائهم , لكن بسبب فترة الكساد والفقر واالإقتصادية الي اجتاحت البلد صارت الظروف والحياة أصعب خصوصاً مع خسارة برادوك في احد مبارياته والي تسببت بإبعاده عن مجال الملاكمه بالاضافـة لإصابة كملت على الباقي .. صار يحاول يحصل على لقمة العيش بأي وسيلة حباً في عائلته حتى وصلوا لدرجة حاولت زوجته اكثر من مره ترسل ابنائهم خارج البلد حتى يقدرون يعيشون من شدة الفقـر , واثناء هذي الفترة كان جوي مدير أعمال برادوك يجتهد أكثر من مره حتى يحصل على أي مباريات يقدر يخوضها برادوك في الملاكمة ويحاول يعيد شي من المجد المفقود , الأحداث مؤثره ورائعه مع تألق الممثلين في الفيلم بشكـل يصيح .. يعني جهزوا المناديل والبصل مع الفيلم <<– البصل للي ميتن قلبه علشان يسوي نفسه يصيح
:
-: صـــــــــور
اسمع .. تراك فشلتني وانا ادور لك واسطه والله لو ماتفوز لا اتوطاك
لا تتبسم انت وكراعينك إن ماجبت لنا الفان الجديد هالاسبوع دور مكان تنام فيه
أجل ماجبت الفان ؟ شف هذولا عيالك العاهات ودعهم يالله ورح نم عند اختك مزنه
يا سفاب الفرقه بس والسروال الأخضر
هههههههههه الله يرجكم اجل الحين صرت ابوكم يوم اشتريت لكم الفان
وهذي صـورتيـن لصاحب القصـة الحقيقية جيم برادوك والي طلع كله عصاقيل وكراعين
:
-: عـــن الــفـيـلـــــم
مثل ماسبق وذكرت الفيلم مقتبس من قصة حقيقيه وانتشر سابقاً كـ رواية ومسرحية .
الفيلم للي فوق 13 سنة لان فيه مشاهد تفقيع وجيه اثناء الملاكمه وايضاً كلمات وصخه <<– افلقني احد بيسمع كلامك يا ناصح زمانك ( حلوه على الوزن ) .
ترشح الفيلم لثلاث جوائز أوسكار وربح 11 جائزة مختلفه .
رسل كرو اثناء ماكان يتدرب على الملاكمه علشان الفيلم إنخلع كتفه الزلابه وهالشي أخر التصوير شهرين بالكامل .
رسل كرو نزل وزنه خمسين باوند ( احسبوها عاد انتم بالكيلو ) علشان دوره في هالفيلم.
الملاكمين الي لعب ضدهم كرو محترفين ملاكمة صدق علشان كذا لما طلب المخرج منهم تكون الضربات قريبه لجسم كرو ماقدروا يضبطونها مره وصفقوا وجه كرو أكثر من مره , ومن هالشي المسكين كرو انكسر له اكثر من سن وجته اكثر من رعشه !! ( لاعادت عليه فيلم خخخخخخخخ ) .
من المشاركين في هالفيلم روزماري ديوت تصير حفيدة جيم برادوك بالصدق , وبالنسبة لدور جيمي برادوك ترشح له اكثر من ممثل غير رسل كرو منهم بين افليك و بيلي بوب ومات دامون .
:
واخيراً اتمنى يكـون اختياري عجبكم وانتظرونا بأفـلام قادمه
Yazeed
