ببساطة (الأبل تي في) عبارة عن جهاز يعرض مالديك من صوتيات وفيديو وصور على جهاز التلفاز بدون أي أسلاك ( واير لس )
أبل تي في Apple TV
الجيل الثاني – 2G
السطر اللي قبل شوي في البداية كان التعريف بشكل مبسط، أما بالنسبة للشرح بشكل مفصل فـ الله يعينك أنزل تحت 
في البداية خلونا نعرف وش حجم القطعة هذي وكيف آليتها ومنهي بنته بالضبط 
مثل مانشوف في الصورة، حجم الجهاز قد كف اليد .. طريقته سهله جداً، تشبك كيبل الـ HDMI وتشبك سلك الكهرب طبعاً .. وبكذا تكون خلصت
طيب شبكته وبعدين 
بعدين تروح ترجع الكرتون مكانه <<- واحد يبي يطول الشرح بأي طريقة 
طيب شبكتها وشغلتها وبعدين وش أسوي فيها
ياربيه يا كثر اسألتك
لما تجلس في نفس الغرفة اللي موجود فيها الأبل تي في ( لازم يكون فيه شبكة واير لس ) تشبك جوالك أو ايبادك على الشبكة وبكل بساطة تشغل اليوتيوب مثلاً وتشغل اي مقطع طبيعي .. بتحصل تحت موجودة هالأيقونة
لما تضغط عليها زي ما هو موجود في الصورة على طول مقطع اليوتيوب أو الفلم اللي أنت محمله على الايباد او الايفون أو الايبود توتتش راح ينعرض على التلفزيون .. حتى الصور الموجودة في هذي الأجهزة ممكن عرضها عن طريق خاصية الـ Air Play .. أما بالنسبة للاب توب، كل اللي عليك هو أنك تفتح الأيتونز iTunes وبعدين تضغط على كلمة Advance اللي فوق .. وبعدين تدور على الخيار Turn on Home Sharing .. لما تختارها بيطلب منك تدخل حساب الابل الخاص فيك، وبعدين بتطلع لك ايقونة الـ Air Play تحت
أي فلم يشتغل عندك على الأيتونز معناها يشتغل على الأبل تي في، واظن الصيغ اللي تتوافق مع الايتونز هي ( m4v, mp4, mov ) بالنسبة للأفلام اللي تكون محمله عن طريق التورنت واللي غالباً ما تكون avi هذي ماتشتغل مباشرة عليه .. تحتاج تحولها لصيغه يقبلها الأيتونز، أو كما سمعت (منيب متأكد) تسوي جيلبريك للابل تي في وتكون تقدر تشغل عليه صيغ أكثر من اللي قلناها قبل شوي
بما أن ريموت الـ Apple TV التعامل معه شوي مهوب مريح، وبما أنه صغير مره ومُهيء أنه من أول يوم يضيع
Remote
تحمل التطبيق من الأب ستور الخاص بجهازك ( ايباد – ايفون .. ) وبعدين تشغله وبتحصل هالشاشة
تختار اللي يناسبك من هالخيارين وبعدين بيطلب منك حساب ابل الخاص فيك .. تسوي تسجيل دخول وخلاص
نقدر نشوف هنا مثال لي انا لما سويت اقتران مع الايتونز حق جهازي ومع الابل تي في
الخيارين كلهم قدامك .. وش تبي تتحكم فيه
تبي تتحكم بالأبل تي في ؟ تختارها من الصفحه الرئيسية لتطبيق ريموت وبعدين بتكون قادر أنك تتحكم فيها بدال ما تتحكم بالريموت العادي، وهالطريقة فيها ميزة أنها أسرع تحكم من الريموت وبرضو الكتابة بتكون أسهل ويدعم كل اللغة ( حتى الكتابة والبحث بالعربي )، وزي ماتشوفون في الصورة تحرك اصبعك على شاشة الايفون وتتحكم بالابل تي في
وأخيراً، نختم الموضوع بميزة جديدة راح تطبق في الـ iOS 5 الخاص بالأيباد، وهي نقل شاشة الأيباد بالكامل على شاشة التلفزيون بدون كيبل ولا حاجه 
باقي بس نقطة صغيره وهي سعر الجهاز، سعر القطعة في موقع أبل الرسمي 99$ يعني تقريباً 380 ريال .. وأذكر شفتها في الرياض في كذا محل بـ 600 ريال وحولها .. عاد أنت وضميرك .. تبي تشتريها من هنا وتدعم السرقة والزرف الوطني
* * * *
عيوب الجهاز بالنسبه لي، كعادة أبل ما تدعم كل الصيغ لازم جيلبريك وحوسه 
______________________________
TICHNO تـكـنـو 
تغطية شاملة لكل ماينشبك في الكهرب 
www.tichno.com
تابعوا جديد شبكة أبونواف على فيس بوك وتويتر
