رسائل المجموعة

Apple TV أبل تي في

ببساطة (الأبل تي في) عبارة عن جهاز يعرض مالديك من صوتيات وفيديو وصور على جهاز التلفاز بدون أي أسلاك ( واير لس )
أبل تي في Apple TV
الجيل الثاني – 2G

apple
السطر اللي قبل شوي في البداية كان التعريف بشكل مبسط، أما بالنسبة للشرح بشكل مفصل فـ الله يعينك أنزل تحت

في البداية خلونا نعرف وش حجم القطعة هذي وكيف آليتها ومنهي بنته بالضبط ، أولاً يعتبر هذا هو الجيل الثاني من الأبل تي في .. حيث أن أبل قد أصدرت في السابق جهاز ( ابل تي في ) قبل هذا ويسمى حالياً بـ ( الجيل الأول )، حجم الجيل الأول أكبر مرتين أو ثلاث مرات من الجيل الثاني، لون الجيل الأول أبيض بينما الجيل الثاني يحمل اللون الأسود ( عشان ينحط على الدولاب وما ينشاف، لا أحد يقول : يااااي الأبيض شكله كيوت، أبغى أبيض <<- مهوب الهدف التكشخ فيه ترى )، الجيل القديم كان فيه هارديسك بحيث تحمل عليه أفلام بينما الجديد لا يحمل هارديسك

مثل مانشوف في الصورة، حجم الجهاز قد كف اليد .. طريقته سهله جداً، تشبك كيبل الـ HDMI وتشبك سلك الكهرب طبعاً .. وبكذا تكون خلصت

طيب شبكته وبعدين ؟ .. تطلع ريموت التحكم من الكرتون

ريموت
بعدين تروح ترجع الكرتون مكانه <<- واحد يبي يطول الشرح بأي طريقة .. تشغل التلفزيون وتحط على قناة الأتش دي أم أي وبتطلع لك قائمة الأبل تي في .. واللي بتكون زي كذا


طيب شبكتها وشغلتها وبعدين وش أسوي فيها ؟

ياربيه يا كثر اسألتك .. تقدر تستأجر مسلسلات أو أفلام وسعرها رمزي 4$ تقريباً للفلم الـ HD ويمكن 2$ للفلم ذو الجودة العادية، غير كذا تقدر تتصفح اليوتيوب / نيتفليكس / فلكر / العديد من البودكاستات والإذاعات .. والأهم من وجهت نظري هي خاصية ( الأير بلي – AirPlay ) وش ميزة هالخاصية ؟ تقدر تعرض أي مقطع فيديو أو صوت أو صور من خلال جوالك الايفون أو الايبود تتش أو الايباد أو حتى اللاب توب عن طريق الواير لس

عرض
لما تجلس في نفس الغرفة اللي موجود فيها الأبل تي في ( لازم يكون فيه شبكة واير لس ) تشبك جوالك أو ايبادك على الشبكة وبكل بساطة تشغل اليوتيوب مثلاً وتشغل اي مقطع طبيعي .. بتحصل تحت موجودة هالأيقونة

لما تضغط عليها زي ما هو موجود في الصورة على طول مقطع اليوتيوب أو الفلم اللي أنت محمله على الايباد او الايفون أو الايبود توتتش راح ينعرض على التلفزيون .. حتى الصور الموجودة في هذي الأجهزة ممكن عرضها عن طريق خاصية الـ Air Play .. أما بالنسبة للاب توب، كل اللي عليك هو أنك تفتح الأيتونز iTunes وبعدين تضغط على كلمة Advance اللي فوق .. وبعدين تدور على الخيار Turn on Home Sharing .. لما تختارها بيطلب منك تدخل حساب الابل الخاص فيك، وبعدين بتطلع لك ايقونة الـ Air Play تحت


أي فلم يشتغل عندك على الأيتونز معناها يشتغل على الأبل تي في، واظن الصيغ اللي تتوافق مع الايتونز هي ( m4v, mp4, mov ) بالنسبة للأفلام اللي تكون محمله عن طريق التورنت واللي غالباً ما تكون avi هذي ماتشتغل مباشرة عليه .. تحتاج تحولها لصيغه يقبلها الأيتونز، أو كما سمعت (منيب متأكد) تسوي جيلبريك للابل تي في وتكون تقدر تشغل عليه صيغ أكثر من اللي قلناها قبل شوي

بما أن ريموت الـ Apple TV التعامل معه شوي مهوب مريح، وبما أنه صغير مره ومُهيء أنه من أول يوم يضيع ، فيه برنامج يخليك تتحكم بالأبل تي في وبالايتونز عن طريق الايفون والايباد والايبود توتتش

Remote

تحمل التطبيق من الأب ستور الخاص بجهازك ( ايباد – ايفون .. ) وبعدين تشغله وبتحصل هالشاشة

تختار اللي يناسبك من هالخيارين وبعدين بيطلب منك حساب ابل الخاص فيك .. تسوي تسجيل دخول وخلاص
نقدر نشوف هنا مثال لي انا لما سويت اقتران مع الايتونز حق جهازي ومع الابل تي في

الخيارين كلهم قدامك .. وش تبي تتحكم فيه ؟ تبي الأيتونز ؟ بكل سهولة تقدر تدخل على الأيتونز حق جهازك وتشغل أي فلم أو مقطع صوتي من جهاز الايباد أو الايفون، مثل مانشوف في الصورة

تبي تتحكم بالأبل تي في ؟ تختارها من الصفحه الرئيسية لتطبيق ريموت وبعدين بتكون قادر أنك تتحكم فيها بدال ما تتحكم بالريموت العادي، وهالطريقة فيها ميزة أنها أسرع تحكم من الريموت وبرضو الكتابة بتكون أسهل ويدعم كل اللغة ( حتى الكتابة والبحث بالعربي )، وزي ماتشوفون في الصورة تحرك اصبعك على شاشة الايفون وتتحكم بالابل تي في

وأخيراً، نختم الموضوع بميزة جديدة راح تطبق في الـ iOS 5 الخاص بالأيباد، وهي نقل شاشة الأيباد بالكامل على شاشة التلفزيون بدون كيبل ولا حاجه

باقي بس نقطة صغيره وهي سعر الجهاز، سعر القطعة في موقع أبل الرسمي 99$ يعني تقريباً 380 ريال .. وأذكر شفتها في الرياض في كذا محل بـ 600 ريال وحولها .. عاد أنت وضميرك .. تبي تشتريها من هنا وتدعم السرقة والزرف الوطني ، وإلا تبي تشتريها من هناك، اللي يريحك أهم شيء اننا علمناك السعر
* * * *
عيوب الجهاز بالنسبه لي، كعادة أبل ما تدعم كل الصيغ لازم جيلبريك وحوسه ! نقطة إستأجار الأفلام والمسلسلات ماتفيدنا يالسعوديين كثير لأن النت مايساعد الإستأجار وبنفس الوقت التورنت عندنا غير محظور ولا عليه عقوبات زي أمريكا، ماتقدر تعرض في جهاز اللاب توب إلا الأشياء الموجودة في الأيتونز، يعني ما تقدر تعرض سطح المكتب وملفاتك وكذا زي الكيبل
_______________________________________

TICHNO تـكـنـو
تغطية شاملة لكل ماينشبك في الكهرب
www.tichno.com
صفحة


تابعوا جديد شبكة أبونواف على فيس بوك وتويتر

   

 

 

 

 

 

 

 

 

 

مقالات ذات صلة

‫4 تعليقات

  1. الله يجزاك خير عاد من فتره وانا ابي ابحث عنه وش سالفته بس مافضيت وفرت علي وقت البحث

  2. يعطيك العافية على الشرح الوافي انا اشتريته من 3 شهور تقريبا و مستفيد منه كثير بس باقي اعمل الجلبريك يا ليت اذا عندك معلومات عن كيفية عمل الجيلبريك و الاستفاده منه

  3. الله يعطيك الصحة و العافية يا أخي في الله Tichno على هذا الاختراع العلمي رائع بالفعل، يا سلالالام على العلم فين وصل، بس اشرح لي شو تعني بحوسة رجاء أصلي ماعرفتها شو تعني.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى