رسائل المجموعة

_فرفشة عيد_

السلام عليكم

يازين ريحه البوية الجديده…انشششققققق مزكم
كيف حال الجميع في ذا القروب الفنان "الله من شين التعبير"
معليش ياجماعة بس الكيبورد يخوني احيانا مدري وش سالفته
اظن والله العالم انه اشتاق للقربعه والطقطقه على راسه !!!

مدري شفيني داخل عرض كذا اليوم وبدون اي مقدمات وابي اكتب
يعني الله يكفينا وياكم احيانا الواحد تمسك معه غلط ويبي يكتب
المهم اربطو الأحزمة واسترو ماتواجهون …

وعلى فكرة كلمة اربطو الأحزمة حطو تحتها خمسين خط بالقلم الفوشي
لأنه لااااازم تربط الحزام حتى وانت طالع مسافة 10 متر تشتري لبيتكم بريال خبز
عشان ماتدفع الضريبة …او بالأصح ماتدفع المخالفة
دبل الدبل
"ويقولون ماعندكم تاكسس" خخخخخخ انا اشهد انه دبل بس الله يعين !!!

أنا اادري ان نصكم جاه تشاؤم من هالمقدمه لكن حبيت أقول
كل عام وأنتم بخير بمناسبة عيد الأضحى صح أنها متأخرة شويتين
ولكن لظروف شبكة الجوال…. وتمديدات الصرف الصحي …وارتفاع وانخفاض اسعار الأسهم…
وازدياد الفقع …
وكثرة الزوار في روضة التنهات …

وأسأل الله لكم العفو والعافية… وراحة البال والضمير….
وأن يمدكم بالصحة والعافية ….
وأن يعيد علينا العيد وحنا نحترم كبيرنا ونعطف على صغيرنا…
ونصل قرايبنا واصدقانا… ونفك انفسنا من السؤال عنهم ومعايدتهم برسايل الجوال..
اللي مامنها الا خساير"أدري كلكم بتشهدون لي " ولاتفي بالغرض ..

واتمنى انها ترجع ايام اول يوم كان الواحد بزر ويجتمع مع اخوياه الشيبان خخخ
لا مع اخوياه البزران ويفرووون ويزورون بيوت اقاربهم وجيرانهم…
مهيب من محبة الظاهر
ولكن يدورن للخمسة ريال حقت حلاو ودجه في ذاك الزمن الحادرخخخخخ
اهم شي فيها انهم يروحون ويفرون بدون لا مواعيد ولاهواش
ولا وين هلك مامسكووووك لا ابوك لاااااااا!!!!!!
((مغطه بالعقااااال مع كف يلخبط معالم الوجه ))

اللي ابي اقوله تنتهي الرسميات بين العوايل والأقرباء وترجع زي اول
بلا رسميات بلا وجع راس ….
ويرجع طعم العيد اللذيذ اللي اخبر اني ماكنت اناااام فرحة به …
اما الحين الظاهر ان تكبير المخده اصرف وانفع …

كل عااااام و وطننا الغالي بخير …
كل عام و وطننا خالي من المرجفين والفاسقين والخونه
ممن زرعو الرعب في ديار الأسلام والمسلمين
الله لايوفقهم إن إن شاء الله ربي مايوفقهم وبأذن الله مصيرهم النار تصلاهم
لقتهلم الأنفس البريئة كما سبقنا وشفنا في ((المحيا)) !!!!
اللهم طهر بلدنا من هاؤلاء الزمرة الفاسدين واحشرهم في جهنم يارب
اللهم احفظ اخواننا المسلمين من شرورهم …

كل عام وحنا خالين من داء الفشخرة والمظاهر الكذابه…
يعني الواحد وش حده يشتري موتر ب 400 الف وهو شغال سكيورتي
في شركة نصابه وراتبه يالله يسد امه واهله وراه…
.والسبب ان ولد الشيخ الفلاني مهب احسن مني عشان يركب ذاك الموتر وانا لا….
معليش بس ولد الشيخ الفلاني تجي ابوه رشاوي …اقصد مكافآت لخدمات جليله
وهالضعيف المسكين ماخذته العزة وانصاب "ياكافي" بداءالفشخرة …

كل عام وسياستنا بألف عافية ..واسمحو لي ماحب اتفلسف في ذا النقطة واااااجد
لأني اشوف مثلث أحمر كبر طويق !!!!

كل عام وشاشات تلفزيوناتنا طاهرة وخاليه من كل شر انهم والله شر …يعني بالله
ستار اكاديمي هااااذي تعتقدووون انها برنامج ترفيهي…عائلي
ثقافي..سياسي..
انا ودي اصنف هالبرنامج من التصنيفات اللي ذكرتها
بس الموضوع خارج من يدي.. .
لكن هالبرنامج ومن فيه زلايب مايسوى الواحد منهم قرشين !!!!

ياناس قسم بالله احترام لكم بقول برنامج فسق معليش اوصخ كلمه في قاموسي المترجم للعربيه
وإلا اقدر اعبر عنه بما هو اقوى واشفي فيه غليلي….
واشبعه من الكلمات
من قاموسي المشفر !!!

يعني فضائياتنا لازم تقلد الغرب
اجل داكتره الأعلام اللي يدرسون عندنا وش يسوووون
اظاهر يزرعون بصل كود انه اصرف لهم ولنا من التقليد

المليون مقلد
ستار اكاديمي مقلد
سوبر ستار مقلد
برامج رزان الداجه كلها مقلده
برامج العجوز الشمحوطه هاله سرحان
بنسبة 80 في الميه من برامج الفضائيات العربية مقلده من
فضائيات اوربية وامريكيه ويهوديه ماجنه !!!!

الحين الحق يقاااااال
انتصرت قلة الأدب…على الأدب!!!!

كل عام ورياضتنا العربية والخليجية
والسعودية بالأخص
بأحسن حال…بعيده عن أمراض الرباط الصليبي …
وعن حمى الأنفلونزا الزائفة ….
بعيدا كل البعد..عن الصفقات الكاذبة …
والمفطحات والبوفيهات اللتي كانت غاية
واصبحت الآن وسيلة لأنتقال النجوم ….

وما ان ينتقل نجم من نادي لأخر بالمبلغ الفلاني…
حتى يكون من هواة ومرتادي الملاهي الليليه والديسكوهات
وبجانبه خمس من الشقروات لحماية حقوقه الفكرية ….
أظن انا نحتاج لمده من الزمن …ندرس ونتعلم حتى نجيد ونطبق مبدأ الأحتراف
كما هو معمول به في الدول الأوربية ….
قال ايش قال احتراااااف …ياشيييييخ طيييييييييييييير….

كل عام ومنتدياتنا العربية تزهى بحله أحلى..
خلوني من الفصحى… وودي انفس شوي…
وناخذها حبه حبه…
مع بداية المنتديات …ومع دخولنا ثورة المعلومات
لقينا في هالمنتديات.. ملتقى فكري ..حواري…تعبيري
تخيلي… !!!!
خلت الواحد يعبر عن اللي يبيه بسهولة ويسر
يوم بعد يوم … إلاوالله هالمنتديات
تتوالد وتكثر …
ذكرتني بذيك السنة يوم رحنا للصين
ودخلت المستشفى الساعة 12 الظهر
عنبر الولادة
وكان فيه 11 بزر
طلعت الساعة 12 وخمس
صار العدد 25 بزر تراني صادق وأسألو الدكتور المسلتم ذاك اليوم

الشاهد أني ابي اقول أن المنتديات كثرت وسمجت
يعني قله من المنتديات اللي تلقها واقفة ومحافظة على مستواها
في ظل وجود كوكبة من الشباب الذي يسعى في نجاح هالمنتدى
لصدق النية ….
وليس لعلوم ودوادي أخرى كلنا عارفينها
وليست مجال للطرح والمناقشة !!!

واعتقد ان هذة المنتديات اللتي بنيت على اساس فاشل
اكيد انها غير قابله للأستمرررررااااار
وحرام والله المساحة اللي اجرهاوالدومين اللي شراه
والأمثلة كثيييييرة ومعروفه للعديد من المنتديات
اللتي من جهه كثر زوارها….
كثر أعضاؤها (( ))
قام كل واحد يتفنن في كيفيه الطرح والفلسفة
وهناك الكثيرين اللي يتفننوووون في القص واللصق …

الصراحة اننا جميعا مرتادي المنتديات
قمنا نشعر بحرية التعبير ….
نشجع ذيك الفكرة ….
ونعارض الثانية …
لا واحيانا تصل الأمور لأحزاب وفصائل داخل هذا المنتدى
والسبب أمر تافه …

صحيح أننا نلاقي الفكر جديد في الطرح
ومواضيع تستحق القراءة والمناقشة
وشغل متعوب عليه احيانا
في الجهة المقابلة ….
نلاقي بعض السذاجات والسخافات
اللتي لاتحمل في طياتها أي هدف…
ولاتحمل لاجمل ولاتعابير تستحق الأشاده
اللهم خربطه كيبورد … وكم صورة تعبيرية
وبذلك تضرب بها الأرقام القياسية في عدد الردووود واضافة كم اكبر من السخافات !!!

بعد ذا كله هب الجميع افراد وموؤسسات وشركات لأنشاء منتديات
اعضاؤها مثقفون ثقافه تشات لاتمت للمنتديات بأي صلة
فيه منهم من يحاول… ومنهم من ينقل ….
لينتقل الموضوع من منتدى لأخر ..
ليقوم برحلة شبيه لرحلة ابن بطوطه
بدون جواز سفر
وبدون حقوق حفظ …
مع العلم انه لامانع في ذلك دام ان الحقوق محفوظه ..

اللي خلاني اتفلسف في هالنقطة …اني شاهدت كثييييير من مواضيعي في مجالس ابو نواف
مقصووووصه ومنسووووخه كما هي لا والذكي اللي نسخها خلاها بالأسماء …
مع العلم ان الأسماء الموجوده في مواضيعي هم من الأعضاء داخل المجالس..
والحبيب الله يسلمه … ناقل كل شي بالنص …. في منتديات آخرى تسعى لسبق ما
أو لتهكير ما
…أو لتشبيك ما
… والله العالم وش الهدف…

اللي ذابحني ناقل كلمه (( طنبق)) في آخر بعض مواضيعي وهو مايدري وش معناها…
يعني الله يسلمه ويخليه لأهله لو كلمني باعطيه بعد توقيعي…وشماغي …وأن كان يبي
بعد باعطيه كيبوردي…

طبعا وعقب ذا كله يمكن العبض يقول وش في مخاوي اضم لحزب المحاربين للمنتديات..
لا بالعكس انا يمكن من اكثر الأشخاص اللي شاركو بمنتديات… يعني داج من يوم ربي خلقني

وهم بعد منيب من اللي يحاربون النقل والقص واللصق..بشرط ذكر اسم الكاتب…وحماية حقوقه النصية …

في الأخير ابي اقول أن الوقت كفيل باسقاط واباده الغث والرديء
وهو كفيل بعد بالحفاظ والبقاء على الأحسن والأفضل…

كل سنة وانتم طيبين …وتقبل الله منا ومنك صالح العمل

محدثكم من ستار اكاديمي..خخخخخخخخخخ لا امزح

مخاوي خويه

برايفت لي>>>تراك مزودن هدرة ولبن الله يصلحك

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى