يمكن من أسوأ الاشياء اللي تمر على الانسان .. لما يوصل لمرحلة ما يلاقي احد يتكلم معاه في موضوع طبيعي انساني ماله اي علاقة بالشغل
انا نوعا ما دحين حاس اني فيها .. فقلت الحق على نفسي واتكلم هنا .. اقلّها احد بيعرف انا ايش بسوي وايش شغلي اللي الى هدا اليوم ماعرف اوصفه لأصحابي وعائلتي
ليا في الشغلة دي دحين 3 سنين تقريبا .. كتب ربي ان رزقي يكون في دولة ماليزيا في شرق اسيا .. وبروناي مقسم وقتي بينهم
كيف وصلت للمكان دا .. وليش اخترت الشغلة دي .. وليش لغاية دحين انا هنا ؟ .. هدي الاشياء يمكن بكتب عنها بعدين ان شاء الله .. دحين ابغى اوصف وين انا وايش يعني رق
كتير مرات في الفيس بوك او التويتر اكتب اني رايح الرق او جاي من الرق .. بس ماحد بيعرف معناها الا اللي شافها قبل فقلت اعطيكم فكرة
كلمة رق ماهي عربية .. هي مأخوذة من الكلمة الانجليزية
Rig
وكاملها
Offshore Oil Rig
يعني بالعربي حتصير حفارات النفط البحرية .. بس بحكم اننا نستخدم الانجليزي فخلاص صرنا نسميها الرق .. بس في بعض الدول زي مصر وليبيا يسموها حفارة
على حسب الدولة ومكان تواجد البترول .. فممكن انها تكون بحرية وممكن انها تكون على البر .. بس حظي رماني في ماليزيا فكل البترول موجود تحت البحر
=D
هذي صورة للمنشأة أو الحفارة أو الرق بشكل عام
تخيل كدا البحر حوليك على مد النظر .. حلو ولا ؟؟
نجي على شغلتي .. طبعا التنقيب على البترول عملية طويلة وفيها كثير من المراحل
تبدأ بالدراسات والبحث .. ومنها يتحدد الموقع وخطة الحفر .. بعدين يجي الحفر والقراءات .. بعدها الانتاج
أنا وسط الطبخة دي كلها طحت في مرحلة الحفر والقراءات .. ماحدخل في التفاصيل ايش نسوي بالضبط بس احنا اللي نحفر ابار البترول ونعطي قراءات ونقولهم اذا كان في بترول أو غاز أو بس ضيعنا وقتنا ههههه
أكيد بيجي سؤال على خاطر اي أحد .. كيف نوصل دا المكان ؟؟
يعتمد على ميزانية المشروع نفسه .. اذا كان شي معتبر فنروح ونرجع بهليكوبتر << أول يوم ركبتها كنت متحمس هههه
وأحيانا يكون العميل بخيل فنروح ونرجع على سفينة .. بس نادرة تكون
تختلف عملية الحفر ومدتها من مكان لمكان حسب طبيعة الارض وايش نتوقع منها .. لكن بشكل عام نقعد في وسط البحر كدا بالشهور أحيان
أكتر فترة قعدتها كانت تقريبا 5 شهور عشان نخلص بير واحد
=D أحس كدا كفاية كمقدمه .. عارف انها مملة وكلها اشياء ما تنفهم .. بس اقلّها لما اجي بشرح بعدين يومياتي يكون في فكرة عامة عن الوضع
دحين على وشك نبدأ حفر بير ان شاء الله .. دعواتكم يخلص بسرعة وعلى خير بدون اي مشاكل
وبعدها نرجع لكم ان شاء الله في يومية تانية
وبما إنه رمضان نستغل الفرصة ونقولكم كل عام وانتم بخير .. اعانكم الله على صيامه وقيامه
@AAJunaid
http://d3waa.com/blog
تابعوا جديد شبكة أبونواف على فيس بوك وتويتر
