يا فرحه ماتمت – سالفه حقيقيه

سوف احكي لكم اليوم سالفه صارت لبنت من البنات ……

في البدايه بعطي نبذه مختصره عن البنت وهي متخرجه العام الماضي من الكليه كما انها شاريه عبايه جديده تلق من النظافه واللمعان قبل حوالي الاسبوعين وما لبست هالعبايه يمكن يجي اربع مرات فقط وبعد هالنبذه يله نبدا :………

كان يا مكان في قديم الزمان وسالف العصر والاوان …….لا والله ماهو في قديم الزمان هالسالفه صايره الاسبوع اللي فات وتحديدا يوم الاحد

المهم هالبنت ما لقت وظيفه وقاعده بالبيت طفشانه ….وفجأه لمعت في ذهنها فكره ذهبيه حيث انها تذهب لزياره كليتها لانها مشتاقه لها ومشتاقه لاعضاء هيئه التدريس (ايه هين مشتاقه للدكاتره او كليتها كثروا منها إلا تكره هالكليه وودها لو تتفجر من قبل ارهابين …طبعا وهي والكليه فاضيه ولا حرام وش ذنب البنيات …..اذن لا بد من وجود امر ثاني خلاها تروح للكليه ؟؟؟؟؟؟ماهو يا ترى ؟؟؟

اهاااااااااا البنت رايحه الكليه علشان تستلم باقي مستحقاتها الماليه المتأخره يعني المكافأه اللي مؤجله ومن هنا يتحقق المثل القائل _اذا عرف السبب بطل العجب _ ……..المهم البنت لما وصلت الكليه نزلت عبايتها الجديده عند البوابه وحطتها فوق الكرسي كعادتها في السنوات الاربع الماضيه ……وراحت علشان تاخذ المكافاه البالغه 500 ريال ويوم جت تبغى تطلع تروح للبيت مع ابوها ………ما لقت العبايه فيه احد عينه عليها ولهطها يعني شلحها يعني سرقها يعني عباايه بااااااااااااح كله رووووووووح وراحت روح البنت مع العبايه وخنقتها العبره والقهر وشوي وتبكي ……يوووووووه الحين وش تسوي المسيكينه وشلون تطلع وتعلم ابوها اللي عند الباب ينتظرها تحت اشعه الشمس الحارقه وبعز الظهر ……..البنت صرفت نفسها ودقت على ابوها جوال وبعد التحيه والسلام والكلام الزين قالتله هذا العلم وهذا اللي صار وياليت تجيب من البيت عبايه ……….ابوها هنا ما استحمل وضحك ضحكه الله يا كافي هزت الكليه كلها وقال : اما رجعه للبيت من دونك كثري منها والله مانيب رايح مشوارين علشان عبايه

وهنا البنت طارت عيونها ……….وقالت : اجل شلون بروح للبيت كذا بدون عبايه ؟؟؟

قال ابوها : انا ادبرك انتي خليك جالسه عند الباب لا تروحين مكان …..وطبعا البنت نفذت وصيه الوالد وما تحركت من مكانها وهي تفكر وش بسوي ابوها

البنت اجلست لحظاات وما درت إلا وحده كانت واقفه برى دخلت من الباب وقالت منهي اللي مضيعه عبايتها ؟………البنت نطت من مكانها تقول قارصتها عقرب وقالت : انا ……..المهم هالوحده عطت البنت عبايتها وقالت : اطلعي لابوك ؟ قالتلها البنت :وانتي ؟ قالت هالوحده : اذا ركبتي السياره تنزلين العبايه وتعطينها الفّراش يعطيها للفّراشه وتعطيني اياها ( والله مشوار ههههههه)

البنت قاعده تتذكر وتقول : سيارتنا ما هي مظلله كيف بدخل فيها بدون عبايه ؟؟

قالت : يا هوووووووووه اكيد ابوي عنده الحل الاكيد !! ولبست العبايه

وطلعت البنت لابوها ما درت إلا ابوها يركبها المرتبه الخلفيه ويعطيها الشماغ يقول : طغتي فيها ؟؟

ابوي يا هووووووووه ما يصير الناس يشوفوني بالشماغ وش بيقولون ؟؟

الوالد : وانا وش علي من الناس ولا تبغيني ادق مشوار بعز الظهر علشان حضرتك ؟

البنت طبعا ما في يدها حيله وتغطت بالشماغ ونزلت عبايه البنت واعطتها للفرّاش …….البنت تحمد ربها ان سيارتهم من النوع المرتفع ولا كان علوم

عاد تقول البنت : وانا طول الوقت ما تحركت ولا حركه ولا التفاته حتى خشمي ما حكيته ……….ووصلنا لطريق خريص اشد طرق الرياض زحمه ووقت الذروه يا سااااااااااااتر …….انا مستعجله ابغى اوصل البيت بسرعه والطريق زحمه افففففففف ومع الزحمه وانا قاعده افكر في عبايتي وانعاها ……إلا والله يوم حكني خشمي ونسيت نفسي ورفعت يدي من فوق الشماغ علشان احكه ……..إلا لما حسيت في حركه بالسياره اللي جنبي على اليسار ……….فيها سعوديين الله يا كافي شوي ويقلطون معنا في السياره والله من الرجه اللي فيهم الحين بنت ومتغطيه بالشماغ فيها شي ؟؟؟ اعوذ بالله عليهم لقافه ………ولما انتبهت لهم نزلت يدي بسرعه ولا حركه حتى راسي ما حركته وانا ودي اعرف وش يسون ؟؟ قاعده احرك عيوني اللي راحت وطي شوي وتصير حولاء …………إلا والله اشوفهم مستغربين وبعد شوي ناظرت مره ثانيه إلا هم راحين فيها من الضحك وانا مقهوره وعلى نااااااار ……….قلت في نفسي : خليهم يولون بشوف راعي السياره اللي على يمين وش يسوي ؟؟ المهم واحرك عيوني في الاتجاه المعاكس طبعا بدون ما احرك راسي اااااااااااااااااااااه يا عيوني إلا والله اشوف هاك السواق الهندي اللي وش حليله …….ما جاب اخبري وانا استانست وابتسمت ابتسامه صفراء )هالابتسامه الصفراء دايم اقرا عنها ولا ادري وش معناها يمكن يقصدون لما الواحد يبتسم تبين اسنانه الصفراء ههههههه)

المهم بعد هالمشوار والمكافاه الي ما ادري عين مين فيها ؟ واللي راحت نصفها على طول ………….وصلنا للبيت بالسلامه الحمد لله …والله كنت خايفه يبلغون على ابوي ويقولون واحد مختطف بنت ومغطيها بالشماغ اددددددددددددعععععععععععس

احم احم وفي نهايه هالسالفه ما اقول لكم غير

توته توته خلصت الحتوته

ايه لازم ادعي للبنت المسيكينه اللي ما حست بالمعاناه إلا كل ما جت تطلع ما عندها عبايه وحتى يومكم هذا ما شرت عبايه وتستخدم عبايتها القديمه الشهباء وهي ناويه تشتري وتقول والله ما اروح لنفس المحل بالرغم انه هو الوحيد اللي عنده قماش زين ومقاس على قدي …….ان شاء الله افر اسواق الرياض كلها ولا اروح لذاك المحل .

اللهم اني أسألك ان تعوض هذا الفتاه بعبايه جديده احسن من الاوله واسألك ان تجازي من كان السبب

اللهم امين

اللهم امين