رسائل المجموعة

هديــة .. تجيب الهم !!

بسم الله الرحمن الرحيم
أسعد الله أوقاتكم بكل خير

بسبب بعض العادات ( الثانوية ) تجد أننا للأسـف .. بطريقة أو بأخرى ,, بإختيارنا أو بدون .. نبتعد عن هدف أسمى من تلك العادات بكثير ..!!
سأتطرق لظاهرة موجودة بكثرة في مجتمعاتنا .. وهي ( الهدية ) بسبب قدوم مولود جديد ,, أو حتى نجاح ابن .. او سلامته من عملية .. أو .. أو ….. الخ

(( تهادوا تحابوا )) سأكون أكثر الفرحين لو جائتني هدية من شخص ما .. ولكن ان تنقلب المفاهيم وتصبح هذه الهدية بمثابة ( دين على رقبتي ) يجب أن أرده لمن اهداني في أقرب مناسباته .. فهنا سأتوقف قليلاً :

اعطِ الهدية كـ هدية ,, ولا تنتظر من الغير أن يردها لك في أقرب مناسباتك … فأنت قدمتها كهدية .. وليس كـ دين !!
خلونا نتكلم بمنتهى الصراحة .. وبالعامية .. لو احد قريباتك جاها مولود ,, بتلقى امك وخواتك .. كل وحدة تقول بجيب لها شي .. اللي بتجيب لها عربية .. واللي بتجيب مشاية .. واللي بتجيب مبلغ .. واللي بتجيب كرسي سيارة .. واللي بتجيب مفرش طفل …. الخ

أتمنى لو نسأل أم المولود .. كم عدد الهدايا اللي وصلتك .. من كل صنف ؟؟ بنلقى ست عربيات .. واربع مشايات وسبع مفارش ومبلغ .. وغيرهاااااا كثير
هل هي بحاجة كل هذا الهدر ؟؟؟

خلونا نكون اكثر صراحة .. لو كانت حالة امك او اختك المادية اقل من المتوسطة .. او متدنية ,, وجاها كم كبير من الهدايا بعد ولادتها ,, ومرت الأيام وولدت احدى قريباتها اللي سبق واهدتها بمناسبة مولودها .. وش بيكون موقف اختك ؟؟ طبيعي بتقول لزوجها بجيب لفلانة هدية .. وبعدها بجيب لفلانة هدية .. وبعدها لفلانة ولفلانة ولفلانة … وما انتهينا !! أصبحت التزاااااام أكثر من كونها هدية ومحبة !!

هل فيه هدية في العالم .. تشتريها وأنت ظروفك ما تسمح ؟؟ متى تدفع وانت ظروفك ماتسمح لك ؟؟ اذا كان هالمبلغ اللي تدفعه يمثل لك التزام وتبي تتخلص منه ..

لكن تدفع مبلغ وانت بحاجته .. لأجل هدية !! اسمحوا لي اقول ان المفاهيم تغيرت .. واصبحت هالهدية .. التزام كبير ربما كثير من الناس ما يشعر به !!

أعرف شخصيا ً حالات .. بسبب مثل هذي العادات ,, أصبح يكره أن يسمع خبر ولادة أو غيرها من المناسبات …. للأســـف !! ولكن ظروفه المادية صعبة جدا … وسؤال زوجته دائما يرن في اذنه : يعني كلن يجيب معه شي وانا لا ؟؟ يعني ادخل ويدي فاضية ؟؟؟ يعني هم جابوا لي وانا ما اجيب لهم ؟؟؟
أكاد أجزم بأن الكثير منا لا يقتنع بمثل هذه التصرفات ,, ولكنه بنفس الوقت ما يقدر يصرح برأيه للناس ..!! والسبب الأول .. المجاملات والخوف من نقد الآخرين !!

ربما يرى البعض بأن الموضوع لا يحمل تلك الأهمية .. هي في النهاية من 200 – 500 ريال تقريبا .. ماتستاهل كل هالضجة !!

وانا اقول .. اسأل اللي ظروفهم صعبة ومجبرين على دفع التزام لا يعني لهم أي شي …

هل يفرق معك هالمبلغ ؟
اذا ما فرقت معك .. فهي تفرق مع غيرك كثـير
أترك لكم المساحة .. لإبداء الرأي اللي أكيد اتشرف فيه
.
.
.
صلوحكا

مقالات ذات صلة

‫37 تعليقات

  1. مسيك بالخير اخوي صلوحكا.. والله كلامك عين الصواب..وما ازيد على كلامك شي وزي ماقلت تطورت من عادة الى شي الزامي..

  2. هلا اخوي كلامك صح مليون في المية و السالفه صارت ان الوحدة فينا تقييم الهدية بقيمتها المادية مو بقيمتها المعنوية وتخيل ان الوحدة صارت تشتري فقط للمجاكره يعني (ابي اشتري هدية اغلى من اللي شرتها فلانه )) والمسكين يدفع:( انا باجيب لك مثال انا هديت وحدة قبل فترة هدية ب 25 ريال لمولودها الذكر تدري ايش؟ هديتها بشت لطفل عمره سنه ب15 ريال من محل الملابس الداخلية للاطفال وغلفته ب10 ريال و سمع الله لمن حمده ورب البيت ان الحرمة فرحت فيها بشكل ما تتخيل حسستني ان البشت ب 1000 ريال ياعالم صدقوني انك فكرت في الانسان يكفي وانا مجربة في كذا شخص انا ما اقول لاتهدي لكن اهدي بالمعقول

  3. اول شئ احب ابدأ بتحية الاسلام فالسلام عليكم ورحمة الله وبركاتهـ … واتمنى باذن اللهـ اختبارات موفقهـ لإخوآني وأخوتي الطلاب في جميع المستويااات … مووضووعكـ اخوي صلوحكآ يحكي وآقع أليم .. مرير نعيشهـ بين الفينة والآخرى .. ومو عيب الوآحد يحآكي السلبيآت اللي توآجههـ في مجتمعهـ ونحآول نصحح بعض الأخطآء اللي تقصم ظهورنآ اذا رأينآهآ في مجتمعآتنآآ .. أخوي صلوحكآ .. اممم بالمثل اللي أنت ضربتهـ .. اسمح لي بقول لكـ اني شوي بتعارض معآك قليلآلآلآ .. يعني أسألكـ باللهـ لمولود .. هل بيقتصر من مآلكـ ( 100 ريآل ) تعطيهآ في ظرف .. يعني هذآ اقل القليل .. يآآآخي حلق ذهب للطفلهـ .. او مشآيهـ وااللهـ ما تتجاوز 150 ريال او اقل .. ( واللهـ ما اعرف اسعارهم ) … هل هذي عآآئق ؟؟ لآلآلآلآلآلآزم كشخهـ المشآيهـ ولآزم ذهب يخقق للبنت ..؟؟ بس اللي انا اشوفهـ لآزم .. انكـ تهدي اللي اهدآكـ في طفلكـ .. في هالحالهـ فقط … مثلهآ في عآنيآت الزوآج .. يعني لمن يجيكـ شخص ويعطيكـ عآنيهـ محترمهـ في عرسكـ … تجي عرسهـ وانت حآفي اليدين .. ورب البيت لو 500 ريال تسد فيهآ مآء الوجهـ اسم انكـ حاولت وهذآ اللي في يدكـ وصدقني لمن تحاول … اكيد المستقبل راح يلآقي لكـ عذر ويقول هذآ اللي عندهـ ويكفي انهـ حاول قد ترتفع عندهـ في القدر .. ولآ تقول لي مآ رآح تقدر ( حتى وان كان بأقل القليييييييييييييييل ) واللهـ لو هرفي بـ 350 هههههههههههههههه وفيهـ هدايا الأحبهـ في اللهـ هي اللي مو مجبر انكـ تردهآآآ مثلها بهديه … يعني يكون الوضع هنا عادي وايزي لكن بيني وبينكـ اخوي صلوحكااا .. المولود والعرس … انا اشوف انهـ شئ لآزم ينرد يكفي العون اخوي صلوحكا وابي اكرر شئ مهم .. ( الرد يكون بقدر الإمكان ) بقدرررررررر الإمكاااااااااااان …

  4. ذكرتني بالوالدة..يوم إني طلعت من بطنها و كنت أول مولود..وتجيها ذيك الهدايا اللي ترست الدولاب و فوق الدولاب. عاد أمي الله يوفقها ذهينة..استخدمت اللي يناسبني و اللي ما يناسبني أو المكرر حطيت عليه اسم صاحب الهدية. ولا صار في ولاده هنا و لا هنا..عطتهم من الهدايا اللي عندها وبكذا فكت نفسها من هات ورح اشتر وود وجب. الله مير يسهل على الرجاجيل اللي عندهم حريم يبلشوهم بالهدايا

  5. فعلا انا انتظر مولود بأذن الله خلال شهر 😀 ولاكن هناك من معارفي واهلي الكثير الذين اعلم انهم سوف يهدوني هدايا اكيد رح يكون منها اشياء متكرره رح اخليها واهديها الي بعدي ولدت وبكذا اكون خففت :$ شي ثاني .. مو لازم تكون الهديه ب 200 والله اعرف بعض الناس ينسقون هدايا ما تتجاوز ال 50 ريال بس بفن وذكاء وذوق ..

  6. صحيح فيه ناس تقلب سالفه الهدية إلى مفاخرة ..B لكن الهدية بقيمتها المعنوية أكثر من المادية .. مو شرط تكون الهدية غالية .. فيه هدايا كثير بمبالغ رخيصة .. لأن الهدية هي نوع من التعبير عن المحبة .. لكن فيه ناس الله يهديهم يحاولون يجيبون الشي الغالي وكأنهم بيكتبون سعره عليه لما يهدونه .. !! أهم شي النية الصادقة … واحتساب الأجر أنه من ادخال الفرح والسرور لأحيك ..:D

  7. المشكلة اخوي بالظروف الحالية اللي اغلبنا يعاني من الاسعار والمصاريف الزايدة اللي مايكف الراتب للمقتدر وراتبه زين فما بالك بالي تحت المتوسط راتبه وش يسوي عني انا عانيت ظروف صعبة مع الهدية لدرجة اني اكره المناسبات واتسلف والله عشان اهدي ااااااااااه وياليت ناخذ من الغرب عادتهم الزينة والاسلامية بنفس الوقت لكن مشكلتنا ناخذ عادات الدشير منهم والشواذ بس الله يعين

  8. السلام عليكم ورحمة الله وبركاته اخوي صلوحكا كلامك سليم 100% وللاسف ان هذا الواقع المجتمع نفسه ما يتقبل انه يغيره واصبحت الشكليات والمظاهر للاسف من الاولويات، وماودي اطول بالكلام واهنيك على مقالك اخوي صلوحكا

  9. كلامك حلو وايضا الي علقو على الموضوع وتسلم :>ونحن نعاني في عائلتنا من المفاخره ولكن الففففككككرررررررره الي اعجبتني وحولت اطبقها عندنا هي اني اجمع مبلغ مالي موحد او سبيكه ذهبيه دفع مبلغها من جميع العائله لأي مناسبه واقوم بوضعه في صندوق بشكل مبتكر واقدمه مع مجموعت كروت المهدين بشكل مبتكر وبذلك يستفيد المهدى اليه من التكرار او الغير مناسب ويكون الحمل اقل على الجميع

  10. في الحقيقة انت قلت ببداية الموضوع (تهادوا تحابوا) فلو كل واحد قال الهداية غاليه وانا مااقدر عليها ماراح احد يهدي احد وبتنقطع هالعادة .. وعلى قولت امي الله يجعلها بالجنة(الهدية ولو كنتي غنية) فهي من الاساس تعبير عن مشاعر الحب والفرح وكل واحد وقدر استطاعته بالهدية ..يعني مو مجبور تدفع نغس الي عطاك او مبلغ عالي والي يحبك بيقدر هديتك حتى لو كانت بملغ زهيد لانه عارف ظروفك

  11. والله صآدق بكل كلمه قلتـه ! أستشهد بآخر حدث صآر وهو ولآدة ابن لـ خآلي وقآلت امي الا نبي نجيب لهم هديه طيب وش تبين يا اميمتي ؟ قالت مفرش ! قلت له يمّه كل العالم يبي يجيبون مفارش حآول تنفردين بـ الهديّه قالت لآ المراد اننا رحنا لـ بيتهم ولقينآ اربعين مفرش B نقطتين 1 / صآرت الهديه عند الولآده بالذآت إلزآميه ومتعآرف عليهآ 2 / تكرآر الهديه بعينه أصبح قرينه مع عآدة الهديه نفسه ! شكراً لك صلوحكآ 🙂

  12. مو الناس انواع ناااس تدي من غير ماتفكر ايش حا يجها في المقابل وناس تدي وتزززعل وتبلبل بالكلام عشان هوا اعطا الوفى ولما جاتوا المناسبة مو كل الناس الي وافاهم وافوا يعنننني نهايتوا انوا دا وااااقعي جدا

  13. والله انك ذيب يا صالح اول واحد يهتم بمواضيع تخص المجتمع المواضيع الحقيقيه طبعا المهم كلامك يعرض مشكله مهمه لكنك ما عرضت الاهم وهو الحل نتمنى تشرفنا بالحل في رساله اخرى شاكر لك تفهمك

  14. والله ياخوي كلامك صحيح..وهذا واقعنا يعطيك نفس سعر الهديه اللي ارسلها يعني همهم يردونه…أنا مره وحد من أقاربي عطيتها هديه..وقالت الله يعني أردهالك وأرد على كل اللي أهدوني أنا تفاجأت من كلامها..ليه الناس تفكيرهم وأنا والله أعطيتها لأني أعزها وأقدرها …مو عشان تردها والهديه .. والله لوأن شكلهامو حلو والله ينفرح فيها….بس الله يصلحهم هالناس وتفكيرهم يســــــــلمو على الموضوع الرائع…والله يوفقك تقبل مروري

  15. والله كلامك درر بس اذا تبي الجد حاليا اقول وبهالزمن وخاصه للمواليد الهديه علشان نجتنب المكرر اذا نمون ع الشخص نساله وش يحتاج واذا ما نمون مبلغ من المال الام نفسها تكون تصرف منه وتشررري اللي هي تبغاه وحتى الهدايا الثانيه يمكن تفك ضيقه حتى لو بخمسين ريال ريال على ريال يعطيك ميه ريال اما من ناحيه الهدايا بالعطله تزوجوا صديقاتي وانخطبوا وميزانيتي ما تسمح وبلاش هدايا لذا سكت وما دفعت وياما ننزنق وندفع باشياء تافهه يفرضها شخص ما يهتم ولاعدمتكم

  16. السلام عليكم ورحمة الله وبركاته بصراحه اخوي كلامك صح الهديه اذا ما طلعت بطيب خاطر تعتبر التزام واجبار مجامله الحين الناس تهدي ما راح يقولك والله غالي علي او غالي علي اهديها نادر الحين يقولون اهدتني لازم اهديها صارت السالفه تبادل والناس ما صارت تعذر بعض ما تقول هذي مسكينه اكيد ما عندها او جيتها تكفي لا صارت تقول انا جبت لفلانه وهي يوم جات ما جابت لي صدق ما تستحي ومن السوالف الزمن تغير وهذي مجرياته والبعض يجاري هالشي والبعض للحين الطيبه والهديه الي تكون عن طيب خاطر لو كانت ورده لها مهنى كبير يا ليت المجتمع يبتعد عن هالمجاملات ويعيش بعفويه راح نكون بخير وتسلم اخوي موضوع في منتهى الروعه نتظر جديدك

  17. السلام عليكم, أوافقك الرأي بس عاد الناس القرايب منك جدا يستلزم هدية غالية رضيت أم أبيت 😀 , :> أما الناس العاديين فدايم نسوي زي ( تعليق رقم 4 – نهر ) .. في حركة يسوونها بعض الاجانب صراحة تعجبني جدا و من جد توفر على الطرفين لكن هنا بمجتمعنا صراحة ما اتوقع احد يقدر يسويها لاننا بنصنفها ضمن الاشياء الـ ( عيب ) مع ان فيها منع للاسراف اللي امرنا فيه ديننا , الحركة هي: يكتبون بدفتر – ايميل أو اي شي لسته بكل الطلبات أو بالاحرى الهدايا الي محتاجتها ( العروس – الام الوالدة ) وكل واحد يقولولهم وش رايح يجيب من هذي اللسته طبعا بالمبلغ اللي يقدر عليه, بحيث خلاص ما تتكرر الهدايا ولا حتى يكون عند الام نفس الهدية اللي جابها , أحس انها مفيدة جداً بس ما اتوقع احد بيسويها :~ و الله يسهل..

  18. السلام عليكم والرحمه.. كلامك صحيح ياخوي للاسف بهالوقت الهديه صارة دين وانا ياكثر ما اسمع هذي جابت لي كذا مو معقول بجيب لها اقل !! الي بتهديك هديه ما احد غصبها هي مجرد هديه للمحبه كقول الرسول اللهم صلي وسلم عليه (( تهادو تحابو )) يعني الواحد لاياخذها دين والي جابت لك هديه غاليه يمكن ضروفها كويسه يعني اذا ودك تهدي من باب المحبه والاخوه اهدي على حسب ضروفك يعني لاتضغط على نفسك شاكره لك لموضوعكالجميل والي كان يدور براسي مرات يعطيك العافيه اخوي ..

  19. بسم الله .. اسعدني جدا تفاعلكم الرائع يالغالين .. آرائكم اضافت للموضوع .. وللنقاش .. تشرفت جدا بتعليقاتكم .. شكرا ً من القلب وما قصرتوا سنلتقي بإذن المولى في مواضيع قادمة .. اكرر شكري للجميع بدون استثناااء .. واعذروني لو ما رديت عليكم واحد واحد ,, كل الشكر لكم يالغالين . . . صلوحكا

  20. بالعكس الموضوع جدا مهم للأسف في هالزمن صارت المظاهر والخوف من كلام الناس ونقدهم يسيطر على كل الجوانب الاجتماعية والهدية صارت هم من جد ..من كم يوم الوالدة تقول لي انها تبغى تجيب هدية لبنت عمي اللي قربت ولادتها قلت لها جيبي شوكولاتة أو طقم ملابس أطفال قالت لي بس فلانة جابت لها طقم ذهب!! عن نفسي والله لو وحدة تجيب لي طقم وأنا ماأرتاح لها ماراح يزيد قدرها عندي ولو وحدة تحبني بصدق وتجيب لي كيسة شيبس بأفرح لأني عارفة انها تحبني وهديتها تعبر عن شي بسيط وهو انها تذكرتني والله يعطيك العافية صلوحكا

  21. عفوآ اخوي .. فيه نقطه فوتها وهي اللي تحّل موضوع الهديه وببساطه .. نقول أذا زوجه جابت مولود .. وجتها خمس هدايا وثنتين يتشابهن تأخذ الهديه المكرره وترفعها بالمستودع .. وأذا ولدت صديقتها اللي جابت لها هديه تروح وتعطيها الهديه اللي مغبيتها … وهالطريقه اشوفهم يسوونها حتى الميسورين مثل طقم بيالات او دلة قهوة ألخ ألخ .. وصلى الله وسلم … الطريقه يبيلها شوي تفكير وأنتهى الموضوع .

  22. الله يرحم زمان اول كانوا من الحكمة بمكان وخاصة فيما يخص الهدايافكان من المتبع في الهدايا للناس المقربين جدا واللي تعرف احتياجاتهم وما بينهم مجاملات انك تجيب لهم اللي يحتاجونه ام الناس اللي تربطك فيهم محبة او صلة مجاملة او حتى تعرف ظروفهم فكانو يقومون كل حسب استطاعته بوضع مبلغ يلف بورقة او منديل وكانوا منول يروحون مجموعات وعندما يدخلون على الوالده او العريسه يضعون هذا المبلغ بمهاد الطفل او بصندوق العريسه فلا يعرف من وضعت هذا المبلغ او ذاك يعني علشان ما يكون فيها احراج هذي جابت كذا وهذي جابت كذا يعني ما فيه مجاكر وانما يكون الهدف العونة كل بقدر استطاعته

  23. والله من زماان وانا اقول لامي وخواتي نفس الكلام .. وش ذا الهدايا اللي مفروض تفرحون فيها صرتوا تشيلون همها .. المشكلة عندنا حرييم فللله يعني ما قصرتي في شرح الموضوع كل وحده لازم تجيب هدية احسن من غيرها ولازم ترد الهدية! الحمد لله اننا معشر الرجال:> الى الحين ما عندنا هالخرابيط ..8) مشكورة على الموضوع الذي هو عين الصواب

  24. تخيلو محد عبرنى احد بهدية الا بعد التعب الجسدى الاى صارلى اللهم لااعتراض الااذا يحبنى شخص فهذا شى ثانى

  25. عجبنى الموضوع والله انك صادقه المظاهر الحين هى الى تفرض عليك تشترين شى زين لا وياليت يعجب ذوقك الناس بس على الاقل تكون الهديه رمزيه

  26. الافضل في مثل هذه الحالات هي عندما يأتيك مولود وتأتيك الهدايا بشكل كبير هو عدم استخدامها بل الاحتفاظ بها واهداها لاشخاص آخرين وكذا ما تكون خسرت شي والله اعلم

  27. السلام عليكم ورحمةالله وبركاته اخوي حنا الان في وقت العجائب اللي هو وقت التباهي والاسراف اللي لاداعي له يعني حتى حنا ياالرجال بيننا تنافس الكل يبي يكون احسن من الثاني والسبب هو النساء تقوم الدنيا ولاتقعد اذا ماصرت منافس للطرف الثاني بالهدايا؟ صارت عندنا مناسبه زواج لخوي ماخذنا الا و شيخ القبيله خربط هو وسواقه سلام عليكم يالله نزلو الذبايح 3 وخذ يابو فلان 2000 ريال والله مقصرين ؟ زوج ولده ومثل ماجاب لنا عطيناه اللحين اذا صار عندنا مناسبه نكتب على الكرت عدم قبول الهديه او العانيه؟ والسلام 00000

  28. والله يااخي تعال في الاجازة المصاريف اللي تصير وكلها هدايا ومواجيب تلاقي الموجب الواحد ندفع فيه الف مايجي نهاية الشهر الا الراتب مخلص صرنا نكرةالمناسبات والزواجات بسبب هالهدايا 🙁

  29. 🙂 السلام عليكم الموضوع جداً رائع.. وأنا معاك في هذا الكلام.. الهدية عندما تهدى لازم تكون للتهنئة و ليس لإنتظار المقابل.. حتى إني مرة إستغربت لم عرف إن في واحد من الشباب زعل من صديقة لأن أعطاه هدية أقل من قيمة الهدية إلي أهو أهداها له!! كل إنسان و قدراته .. و في أغلب الأحيان الكلمة الحلوة تكون أحلى و أبلغ من أي هدية … و شكراً :$

  30. صحيح كلامك اخووي مب لازم نهدي الهدية لكل شخص اعطانا هدية، يعني الواحد يوم يبا يعطي هدية يعطي من الخاطر مب يكون مجبور.. تخيل انك تهدي هدية لشخص ماتحبة من قفا خاطرك بس مجاملة بس عشان الناس ماتتكلم ولا بعد هاذي فيها خسارة بيزات فوق انك ماتحب هالشخص 😀 واللة صارت هالسالفة موضة عنا في الدوام لازم ويفضل انك تهدي هدية لكل شخص وفي كل مناسبة مايصير واللة تمر مناسبة وماتهدي هدية للشخص هذا لا عيب عنا .. أنا عن نفسي اذا شخص متقبلتنة اهدي الهدية ولا أشرد من كلمة دففففففففع يوم يسوون حفلة ويمعون التبرعات اقصد البيزات لوووووووووووول:$. أظن في منكم تصير عندة هالحالات في الدوام وغيرة. تقبلو تحياتي

  31. كلامك صح ميه بالميه وفيه حل للي ضروفهم صعبه انهم ما يستخدمون الهدايا ويخلونها يهدونها لاصحابها يعني اللي عطتني مبلغ اهديها المشايه واللي اعطتني المشايه اهديها المبلغ وبكذا محد يدري وانا صارت معي وفي ناس ما اهدوني بولادتي وضروفهم عال العال لكن لاني ما اهديتهم قبل ( مو علشبنان ما اقدر بس كنت وقتها بنت قبل اتزوج ومااهتم بهدايا الوالدات) فعاقبوني بعدم الاهداء حتى الهديه طالها النفاق والمجامله وما تنعطى من القلب ولله في الله

  32. بسم الله .. اسعدني جدا حضوركم وتفاعلكم وتواجدكم من القلب أشكر كل من حضر هنا وتفاعل ,, وسنلتقي بإذن الله في مواضيع لاحقة اكرر شكري للجميع .. والله لا يحرمنا منكم ,, . . . صلوحكا

  33. السلام عليكم و رحمة الله وبركاته بعد التحية والسلام ….كلامك صح اشكثر نصرف على الهدايا ..و ايضا تعقيب على الرد رقم 3 (الحزن عنواني) ال100 او 150 ريال ما راح تنقص كثير لكن في ناس ظروفهم جدا صعبة ويالله يقدرون على الايجار و الاكل و المدارس و ناس حالهم متوسطة و 100 او 150 لما كل حد بيروح يزوره و كل مناسبة تصير في العائلة و نضيف عليهم الاصدقاء والمعارف اللي بالشغل او المدرسة او الجامعة شوف في الشهر كم راح تصرف على كل هدية تشتريها ميزانية ما تقل عن 1000 او 1500 ريال وطبعا هذا كثير حتى للي حالهم متوسطة بالنسبة لي لما توصلني هدايا واحس اني مو بحاجة لها أهديها لغيري وما اعترف بالمثل الهدية لا تهدى ما ادري على اي اساس بعض الناس تمشي عليه … لما لما حد يعطيك شي خلاص صار ملكك و تقدر تتصرف فيه مثلل ما تبي ومن بينها تهديه لغيرك …. أصلا شو بتسوي فيه اذا ما استخدمته …. بتتراكم عندك فلا انت تستفيد ولا غيرك يستفيد منها الشي الكبير البعض يقول انه الهدية لا تهدىحديث للنبي ص و هو حقيقة انه موضوع على كل تشكر يا اخ صلوحكا على الموضوع

  34. السلام عليكم ورحمة الله وبركاته.. موضوووع رائع وصاير بمجتمعنا,, صدقت والله,, كله دام فلان جاب لي لازم اعطيه واردها له؟؟؟ حــــــــشىB صارت دين مب هديةّّ!!!! من وين بتكون المحبة:( والمفر وض اللي يجيه هدية مـــــــــــــــــايلتزم بردهاا حتى لو كاان قاادر ومعروف.. يكتفي بصلة الرحم والزيارة والكلمة الطيبة وبهالطريقة بيكون اثبت وجوده و عرف بنفسه وبرايه بهالطبايع الشينة اللي انتشرت عندنا بتلاحظ غيره من الاقارب بيسوي زيه وبيلتزم مثله هالتصرفات الله بيحاسبنا عليها ..تعب وتبذير.. والاجر على النية الصادقة بالزيارة والسؤال والسلام الله يعطيكم العاافية اخوواني وخوااتي تسلم صلوحااا على الموضوع

  35. تخيل العائله فيها 26بنت و15 ولد بكره بيتزوجوا وينجبوا أطفال ما يحلا لهم إلا الزواج بسنه وحده والسنه اللي وراها الكل إما حامل أو والد اللي راتبه2000ريال بس منين يجيب هدايا للكل العروس بجيب ذهب وإن جابت بنت بجيب ذهب والولد بكّون والله مصيبه مو500 ريال بتفرق معه إلا 20 ريال بتفرق

  36. اناالحين كثير منحرجة لي صديقة زارتني من سنة وللحن ما رحت لها والسبب هديتها طبعا جاتني الله يجزاها خير وجايبه معاها حلا وهدية فخمة هي موظفة وانا الحمد لله على قد حالي وكل ما اتصلعلهيا تقول تعالي لي وانا اعتذر ومن جد مالي وجه بس ما تقدر اني اروح ازورها وما اشيل لها هدية بصراحة مرره صعبة

  37. والله أحسن هديه تجيني رفعة السلامه والتحمد بالسلامه.. وبسسسسسسسسس

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى