مساكم الله بالخير قروب ابو نواف
شكرا لكل الي سالو عني الفتره الي فاتت
وشكرا من اعماق قلبي لأبو نواف على السؤال المستمر
وعلى الأهتمام سواء بي شخصيا او بالأعضاء الآخرين
واحب اهني نفسي واهني أعضاء قروب أبو نواف بالكاتب المميز
أبو طارق
الي كانت مشاركته في القروب مفاجئه حلوة
( موضوع للمقبلين على الزواج فقط )
ونسعد بإنضامه للمجموعه الذهبية مجموعه ابو نواف
ليكتمل عقد الألماس مع الأعضاء المميزين الي يتحفونا كل يوم بالجديد والمميز
منيب مطول عليكم
بس فيه سالفة مضيقة صدري من زماااااااااااااااااااااان
وودي اتكلم عنها هي عن الإشاعات الي تطلع من فتره لفتره
واخليكم مع الموضوع
نصابين الين الحين
النصبة الأولى
جني الحبلة
جني الحبلة
أذكر منول يومني في شقراء ايام القراوة في ثالث متوسط انتشرت هالأشاعة
ان فية صوره لجني مصورينها شباب في غار في الحبلة
وخلصت الصور من استديوات شقراء وانسخ منها الييييييين قالت بس
الزبدة ابي الصوره ما قدرت ( قلت لخوينا نبي صوره الجني يرحم امك وش الحل )
قال مالك الا انك تجيبها من المجمعه 90 كيلو عن شقراء تبي ننقز بكره .. قلت قدااااام
والله ونغير زيت الددسن وندز للمجمعة يوم وصلنا ونلقى زحمه وامه الثقلين عند الأٍستديو
تدرون بكم يبيعون الصوه الوحده 
هذا وهو جني الحبلة اجل لو هو جني المجمعة بكم بيبيعونه
والله وناخذ لنا بميه ريال خمس صور صورتين لنا وثلاث صور وصاي 
ودارت الأيام ودار الزمان وكبرنا وتعلمنا وجمدت عقولنا وآخر شي نكتشف انها
مغير صوره ملعوب فيها .. لعب فيها باكستاني راعي ستديو وطلع منها ملايين
والي زور جواز و بطاقة احوال مهوب عجزن لا يزور صوره جني
ولا اقول الا الله يخلف على امن جابتك عزيزي القارى 
بس يشفع لنا اننا ذيك الأيام بزارين .. الشرهه على الشياب الي صافين سرا عند الأستديو
النصبة الثانية
النمنم
النمنم
هذي إشاعة انتشرت في عام تقريبا 1988 م وعلى مستوى المملكه كلها
وراح ارويها لكم حسب ما دار في ديرتي شقراء
يقولون ان فيه قبيله من نيجيريا اسمهم النمنم جو من نيجيريا وهم ياكلون لحوم البشر
وهي قبيله غريبه ولهم اذناب مثل اذناب القطاوه بس اشكالهم ماتفرقهم عن اللحوج
فية رواية
تقول عجوز من ( القراين – غسلة ) لعجوز ثانيه ان مرتن دق جرس الباب
ورحت اشوف من عندة .. قلت من ؟
وكانت الي تطق حرمه لابسه عباة … ردت و قات انا
تقول يوم فتحت الباب ولا هالحرمه واقفه وتقولي ما عندكم شن يوكل
قالت العجوز لا والله ماهناش الحين ..
تقول العجوز .. يوم اقفت هالحرمه 
ياكبرهاااااااااااااااااا يا كبرهااااااااااااااااا
ومرت الأيام ومرت وصارت السالفه الظاهر ان فيه عجوز بتروع ولدها ما تبيه يطلع
وفقشت عليه هالفقشه ومن بزر لبزر ومن حرمه لحرمه لين صارت صدق
ولا بالله وجاب قبيله من نيجيريا يسكنون في شقراء .. الله واكبر ياماليزيا
طيب مدامهم داقين مشوار من نيجيريا ورا ما وقفو في تركيا ولا في دير ازين شوي
ماعندنا الا غبار وشمس تصهر الوجه وش يدورون … وان كان نيتهم لحوم بشر
يعني مسكت على لحوم اهل شقراء 
هههههههههه 
خصوصا حي السياحين … والله لوني نمنم ما اشتهيت اكل ذيك اللحوم .. ولو كلت ابطرش
النصبة الثالثة
معجون الأسنان ملوث بالأيدز
معجون الأسنان ملوث بالأيدز
في عام 1990 تقريبا وفي صباح احد الأيام
قامو اهل شقراء من نومهم وكلهم لقو في حوشتهم كيس صغير
فيه معجون وفرشة اسنان بدأ الكلام ينتشر من هنا وهنا
وكان ذيك الأيام الأيدز توه طالع الله يكفينا وياكم الشر
وبدت اول فقشة ان هذي عماله فلبينيه رمت هالفرش في حوشة الناس
حتى يستخدومنها وينتشر الايدز في شقراء 
والي خذ المعجون وسلمه للشرطه والي راح ورماه في البر ودفنه والي والي
المهم بدت عمليه البحث عن المجرمين
وفي صباح اليوم الثاني وفيه واحدن تووه طالع من باب بيته
الا ولا الفلبيني في وجهه توه رافع يده بيحلت الكيس في حوش الرجال
ماصدق على الله الرجال ومسكه ورمغه رممممممغ الين عض الأرض
يابن الكلب يالفلبيني تبي تنشر الأيدز في الديره … يوم الفلبيني الضعيف ضاقت به الدنيا
وقاله الرجال وين كفيل انتا
قام الفلبيني الضعيف عطاه كرته
صار مندوب تسويق لشركه سقنالتو … 
ويوزعون عينات تجريبيه تسويقيه
قال الشرهه مهيب عليكم على الي يجي يوزع عندكم شي مرتن ثانيه
وبعد اسبوع طلع ايضاح في جريده الرياض حول هذا الموضوع
والا كان الا الحين يمكن الناس تحسب اي شي يدس من تحت الباب فيه ايدز
الله يستر بكره لا يقولون جريده الوسيله فيها ايدز انتبهو تقرونها 
النصبة الرابعة
الرجل الثعبان
الرجل الثعبان
طبعا زي ماقلت لكم الأشاعات هذي انتشرت في السعودية كلها
يعني لا يبزون علينا اهل الرياض ترا فيهم حقهم 
بس انا اقولكم اثار الأشاعه في ديرتي
الرجل الثعبان هذا اذكر روعني روعه الله لا يوريكم
انتشر رقم تلفون بين الناس ذيك الأيام قبل 12 سنه تقريبا
رقم التلفون هذا في الرياض 
ان صاحب هالرقم قلبه ربي ثعبان بس ما ادري ليش
وفعلا جبنا الرقم وكلمنا 
طقتنا النفاضة
الرقم هذا انتشر انتشار مهوب صاحي
تدرون وش صار في الأخير
7
7
7
7
7
7
7
7
صار رقم فاكس شركه … اول ما طلعت الفاكسات ذيك الأيام
بعد فتره قلبو التلفون على خط مباشر يرد فلبيني …اقول بنفسي الثعبان انقلب فلبيني
المشكه ان عيال خالي في الرياض يقولون انهم مرو بيت الرجل الثعبان
وشافو راس الرجال مع الدريشه
ههههههههههههههههههههههههههههه
ههههههههههههههههههههههههههههه
ابو الي انتم نصابينه ياشيخ 
النصبة الخامسة
البنت العمانية الممسوخة
البنت العمانية الممسوخة
وهذي جديدة توها طالعه من كذا شهر
جالس في الإستراحة الا والله واسمع الشباب يحكون
ما شفتو البنت العمانية الممسوخه
قلت ليش وش الي ماسخه 
هاه غردو وش الي ماسخها
قال واحد انهم يقولون انها كانت تسمع اغاني 
قالت لا منيب مقصرته …. ثمن ما امست الا وهي صايره كذا حتى شف ملامحها ملامح بنت
اقول في نفسي ملامح عنز والله …. بس ماشالله وينها قاصتن شعرها فيه
ويوروني الصورة 
قلت الشرهه مهيب على الي الي ناشر الصورة الشرهه عليكم يالدلوخ الي مصدقين
لعن ابو بليسكم ما تعرفون اختراع اسمه كمبيوتر ولا اختراع اسمه فوتوشوب
واقول بنفسي اسعد الله بالباكستاني الي ركب جني الحبله يكمل مشروعه وانا بمول المشروع
مدام انه الا الحين فيه زلايب 
7
7
تبون اقولكم وش سالفة العمانية الممسوخه الصدقية
ولا تدرون منيب قايلكم
بعطيكم هالرابط عشان تشفون وش قصه هالبنت العمانية
نصبات على الطاير
المطاعم الي تحط كتشب ملوث بالأيدز في الهمبرقر
رسائل جوال
اللحوم الي ملوثة في بالأيدز
مهربة للسعودية من منفذ البحطا في مدينة سكاكا انت بس ركز على المنفذ وينه فيه واغسل يديك
انا خابر انا منفذ البطحا عند الأمارات وش جابه لسكاكا مدري
رسائل جوال
البنت الي تهاوشت مع الهيئة في مجمع الفيصلية وطاحت ميتة
والناس راحت للفييصليه تدور اثار ولا كعب طاير ولا شي
سوالف استراحات وانترنت
يقوله ابو عبد الرحمن
وانتم ماشين ……………
انا اقول مدام هالذباب يدودي فوق روس بعض الناس
وماعندهم شغل ابشرو والله بالي العن من من هالفقشات
تحياتي القلبية لكم
ابو محمد
دعواتكم الصادقة لي بالتوفيق اذا اعجبكم محتوى الرسالة
واذا ما اعجبكم ادعو علي عادي
