يقول الشاعر الفذ في احد قصائده الارتجاليه
يانجد صيفك يقطع القلب حرّه *** شتان مـا بينـك ومـا بيـن بيـروت
أقفى ربيعك بالفرح والمسرّه *** وصيفك وصل بالعج والحـر والمـوت
جوٍ سموم القيـظ دايـم تكـرّه *** وإليـا ركـد مـا كنـي إلا بتابـوت
وإليا لحقني فيك بعض المعرّه *** إسمحلي أرحل عن فيافيـك بسكـوت
شهرين ابيها منك فالعام مرّه *** ألبس بها البنطال والبـس بهـا الكـوت
آخذ على لبنان والشام فرّه *** وآكـل مـن الرمـان والخـوخ والتـوت
الخ القصيده …
.. ومناسبه هذه القصيده ان شاعرنا الفذ ماقالها الا وهو " مونس " الحر وبعد ماطقته الشمس وحمسته ..
والله اني احمد ربي اني منب " تمره " كان الحين انفضخت عبستي من زود الحر 
تدرون من زود الحر اني جالس اكتب لكم وانا ارشح عرق ومتغطي بكنبل " بطانيه " نفرين 
مره دخلت على منجره وجالسين العمال يشتغلون وحر كتمه مابعدها كتمه اللي فيه ربو افلقني اذا لقى هواء يشفطه
وانا اجلس اتحقرص واتصبب عرق عاد حنا يالسعوديين علينا ملابس في الصيف مال امينها داعي 
يعني تخيل معي حر ولابس لي
1- سروال مقوصر 2- سروال طويل ربدزه ابو غزاله علشان تتك صح على البطن . 
3- فنيله نص كم دروش كلها قطن
من وين تجيك ضربه شمس على هاللبس 
لذا قررت اني اغير ملابسي واترك عادتنا وتقاليدنا على جنب لين يخلص الصيف وانا ناوي افصل لي
شرشف خفيف واستر فيه عورتي او البس حرام واروح للدوام
نقطه العرق تنزل من ابطك لين تسيح على بلاط الرخام مايردها شي 
اجتمعنا حنا الشله المكونه من ابو سليمان النحوت " النضول " و ابو عثمان غفر لله له
وابوناصر قدس الله سره وابوسعد حظي قعد وتشارونا في مسألة الحر والصيف وكان خامسنا الطفش 
قررنا نطلع لسوريا بس الحجوزات مليانه وماعندنا احد ينفعنا .. في المطار
قلنا مالنا الا نشحن السياره للقريات وندور واسطه على طيارة عرعر او القريات مباشره
ونطير عند واحد يدعي انه من الجماعه قلنا خلنا نستفيد منه وبعد جهد جهيد وابشركم لقينا واسطه وقصينا التكت
وقفنا ننتظر موعد الرحله الا خوينا ابو ناصر جاي ومعه كيس رز المهيدب .. والعيون شاخصه عليه 
وش عندك يابوناصر مع كيس الرز .. قال باخذه معي كل شي عاد ولا الرز ..
قلت له يابوناصر بسوريا مايتحاج رز عندهم المشاوي والمقبلات ازين لك من هالرز ..
قال : ولو كل شي ولا الرزيزه ولو هرجة الناس كان افطرت رز ..
معليش يابوناصر لازم اذكر القصه كامله تقولي احراج .. عادي انت احرجتنا بالمطارات الدوليه وكيس الزر اللي تسحبه معك
بعد ما اعلنو عن بوابة الطيارة اللي راح " تقلنا " الى مطار القريات نط ابو سعد حظي قعد مقروص قال جوازي
نسيته ياجماعه الخير وش الحل 
طبعا لاتشرهون على بال ان هالمطار مطارنا وحنا ماندري .. قالنا السوبر فايزر اها بس تقلعوا الرحله تمشي في موعده
يعني تمشي في موعده ما نحتري احد .. وش قالوا لكم النقل الجماعي حنا شغل " لمصقه " 
" مدري ليه ماخذين فكره سيئة عن النقل الجماعي والكريديس بيطلع هو وزوجته شهر عسل عليه "
قال ابوسليمان النحوت : ياشين اقطع راسي نصين اذا طارت الطياره بدونا .. رح يابو سعد جب جوازك وتعال وحنا
نحتريك .. ماعليك منهم .. نقز ابوسعد يجيب جوازه من البيت .. والشله جالسين والمطار يعلن عن تأخر الرحله
بسبب عطل فني .. وانا والشله متمددين ضحك قال ايه قال عطل فني .. ياشيخ والله ماتزين الا اذا تفل ابو سليمان 
رجع ابو سعد .. ومعه الجواز قال ابو سليمان يالله مشينا .. مير نروح عند السوبر فايزر ونقوله يابو الشباب خلاص
خل الطيار يشغل الطياره
وجلسنا نحتريهم يمدون الخرطوم عاد تباطيناهم مادرينا الا جانا ابو ناصر طاير قالنا يالله يالله ياعيال هذاهم " يقروون بذنه " 
يعني انهم مدوا الخرطوم حق الممر .
وصلنا القريات بحمدلله وسلامته .. 
وطلعنا علشان نستلم السيارة من البسامي .. واكتشفنا ان ابو عثمان غفرالله له ما ارسل السيارة للقريات
لانه من الاساس ماكان معه سيارة 
كابرس تسعاوي يجرح ويداوي 
واتفقت الشله بالاجتماع على البنود التاليه بعد توفر دعم للميزانيه اللي اطفحت علينا كالتالي :
البند الاول
شراء مكيف صحراوي واحد حصان
البند الثاني
تركيب طبق فضائي " ساتلايت " مع ثلاث روس عرب سات ونايل سات والاوربيات عوضا عن جلسات الزبداني
البند الثالث
استقطاب ايدي عامله عدد واحد هندي لمدة فصل الصيف يشترط فيه خبره في تضبط روس المعسل وتنظيف دورة المياه .
البند الرابع
شراء شراشف جديده غرض نومة الظهريه في الاستراحه
البند الخامس
تسديد جميع مستحقات الاستراحه والمديونيات المتأخره الى زاكي راعي البقاله ..
البند السادس
محاولة البحث عن مناطق تنزه للشباب وحجز مكان في شارع النهظة غرض التسدح على الثيل
خاصه بعد اندثاره على طريق الدائري بعد عملية التحديثات الاخيره ..
البند السابع
انشاء جمعية من رأس مال القطعه مناهظة لجمعية مكافحه الفقر وتختص الجمعيه المزمع انشائها باذن الله
في مكافحة الحر في نجد وماجاورها من المناطق السعوديه ومكافحه غلاء الاسعار قال ايه قال سياحه داخليه
————————————–
مع تمنيتنا لكم حراً سعيدا
——————–
