رسائل المجموعة

موضوع مغبّر .. بس غباره نسيم وترابه عطر !

صباح الورد للي مصبّحن عالم النت بعين وحده .. ومساء الفُلّ والياسمين للي توّه دابغن في النعمه وملحّقها بكاس لبن وجالس ينتظر أذان العصر  

بادءٌ ذي بدء .. أشكر كُل من أرسل لي أي حرف شُكر وثناء أو نصيحه وتوجيه لحلقاتي الثلاث المزواجيه بتاعة ( للمتزوجين ) .. وصراحه كنت أتمنى أن السلسلة تطول .. لكن خبركم .. أخوكم متزوّج واخاف أتهوّر واجيب العيد مبكّر .. خاصه بعد ذوباني على الكيبورد لاشعورياً وخويي سالم جنبي وكل ماشاف عيوني بديت تطيح طقني بذراعه وقال لي بصوته الخُنفُشاري : أعقل يامُدمن .. ترى الدنيا ماتسوى أنك تموت عشان مواضيع رووومانصيه  

وصراحة الواحد من دون توجيه غيره له أو شدّ لهمته مايقدر يواصل أو يستمر في طرح المُفيد بإذن الله << أخلص عطنا اللي عندك ولاتمدح روحك
موضوعنا اليوم .. موضوع مغبّر
.. غُباره نسيم .. وتُرابه عَطِر .. وهواه عليل


أيامي الخوالي .. عشتها بين دعثة النخيل وريح الغنم وملاحق الثيران في مزرعتنا بالديره  

أيام جميله بِكُل ماتعنيه الكَلِمه ويحويه الحرف المتنيّل بستين نيله 

كنت أنا وولد عمي سالم وخوينا حمد الاثول ربع ورفقة عمر
.. درسنا سوى ومن حبنا لبعض كان الرسوب حليفنا ( سوى ) … يعني ماكان يفكّر حمد أنه يتعدانا لأنه يخاف أنه يتعدانا ثم يُفاجئ بأن ربعه واخوياه تركوه لأنه صار أكبر منهم دراسياً .. وهذا يؤثر على مُستقبله .. وين بيلاقي ربع فيه مثل المدمن وولد عمه سالم 

 
تخرّجنا دراسياً سوى .. ومشت الامور إلى حين لقى ( حمد ) له وضيفه عند ابوه ، وسالم توظّف في محل خُضار مع اخوه التسبير ، وانا صرت وزير .. قصدي صرت ( على قدّ حالي ) ومحطة البنزين اشغلهم لين يعطوني علبة مناديل ( أمشّ فيها )
خشمي 

 
في الأيام الخاليه كنّا احنا الثلاثه زوّار مزرعة الوالد .. نجلس فيها من أذان العصـر وحتى قُبيل أذان العِشاء .. هذا يحصد وذاك يخرف وذاك يتسوي العنز في ظهرها  :goat:.. براءه مليحه ووجوه مليئة بِغُبار التعب والكدّ الوديع

:farmer: 

مرّت الأيام والليالي .. الشمل تفرّق .. ورجعت بِشريط الذِكريات بنفس رِتِمْ الخُطى القدميه
 

 
سحبت روحي ودفّيت عمري لنفس المكان اللي كنّا نتبطح ونجتمع فيه .. على الأقل أطلع على ماتبقى من أبواب ونوافذ 

ومن دخلت وانا عيوني
( غدن بيضن من الونّه ) .. تذكرت كل شي … ( خُطى ) سالم الكبيره لها أثر .. حتى جدار المزرعه أبقا أثر لكلمات كتبتها وانا صغير وعمري مايتعدى الثانية عشر سنه .. كتبت بخطّيَ الفاشل إملائياً : ….. + سويّر = عيال حاره وحده ، ودحيّم مالك عندنا بالديره مكان 
 

 
خرفشت في جيبي أدوّر الجوّال أبغى القطه بكراعينه واصوّر لي كم صوره .. أخيراً صدته ولقيته
( يأنّ ) ويقول ( حرام عليك يامُدمن .. لاغدى والا عشا والا حتى قطـــعة شحن تشحنّي فيها .. يرضيك كذا ؟ ) .. قلت ( أنقلع .. أحمد ربك شلتك في جيبي لأنك أبو المصايب وماخرّب عيالنا إلا انت واشكالك ) .. خذت لي كم صوره أكشن << مالها داخل كلمة أكشن .. بس لزوم التميلح 
 

أترككم مع الصور .. ولا أحد يسرقها تراي كاتب تحتها اسمي وباصمن عليها بجبهتي 

 
* اقلطوا يارجال *




* صِراع الأبواب .. الماضي والحاضر ! *

 



* هاهُنا كان الركوع ! *


* بساطة الماضي عبر نافِذةُ الغُبار ! *



* * *

 من تحت هامش السطور : قريباً – بإذن الله – في الأسواق كِتاب  مذكرات مدمن شاهي .. مرافئ على شاطئ البسمه ( الجُزء الأول ) .. وقريباً أيضاً قناة ( لمسات شبابيه ) وقناة ( بسمة للأشبال ) عبر رسائل الإس إم إس للجوّال .. بإشراف مُدمن شاهي والثالثه خلوها مُفاجأه .. وكل شي في وقته حلو 

:: مُدمن شاهي ::

:cup-of-mi

مقالات ذات صلة

‫17 تعليقات

  1. شكراً لك على الموضوع الرائع بس اللي عجبني ولفت انتباهي الباب القديم نفس باب بيتنا القديم تقول نسخه ثانيه منه احنا قايلين بنوديه المتحف لكن الله ما كتب يزور المتحف هههه مشاعر

  2. السلام يامدمن مدري شقول غير انت رهيب ، مبدع بسخريتك بطرحك بحروفك بنكتتك ببسمتك بكل شي انت رائع ربي يوفقك

  3. السلامـ عليكمـ ورحمة اللهـ أخويـ مدمنـ.. صباحكـ بنكهة القهوة.. ومسائكـ مليء بالسعادة.. تسلمـ على الصورتينـ المميزة.. يكفيـ أنها تحملـ معانيـ كثيرة لتلكـ الأيامـ الرائـ ع ــة.. سلمتـ.. ننتظر إبداعاتكـ.. .::سـمـسـومـة ::.

  4. الصور وريته شايب عندنا عووووود مره …….ونسدح وحط ايده على خده وقام يوووووون

  5. والله أيام أول حلوة ….الصراحة الموضوع فلة …بس التصوير روعة …. تسلم اخوي مدمن عالمواضيع المسلية …

  6. بيض الله وجهك على الموضوع رجعتنا أيام الديره والزحف ولعب الكوره مع عيال الحاره.. وبسألك أخوياك توظفو وأنت ماتوظفت ليه؟! ههههههه وأشكرك على الموضوع….

  7. ماشالله عليك يامدمن اعتبرك مثال للسخريه اللي مامثلها ، تسلم وشكرا على مواضيعك الهادفه الساخره اللي تونسنا بكل وقت واحد يحبك اسمه / ابن العرب

  8. مدمن ياقلبي .. أنا قررت أخليك معي بالسيارة من لاوزم الكشته انت .. لاتقول ماأحب البر ,,, خلاص الموضع طلع من يدي هههههههه ياحبي لنا لك والله كل موضوع احلى من الثاني ربي يوفقك انت مبدع ,,,,,,, ولا تنسى موضوع الكشته تراك أنت أول العزبه خخخخخخ

  9. سلام يامدمن من شفتك رسالتك وانا زي المهبوله ، ياربي لايخلينا منك ومن فرافيشك المصرقعه ، وتراي من زمااااان وانا مدمنة شاهي ومدمنة لمواضيعك ، لوووووول 🙂

  10. عندي التوقيت آلحين الساعه 11.23 صباحاً .. يعني غاطس بصحن جُبن وبكاس حليب مفوّر .. … .. صباحكم ورد ياغالين = مشاعر = = نوره العقيل = = smsoma = = جناحي = = قمور = = تمساح بس حلو = = ابن العرب = = الديزل = = مها بنت سويّر = شكراً لحضوركم من باب داري .. وحضوركم نسّم علي الخير .. لاعُدُمتُكم جميعاً .. وعقبال تعرسون وتعزمونني بعرسكم وادبغ فالنعمه واحط عود الاسنان بفمّي وانا طالع من باب قصر الافاح .. واقول في ثنايا الروح يارب وفقهم 🙂 أخوكم : مدمن شاهي .

  11. ههههههههههه والله انك منتهي وفاصل من زمان يامدمن ، اجل وزير يالاخو ، على طاري المزارع والهبال ترى عندي مزرعتن يحبها قلبك غديك تجي عندنا وتنورها بوناستك ، ياحبي لك بعد

  12. قلت لاجديد ، لأن أبداعك هوَ هوَ ، ماشاءالله عليك يامدمن الغالي ، الكل يحبك والدليل ضجّة المنتديات عند حضورك بأي موضوع ، مُتابع لك في الساحة العربية وهُنا وهُناك في منتديات عنيزه ، أنتظرُ كِتابك ورسائلك عبر الجوّال ، والثالثه بانتظارها مفاجأه ياأجمل مُفاجأه بِدُنياي أحبك لو غدى الطير غدّار !

  13. ماشاء الله عليك يامدمن والله يكفيك شر العين ، مبدع لآخر كلمه وتقدر تضحك الجميع وتوصل ماتبغى بطريقتك الحلوه تحياتي

  14. راح ننتظر كتابك يامدمن وترى قبل كم يوم دخلت عند موظف مكتبة جرير بسأله عن كتابك يسألني يقول وش هذا مدمن شاهي ، شكل فيه ناس ازعجونه كتير عشانك ، وشكراً على الوناسه ياحبيبي

  15. كلامك روعه وقصصك فكاهيه وتجيب الفايده بأسهل الطريق ، تسلم يمينك يابو المفاجآت

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى