رسائل المجموعة

مفهوم الترفيه ..

السلام عليكم ورحمة الله وبركاته
بسم الله الرحمن الرحيم
بسم الله نبدأ وبسم الله نختم لقائنا ..
طبعا الموضوع كتبته بخصوص الوقت وقت الصيف وكل شخص راح يبحث عن الترفيه للنفس ..
فحبيت أذكر لكم المفهوم الصحيح وبعض اخطاء مفاهيم الناس للأمر هذا ..

مفهوم الترفيه
المفهوم الأصح هو ترفيه الروح من نشاطات جديده مفيده
وتغذيتها بما يفيدها ..
طبعا هذا المفهوم جزء من مفاهيم مختلفه تماما عند كل شخص معين
لكن هذا المفهوم طبعا أشوفه الأفضل ..
واليوم طلعت لنا مفاهيم عديده عند الأشخاص ..
بعض المفاهيم تصل بك إلى التعجب والإستنكار من طريقة الترفيه المتبعه ..
طبعا راح أسردها على شكل مجموعات ..

المجموعه الإولى ..
الترفيه ب(إرقص وإردح وخلنا بالهبل سوا)
واقف عند الإشاره وأسمع صوت رجه ..
ألتفت يمين يسار وتسقط عيني على حنكة شباب ..
مشغلين إغنيه طق .. القاصي والداني يسمعهم ..
الكل يطلع عليهم وعلى حركاتهم المضحكه ..
للأسف يظنون هذا هو المطلوب ..
أنا أتسأل بذاك اليوم وين عقولهم ؟
طيب ما يمنع إنكم تسمعون أغاني إسمعوا لكن خلوها بينكم وبين أنفسكم ..
والهز والردح الى قاعدين تفعلونه لزم قدام الملأ ؟
طيب شوفولكم مكان معزول وأمين لاتوقفون لما ينطبكم جن ..
يعني عيب أخلي من نفسي نظره للناس بحركاتي لو أنا مقدم على أمر مثل كذا ..
أعزائي للعلم فقط الفرق بيننا وبين الحيوان العقل ..
واذا ذهب العقل ذهب الحياء وإذا ذهب الحياء عاد سترك يارب ..

المجموعه الثانيه ..
الترفيه ب( الخارج ينادي )
بعض الى يسافرون للخارج حاب يستكشف ( ويتمقل ) بعالم غير عالمه وهذا لا بأس فيه ..
وبعضهم
يسافر علشان الليالي الحمراء وعلشان ياخذ راحته هناك ..
يذهب وهو يعرف فلان وفلان
ويرجع ولا يعرف حتى إسم الوالده
بإعتقاده هذي الحياة وهذا مايتطلب فعله ..
يعتقد الشرب ومخالطت الفتيات هو الترفيه الصحيح ..
نأسف جدا على هؤلاء ..
فعندما نراهم بمقاطع الفديو وقمة غبائهم نحزن لكن ما باليد حيله ..
الغريب اذا كان هم خارجين من سموم العمل من ضغوط وعمل متتالي ..
كيف يذهبون ويضعون سم على سم ؟!
لكن عقليات ..

المجموعه الثالثه ..
الترفيه ب( التفحيط )
عاد انا أستانس عليهم ذولا جد مادري وش يحسون فيه والسياره تمشي 180 على جنب هههههههههه
الساعه 6 الفجر الناس طالعه من صباح الخير إترزق وذولا تفحيط
الغريبه هنا إنه يكثر الحشد والمتابعين لمثل تلك الحركات الإنتحاريه ..
وبكذا نشيد إنهم على صح وهذا غلط ..
وكم سمعنا عن وفات 8 أشخاص بلحظه وكم سمعنا عن إحتراق السياره أثر تقلبها وإحتراق من في داخلها ..
وكم وكم ..
السياره تكون قيمتها حدود ال60 ألف ريال ..
البعض محتاج لتلك النقود لتسديد ديون أو ماشابه ..
وهذولا يذهبونها بلحظه أثر إصتدامها بحاجز ما ..
طيب إذا فيك هالشي وحاب تظهر قدراتك وفنونك بالأمر هذا ..
فيه الله يجزاك خير بلاستيشن 3 وفيه شريط GT لايفوتك ..
إشتره وإقعد من الصبح إلى الليل طبق حركاتك وريح الناس منك ومن شرك ياخي ..
والله جد حرام عليك ترهق أرواح يمكن وراها عيال وراها أهل ينتظرونه ..
والله إن تقبل دعوه من هالدعوات ويجيك شي تندم على الإمور الى كنت أنت السبب فيها ..

المجموعه الرابعه ..
الترفيه ب( المخدرات والحشيش )
عاد ذولا الله لايبلانا منتهين حتى اخر لحظه ..
يجيك يدفلك حبتين وشف الإقتراحات الى تطلع منه والتصرفات الى عليه ..
والله أمرنا عجيب ..
أغلب المتعاطين دائما يكونون هاربين من أمر معين مثل ضيق النفس أو فراغ دامس ..
وإذا إحتجنا لحل نذهب ونتعاطا المخدرات .. المشكله نربط أنفسنا بأنفسنا كذا ..
والله ماهو ترفيه هذا .. هذا دمار عقلي ودمار إجتماعي ..
المخدرات مو بس تنسيك الدنيا .. تنسيك إن لك عقل ومثل ماقلت لكم ..
بدون العقل نصير مثل البهايم وأنتم بكرامه ..


طبعا لو نضل إلى بكره مانتهينا من ذكرنا للمجموعات هذي ..
لكن أنا حاب إني أوصلكم بعض المفاهيم الخاطئه للترفيه لجل ندشن بالموضوع الأساسي ..
قال الله تعالى { وَلاَ تُلْقُواْ بِأَيْدِيكُمْ إِلَى التَّهْلُكَةِ }
كل ماذكرنا بالمجموعات وماوضح لنا إنهم ملقين أنفسهم في هلاك محتم ..
لو ماهلكوا بالدنيا راح يهلكون بالأخره إذا الله ماكتب لهم التوبه وحسن الخاتمه ..
أعزائي ..
الإستمتاع بالحياة مطلوب عند كل فرد كبير أم صغير ..
بل حياة من دون ترفيه حياة فاشله ..
لأن النفس عباره عن قنبله موقوته قابله للإنفجار في أي لحظه ..
لكن نستمتع بما يعقل ..
أيها الشخص ..
إستخدام ترفيهاتك المضره فيه تشويه لرقي مكانتك ..
فيه تشويه لحضارتك ..
والأهم من كل ذالك تشويه الرساله الإسلاميه ..
فل تكن معين للمجتمع لا عله على المجتمع ..
ودع عنك التفكير المتضارب وإختر الإستقرار ..
ومعنى الإستقرار .. إستقرار النفس بما ينفعها ..
بالنهايه ..
أتمنى إن الرساله وصلت ووضحت للجميع ..
وعرف المقصد للترفيه المفيد ..

أستغفرالله وأتوب إليك إني كنت من الظالمين
( لاتنسونا من خالص الدعاء )
إخوكم
Mansour

 

مقالات ذات صلة

‫7 تعليقات

  1. ياعزيز كلامك جداً جميل… ولكن ماتساألت وين يروحون الشباب …. هل توجود خيارات متاحه للشباب؟؟؟ كل شي عوائل عوائل انا ادرس بالشرقيه تصدق اني إذا بغيت اشتري ملابس اروح للبحرين والسبب كل شي عوائل كل المجمعات ماعدا الراشد ولا ننسى الملاهي الترفيهيه كلها عواااااااااااائل بدون استثناء ياخي الملاهي موللأطفال فقط عشان تصير عواااااااال ياخي ديرتنا زينه والنا غنا عنها بس القوانين المحليه تدبل الكبد

  2. صدقت اخي الفاضي خالدي قصيمي فعلا الشباب مالهم اي مكان يقضون وقت فراغهم فيه. فلذلك تشوف الشباب مافيه الا ترزز بالشوارع وملاحق بنات خلق الله ومضايقتهم انا مستغرب ان رجال الاعمال لحد الان مافكروا بفكره تجذب فيها الشباب وتفكنا منهم او بالاصح تفتكون منناههههههههههه فيه نشاطات كثير تقدر تجذب فيها الشباب مثلا الانديه الان بدت تتطور ولاحظت شباب كثيرررررررر يروحون انديه هذا مؤشر ايجابي ولكن فيه شباب مايبون انديه ولا يحبون الرياضة فلابد من تعدد وسائل المتعة في البلد بما لا ينافي العقيدة الاسلامية وشكرا اخوي منصور على الموضوع الرائع

  3. أخي / منصور . طرحك جميل جداّ . ولكن كل مجموعة مرتبطة بي بعض : ابو عزة صديق لى وهو عاش وجرب كل المجموعات و الان هوخلف القضبان ، ويقول إلي يفحط الازم يستخدم مخدرات و يسمع أغاني و إلى يسافر يمكن يزاني والى أسال مجرب 🙁 طيب وش الحل يجب على رعاية الشباب تسجيل جميع شباب في برنامج يساهم في تنفيس القدراتهم والخذ بأيديهم إلى بر الامان تجربة ناجحةمثل دولة الصين وضعو معاهد تخص الشباب و المشرفين عليها أخصائين علم النفس للمراهق و لهم صلاحيات في مجال الزواج والتدريب و الوظائف:( لا تعلم كيف كان أبوعزة قوي ويوثق فية الانه قوي الإرادة ولكن في غير محلها . الله يفرج عنك يا بوعزة

  4. السلام عليكم ورحمه الله وبركاته بالنسبه للموضووع فاشووفه انه حلوو يخي خلنا اعقب على النقطه الاولى (السفر)انا راح اقوولك ليه احنا اذا سافرنا برا مانسووي اشياء وحركات مايسويها الاجنبي سؤال بس ؟ انت للاسف تتكلم عن فئه معينه بالمجتمع ياخوي منصور انا متاكد انك ماشفت او انك ماراقبت الى مكان معين انا اقوولك تعال شووف الفئه المخمليه باوروبا (يشررب ويسكر بس بحترامه ) اما الحووج بصراحه اتوقع هاذامن البئه الى الواحد عايشفيها بالاخص ان البيئه السعوديه بيئه تقدر تسميها مغلقه شووي وما اتوقع انهم ناس مطلعين هاذا بالنسبه للموضوع الاول . ______________________________ بالنسبه لتفحيط لا تندسى بالاول انها نوع من الهوايات انا يمكن اكوون جلست مع اشخاص مفحطين واجد بالعكس اذا كنت تتكلم عن التكاليف ترى مافكروو فيهاا يمكن لانهم ناس معروفين مثل شخص الله يستر عليه طبعاالسيارات حقته او يستاجرهااا هاذا الشخص ممسوك 6 مرات وكل مره يطلع بوقتهاا انا اشوف الحل بالموضوع هاذا انشاء نادي او شي مثل كذا … مثل دوله الامارات والبحرين ومثل اغلب الدوول يكون فيها سيفتي وكل شي لاكن المشكله الناس الي سميتهم ( لحوج ) ابو الشبااب يجيك يصرق سياره ومايفكر في المسكين الى انصرق ويفحط وكذا فانا من وجهه نضر ان المشكله بالحووج لانهم نااس من بيئه او نقدر نقوول المشكله بالمدارس او الانظمهلانالدو المتقدمه تملك ناس لحوج بس النضاام يفرض نفسه صح المشكله عندنا النظام لويكوون فيه نوع من الحزم واسف على الاطاله

  5. ليست المخدرات والتفحيط وسماع الأغاني هي الترفبه ولكن ارى ان الأنشغال بذكر الله احسن وكذلك زبارة الأماكن المقدسة وصلة الأرحام والأجتماع مع الأخوة والاحبابواتنزه البري هو افضل وسيلة ترفية مع حبي واحترامي للجميع

  6. اولا خلونا نسلم عليكم السلام عليكم ورحمة الله وبركاته .. ندخل في الموضوع علطول , الانشغال في ذكر الله وصلة الارحام هذا واجب وليس ترفيه يعني انا مثلا ما احصل المتعه الا في خارج المملكة >> صريح ولا تقولون اي تفلها وبنات ووسعة صدر لا بالعكس حتى هناك نستحي نطالع بوجه البنت مدري ليش >> هع بس نبسط الملاهي انواع الفله ,حتى الشوارع لو تلفها 100 مره ما احد قالك شي اما عندنا الله يهدي مرورنا كل شوي موقفينا صرنا الحين نعرفهم واحد واحد من كثر ما يوقفونا صرنا حتى نمون ونسلم باليد مثلا ارجع لكلام اخوي الي يدرس في الشرقية كلامه 100% صحيح وشلون تبون الشباب ناجح من غير وسائل ترفيه , ياخي صرنا شيبان مو شباب من كثر ما نجلس في البيت ونمدد رجلينا عند النت , >> الي يشوفك هامور اسهم ما ندري وين نروح اقولكم قصتي : مره انا والشباب ناوين نزور معلم في الرياض الي هو برج المملكة نبي نشوف الرياض من اعلى قمة .. جينا الساعه 8 باليل ووقفنا السكيورتي قال الان عوائل الشباب من الساعه 10 الصباح الين الساعه 6 المساء قلنا نو بروبلم نجيك ثاني يوم مشخصين وكل واحد طق له هالجنز والشغل النظيف ووقفنا السكيورتي مره ثانيه قال اليوم ما فيه شباب اليوم الاربعاء كله عوائل .. طيب واحنا متى !! هذا بس سالفتنا في زيارة معلم ! اجل كيف المنتزهات .. حتى المخيمات الي كانت في الثمامه عند محطة خزام للعوائل طيب والي ما يبي يطلع مع اهله وش يسوي .. يعني لازم حل .. واسف على الاطاله وعلى سوء التعبير لكن قلت فرصه افجر مافي داخلي واشكركم جميعا

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى