منذ نعومة اظافري وأنا استخدم نظام الويندوز
ولكي اصدقكم القول ماعرفت ان فيه انظمة غيره الا من سنتين الظاهر 
نعم، تهورت وشريت ماك 
في البداية خلوني أقول لكم رأيي وإنطباعي عن الجهاز حتى الآن 
نجي لنوع الجهاز اللي شريته
ماك بوك برو MacBook Pro
تقدر تطلع على موصفات الجهاز وشكله من الموقع الرسمي : هنا
إستجابة الجهاز
الجهاز للأمانه سريع في تشغليه وتطفيته، ماتحس فيه ولا تجلس تنتظره، لذا أقيمه بأنه سريع التشغيل واستجابته عالية (ممكن يختلف الكلام مع اختلاف موصفات الجهاز)، هذي نقطة في صالحه لكن برضو سرعة الإستجابة ممكن تحصلها في أي جهاز جديد عالي الموصفات 
واجهة الجهاز والإختلافات الموجودة فيه
كنظرة أولى للجهاز وواجهته بتحس أن أهلك حاطينك في السوق وناسينك
تثبيت البرامج
تثبيت البرامج ممكن يكون عن طريق تحميل البرنامج مباشرة من الموقع وبعدين تسوين له ( install ) واللي بشكل عام قريب جداً من طريقة الويندوز .. أو يكون عن طريق الـ App Store وهذي ميزة حلوه مهيب موجودة في الويندوز .. ممكن تفتح الاب ستور وتجلس تتمشى فيه وتشوف التطبيقات اللي تعجبك سواء من العاب أو برامج او تطبيقات اجتماعية ( تويتر, فيس بوك ) وبالضبط مثل الاب ستور حق الايباد والايفون ونفس اليوزر اللي تستخدمه هناك تقدر تستخدمه هنا وتشتري وتحمل وتسوي اللي تبي 
البرامج اللي كنت أستخدمها في الويندوز وبدائلها
هالنقطة كانت مخوفتني كثير خصوصاً إني أحب يكون الجهاز اللي أستخدمه فيه كل البرامج والإضافات اللي أنا احتاجها واستخدمها، عشان كذا يسموني أخويائي : عدو الفورمات
ادوبي Adobe
كل برامج الادوبي موجود منها إصدار للويندوز والماك، الادوبي ريدر ( حق الـ PDF ) والادوبي فوتوشوب والإلستريتور والدريم ويفر والبريمير، هذي وغيرها كثير موجودة للنظامين ولكن بشكل غير مجاني، لذا الله يخلي التورنت 
برامج التحميل
متوفر للماك برامج تدعم التحميل المباشر وبرامج ( تسريع التحميل ) على قولتهم ، والأهم برامج التورنت الموجودة في الويندوز موجودة في الماك وتقدر تحملها من الموقع الرسمي حقها، مثل الـ Utorrent
مشغلات الفيديو
كثير من المشغلات الموجودة للويندوز موجودة للماك بعد، مثل VLC, RealPlayer وفيه مشغلات حلوة ثانية مثل Movist, MPlayerX
برامج تصميم وتحرير الصور والمواقع
بالنسبة لتصميم الصور فمثل ماقلنا قبل شوي، تقدر تستخدم الفوتوشوب أو أبحث عن بدائل له ( أنصح بإستخدام هالموقع الرائع : Alternative To ) بخصوص برامج تحرير الصور وعمل الشروحات عليها ففيه برامج مثل SEASHORE, Skitch
اما بالنسبة للتعديل على المواقع فاللي يستخدم برامج تعتمد على الـ HTML مثل الأدوبي دريم ويفر أو المايكروسوفت فرونت بيج (FrontPage) يقدر يستخدم في الماك الدريمويفر (Dreamweaver) أو KompoZer أو NVU
وفيه غيرهم برامج لكنها تكون في الغالب خاليه من التعامل مع أكواد HTML ويكون التحرير فيها سهل ومهوب متطور وبقوالب جاهزه، مثل برنامج Freeway, RapidWeaver, flux, iWeb
برامج الحماية
برامج الحماية متوفرة للماك مافيها كلام
المسن
مالي استخدام يذكر للمسن خصوصاً أن مواقع الشبكات الإجتماعية والجوالات الجديدة خلتنا شبه نستغني عنه 
ضغط الملفات
طبعاً كلنا نحتاج برامج ضغط الملفات، لأن مثلاً لو عندنا مجلد في الجهاز مليان ملفات مهمه، ماتقدر ترسله بالبريد أو ترفعه على موقع رفع إلا لما تحطه في ملف مضغوط .. موجود للماكنتوش برنامج ضغط ملفات مجانية مثل الـ WinZip, StuffIt Expander
المتصفحات
تقريباً جميع المتصفحات تركب على الماك ( فايرفوكس، قوقل كروم، اوبرا ) وطبعاً السفاري يجي متصفح إفتراضي في الجهاز 
ملفات الورد والبوربوينت
فيه مجموعة مخصصة للماك أسمها ( أي ورك – iWork ) وهي مقدمة من شركة أبل طبعاً، تحوي هالمجموعة على ثلاث برامج ( بيجيز – Pages ) وهذا شبيه بالورد لكن متطور أكثر من وجهت نظري، تصميمه وطريقة التعامل معه جداً سهله يجي معها تيمبليت جاهزه بتصاميم مختلفه تقدر تختار منها اللي يناسبك وتبدأ تشتغل وتعدل عليه ( يختصر عليك وقت ويعطيك أفكار جميلة تناسب شغلك، سواء كتابة رسالة أو بطاقة أو نشرة بريدية ) والجميل في البرنامج أنه يدعم عربي ويفتح ملفات الورد ( .doc ) وممكن يحفظ الملف لو تبي بصيغة ملفات الورد اللي ذكرناها قبل شوي
مثال للتمبلت الجاهزه في البرنامج : اضغط هنا
البرنامج الثاني في المجموعة هو ( كينوت – Keynote ) وهالبرنامج شبيه ببرنامج البوربوينت ويقوم تقريباً بنفس عمله لكن ميزته أكثر أحترافيه وفيه حركات كثيره مهيب موجودة في البوربوينت بالإضافة إلى تيمبليت جاهزه برضو .. ويدعم ملفات البوربوينت وممكن يحفظ شغلك لو تبي بصيغة المايكروسوفت بوربوينت ( .PPT )
مثال للتمبلت الجاهزه في البرنامج : اضغط هنا
واخيراً برنامج ( نمبرز – Numbers ) الشبيه بعمل برنامج المايكرسوفت إكسيل، مخصص للتقارير الحسابية ومشتقاتها، يدعم اللغة العربية ويدعم ملفات الإكسيل ويمكن حفظ الملفات بصيغة ( .XLS )
مثال للتمبلت الجاهزه في البرنامج : اضغط هنا
شاهد فيديو عن مجموعة “أي ورك” في الموقع الرسمي : اضغط هنا
الجميل في الأمر أن هذه المجموعة موجودة للأيباد ايضاً، بإمكانك شرائها عن طريق الأب ستور ومن ثم متابعة أعمالك وتعديلها وقت ماتشاء عن طريق الايباد أو الايفون 
اللي ذكرتها كلها برامج إضافية تحملها أنت بحسب رغبتك وإحتياجك، وفيه غيرهم كثير على حسب اللي تحتاجه، أما بالنسبه للبرامج الإفتراضية اللي تجي مع نظام الماك فاللي يبي يعرف عنها أكثر يقدر يطلع على هالموضوع ( أشهر برامج الماك )، أو هذا الموضوع للي يبي يتعرف على النظام أكثر وبعض خصائصه ( لمحة عامة على نظام الماك )
بالنسبه لغالبية البرامج المذكوره هنا، موجودة بالإضافه لبرامج غيرها في مكتبة البرامج، تقدرون تحملون اللي تبونه من هن
( مكتبة البرامج )
بالنسبه لعيوب الجهاز من وجهة نظري، سعره مبالغ فيه
* ملاحظة كبر وجه ورقة بلوت
TICHNO تـكـنـو 
تغطية شاملة لكل ماينشبك في الكهرب 
www.tichno.com
