.
.
.
.
السلام عليكم 
يالله حي ذا الوجيه 
وأسعد الله اوقاتكم بكل سرور
ويازين من جمع ضيفانه 
<<يسمع بالمقدمات اللي تفتح النفس…. 
يقلك كيف تقدر تطبع بدون برنتر 
خخخخخخخخ احس اللي مسويها
دافووووووور وكسلان بعد
لدرجة انه يقول لطلاب مدارس
المهم الطلاب الثلاثين اللي ماخذين الأول علىالمملكة بنسبة 100%
ارقدو بالله
!!!!
إلا على طاري هالطلاب وش رايكم في ذا المدرسة 
والله ودي اعيد 3 ثانوي فيها
كود اجيب ذا النسبة وادخل كلية الزراعة 
واتخرج مدرس فنية 
ماعلينا في الحقيقة أني في قمة سعادتي 
يغمرني شعور بالفرحة والبهجة
مع قليل من الأفكار الصايعة 
والطيبة في نفس الوقت
المراد طرحها اثناء العطلة الصيفية 
طبعا كان ودي اذكرها واسردها لكم
ولكن هاذي الطبعة الثانية 
من الرسالة واللي يبي الطبعة الاولى مع مجموعة الافكار
اللي يمكن انها تساعدك في شغل وقت فراغك 
((طبعا وقت فراغك من عقب 12 لأن قبلها انا مشغول <<يلوموني يابيل قتس))
في ذا الصيفية لايتردد في الاتصال برقم الخدمة المجاني الخاص بالقروب
خمس ستات بعد 800
للبيع مسيوم بكرت شحن بو 200 وجه ووجه
طبعا معليش خانتني ذاكرتي 
ونسيت اقول لجميع الخريجين والناجحين
والساقطين بعد عشان مايزعلووووون !!!
” مدري ليه احب الساقطين واحس انهم
احسن من الناجحين
واذكى منهم بس الحظ منسدح وشارب قزازتين بيرة !!!
الف الف الف مبروك للناجحين <<جرد في الساقطين …
بيضتو وجيهكم ..واسعدتو اهاليكم
وثمنتو جهودكم المضنية في الدراسة
((الله من كم واحد نجح واهو مايدري وين الله موديه 
والف مبروك لي وعقبال التخرج لي 
واذبح لكم مفاطيح وارسلها لأيميل كل واحد منكم
يعني رز ولحم وبس …ويمكن للشخصيات الفي أي بي 
كرتون ماء ابو نص وكرتون موز وارد شربتلي …وشوية مكسرات قبل العشاء 
المهم مالكم بالطويلة .. بس تعرفون احب امهد للي ابي اقوله
…مهب طقني والحقني ..
ولأن المجال واسع في النت مهب مثل بعض الصحف والمجلات اللي يحشرون
الواحد ويضيقون عليه في مقالته ويعطونه
4سمX2سم
ويقولون اكتب يامال اللي منيب قايل 
عشان كذا باخذ راحتي على الاخير…!!<<اخلص محد درى عنك
يعني …اللي ماله بالطويلة …
من غير مطرود بالله وترى فيه
في الصراحة ان فرحتي ما اكتملت هالصيفية 
وذلك بعد الخروج المذل لمنتخبي المفضل الأزوري … 
((المنتخب الأيطـــالي )) 
من كأس الأمم الأوربية …
ما افلح لا ترباتوني العجوز
ولاعبين الخبرة …
واظن لو يفكنا ربي من لاعبين الميلان
(وجهه يقول لحوووول )
كان المنتخب الأزرق حقق ما هو اكثر..
ماعلينا الحين قلبت صرت اشجع منتخب جزر البهاما لكرة المضرب
… كود انه اصرف من صفقات البلوي 
اول مرة اشوف رئيس نادي فاك مع الفلاشات حقت الكاميرات
ومع المكرفونات …خخخخخ اول مرة يشوفها ظني !!
واصرف بعد من الأدوار العربية كلها
اللي طق ومطاقق 
مع احترامي لعشاق القلعة وللكيان الأخضر الأهلاوي
وماعليكم يالأهلاوية القهوجي والسويد صارو
(اكس بايرد)
يعني فشنك على قولة المصرييين
طبعا اكيد اني شطحت بعيد عن عنوان الرسالة …
ومعليش تحملوني
كاتب صغير ومبتدئ وماعندي سالفة 
ومالقيت إلا ذا القروب انثر فيه هالبربسة !!!
((الله يعينك يبو نواف تحمل والصبر زين ..
وابشر اتوسط لك في الآي ار تي ونشفر القروب
الزبدة 
…الظاهر اني كتبت مرض فوق …أيه!!
ياجماعة .. انا اكتشفت <<يازيني وانا اقول اكتشفت احمد زويل متلطم 
العديد من الامراض والمشكلة ان ذا الامراض صارت معدية ومنتشرة
انتشار اسرع من انتشار الضوء في
في (قنينة)من الماء السائل
وذلك بفرق ثانيتين وربع لهالأمراض 
تختلف ذا الأمراض من الناحية السنية والبدينة
…لا وتختلف من ذكر لأنثى ..
طبعا انا بذكر الخاص بالذكور … 
لأني امون على بني جنسي !!! وإلا كيف ؟؟؟؟
إلا غصبن عنكم أمون
وإللي عنده شي يقابلني برااا…
واما الأناث 
اخاف بكرة يشتكوني وإلا شي مطالبين بحقوقهم من مخاوي
وتعرفون انا ضعيف ومسكين
وماعندي لاواسطة ولايحزنون
فخلوني فحالي
الأمراض اللي اكتشفتها تخص الفئة العمرية
من سن 17 حتى 26
وربما يتجاوز هالسن في حالات نادرة وشاذة !!!!
(( مرض فضائياتس F9’a2yaTes ))
مرض غير مرئي اصبح يصيب الكل في هالفئة العمرية..
تشوف الواحد مبلط قدام الشاشة 
والبعض يحفر لنفسة حفرة وياخذ التلفزيون معه
<<ياعيني ياعيني
والبعض موقع عقد مع الأقمار الصناعية لتفادي الخلل والشك !!!
يختلف تصنيف المرض ..فيعني محاكيكم
.. من مدمنين قناة ابوظبي الرياضية …
والجزيرة سبورت …
لدرجة اني حذفت القنوات كلها
وخليت هالثنتين بس!!
<<وجه مطلع سنونه ويقول ودي اصدق بس قويييية!!!
لا وصرت اتفنن في طريقة المشاهدة
حسب الاحوال الجوية
وحسب ارتفاع وانخفاض الأسهم !!
<< ازين شي مافيها انك تشرب شاهي ببلاش في صالة التداول في البنوك
لكن ابشركم خف الادمان
بعد ان ذهب الليقا الأسباني” لفالنسيا “
<<يستاهلووون هالخفافيش 
والكالتشو الايطالي للميلان <<يامحظووظين وجع
وبعد خروج الازوري من الامم الأوربية
وذهب لأحضان عيال الأغريق
اليونانيين اللي داخلين هالبطولة يكملون عدد
!!!!لكن الحظ يلعب دور
المهم اني انفكيت ولله الحمد من هالمرض وصرت انسان عادي …
يعني تحسون اني اشاهد هالقنوات
عشان اطلع اللي بخاطري 
من الحرمان اللي اعانية من عدم مزاولة الغزل مع معشوقتي …الكرة
في حين البعض يتفنن في مزوالة غزلة
مع بعض القنوات الفضائية الداجة
للبحث عن ماهو نافع جسديا
الأدهى والامر ان هناك من هم مدمنين
المهضومات في الأكاديمية 
((اكاديمية الدجة والله إلا هي ببلاش وإلا بفلوس ..
ودي اسجل كورس صيفي إذا عندهم مانع
..وبدون كميرات بالله ..أخاف على السمعة !!! …))
والبعض استفحل فيه المرض
وصار من مدمنين تأبر البي!!!
وعاوز ايه والنبي!!!
وكذلك اشتد الأدمان لمشاهدة فتيات كازابلانكا
وممارسة نوع جديد من الجمباز في
صحاري الخليج!!!
… وكذلك لاننسى بعد البرتقالة
العراقية اللي اقلقونا بها
والبعض صار مديون لشركة “النصب” اقصد شركة الأتصالات
<<من اللي يبشرني بشركة جديده وله جوالي ببلاش
باكثر من 3000 ريال للفاتورة بسبب خدمة 700 الممتازة
المقدمة للفضائيات وهم بعد لأصحاب شركات النصب من سيتي لاين وهالطقة 
.واللي يوهمون خليقة الله ان هناك جوايز بالملايين
وكلها من ظهور هالمتصلين الضعوف والمخبل بعد
مايكودون يشوفون نصبه جديده
وهب دبو فيها
والبعض صار يشحن ويشحن ويشحن جواله السواااا
وصار يتسلف من البنقالي
اللي جنب بيتهم عشااااان
مايفوته التشات في ذا الفضائيات..
ولايفوته بعد ارسال كم اهداء لولد خالته
ولولد عمه
ولعيال ولد ابو جد نسيبه من طرف اخته الكبيرة!!!
خخخخخ طيب اتصل عليه وسمعه الاغنية ياخي
….الله من التناحه
الظاهر الجزيرة والعربية والحرة
والفضائيات الأخبارية !!
بيفتحون تشات وتلاقون يوزرات بوش
لا وتلقون بعد ياسر عرفات هو الادمن في الشات
ياحليله احسن منصب له
انا اقول دام ان المرضى كثير ودام ان المهبل
والمساطيل
وش رايكم نسوي قطية من
” 5ريال”
أومايعادله من عملات!!
ونسوي قناة فضائية …
ونكسب
انا اقول انا بنكسب اكبر كم من المرضى
..قبل ماندخل اللي خسرناه في هالقناة الفضائية 
طبعا فيه علاج ووصفة شعبية بسيطة
من انامل اخوكم الصغير مخاوي
بالتعاون مع
مقهى الشلال
ومرسى الأحلام
وستار بكس !!!
سجل يا أيها المريض
التعيس هذة المقادير
من صيدلية مخاوي 
– ملعقه سكر مملح-
– بيضة صرصور عقيم-
– وحبة مستكه وحبه مش مستكه-
– واظفر ضب طويل-
– ونص لتر حليب كنغر مستورد من القطب الشمالي-
-وكاس قمر الدين مخلوطه مع لبن جراد-
– وربع فخذ سمكه-
– وبضع قطرات من معجون الحب هان والحب هين والحب هون- !!
– ربع كيلو معسل التفاؤل
“خلطة مميزة من اعرق الأعشاب البحرية
ممزوجة برائحة جرابيع الماء الصحراوية
وقليل من بودرة شف وجهه التيس واحلب كوكتيل
مع اضافة نكهة البف باف بدرجات متفاوته
واخلط هالمقادير كلها خلط كايف
واعصر عليها في الأخير ليمونه زرقا
واشربها كل ليل على الريق
و ارقد وإن شاء الله تصبح متعافي
===========
فيه مرض ثاني الا واهو
( مرض مهايطاتس Mhay6aTes )
هذا المرض مرئي وملاحظ …
يصيب اللي عنده نقص في شخصيته
سواء كان النقص وراثي ..
او بالفطرة …
او تم اخذ جرعات منه بالغلط من اشخاص مصابين بالمرض
نقدر نوصف حاله المريض انه دايم شايف نفسه
ونافخ خشته متر ونص قدام
ولاجاء يتكلم تحس انه يتكلم في مصاورة 3 بوصه
..واحيانا تحس ان الصوت مصدره الأنف
ولذلك لوجود قطعة من الفلين في حلقه لم تؤكل جيدا
و الشخصية او الديكور الخارجي
يختلف حسب ميول كل شخص !!
فيعني البعض يحب
يلبس لبس النقر والراب
والبعض يشتري ملابسه
من مانقو ولورا اشلي
والبعض واهو احسن الشين في نظري
يتقيد باللبس المعروف بس تحسه مجبس رقبته لمتنعه
عن الحركة يمين ويسار عشان ماتخترب شخصيته
وهم بعد موقع عقد مع شركة -مريتو
عشان يمدونه شهريا بالبخاخ لتجبيس شماغه !!!
طبعا هالمريض يعتقد في ذاته
انه الأكبر والاجدر والاحسن
والأفضل والاغنى والأكثر والاطول والأجمل ووووو
وكل صفة تدل على
علو يعتقد انها لاتخلو منه
اغلب هؤلاء المرضىحسب وجهه نظري
هم من المهجنيييين …
او اللي تلاقي بوه يملك قرشين وموزعهم
على خمسين بنك في كل بنك عشرة اريل
ومشغله ربي 
او ممن حرم من التربية الصحيحة
في صغره 
وغرق في بحور الدلع والحنان
وماشاف كم طراق على خشته على كم شوته في بطنه
على كم سلكة بالعقال تخليه يقول اححححح قبل مايلمسه
فاصبح ينتمي لهؤلاء المرضى وهذه السائده
كيفيه التعامل من هؤالاء الفئة
بسيط وسهل خله على راحته خله يشلخ وينصب
ويقول ويفعل ويترك …
ماعليك منه انت بس اضحك وانبسط عليه
… وطبل له إذا ادعى الأمر
يعني مثلا قله انت والله
اقوى ولد في الرياض 
لا لا قله انت اقوى ولد في العالم …
وشف !!!!
وإلا قله ياخي ماشاء الله على ابوك
نص عقار نيويورك له !!!خخخخخخ
إذا مايقلك عقبها ان نص
الكرة الأرضيه
لأبوه ونصها لأمه والفرطة الباقيه
لعيال خالته
وهم بعد الربع الخالي
قالبينه ملعب طايره لهم
وإلا قله ياحلوك ياخي بالله تكفى ضبطني
…. خخخخخخخخ
بيرجع يقولك …انا اعرف بنات العالم كلهم
… وبيجيك يقول بنفسيه شينة!!
ياخي ذبحوني هالبنات طردي واري
صرت اخاف ماقدر اطلع لحالي
((جميع هالعينة تلاقيهم يشبهون ل عباس كرفته
صاحب محل تسجيلات
الصفوة الذهبية في خنشليله
..وقريبا فرع في خشم العان)) !!!
طبعا خلك حذر وحريص انك ماتصاب بالعدوى
وإذا تأكدت انك اكتسبت المناعةالكافية
واللازمة لتجنب هالمرض
انطلق بين هالمرضى وتونس عليهم
ولا قد صدرك ضايق راسلني …
واعطيك مكان مليان بهالمرضى
رح وطبل لهم وشف الفللللللة
ومع العلم ان هنالك فئة ذكية منهم
طبعا بتقولون لي كيف نعرف هالفئة !!!
لو جاك شك في الشخص اللي
قدامك انه من هالفئة
ابدا بسالفة عادية ولامانع من بعض الشلخ السريع!!
على كم ارنب داق طبلونه
ولاتنسى التمليح البسيط !!
إذا لقيت الحبيب جاي منطلق ودخل
معك وبقوة في السالفة
…سكته ولاتخليه يكمل
…
وزود العيار شوي في السالفة 
(يعني اقصد اشلخ مور ذان )!!!
بعدها شف وش بيصير
بيولع وبيعصب
شوي عشان يسعف نفسه ويلحق عمره
ويجيب لك شي اقوى من اللي جبته …
عشان مايشعر بالأنهزام
انت في هاللحظه استر ماتواجه !!!
وجهز شبك عشان محمية الارانب اللي بتطلع من الحبيب اللي تو ….
ولامانع يكون جنبك عجرا ملفوفة بشطرطووون اخضر وابيض
عشان تصطره على جبهته عقب مايخلص …
العلاج … والله صعب تلاقي علاج لهالأشكال
… انت قل بس اللهم لاشماته واستانس ….!!
<<تحسونه نذل شوي
طبعا هناك امراض ثانية إلا والله كثيرة
لكن مابي اطول عليكم ….
وقد ودي بالفكة لأني بروح ارقد
وهم بعد اكيد البعض بيقول ياحبه للفلسفة
واكيد ذا الولد فاضي وفال امها !!
وانا اخر مرة عرفت نفسي فاضي
كان في رمضان قبل سنتين
و نمت من الساعة 7 مغرب عقب الفطور
إلا الساعة 7 وخمس قبل اذان العشاء!!!!
إلا على طاري فاضي وش رايكم بهدف مانقا
مهاجم الشباب على الاتحاد
احس ان الأتحاديين واولهم البلوي قالو تسلل ياحكم …!!!!
استحقو الليوث بجدارة الكأس
صح انهم طلعو الأهلي لكن ماهنا خلاف
حن وإلا هم الحال واحد << يتلزق
عموما المعذرة على الأطالة …
وووووووانا عارف ان رسالتي ذي
كنها برنامج من كل بستان زهرة
اللي كانو يعرضونه في التلفزيون السعودي عام 1412 هـ عقب الأخبار !!!
عموما ماعلى حاج من حاج 
انا جاي ابارك للناجحين وبس …
واقولهم الف مبروك مرة اخرى لجميع الناجحين…
((باستثناء الاوائل الثلاثين ))
ابحثو وراقبو المستقبل
فهو قريب… !!!
((تلاقونه متوزي ورا جبل وإلا تحت كبري
المهم دورو له زين ..بس لحد يطري الوظايف يعني اقعدو في العافية ))
طبعا قبل ما اقلب وجهي …
واروح انخمد!!!
في اشخاص في الفترة الأخيرة ارسلو لي
وطالبوني بنشرة نقدية باسلوبي للعديد من القطاعات والشركات !!!
وزودوني بامثلة ربما تكون فيها مبالغات نوعا ما…
او ربما لاتهمني شخصيا
لأنني ابحث عن عثرات المجتمعات
حسب رؤيتي لها ببساطه !!
وليس عن عثرات الأشخاص بعينهم او التفخيم في الأمور أو الفضائح
واعتقد ان هناك منتديات او قروبات اخرى تسمح لها النوع من المشاركات ..!!!
عموما اقدم لهم اعتذاري للمرة الثانية
واقلهم انني كاتب هاوي وقليل الخبرة في هالمجال
وان الكتابة ليست مصدر رزقي
ولاهمي الأول
ولست ممن يكتبون للحصول على شهرة
او خلافه
وإلا كان كتبت باسمي الحقيقي !!!
..مع احترامي لكل الأطراء الجميل من البعض ..
وسوء استخدام المعاني من البعض الآخر !!
<<مدري ليه بعض الناس هوايتهم الحش واستعراض العضلات
من ورا الشاشات
.
.
.
وعلى فكرة رسايلي هي مجرد مساهمة بسيطة للأخ ابو نواف في القروب
… لكي احاول ان اضيف ولو احيانا القليل
من النقد الممزوج بالسخرية والأبتسامة
حسب وجهه نظري الشخصية
وحسب تشجيع البعض من احبتي
لحروفي المتبعثرة
وثقافة قلمي او بالأصح كيبوردي المكسور…
وإن كانت بدرجة معقولة ليس إلا !!!
قبل اختم من اقوالي المأثورة
((اللي يعجبك تمسك فيه ..
واللي مايعجبك انطله من فوق السطح))
محدثكم مخاوي خويه
قناة أبو نواف الفضائية – شرم الشيخ
هيييييياااااا
مع السلام عليكم << انلحست
مخاوي خويه
