طالب قصيمي في البريتن
( بريطانيا )
ـــــــــــــــ
القصه : حقيقيه
المكان : بيت احدى العائلات الانجليزيه المحترمه
المدينه : نوريج ( شمال شرق لندن ( تبعد 250 كم تقريبا ) عاصمة البريتن
الزمان : منتصف فبراير 1993م
الوقت : عند الاشاره تكون الساعه الثالثه فجرا
الراوي : انا يا محاكيكم عزيز ولد عزيزه يوم اني ادرس هناك
أبطال القصه : عائله انجليزيه محترمه مكونه من اربعة أفراد وأنا خامسهم
1 ـ أم انجليزيه محترمه بيضاء ـ العمر 39 ( ونطلق عليها اللاند ليدي ) هاذي هي الاصول
2 ـ أب امريكي محترم ( زنجي ) ـ العمر ــ 46 مقيم من زمان في البرتن .( ونطلق عليه اللاند لورد )
3 ـ كلب ( للدلع ) غير محترم ــ مستخف دمه بالمره ( ملك للام )
4 ـ قطه سياميه . قمة الاحترام ــ قمه بالهدوء والرومانسيه وماشيه جنب الحيط ( ملك للاب )
5 ـ طالب عربي ساكن معهم AZIZ BIN AZIZAH لتعلم الانجليزيه ومعطينه أكبر من حجمه ( معطينه وجه )
الهدف : بس ابغى أوريكم وش الفرق بيننا وبينهم انتم يالانجليز بالاحترام وبأشياء كثيره ( زينه وشينه )
ــــــــــــ
أستيقظت مفزوعا on صراخ وعويل وعراك بين الزوج والزوجه وكنت وقتها نائما
( لاليا ولا عليا ) . وما أن نزلت الى الصالة الارضيه المحترمه حتى بدا كل منهما يشكو الاخر لي
( بالضبط مثل ما صار لصديقي عادل إمام في مسرحية الواد سيد الشغال . يوم صار يفك المشكله
بين بنت صاحب البيت وزوجها بسبب شحيبر )
وعلى لغتي الانجليزيه المتخلفه فهمت بعدين أن القطه السياميه الهادئه اللي لا تهش ولا تنش وتخاف من نسمة الهوا وتخاف من ظلها مخشت عين الكلب الغير محترم ( الغثيث ) في عينه وسيلت منها الدم .
لا انا ولا الاب صدقنا أن هالخكريه
تسوي بالكلب كل هذا .
لكن لانني اعرف الكلب وثقل دمه ( ومسوي لي فيها حبيب ومفازلجي عند القطوه ) ممكن اصدق ما سوته القطوه . لاني اعرف تاريخ الكلب مع الجميع من قطاوة وكلاب الجبران المحترمين ( يعني فاضحنا بكل حته )
ولان القطوه من النوع الصبور واللي يتمالك نفسه وكثيرا ماكانت تبتعد عن
هالكلب اذا قرب منها ويضايقها .
المهم اشتد النزاع والصراخ بين الطرفين بسبب هالموضوع .
الزوجه أتصلت بالاسعاف المحترم اللي زودها بالتعليمات للاسعافات الاوليه من
كمادات وخلافه . الى أن يحضر
( تذكروا أنه عند الاشاره تكون الساعه الثالثة والنصف فجرا )
ويمكن يسأل سائل محترم : وش قوم الزوجين بهالوقت ؟؟ وأقول متى اصلا هم ينامون .يقعدون يشربون من هالحليب الطيب الى الساعه خمس او ست والناس بدأت نصحى تروح لاشغالها .
,,,,,,,,,,,,,,,,
ولازال الصراخ والسب والهواش بينهم وانا جالس افك بينهم واقول لهم بالانجليزيه طبعا ( ماصار الا الخير )
وأورد هنا جزءا من النقاش الحااااااااد
بين الزوجه والزوج المحترمين
بعد الترجمه
الزوجه : وخر قطوتك عن كلبي ولا والله ما تشوف الا اللي ما يعجبك
الزوج : اولا.. ربي كلبك الداشر اللي ما شاف خير
الزوجه : أنا كلبي مربيته احسن من تربية امك لك
بن عزيزه : ( ياكبرها .. تربية امك لك ) هدوا اعصابكم …. الكلب ترى حرارته مرتفعه
الزوج : احترمي نفسك ولا تجيبين طاري الام حلوة اللبن
الزوجه : والله لو ماتعقل قطوتك هالخكريه اني لاطردها من البيت
الزوج : صجيتينا ببيتك ( على فكره ياشباب ترى البيت لها ــ مثل ما يقول حسينوه بدرب الزلق )
الزوجه : المهم العلم جالك ويتعداك . عقل بنتك ترى هي السبب وهي اللي تلمح للكلب بأشياء مهيب زينه
بن عزيزه : لا توصلون النقاش الى هالمستوى ( ليش ماحد سامعني ولا جاب خبري ولا انجليزيتي خرطي ؟؟)
الزوج : يعني أعترفتي بان كلبك التبن هو البادي وتقل ما شاف خير حتى وسائد الكنب ما سلمو منه .
الزوجه : وبعدين معاااك انا ابي تعويض حسب ما يقرره تقرير الاسعاف للاضرار اللي على كلبي
الزوج : مشي خشمك يابنت جيمي وايت ( ما بقى الا هي …… محاولة اغتصاب وتعويض بعد ؟؟ )
جرس الباب يرن ….
ترن ترن ترن رن رن رن ترن ترن
بن عزيزه : الاسعاف وصل والشرطه الى هاللحين ما جت ( يحب الشر يبي ينكب بالكلب )
الزوجه لرجال الاسعاف : ارجوكم بلييز بلييز انقذوه باي طريق لا ينعمي
رجال الاسعاف للزوجه : دونت ووري …. كيب اوت … بلييز ( لا تخافين بس وخري شوي … خليك بعيده )
///////////////////////////////////
الاسعاف عمل اللازم والباقي على ربنا ….. وزود الزوجه بالادويه والنصائح وان تعطيهم أي جديد عن هالكلب
. مرت الدقايق وساد الصمت والزوجه يدها على جبهه الكلب وكل شوي تتصل بالاسعاف وتقولهم أن الحرارة لازالت مرتفعه وعينه تورمت وتصيح وهي تقول :
وت كان أي دو ( وش اسوي اللحين له )
ـــــــــــــــــــــــــــــــ
وفجأة قرع جرس الباب ودخل رجلن محترم ومعه رجلن محترمن اخر ومعهم اوراق واقلام محترمه
وهاذولا كانو رجال البوليس ليحققو بالحادثه بعد أن اتصلت بهم الزوجه
وبعد….. …. سألهم كثيرا كل على حده وطالت المسألله سألني :
الشرطي : من انت وما اسمك .. وهل انت هنا للعمل او الدراسه او السياحه …؟؟؟؟
بن عزيزه : اسمي ……………… ( طبعا اقول اسمي له غصبن عني بي والله ما اقوله لكم )
الشرطي : ممكن تقولي ما رأيت
بن عزيزه محدثا نفسه ( والله وجت الفرصه لانتقم من الكلب ابن الكلب وانكب عفشه) : شوف يابو الشباب .. أقصد ياحضرة الشرطي
ترى اللي قدامك هالكلب اللي جاة شوي عليه وفعلا كان هو المخطي وتراه عمل كذا في اليوم الفلاني وسوى كذا في اليوم العلاني ( مابقى شي زفت سواه ولا ما سواه الا قلت للشرطه عنه .. يعني راااااح فيها .
،،،،،،،،،،،،،،
تم إحلة الموضوع للمحكمه المحترمه ( فيه محاكم صفيره ببريطانيا لا زحمات ولا حوسه ولا مواعيد للفصل او الافراغ او الوكالات …. ونااااااااااااااااسه )
ـــــــــــــــــــــــــــــــ
صدر حكم المحكمه بالاتي :
1 ـ تغريم القطوه بمبلغ 70 باوند ( وقتها الباوند 7 ريالات سعوديه وعليكم الحساب )
2 ـ اخذ التعهد من الزوجين بعدم تهديد كل منهما للاخر
3 ـ إحالة الكلب لاحداث الحيوانات لمزيدا من التربيه
4 ـ إرغام بن عزيزه على تكثيف لغته الانجليزيه خلال شهرين لان الشرطه والقاضي تعبو الى أن عرفوا وش يقول
ـــــــــــــــــــــــــــــــــــــــ
(2)الحلقة المقبله
اليمني والفار الانجليزي وشهادة الميلاد
فأنتظرووووها
حقوق النشر والايداع الدولي لكل مذكرات بريطانيا
محفوظه وملعون ابو خيرها لدى
قروب ابو نواف
