بسم الله الرحمن الرحيم
تنبيه هام
أما قبل
أرجو من الاخوة المعرسين انهم يسكّرون الموضوع ويتوكلون على الله أخاف يثير هالموضوع شجونهم 
أما بعد
الأخوة والأخوات الأفاضل أعضاء قروب أبو نواف ( حفظه الله
السلام عليكم و رحمة الله وبركاته .. وبعد
نظراً لأننا في موسم العروس وتحريك الضروس
حبّيت أصافحكم بهذه المشاركة الأولى والتي أتمنى ان تنال شيئاً من رضاكم
وهي إهداء منّي إلى جميع العرسان
قراءة في سُفر :
" السراج الوهّاج .. للمقبلين على الزواج "
جهشت هاك الصبحية قصدي أفقت ذات يوم ٍ مشرق ، وقمت اتقلّب ابي كود النوم يجيني ولا طاع وقعدت من الفرغه اغسّل المواعين " الا والله من الزلابة " 
اسم الكتاب : " السراج الوهّاج للمقبلين على الزواج " ه
تأليف : الفقير الى عفو ربّه ابو يارا القرائني الوشمي النجدي الحنبلي.
المتوفى سنة :222 ق.م <<= شكل عنده واسطه على هالتاريخ.
°¤ّ!_!ّ¤°( مقدمة الكتاب )°¤ّ!_!ّ¤°
بسم الله .. والحمد لله .. الذي لايُحمد على مكروه ٍ سواه ، الذي شرع الزواج ، وجعل منه الداء والعلاج ، وبعد :
فقد تتبعت أحوال الناس ، وكافة الأطياف والأجناس ، فوجد أنهم أجمعين إلى الزواج محتاجين ، الكبير منهم والصغير ، والغني والفقير ، وبعد تمعّني و رصدي لذلك ، وجدت أن أكثرهم يعيش في ظلام ٍ حالك ، فلا يعرف من الزواج إلا اسمه ، ولا من " ذاك وذاك " 
فإن أصبت فمن الله المنّان ، وإن أخطأت فمن نفسي والشيطان
°¤ّ!_!ّ¤°( التمهيد )°¤ّ!_!ّ¤°
إعلم رحمني الله وإياك وجعل الجنة مثواي ومثواك ، أن العرس أمر ٌ عسير ويحتاج إلى رجل ٍ قدير ، ذو رأي ٍ وعزيمة ، وهمّة ٍ وشكيمة ، ليس " أخرقاً " لايعرف إلا شرب الشيشة ، ولا يدري هو فيه والا في الخيشة
كما أنه يحتاج الى امرأة ٍ بصيره وبسائر الأمور خبيره ، كبيرة الفطنة ، صغيرة البطنة ،عالية الإحساس ، ذات قد ٍ ميّاس ـ على قدر ٍ من الجمال وليس شرطاً ان تكون كـ باسكال ، 
ولقد قمت بتقسيم كتابي هذا إلى عدّة أبواب سأوردها لكم بالتفصيل :
قال أبو طارق :
أبعيد صياغة الكتاب لكم بالعامية عشان يتماشى مع سياسة 
°¤ّ!_!ّ¤°( باب ماقبل الخطبة )°¤ّ!_!ّ¤°
الفصل الأول : – وش تسوي في البيت ؟
: أول شيء الناس يختلفون فيه احد يستحي وفيه احد غاسل وجهه بمرق فكانك من النوع اللي غاسل وجهه بمرق فماعندك مشكله ولا فيه داعي تقرأ ذا الباب اطمره للي بعده وكانك من النوع اللي يستحي انه يقول لأهله ابعرس فاسمع الله يسلمك .. أول شيء خلك حبيب معهم وسايسهم وحبّ راس ابوك كل ماشفته وكل ماشفت امك قل لها " هاه ماتبون أودّيكم للسوق تراكم مبطي مارحتوا له حتى لو ان توهم جايين منه .. ولا تخاف مهمب معيين المهم عاد الا ضبّطت امورك معهم لمّح لهم وقل .. أحس اني مقصّر معكم ومدري وشلون اوفّيكم حقّكم وودي يجيني عيال عشان اسمّي عليكم وعاد الوالده بتفهمها وتقول .. الا ورى ماتعرس ياوليدي واذا قالته
لاتسوي فيها حياوي وتقول لاحقين ليّها تقول والله انك صادز ثم
الفصل الثاني : وش تسوي في الحارة :
ايييه عاد هذي راس المال .. انتبه وفتّح معي زين والا جاك
الا نويت العرس لازم تبشّك امام المسجد والمذن ولايهونون
من يوم تسمع الاذان انقز واغسل ورح داحم الشيّاب على 
المفروض هذا شغلنا في كل وقت بس الله يخلف علينا
.. " أحس انك هالحين تقول ماحبيت راس ابوي وأمي فأحبب روس هالشياب .. أها بس .. خذ العلم وماجاك عليّ .. ترى كلها
°¤ّ!_!ّ¤°( باب الخطبة )°¤ّ!_!ّ¤°
الا بغيت تخطب ياطويل العمر .. ارررركد ولا تطبّ الا وأنت 
ترى بعضهم من زود " الشفاحه " الا مدْحت له وحده " طب محيفرة " ولا سأل عنها زين ولا عن طبايعها .. ولا عن أهلها ولا عن أمها الخ .. لازم تركّد وتسأل زين ومن جهة ثانيه لاتجي حقينه .. أبي لي وحده عيونها عيون أصالة وخشتها خشة باسكال وجسمها جسم نانسي عجرم ، لأن لو تلقى لك وحده بهالمواصفات مابغتك أنت وخشتك ، وقبل ماتشرّط مرّة .. جب لك مراية " وتجرّد من العاطفة " وناظر خشتك واحكم عليها ..
المهم الا لقيت بنت الحلال لاتسوي فيها ثقة وتطق البشت وتروح أنت وابوك عشان مايطيح وجهك
°¤ّ!_!ّ¤°( باب مابعد الخطبه )°¤ّ!_!ّ¤°
الا قضيت خاطب واتفقتوا على كل شي لاتجحد شياب الحارة اصبر شوي
°¤ّ!_!ّ¤°( باب الشوفة )°¤ّ!_!ّ¤°
هذا عاد أهم باب في الكتاب .. شف ياطويل العمر الا خطبتَ وصملتَ وكلش قل لأبو نسب ابشوف منيرة كان اسمها منيرة والا ابشوف حصة كان اسمها حصة والا ابشوف لطيفة كان اسمها لطيفة ( واحد بيطوّل الموضوع باللي هو به ) 
واذا دخلتَ عاد دوّر لك محل استراتيجي في المجلس ويفضّل انه يكون بعيد عن الباب عشان يمديك تتهيأ وتشوفها وهي 
ثم الا جلست حط عيونك فيها ولا تغضي واحرررق مندوبها ولا تستحي تراك ماجيت تسولف مع اهلها ولا جيت تقهوى جاي تشوف والاهم انك تشوفها زين مهوب الاقامت قلتا والله مدري ماشفت نادوها ثانيه ترى ذا الحركه مالأمها داعي
°¤ّ!_!ّ¤°( باب الملكة )°¤ّ!_!ّ¤°
الا تملكت عاد خلاص .. سو اللي تبي .. وأول ماتسويه انك تجحد مندوب شياب الحارة ولا سلّم عليك واحد منهم قل له
ثم خذ رقم المدام .. وابد شبّكها
أولها خلك " طبيعي " و " تلقائي " لاتكلف ابد .. وخلك صادق معها لاتعطيها من هالرخيص .. تكلّم عن نفسك بكل صدق وتجرّد عشان ماتاخذ عنك صورة اخرى .. .. لاتقعد تسوي فيها رومانسي وأنت من جنبها ، ولا تقعد تعطيها من هالرخيص وتقول أنا أحب جلسات البحر وأنت ماعمرك رحت للشرقية الا
، ولا تقعد تقول أنا أحب الجوري واللوتس والأوركيدا وأنت ماتدري هو ورد والا نوع من أنواع الفقع 
والنقطه الثانيه خل كلامك طبيعي و " تساتس " .. على كيفك وقل وشلونتس وش أخبارتس وش علومتس .. " ولا تحاول تسوي فيها اتيكيت وتكاكي " وشلونكي وش أخباركي وش علومكي " لأنك مفضوح مفضوح لو تكاكي سنه ..
وحاول تسيّر عليها كم مرة .. 4 مرات .. 5 في هالحدود عشان تطيّح الكلافة وتكسر حواجز الحيا والخوف بس عاد انتبه لاتجوز لك الدعوى وتصير لزقة وتسنترعندهم كل ليلة
والافضل ان فترة الملكه ماتصير قصيره مايمديكم تعرفون على بعض ولا طويله عشان ماتتشبّعون من المكالمات .. يعني الزين من الشهرين الين 3 شهور بس لاتزود أكثر ..
°¤ّ!_!ّ¤°( باب ماقبل الزواج )°¤ّ!_!ّ¤°
فصل الملابس
الا قرّب الزواج ازرق المعيقلية
فصل التأثيث :
هذا امصل فصل وأغث مرحله .. شف ياطويل العمر بعضهم يشاور المدام في كل شي حتى لون البيزه وهذا بينهبل قبل مايعرس
نصيحة مهمة للشباب
اسمع أي واحد يتملك تفرك كبيدته على انه يطلع يتقضى مع المعزبه بس نصيحة لوجه الله
وخل التقضي عقب العرس عشان تصير تمون عليها
نصيحه مهمة للبنات
لا تسوين فيها حياوية وتعيين انك تطلعين معه تأثثون والا تقضّون .. ترى الفترة الممتدة بين الملكة والزواج هي فرصتك " الذهبية " في انك تشترين على كيفك وتخلينه يسوي لك اللي تبين وهو " مايشوف الدرب "
وترى الحياة فرص واغتنمي هالفرصة .. لأنك ان قلتي لها نبي نخلي التقضي وبعض التأثيث بعد الزواج .. يبي يروح بك للحراج وان سوى فيها اتكيت راح بك لـ " أسواق بن دايل ) وان بغيتي
فصل العطور :
أكيد انك ان شاء الله تبي تشتري لك كم قارورة عطر قبل الزواج إلا كانك مطوّع تبي تشتري كم تولة دهن عود
" body spray"
" او العطور الزيتية "
و لازم ياطويل العمر تزرق زهور الريف والا
THE BODY SHOP
لا .. لا .. لا بصراحة ما اتحمل كل هاللغة .. ويقولون اني مانيب ارطن ( عساي كاتبها صح بس )
vanilla ، oceanus، ananya
وواحد بعد زود بس نسيت اسمه ( بشّر امك ) 
المهم اشتر لك كم واحد ووزهن الين ليلة العرس وتروّش بهن
ولا تقول مانيب فاضي والله .. تجمّل على الاقل الين يقضي
فصل مالقيت له اسم
تنظيف الجسم
إذا بقى على عرسك يومين رح وخذ لك حمّام شامي والا
وقبل ماتروح له اوزن وشف كم وزنك واذا طلعت منه اوزن وان مانقص وزنك 3 كيلو على الاقل سطرني
و يبي يجيك واحد معضّل ويبطحك بس لاتخاف تراه حبيّب 
لاتقول مافيني شطوب " تسذب وتعقب ماهنا سعودي مافيه شطوب الا ان كان رجليه متقطعه يمكن مافيه ، ولاهوب أكيد بعد وأصلاً لو يجي سعودي مافي رجليه شطوب كان سحبت
ولو اني من الأحوال كان أحط في في مكان صورة البطاقة صورة للرجلين كان فيهن شطوب فهو سعودي أكيد وكان مافيهن فهو متسعود
وعلى طاري الشطوب اعرف واحد يوم رقد ليلة العرس ماقدرت حرمته ترقد من الصجه لأن رجليه تحكك في المفرش الساتان وماتسمع الا صوت الشطوب " كخخخ .. كخخخ " الله يحلل
تنظيف السنون :
الا قضيت داعك روحك رح لأقرب مستوصف أسنان وخلهم يسوون لسنونك تنظيف وتبييض لاتقول اني أفرّش دايم .. تسذب كانك جيّد فأنت تفرّش لك فتره ولا قضى المعجون طنشت التفريش وتعيجزتا تشري لك ثاني <<= يقيس على روحه
°¤ّ!_!ّ¤°( باب ليلة الدخلة )°¤ّ!_!ّ¤°
لا عاد العب عليكم
اركد ولا تصير عجل ، ترى حرمتك مهيب طايره تبي تقعد عندك الين تفطس ، ولا تخليها تحس ان " ذاك وذاك " أكبر همك .. لأن الزواج أسمى وارقى من هالامور ، وأهم شي الرفق في سائر امورك لأن الرفق مثل ماقال الرسول اللهم صلي عليه وسلم مادخل في شيء الا زانه ولا نزع من شي الا شانه ، أو كما قال صلى الله عليه وسلم ..
وخلك طبيعي .. وكل الامور تبي تمشي عال العال ان شاء الله و " بالرفاه والبنين مقدماً "
°¤ّ!_!ّ¤°( باب مابعد الزواج )°¤ّ!_!ّ¤°
: بالطبع ان لكل طريقته في ادارته لدفة الزواج بس بالتأكيد ان هنالك امور لابد من اخذها بعين الاعتبار وهي أن الزواج هوعبارة عن إنصهار جسدين في بوتقة روح واحدة ( تراي كاتب الموضوع كله عشان أقول بوتقة انتبهوا لها عاد )
وبكل تأكيد اننا كلنا بشر والبشر مليئين بالأخطاء ومشبعين بالنقص وبدلاً من أن يترصد كل زوج لأخطاء الآخر ويحاسبه على نقصه ، من الأجدى له ان يترصد لأخطاء نفسه ويحاول اصلاحها
°¤ّ!_!ّ¤°( باب تسمية المولود )°¤ّ!_!ّ¤°
من المعروف ان التسمية على الابو والام منتشره في مجتمعنا بس بصراحه اشوف انها ومن وجهة نظر شخصية مهيب من البرّ في شيء الا إذا صارو ابوك و امك ودّهم تسمي عليهم ففي هالحالة سم عليهم ولا عليك من احد بس الا صار الوضع عندهم عادي فقهر بعد ان حرمتك يصير اسمها رزان والا روان والا بيان .. ويصير اسم بنتها لطيفة والا منيره والا هيا ..
وعشان بعد نفتك من سلسلة محمد بن عبدالله بن محمد بن عبدالله
ونفتك من انك الا جيتا في مجلس وقلت يابو ابراهيم التفت لك عشرة وقالوا نعم ،
والأهم من هذا وذاك نفتك من العياير شوي
ومن ناحية البنات الافضل ان الواحد يسمي بنته على بنات جيلها .. لأن البنات غثيثات ويمكن يسببن لها عقده في المدرسة والا غيرها + ان الاسم الزين يسوّق لراعيته الا بغت تعرس وأعرف لكم وحده كلها ملح وقبله وكل ماجاء يخطبها أحد
المهم الا بغيت تسمّي فلا تصير دكتاتوري وتستبدّ برأيك خلك ديمقراطي وشاور حرمتك وخيرها في كم اسم وقل اختاري الاسم اللي تبينه .. مثل ماسويت
انا بما اني ديمقراطي وأرفض التسلّط والدكتاتورية وإقصاء الآخر شاورت المدام وخيّرتها بين خمسة اسامي وقلت الا جانا ولد ان شاء الله وش تبين نسمّيه الأمر أمرك والشور شورك اختاري لك اسم بين هالاسامي " مناحي .. صنهات .. نجر .. محماس .. طارق "
هذا والله أعلم وصلى الله على نبينا محمد وعلى آله وصحبه وسلم …
وعذراً على الاطالة وعلى كثرة الدندرة بس وش اسوي لي مدة ما هذرت وجمّعت لكم كل هذري في هالموضوع ..
" سبحانك اللهم وبحمدك ، أشهد أن لا إله إلا أنت أستغفرك وأتوب إليك "
وتتقبلوا تحيات اخوكم الصغيّر
أبو طارق
