+ 18 << الله من واحد اذا شاف ذا الحركه سالت سعابيله
– – –
سلام ياجماعه
اخبار اعلام .. الايام هذي أيام ربيعيه .. لا ( حرّ ) يقطّع الجـــلد ولا ( برد ) يكسّر العظام
أمس جانا مطر خفيييف .. كنت فاتح الشبّاك وجالس أقرا بالنت .. وكاس الشاهي – الله لايخليني منه – بيدّي .. كان المنظر خطييير للغايه .. وكنت أتمنى وقتها أني أصيح بأعلى صوتي ( أبي أعرس على سويّر ) … بس لحسن الحظ أن الوالد كان جالسن تحت الشبّاك في دورنا الارضي .. والا كان جبت العيد مبكّر
موضوعي الماضي وحلقتي الأولى اللي فاتت كانت ردود الفعل تُجاهها من أروع مايكون .. وصلتني أكثر من رساله بريديه تُثني وتطرب لهالدافع المعنوي لتجديد الحياة الزوجية .. والعجيب أن واحدن من ربعي حكى لي مشكلته الداخليه عن طريق رسالة ايميل بعثها لي قبل كم يوم .. وكان يبحث عن حلّ لمشكة زوجته ذات البلوى المبليه .. وطبعاً أنا من قريت الرساله وانا عارف أنه فلان .. وهذا من باب الصُدفه المليحه ليس إلا .. وماكان خويي يعرف أني أنا ( مُدمن ) خويّه اللي كل ثلاثة أيام أقابله بالإستراحه .. وبالأمس ريّحت باله بمحاولة حلّ المُشكله وفي نهاية الرسالة كتبت له بالخط العريض / يابو فلان .. ترى الدورية الجايّه عليك بالاستراحه .. لاتنسَ تجيب القهوه والشاهي وكثّر حلى القهوه ياعسل
خلونا من هالبلوى .. وراح أطرح عليكم في هالحلقة الثانيه بعض الأخطاء الزوجيه .. مع تبيان الحل << عزوبي نمره واستماره .. بس أقدر أتدخّل في مصايب هالمعرسين واحاول اجتهد ويمكن أصيب
أخوي الزوج
زوجتك تحب الإقتراح عليك دائماً في بعض حلول مُشكلِاتِكُم الداخليه .. لاتُلقي اقتراحها في أقرب نفاية .. بل إصغِ إليها وخلّك رجّال واعقل .. فعدم الاهتمام باقتراحها يجعلُها تُحِسّ بالتهميش العاطفي
الأنوثه ودواهيها .. خِلقةٌ فطريه من الله عزّ وجلّ وهبها لذات لونِ الزَهَر .. لاطِفها وداعبها على فِراشِها .. فلها الحق في ذلك .. فلا تحرمها من ذلك النصيب .. 
المرأه تمرّ بمراحل مُتعدده من العذاب النفسي والبدني ( ولادة وحمل وتسقيط وتنزيل سست غير الكروت الحمرا ومصايبها ) فمُراعة الشعور أثناء تِلك الفترة واجِبٌ ضروري على الزوج .. يعني مهوب تجيها وهي تعبانه وترفع خشتك عليها وتقول لها وهي منهـــاره بدنياً ( وراتس ماتضحكين بوجهي .. أنتــــي ووجهتس هاللي كنّه وجه عنز عقيم 
المعروف عن الحرمه أنها راعية خنبقه وعلاقات مع كل إمرأه على وجه الأرض .. يعني لو تشوف لها حرمة بأقرب منتزه فمُباشرة راح تشبكها ومن باتسر بيتقهوون سوا .. والحرمه بطبيعتها تحب البشكه مع رفيقاتها .. وهذا حقّ من حقوقها في الإطار المحمود والغير مُبالغ فيه .. و ( حدّ ) الرجُل من علاقة زوجته بزميلاتها ومنعها من أخذ حقها في الذهاب إليهم غير صحيح << أحسّ أني بانجلد بعد ذا الحتسي
أختي الزوجه الدويفع
الرجُل معروف بطبيعته بكتم السرّ الزوجي .. يعني أغسلي يديك أنه يروح لاهله ويقول ( والله زوجتي اليوم طبخها مخيسن زي وجهها .. والبارح لقيتها ماغسّلت المطبخ زين .. وقبل كم يوم لقيت لي وسخ بكاس الماس ) .. لكن المُلاحظ على بعض النساء أنها تكبّ عفش بيتها وتبدا تحشّ بزوجها عند أقرب أخت لها في بيت أهلها ..
السؤال اللي يمصع نفسه : هل هذا من حقّ البيت الزوجي أيتُها الزوجه الرفلا ؟
بعض الحريم ثرثاره وهرجها واجد .. ومن يوم يدخل زوجها وهي تستقعد له وماتخليه حتى يتنفّس أو يقدر يحرّك يده اليمُنى .. وهذا طبعٌ سيء وفِعلٌ مشؤوم وعملٌ قبيح << لايكثر عاد يامدمن
دائماً لاتنتظري من زوجك قول ( آسف ) .. لأن الرجُل لايُحِب الإعتذار ( وفيه شوفة نفسن عظيمه ) .. ولكن انتظري طريقة اعتذاره بشكل آخر
في حين المُعاشرة الزوجيه أمتعيه بِكُل الطرق وبجميع الأشكال حتى لايبحث عن المُتعه عن طريقٍ آخر
= = =
وكما عودتُكم .. لابُد من التمليحه وطرح بعض الحركات الرووومانصيه .. عشان تصير حياتكم أحلى مايكون
أيتُها الزوجه << على بالي في خطبه وجالس أحدّث .. إذا بغى زوجك يسافر أو يروح للبر .. أحشري كم وردة مُجففة ثم عطّريها بأحلى عطر واكتبي على بطاقة صغيرة أحلى كلام وادعسيها أبو أبوها بمفرش نومه .. وراح يتفاجئ بهالحركة الحلوة إذا بغى يتبوطح على فراشه وقت النوم
من خلال حبّـــات الفاكهه عنب + كرز + فراولة تستطيعين رسم ( قلب حُب ) جميل داخل طبق الفاكهه الكبير
أختاري يوم قميل ورتّبي أمورك بعد تناول وجبة العشاء .. وقدّمي له صندوق صغير مليح ويهبّل وبداخله مفتاح غرفة النوم واكتبي داخله بطاقة صغيره مدوّن بها ( الغرفة وصاحبتها تحت أمرك اليوم يازوجي الغالي .. عندك مفاتيح الغرفة وعندك مفتاح قلبي ) ! << أبو الرومانصية ياناس
من باب التجديد وتغيير الروتين الزوجي المعروف .. أحضري الفطور على سرير النوم .. أيقضيه كي يتفاجئ بالإفطار الجميل .. الفطور طبعاً بما أننا شعب خليجي فما يخلو من ( البيض والمربى والعسل والزيتون اللي يتفخ البطن ) .. لاتتهورين أختي الزوجه ثم تجيبين شاهي وينكبّ على رجله وينقلب الفرح إلى ترح .. غيّري هالمرّه وجيبي ( كاس عصير برتقال بارد ) .. وصباحكم ورد 
أخوي الزوج .. حدد لك يوم في الشهر واطلع بام العيال لاقرب ( برّ ) واكشت انت واياها .. أنت اللي أطبخ وخلّ أم العيال تغار من طبخك
في يوم من الايام ازرق بروحك لاقرب سوق .. أدخل لأقرب محل ملابس داخليه نسائية .. اشتر اللبس اللي على ذوقك ثم شف لك محل الهدايا .. غلّف الهديه .. وقدّمها لزوجتك .. وخلّها تحسّ بأنك جالس تشاطرها جمالها الخِلقي
إلى هِنا أنتهي من حلقتي الثانيه واللي راح آخذ بعدها نفس عمييق وراح أسافر بعدها لمدينة قريبة من منطقتي .. طبعاً أنا وربعي العزازيب … ومن ثمّ العوده والمُتابعه للحلقة الثالثه والأخيره .. خلوكم معنا يالمتزوجين .. وانتم يالعزّاب من شنبات وشباصات صرفو عماركم واذا اعرستو راجعونا
– الله يخارجنا منكم بس – آمين
* هذا الموضوع برعاية محلات سالم أبو خيشه للأواني المنزليه .
عندنا تخفيضات ماتخرّش الميّا .. بس انتم انهـــــجو وتعالو لنا الله يحييكم
:: مدمن شاهي :: 
* حقوق الموضوع محفوظة بقدر كاتم *
