اليوم قصتنا قصه .. بكوز اتز از ا ستوري << بيجيني نعله انا وذا الفلسفه..
هذي الله يسلمكم كليتنا .. كلية الاقتصاد المنزلي والتربيه الفنيه .. الي على طريز الجامعه ..
يطلق عليها المقبره الجماعيه ..
في الحقيقه هي متحف اثري للحضاراة الساميه .. واكبر دليل ان قسم الفنيه جايين عندنا قبل امس عشان ياخذون محاضره في فن الخنبقه المعماريه ..
والحمد لله ابشركم طلعوا مبسوووطين بالي شافوه .. والكل جاب الدرجة الكامله (( مبين الدرس كان واااضح ))
اجل بوه كليتن سنعه تفتح كفتيريتهم فوق البياره .. طبعا هذي البدايه وما ادراك ما النهايه ..
خلونا في الكفتيريا دامنا جبنا سيرتها ..
الكفتيريا عباره عن صندقه خضراء اللون (( مطحلبه .. ولا لونها الاصلي مدري وشو )) .. ان جيتوها من داخل (( نصيحه لا احد يجي)) بتلقون بياره في الوسط .. من حولها الكراسي مسطفه .. كما الورده والناس من حولها يشتمون اللهم وجه الاختلاف ذي يشتمون ريحتن زينه وذي خياس … الروائح الي طالعه منها لها اول مالها اخر .. والسقف متقطع ومتشقق وشين منه طايح وشي عالق خطر يطيح بس عالقن بسعبولة ذبانة .. والمكيفات تقطر مويه .. حتى بالاماره البنات يوقفون سرى على المكيف كلن يبي يملى فنجاله ويدحسه شاهي ويتقهوون منه<<< زيييييووو
وفوق ذا القرف كله حاطين الاكل ..
ياجماعه بالله شلون تقبله النفس وهو في وسط مكب النفايات ذا ,,
لا ومن زينهم يبيعون الكتكات بريالين ؛<<< الا ياشريته من عندكم ..
وان جينا للنافوره الي مقابل الكفتيريا .. مظهر اخر من مظاهر الترفيه عن النفس .. هي في الاصل عباره عن بياره تجيها حالات وتنفجر .. وانواع النوافير .. وبعض الاحيان البنات يستانسون على بالهم الكليه مسويتها كا احد نشاطات الترفيه … يتجمعون حولها ويقعدون يطرطشون فيها ويلعبون .. ما نقصهم الاالصواريخ وتصير نافورة جدة على غفله ..
احد البيارات الراكده في ربوع كليتي ..
وان جينا للحمامات .. فهي اخت الكفتيريا .. مالودين من بطن واحد .. كلهم ريحتهم خايسه . وكلهم وصخين .. وكلهم فوق البياره .. اللهم الحمام مقسم غرف(( للخصوصية يعني)) والبياره اااا قصدي الكفتيرايا مفتوحه على بعض..
طبعن الحمامات عندنا بالكليه لها روائح زي العطور تمام .. بتقولن وشلون ..
بقولكم تمر ولون .. الله يسلمكم حمام قسم التغذيه يقولون له رائحه معينه .. رائحة الصراصير مخلوطه بالخياسيات الاخرى .. بينما حمام الفنيه .. فيه رائحة الخنافس .. مخلوط بالخياسات الاخرى طبعن ..
وبكذا اتضح لنا الفرق بينهما .. من يقوم يعيد الفرق (( لحوووووول وشذا الي جانا ..موب قلنا كل واحد يفصخ نعاله برى ))
وهذي بعض الصور .. وياليتني كنت اقدر احط الروائح .. كان قسمب بالله ما يبقى بشر على الانترنت
وان جيتوا للقاعات .. فهذي عالم اخر من حمامات السونا .. اختراع جديد بنقالي ..
اجل نعنو بوهم 160 طالبه حاشرينهم في قاعه 4 × 4 ..
قسمب بالله خطر نجيب اسطوانات اكسجين نعلقها بستوفنا ويالله نتنفس بعد .. وغير انواع الحر و العج والغبره ,, الي ما اشك ابد انها من يوم بنوها ما طبتها مكنسه زيدي .. اللهم تنانير البنات الله لا يخلينا منها .. مسويه واجب المكنسه واكثر .. طبعا ما يخفاكم ان البنت تطلع من بيتهم ملونه ووش زينها تقل تلفزيون سوني شاشه كريستاليه 40 بوصة.. وترجع ابيض واسود من ذا العج..
شوفوا
هذي اكشخ واشرح قاعة بالكليه .. لا يفوتكم بس انواع الديكور ..شي شي ..
وهذي كراسينا .. انوااااع الراحه .. والمحاظرات من ساعتين الى ثلاث .. ما نقوم من عليها الا مشصبين ..
اجل ذي طاولة دكتوره .. والله ما حلفتوني انها تجي وتلقى الطاولة كذا تحط اشيائها على الطاوله وتقعد على الكرسي الي بجنبه وهو كذا وتقعد تقرقر .. طبعا في رايكم هذا منظر يفتح النفس للدراسة ؟؟
—————-
اما الاسياب فهذي عالم ثالث .. انواع المهزله والقرابيع والخنبقه لدرجة ان الزبايل متبريه منا .. تقول دامكم ما تبوني فانا ما ابيكم
انواع البيارات .. المبنية بتفنن
اما المستودعات كلها مستودع واحد .. نسميه التجوري .. هذا الله يسمنكم .. مستودع فيه من الاشياء .. ما تعجب له الرجل .. وما لا يصدقه خشم .. والي يبي يعرس وياثث بيته .. ماله الا مستودعنا .. فيه من الاشياء الييييييييييييين بكره وجديده بقراطيسها .. من خلاطات وميكروويفات وثلاجات وصحون وملاعق وفناجيل وبيالات ودلال وسفر والله لو ابعدد الين بكره ابتعب .. والمشكله ان من كل صنف يجي مية حبه هذا اذا موب اكثر.. والي يقهر ويدمي الاصابع ان مطابخ الكليه تصفررررررررررر والله العظيم ثم والله ان البنات هم الي يجيبون الاغراض معهم ..
يعني اذا الطبخه تحتاج خلاطات وغضارات وصحون وملاعق ما يجيبها الا البنات .. تشوفون كل وحده زاقلتن لها من 3 الى 4 خياش كلها ادوات ومقادير , والمشكله ان ذا المخازن مليانه ادوات .. بعضها من انتاج 1973 والى يومكم هذا ما انفكت من قرطاستها ..و اللله قههههههههر .. وان قلنا لهم طلعوا لنا من ذا المخازن قالوا مناب .. قلنا وراااااااه ؟؟ قالو : اذا عطيناكم منه يخلص ,, ياناس هذول وش اسوي فيهم علموني بس .. وكان ودي لو اني قادره اخذ لكم صوره للمطابخ بس مع الاسف لقيتهم صاكينها بالمفتاح … نعنبو بوكم هي فيها شي ينسرق يوم انكم تصكونها ..
مكتب التصوير .. غرفه 2 ×2 متر .. بس اموت واعرف الة التصوير ذا الدردوعه وشلون دخلت فيهاااا ؟؟
الظاهر انهم حاطين الاله قبل همن بنوا الغرفه .. الظاهر ,, ولا بعضهم يقولون الغرفه موجوده من قبل بس انهم حفروا من تحت الغرفه ودخلوها .. عاد أي من السالفتين الاصح مدري.. وان بغيت ورقه تصور يبي لك تمسك سرى من 4 ايام الى اسبوع وتسجل اسمك وتدفع مقدم عربون .. وعاد انت وحظك ان جيت لقيتهاو لا ما تلقها على حسب .. وحاطين طاقة الغرفه نص متر في 15 سانتي فوقها مكيف يبرد على ذا الصندقه و ينفخ هوا حار فوق روس الطالبات هذاغير الشمس والله لو تحطون بيض بذا الشمس استوى ..
اما الساحات وانواع الشموس الي فيها << لو يدرون اللبنانيات عن ذا الشمس الي عندنا قسمب بالله تشفونهم نمل .. انواع حمامات البرونزاج
ولا باب الخروج .. باب اليس في بلاد العجائب اكبر منه .. الطالبات يمسكون سرى اذا بغوا يطلعون مايكفي الا طالبه وحده واذا هي متينه معناتها يابعدي مضطره تدخل على جنب .. واذا طويله تدخل زحفن ..
صور متفرقة
الزبايل من كذا وطالع .. لاحظوا انهم غارفين في وسطها بيارة منفجرة ..
العفش والزبايل كله منطل بالاسياب والساحات.. حتى زوالي الصلاة ياعالم .. يخلونا نصلي بالاسياب على عباياتنا بالتناوب .. كل وحده تفرش عباية صديقتها وتصلي عليها همن تجي صديقتها وتعقبها .. وطبعا ما يحتاج اقولكم انه مافيه مصلى .. الصلاة بالاسيااااااب .. فتحوا مصلى كبر يدي صندقه همن قلبوه مخزن خبركم المخزن اهم من المصلى ..
برادات المويه .. يبون نشرب منها عشان يجينا الكوليرا مدري التيفوئيد..
انواع الشخاميط على جدران الحمامات
دينمو الكليه الي كل شوي منقطع .. بلا والله من شاف وجهه ما رجى خير ..
على طاري الدينمو والمويه ..
هذي سالفه ابي اقولها لكم .. وتراها حدثت هناااا موب في جيبوتي ..
مره من المرااااريت كان علينا محاظرة طبخ ..
يوم دخلنا كانت المويه وش زينها تنقط تنقيط .. يعني احسن من لا شي ..وكنا نحط القدور تحت البزابيز ونجمع المويه(( خبركم كلية الاقتصااد .. ولا ليه مسمينها اقتصاد اجل)).. المهم وفجئتن انقطعت المويه وحنا بعز الشغل ونقعد نختبص ونحتاس .. طبعن تجي الدكتوره وتقول يالله كل وحده تشقل لها قدر وتروح تعبي من الحمام الي بالعماره الثانيه موية وتجي .. مير انا لاعت تسبدي وشو حمامة ووشو مويته .. قالت يعني عاوزين تؤعدوا كده ما الميه كل يوم بتتئطع وكنا بنعمل كده ..
عاد قاموا البنات الي تاخذ لها قدر والي غضارة والي سطل بوية جادعه هندي ويقعدون يعبون من االمويات الي بالحمامات.. لا وذاك اليوم الله راحمنا كان فيه مطر .. والمرازيم والصنوع كانت تصبصب والبنات سرى عند المرازيم كلن تبي تملى قدرها (( والله ثم والله ان السالفه صدق ))
ووالله ثم والله ذاك اليوم ما اشتغلنا الا على
موية المطر
..
لا وفيه بنات طقت معهم .. وقاموا يدحسون المواعين بدون ما تغسل
يعني انواع القرف ..
وتجيك الدكتوره في نهاية المحاظره تقول يالله يابنات كل وحده منكو تدؤ صنفها وتؤؤل ايه رايها فيه وايه عيوبه <<< ايه افلقني ان ذقته ,, تبي يجينا الطاعون ذا الخبله ..
الدرجات .. وانواع المزابل .. وبعض الاحيان ينزل منها شلالات .. بس منيب معلمتكم السالفه اخاف تنظلونا
اما المناهج عندنا بال14 وال15 ماده والي يقهر ان الي يسمع عن قسمنا يحسبه بس طبخ ..
قسم بالله الي يشوفنا وش ندرس يقول ندرس طب .
خذوا عندكم
ندرس ميكروبيولوجي (( ولو انه من تخصصات قسم الاحياء))
وفسيولجي انسان _ وكيمياءحيويه .. وعضويه ((عملي ونظري ))
يعني نقعد نحوس بالمعامل وانواع المركبات الي تطلع ..
واحصاء- وحضارة اسلامية- وتاريخ التشريع (( قلبنا تاريخ))
وانجليزي طبعن – وعربي -ومناهج تعليميه .. وحاسب الي (( عملي ونظري ))
وعلم نفس – وعلم الادارة – نظم اسلاميه – ونظم ماليه – طرق تدريس ..
لا والي ناسيته اكثر من الي قلته
..
يعني تطلع الطالبه من عندهم بروفسوره في جميع التخصصات .. وعلى الرغم من كذا يتطنزون من قسمنا ((التغذيه))على بلهم كله طبخ مع انها فقط محاظرة وحده في الاسبوع ..
والله ثم والله اتعب ياجماعه وانا اقولكم .. ماراح تصدقون الا اذا شفتوا بانفسكم ..
صدقوني صرح تعذيب موب تعليم ..
ما اطول عليكم <<< قولي قسم ..
بس تكفون احد يلحقنا قبل نروح في ذا المقبره الجماعيه تفكوووووووووووووووووووووون
