أعزائي قروب ابو نواف
يسرني دعوتكم لمتابعة لقاءي على قناة المرقاب
يوم الاثنين الموافق 1431/5/5هـ
في تمام الساعة 11 والنصف مساءً
ويعاد البرنامج يوم الثلاثاء الساعة الواحدة ظهرا
والخميس بعد المغرب
كما يسرني أن أصافحكم بهذه القصيدة المتواضعة
دام العتب في سلم الأحباب مسمـوح
قل لـي وش اللـي غيـرك لاتكابـر
أصبحت انا لك روح وانته لي جروح
وانا اندب الفرقى واجامـل وصابـر
الى متى اقبـل علـى البـاب واروح
احسب مسافاتـي واعـرف المعابـر
وانا الذي غنيت مـع ساجـع الـدوح
وعليت لك من فيض شعـري منابـر
احرص على عشقك واعلي به صروح
وجزيتني كني معـك شخـص عابـر
اجي وانا مجـروح واروح مجـروح
خابـر بنيـاتـك ولانــي بخـابـر
الجسم حـي وداخلـه قلـب مذبـوح
وكسرت رجلٍ مالقـى اليـوم جابـر
كانك تبينـي افضـح السـر وابـوح
والـوم دور الوقــت واقـول غابـر
حنا عرب والسر من دونـه الـروح
وصـدورنـا للهم مـثـل المقــابــر
مانخلف النيـه ولـو فيـه مصلـوح
والغــدر مالـه عنـدنـا أي دابــر
وان كان جايك من على الهرج مشفوح
اللي على النـمـه لـهـم شبـر شـابــر
بعطيك علم وعادتـي ابعـد الشـوح
تـرا المظاهـر ماتعكـس المـخـابـر
بصبر ولو صدري على حبـك يفـوح
وابقى على الهقـوه كتـوم و مثـابــر
عل الفرح فـي مقبـل أيـامنـا يلـوح
وانسى الهمـوم اللـي عليـه تسابـر
وان كان همك تستمع لي وانـا انـوح
فانـا همـومـي مــاحـوتـهـا المحـابـر
اخوكم عبدالله العصيمي
وجد شاعر
تابع جديد رسائل المجموعة على تويتر
ماشاء الله عليك ، ابدعت قليله فيك صح لسانك وسلم منطوقك ربي يعطيك العافيه بعطيك علم وعادتـي ابعـد الشـوح تـرا المظاهـر ماتعكـس المـخـابـر ايه والله انك صادق ربي يوفقك ، دمت موفق
صح لسانك والله ابحرت في القصيده وجات على الجرح:( مثل قصائد ابن فطيس يعطيك العافيه ولاهنت على القيده دمت كما تحب
الله يعطيك العافية يا غالي والله الكلمات رائعة جدا معبرة صادرة من قلب كان هائج والحين يحس انه مذبوح تقبل احترامي يا غالي
أتيتَ بهـا غاااااااائه في الجرح يـ أبو عابد كلمات وأسلوب ومعاني أكثر من مجرد عذبــه وجمالـ تحتار في وصف جمالية القصيدة كلماتي , استمر يـ مُلْهَمْـ تحيتي
يمسيك بالخير شعر جميل واتحفنا بالشعر وخاصتاً المتضمن بالنصايح والله يوفقك
السلام عليكم ورحمة الله وبركاته تسلم وصح لسانك ماقصرت اخوي عن جد ابدعت لاحرمنا الله من مزيدك تحياتي لك