بسم الله الرحمن الرحيم
السلام عليكم ورحمة الله وبركاته
مساء معطر بنسمات الرياحين
¤.. كلٍ تمنى خوتي بالتمني ..¤
|
يا للي تهددني على البعد مليت
بالطالعة والنازلة ممتحني
|
|
ما سقت أنا الخطوة على دربك وجيت
أنت الذي سقت الخطى ومْتعني
|
|
أقبلت يمي قمت أنا فيك هلَّيت
فتحت لك قلبي وذا طيب مني
|
|
أرخصت لك روحي ومالي ومديت
كفي لكفك محسنٍ فيك ضني
|
|
أسهر واشيل البيت واتجاوب البيت
على طروق الشعر نسهر نغني
|
|
قسمت لك زادي وشربي ولا بيت
حتى أشوفك بالمنام مْتهني
|
|
واليوم أشوفك يا رفيقي تماديت
كنك عليه بالصداقة تمني
|
|
مدري نسيت الطيب وإلا تناسيت
والا بدالك عاذلٍ وامتهني
|
|
يا صاحبي ما مر يوم وتهقويت
انك تفكر با لجفى والتجني
|
|
واليوم أنا ماعاد بي صبرٍ ازريت
ولاعاد ينفع معك لحظة تأني
|
|
الله كريمٍ كان عني تخليت
ما نيب ميت كان قفيت عني
|
|
غيرك ملاينٍ ولو عني أقفيت
كلٍ تمنى خـوتي بالتمـني
|
عبد الله محمد اليحيى
حيزوم
