بسم الله الرحمن الرحيم
(( سلطان ))
قصة وسيناريو وحوار
Fox
سلطان : السلام عليكم .
ام سلطان : عليكم السلام هلا سلطان وراك غايب طويل اليوم ماهي عوايدك .
سلطان : اليوم كنت اصفي عملي بالمكتب لاني بنتقل للفرع الرئيسي من بكره وحيلي منهد عالاخر ادور المخده .
ام سلطان : روح بدل ثيابك وبجيب لك العشا .
تأتي هند شقيقة سلطان من غرفتها :
هند : هلا سلطان توني بدق عليك وسمعت صوتك .
سلطان : امريني ؟؟
هند : ابي اغراض من الصيدليه وادويه لولدي سلطان بس شكلك تعبان خلاص ودني وانا بنزل اشتري .
سلطان : لامايحتاج ابشري الحين اروح .
هند : ترى النت مفصول طول اليوم .
سلطان : وش فصله ؟؟؟
هند : مدري والله لكن لمبة المودم الثانيه طافيه.
سلطان : يعني المشكله من الشركه لابارك الله بالعدو مايمر اسبوع الا ينفصل مصخوها بصراحه .
هند : ليه ماتشترك في موبايلي والله العنود تقول من اشتركو ماعرفو شي اسمه النت مقطوع وتقول من طلعت شريحة موبايلي فاتورتها ماتتعدى 200 بالشهر وهي ام الهذره على الجوال .
سلطان : فعلا حتى الشباب بالشركه يقولون نفس الكلام ويمدحون سرعة التصفح والتحميل حق موبايلي…. خلاص اذا نزل الراتب بشترك معهم وبنقل رقمي لهم بعد .
يتجه سلطان للصيدليه ويشتري الاغراض ثم يعود ويخلد للنوم وعند الساعه الثالثه فجراً يدق باب غرفته فينهض مفزوعا ويتجه للباب فيجد هند امامه تبكي :
هند : الحقني الحقني ولدي حرارته مرتفعه ومايتنفس .
يذهبون به الى طواريء المستشفى ويخبرهم الطبيب بان حرارته مرتفعه جد ثم يتم علاج سلطان الصغير واثناء عودتهم للبيت :
هند : حسبي الله على اللي كان السبب والله منحرجه منك ياسلطان تاعبتك معاي والمشكله سلطان بهالعمر تكثر امراضه وروحاته المستشفى .
سلطان : اقول اسكتي بس تراني اخوك ماني بجارك .
هند : الله يخليك لنا يارب …….. اقول شكلك نسيت ان بكره موعد الجلسه بالمحكمه .
سلطان : لا مانسيت والله…… بكره بروح الشركه بقابل رئيس مجلس الاداره مدري وش يبي فيني وبعد مااطلع اجيك ونروح المحكمه .
هند : ان شاء الله بكره الحقير سالم يجي للجلسه عشان نخلص من الموضوع .
سلطان : لازم يجي اصلا لانه لو ماحضر هالمره بيحكم الشيخ غيابي .
في صباح اليوم التالي يذهب سلطان لمقابلة رئيس مجلس الاداره ابوتركي :
سلطان : الله يصبحك بالخير طال عمرك .
ابوتركي : هلا اخوي سلطان تفضل اجلس…….طبعا انت ماتدري ليه انا طلبتك وماتدري وشهي وظيفتك الجديده ؟
سلطان : ابد ماعندي علم طال عمرك وانا تحت امرك .
ابوتركي : الشركه تحاول في الفتره الاخيره مسايرة النمو الاقتصادي بالبلد وحنا هنا نحاول التوسع في نشاطتن في شتى المجالات, وانا وشركائي قررنا نفتتح مؤسسه للمقاولات والاختيار وقع عليك لتكون مدير عام للشركه وطبعا راتبك بيزيد اضافه الى المنصب .
سلطان : لكن انا توني ماكملت سنتين بالعمل وماعندي خبره كافيه !!
ابوتركي : هذي فرصتك ياسلطان لاثبات وجودك وحنا اخترناك بعد مارشحك مديرك بالفرع وبعد ماشفناك في الحفل السنوي وانت مناسب جدا للوظيفه .
سلطان : انا حاضر طال عمرك والله يستر .
ابوتركي : عموماً انت مارح تحتاج خبره لان معاك مهندسين وخبراء…روح الحين للمهندس سليمان عشان يدلك على مكان المؤسسه .
يخرج سلطان وفي راسه الف علامة استفهام ويتجه لمكتب المهندس سليمان :
سلطان : صباح الخير مهندس سليمان معاك سلطان موظ….
سليمان يقاطعه : اجلس
سلطان : ماشاء الله هدوء بالمبنى الرئيسي مريح جدا .
سليمان : جاي تسولف هنا انت …خذ هذي الاوراق وروح برج العتوي واطلع الدورالتاسع مكتب رقم تسعه هذا مقر المؤسسه الجديده وبتلاقي المهندس اسلام عطه الاوراق واستلم الشغل .
يتجه سلطان الى البرج ويقابل المهندس اسلام ويخبره بان دوامه سيكون لمدة ساعتين فقط يأتي للتوقيع على الاوراق.وبعد ذلك يخرج سلطان من البرج غير مصدق ماحصل له وكأنه في حلم ثم يتجه للمنزل ليأخذ شقيقته هند ويتجه بها الى المحكمه وبعد انتظار طويل امام مكتب القاضي ينادي الحارس على اسم هند فيدخل سلطان :
القاضي لسلطان : المدعيه هند وخصمها سالم موجودين؟
سلطان : اختي موجوده بانتظار الحريم اما خصمها مدري ياشيخ انت اعلم مني .
القاضي : هو خصمكم انتم والمفروض يكون عندك علم رح شفه وخله يجي معك لاتجي لحالك واحضر شقيقتك معك .
يخرج سلطان وينتظر فتره طويله ثم يأتي زوج شقيقته ويدخلون للقاضي :
القاضي لسالم : وراك ماتحضر الجلسات يااخ سالم ..معطلنا ومعطل خصومك .
سالم : اقسم بالله اني كنت مسافر يافضيلة الشيخ وماكنت ادري عن الجلسه السابقه .
سلطان : يكذب ياشيخ موجود ماسافر ويدري عن الجلسه لان محضر الخصوم بلغه بنفسه وانا بلغته برساله على جواله .
سالم : سجل عندك ياشيخ يكذبني قدام فضيلتكم .
القاضي : وش اللي سجل وين انت جالس فيه…وراك ماتنفق على ابنك سلطان من طليقتك هند .
سالم : اصرف عليه وانا ماربيته الله مايرضى بالظلم ياشيخنا .
القاضي : النفقه واجبه عليك ربيته والا ماربتيه وانت اللي طلقت زوجتك وتركت ابنك الرضيع والمفروض تقوم بواجبك تجاهه .
سالم : طلقتها لانها تحاسبني على طلعتي ودخلتي وتشك فيني وانا ماسويت شي ودايما مريضه ومهمله للبيت .
هند : حرام عليك ياسالم مدخل بنت علي في بيتي وتقول ماسويت شي !!
سالم : هذيك خدامه جايبها تنظف البيت وانتي تسرعتي عاد تحملي اللي جاك .
القاضي : اتركنا من هذا الحين انا بلزمك تنفق على ابنك وبحدد النفقه من واقع دخلك الشهري وايضا تترك الشقه اللي انت ساكن فيها والسياره اللي تستخدمها لانها ملك لطليقتك هند حسب العقد والاستماره .
سالم : ماعندي دخل اصلا لاني مااشتغل والشقه والسياره شريتها منها بفلوسي .
هند: مااستلمت ولا ريال منه ياشيخ ووقعني على ورقه بالبيع بعد ماضربني وكان بيذبحني .
سلطان : ياشيخ الورقه اللي وقعت عليها هند ماتعتمد لانها بالاكراه وهذا اللي يقول ماعنده دخل تراه يملك مؤسسه وجايب خمسين عامل موزعهم على الشوارع ينصبون على خلق الله .
القاضي لسالم : عندك شهود على انها استلمت منك قيمة الشقه والسياره؟
سالم : عندي عشره لو تبي .
سلطان : ياخي خاف ربك تكذب وانت مادفعت لها شي وعندك مؤسسه تجيب لك بالشهر اكثر من عشر الاف ريال يعني تقدر تصرف على ولدك ومنت بحاجة السياره والشقه .
سالم : اي مؤسسه يابوالشباب انت؟….. عندك اثبات ان عندي مؤسسه ؟
سلطان : تنكر ان المؤسسه باسم اخوك وانت اللي تديرها والربح كله لك ؟
القاضي لسالم : اذا انت معسر هات صك اعسار .
سالم : تفضل ياشيخ هذا صك اعسار طازه توني مطلعه .
القاضي بعد ان قرأ الصك : يااخت هند انا بعلق موضوع النفقه لان الرجل معسر وبالنسبه للشقه والسياره عندك اثبات انه وقعك بالاكراه ؟
هند تبكي : حرام الله مايرضى بالظلم انا ماعندي شهود ياشيخ وهو ضيع وظيفتي علي وسرق شقتي وسيارتي حرام والله حرام .
سلطان : لاحول ولاقوة الا بالله .
يطلب الشيخ من سالم احضار شهوده ومن هند احضار مايثبت كلامها ويؤجل القضيه الى السنه القادمه, وبعد خروجهم من مكتب القاضي :
سالم : تصدقين رحمتك والله خلاص برجع لك الشقه والسياره بس تدفعين لي مية الف ريال وانتي الربحانه .
سلطان : والله ماتدفع لك ولا ريال والجلسه الجايه بجيب للشيخ اثباتات توديك بداهيه وبتشوف.
سالم: الحقني والحقك ونشوف من يحب الثاني اكثر (يرقص حواجبه) .
بعد ركوب سلطان وهند السياره :
سلطان : ليش تبكين ….هذا واحد ينبكى عليه وتراك انتي معززه مكرمه في بيت ابوك الله يرحمه
هند: انا مصره اخذ حكم بالنفقه واخذ شقتي وسيارتي منه عشان اقهره,وماابي انا وولدي نكون عاله عليك وانت راتبك يالله يكفي البيت ومصاريفه ..انا لو اقدر ارجع لوظيفتي كان ماشلت هم .
سلطان : الله يهديك بس وش وظيفته اخوك صار مدير مؤسسه وراتبي بيزيد وصرت رجل منصب يشار لها بالابهام .
هند: قل والله …وليش مابشرتني من اول والله اني فرحت وربي .
سلطان : كنت متوقع ان ضغطك بيرتفع وقلت بخلي الخبر الين نطلع من المحكمه عشان اغير جوك …..عساه تغير ؟
هند: طبعا تغير والله انك تستاهل ياسلطان والحين ماصار عندك عذر ولازم نزوجك .
سلطان : ماني متزوج الين تتزوجين انتي ومنيره .
هند: على كذا منت متزوج لان ماحد يبينا وحنا مطلقات .
سلطان : توكم صغيرات والله يوفقكم بناس تقدركم موب مثل سالم وعبدالله اللي ماقدرو النعمه .
عندما يصلون الى البيت تقابلهم منيره شقيقتهم :
سلطان : وين رايح الغزال لايكون ناويه تنحاشين من المحميه ؟
منيره : شفتكم من فوق ونزلت ركض…تدري اني لابسه عباتي من ساعتين…تكفى ياسلطان ودني لمجمع السهيلي فيه تقديم وظايف نسائيه .
سلطان : اقول انثبري بس بلا مجمع بلا بطيخ صاحيه انتي وش بتشتغلين هناك حارسة امن ؟
منيره : اولا مااسمح لك تقول انثبري ثانيا المجمع نسائي وادارته كلها حريم وانا بكون بالاداره .
سلطان : يابنت الحلال ارجعي بس وانسي الوظيفه ابشرك ترى بيزيدون راتبي وبصير مدير مؤسسه ونويت اعطيك راتب من عندي مقابل انك تسوين لي كنافه كل يوم .
منيره : وش ابي براتبك انا ابي وظيفه اداريه محترمه والكنافه بسويها لك بدون مقابل .
سلطان : والله حلفت ماتشتغلين ماعندنا حريم يشتغلون بمجمعات .
منيره تبكي وتصرخ: حرام عليك الاقيها من وين والا وين.. احس اني بموت من الخنقه والجلسه بالبيت ..ليتني ماقلت له يطلقني ليتني ماقلت له يطلقني .
سلطان : تعيشين مع واحد سكران طول اليوم ومتزوج شغالتك السرلنكيه وحاطها عندك بالبيت؟
منيره : ايه اعيش على الاقل طول يومه سكران ومايتحكم فيني .
سلطان : ماقلنا شي سوي اللي تبين واشتغلي باي مكان لكن غير المجمع .
ام سلطان : سلطان ليه ماتخلي اختك تشوف نفسها وتأمن مستقبلها .
سلطان : يايمه هي بتشتغل بمجمع نسائي صح, لكن المجمع صاحبه رجال واكيد بيكون في اتصال بينهم وصدقيني نهاية هالوظايف كوارث وانا ابي مصلحتها .
ام سلطان : بنتي متربيه وقويه وماحد يقدر يمس شعره منها .
سلطان : ماتشتغل لو يصير ايش وانا بدور لها وظيفه زي الناس .
منيره : انت وظفت نفسك بالموت وانت رجال..ابي اعرف شلون بتشوف لي وظيفه وانا حرمه؟؟!!
سلطان : يجيب الله خير .
في صباح اليوم الثاني يتصل رئيس مجلس الاداره الشيخ ابوتركي على سلطان ويطلب منه الحضور فوراً .
ابوتركي : والله عندي خبر ماهو بزين ياسلطان .
سلطان : راح المنصب الجديد اكيد …….. والله اني حسيت اني ماني بكفو .
ابوتركي : لا ماراح لكن رفضو يعطونا تصريح للمؤسسه بعد ماخسرنا كل هالخساير .
سلطان : والسبب ؟
ابوتركي : ابد قالو ماتقدر تجمع اكثر من نشاط بوقت واحد .
سلطان : معقوله عاد هذا سبب ؟!!!
ابوتركي : اعضاء مجلس الاداره اقترحوا علي ان افتح المؤسسه باسم ابني تركي لكن بيني وبينك مااثق فيه لان سفره كثير واخاف يخرب كل اللي خططنا له…وعشان كذا قلت لهم اذا ابني سلطان وافق تكون المؤسسه باسمه من بكره بجهز له كل شي .
سلطان : وطبعا ولدك سلطان بيكون المدير العام وانا اطلع منها .
ابوتركي : ركز معي ياسلطان انا اقصدك انت .
سلطان باستغراب : انا طال عمرك تقصد اني اصي…
ابوتركي : ايه ايه انت لاتسوي فيها مصدوم ….. موافق والا لا؟
سلطان : انا اعتبرك مثل ابوي الله يرحمه ويطول بعمرك واكيد ابوي اذا قالي شي لازم انفذه لكن ماني مصدق كذا بيوم وليله اصير صاحب مؤسسه وانا ماعندي الا خمسه ريال بجيبي..ممكن تعطيني فرصه افكر واستخير.
ابوتركي : مافي تفكير تعطيني ردك الحين واذا منت موافق تراك بتجلس في بيتكم لان الفرع اللي كنت فيه بيتسكر وبيتسرح كل الموظفين .
سلطان يرد بسرعه: لا تكفى ترى هالوظيفه تصرف على بيت كامل خلاص موافق موافق .
ابوتركي : راتبك كان 2500 ريال وبضيف لك مع بداية السنه الجديده بدل منصب وبيصير 2999 ريال .
سلطان باستهزاء مبطن : الله كثير طال عمرك!!!! طيب اللي تشوفه وانا تحت امرك .
يخرج سلطان من مكتب ابوتركي ويتصل بصديقه حسين ويبلغه بما حصل :
حسين : ياخي انت اهبل يقولك صاحب مؤسسه وتقول له بفكر!!
سلطان : ياخي واحد مثلي عنده ثانويه وملحط والله لو يطلع لي المارد يقولي هالكلام ماصدقته, شي طبيعي اني انصدم وتكون ردة فعلي عكسيه لكن الحمدلله تداركت الامر قبل ماتضيع الوظيفه .
حسين : بس عاد هذي زياده والله مديرك مايستحي على وجهه والمشكله بتجيك مع السنه الجديده موب الحين!!! والله لو انا منك اسحب عليهم من اول صفقه واخذ الفلوس ومالهم حق يتكلمون لان المؤسسه باسمك .
سلطان : الله يغنيني بحلاله عن حرامه .
حسين : طيب اجل برسلك اخوي سامي عشان توظفه بالمؤسسه .
سلطان : الله يقطع شرك توني مااستلمت الوظيفه وتبيني اوظف…خلني اثبت نفسي اول بعدين بشغل اللي ابي .
حسين : زين زين لاتاكلنا خلاص علمنا متى تصير قوي عشان ارسله لك .
بعد مرور ستة اشهر واثناء وجود سلطان في مؤسسته يدخل عليه الشيخ ابوتركي :
ابوتركي : هلا سلطان بشر كيف الشغل؟
سلطان : حياك الله طال عمرك والله شوفة عينك ست شهور نكش ذبان مافي شغل والمشكله مااحب اجلس كثير بالبيت عشان خواتي ياخذون راحتهم .
ابوتركي : جبت لك شغله بتلهيك كم شهر قدام .
سلطان : الله يبشرك بالخير…. وش الشغله ؟
ابوتركي : وزارة المواصلات منزلين مناقصه على بناء نفق في المدينه لتخفيف الزحام وحنا بندخل المناقصه بمؤسستك وبنحصل عليها .
سلطان : عساها ترسى علينا بس ؟
ابوتركي : افا عليك اعتبرها راسيه من الحين..وقع لي على هذي الاوراق عشان نكمل الاجراءات .
وبعد شهر يتم ترسية المناقصه على مؤسسة سلطان ثم يطلب منه الشيخ ابوتركي الحضور للبنك وعند وصوله :
ابوتركي : هلا سلطان رح لخدمات العملاء واطلب صرف هذا الشيك بالدولار وحطه بهذي الشنطه وسلمني اياها .
سلطان : الله وش كبر هالمبلغ مااظن تكفيه الشنطه …..لايكون هذا حق بناء النفق ؟
ابوتركي : ايه هذا اول دفعه من المبلغ الاجمالي وكل ثلاث شهور بجيب شيك بدفعه جديده وبنسوي نفس الطريقه وانت تسحبه وتعطيني اياه .
بدأ الشك يساور سلطان :
سلطان : بس يابوتركي شلون يعطونك الشيك وهو باسمي مو المفروض انا استلمه .
ابوتركي : ياخي تراه شيك يعني ماحد غيرك يقدر يصرفه وبعدين انا بوتركي ماني اي واحد واللي ابيه اجيبه لو كان في جحر النمل . ووفرت عليك روحة الوزاره والحوسه هذي كلها بس وقع علي استلام الشيك هنا عشان ارسله للوزاره .
يذهب سلطان الى خدمات العملاء ولكن لانه شك في طريقة كلام ابوتركي عاد له واختلق عذر محاولاً تأخير صرف الشيك :
سلطان : طال عمرك طلبوا مني اثبات الشخصيه والسجل التجاري .
ابوتركي : انت دلخ والا ايش ؟؟ماقلت لك جب معك اثباتاتك ؟
سلطان : انا جبت السجل لكن المشكله بطاقتي ضايعه والموظف يبي الاصل .
ابوتركي : ان لله وانا اليه راجعون هذا اللي كان ناقصنا..طيب بكره تروح لواحد اسمه وحيد الزقرت بالاحوال المدنيه وتخليه يطلع لك بطاقه باسرع وقت وتجي البنك بنفس هالوقت لان لازم نسحب الفلوس والا كيف بنشتغل .
فيساله سلطان سؤال لقطع الشك باليقين :
سلطان : طيب ليه ماتكلم مدير البنك يصرف لي الشيك وهذا اسهل من جحر النمل ؟
ابوتركي : ياخي انا معروف هنا وماودي يعرفون ان لي علاقه بالمؤسسه حقتك عشان مايشكون انها لي .
سلطان : ليش طيب ماتبيهم يعرفون لايكون المؤسسه سمعتها سيئه ؟
ابوتركي : ياخي ليش اسالتك كثيره هذي شغلة تجار انت ماتعرف عنها شي .
يخرج سلطان من البنك ويتجه الى المؤسسه ويطلب من المهندس اسلام اوراق المناقصه الجديده واثناء تصفحه الاوراق تقع عينه على ورقه مكتوبه باللغه الانجليزيه ذكر فيها مبلغ كبير فيذهب لصديقه حسين :
سلطان : بسرعه ترجم لي هالورقه ووش قصة المبلغ اللي فيها .
حسين : ام ام مممم………… هذي اتفاقيه مبدئيه لبيع مناقصه بناء نفق بمبلغ 200 مليون دولار .
سلطان : لو حسبناها بالريال يطلع الناتج مممممم 750 مليون ريال ..اهاااااااااااااا يعني باعو المناقصه بنص المبلغ اللي اخذوه من الوزاره ..ياسلاااااااام اشوه اني لحقت عليهم قبل مايودوني بداهيه .
يذهب سلطان الى البنك ويجد الشيخ ابوتركي في صالة الاسهم ويخبره بانه لايستطيع اعطائه المبلغ كون المؤسسه باسمه وهو من سيقوم بالاشراف على البناء .
يجن جنون الشيخ ابوتركي : انت صاحي والا مجنون كيف واحد سلتوح مثلك بيشرف على بناء نفق يكلف ملايين الدولارات ؟
سلطان : والله اني صاحي اكثر منك وانا عرفت مخططك الدنيء تبي تاخذ الفلوس وتحط رجلك اجل يالقزم هاااه .
ابوتركي : وش تقول انت وش احط رجلي ؟
سلطان : ياحراميه تبون تسرقون البلد بعز الظهر…انا عرفت انك بعت المناقصه على شركه ثانيه بنص المبلغ والباقي بتاكلونه عساكم بحريقه تحرق بطونكم وماهو بسلطان اللي تضحك عليه روح العب بعيد ياشاطر .
ابوتركي : خلصت كلامك ؟
سلطان بثقه : ايه خلصت .
وفجأه يخرج ابوتركي سلاح كلاشنكوف من جيبه ويطلق الرصاص على سلطان فيخر صريعا ثم يقتل كل من بالببنك ويسحب الفلوس ويهرب واثناء هروبه تخرج لمياء ابنته امامه وتخبره بأن سلطان تزوجها بالسر وهي حامل منه بتوأم ثم يخرج ابنه تركي ويخبره بأنه اصبح مدمن مخدرات بسبب اهماله بتربيته ويسرق الفلوس من ابوه فتخرج والدة تركي وتخبره بأنه ليس زوجها وانه شقيقها بالرضاعه و …لحظه لحظه يافوكس ستووووووب…..انت كذا بتقلب القصه فلم هندي على مسلسل خليجي في رمضان ….ارجع واكتب المشهد من جديد :
كلاكيت ثاني مره
اكشن
سلطان بثقه : ايه خلصت .
ابوتركي : يابهيم هذا شغل نظامي ومسموح فيه واسمه بيع بالباطن على شركه ثانيه وهذا عرض وطلب حنا حصلنا على المناقصه بمليار ونص ثم بعناها على الشركه الثانيه بنص المبلغ وبقية المبلغ من حقنا لان هذا بزنزس وشغلنا مافيه سرقه لكن المتخلفين اللي زيك يفكرونها سرقه .
سلطان : هاه..كيف يعني؟
ابوتركي : كيف يعني هذي يبيلها شرح طويل وانا ماني بفاضي لك روح اسحب المبلغ اخلص علي .
سلطان : طيب دام النفق يكلف 750 مليون بس ليه حسبوها الوزاره بمليار ونص وبأي حق تتقاسمون فلوس المواطنين المساكين .مبلغ زي هذا يوازي ميزانية دوله صغيره بصراحه شي يقهر وانا اخوك.
ابوتركي : ياخي انت غبي والامجنون ؟؟ اقولك روح اسحب المبلغ واترك عنك المواعظ اللي لاتودي ولاتجيب .
سلطان : اتاكد من كلامك اول بعدين اسحب الفلوس .
ابوتركي : ياخي انت تبي تذبحني !!
سلطان : طيب ليه تبي تسحب الفلوس كاش وليه تكلمني بالهمس .
ابوتركي : ياسلطان انا خايف انهم يعرفون ان المؤسسه لي وفتحتها باسمك وبكذا تروح علينا المناقصه ويضيع كل شي بما فيهم انت اسحب الفلوس ولك مني الف ريال هديه .
سلطان : طيب توقع لي على ورقه اني انا مجرد اسم بينكم ومالي دخل لو الوزاره درت انكم سارقين نص المبلغ وبعد تضمن لي انك ماتفصلني .
ابوتركي : معقوله افصل راس المال ..روح اسحب الفلوس الحين وبسوي لك اللي تبي .
يذهب سلطان ويسحب الفلوس ويعطيها للشيخ ابوتركي ثم يعود الى بيته ضايع وجهه بعد ان كان يعتقد بأنه اكتشفت مؤامره ويدخل منزله ويشاهد شقيقته منيره تبكي في صالة الجلوس :
سلطان : خير يامنيره وش فيك بعد ؟
منيره : خلاص انا برجع لعبدالله بأي طريقه…… ناره ارحم من نار الجلسه بالبيت .
سلطان : الحين انتي مو كنتي عايشه هنا قبل ماتتزوجين وكنتي مبسوطه وتطلبين وتتدلعين وتروحين وتجين ..ابي اعرف وش اللي تغير عقب زواجك.؟
منيره :: ياسلطان قبل ماااتزوج كنت بشبابي وكان عندي صديقات اطلع واتمشى واشوف الدنيا وماكنت شايله هم شي الحين انا مطلقه يعني عجوز بعين الناس حتى لو عمري صغير وصديقاتي يتهربون مني خايفين احسدهم على ازواجهم وقبل مااتزوج كان ابوي معيشني بنعيم لكن الحين ابوي الله يرحمه وفلوسه كلها صرفها على علاجه قبل مايموت كيف تبيني اعيش مبسوطه وانا احس اني عاله عليك .
سلطان : بالعكس انا ماشوفك عاله الا اشوفك منوره البيت ولو علي ماخليتك تتزوجين مره ثانيه لانك ملح البيت .
منيره تصرخ : ماحد يبي يتزوجني ماحد يبي يتزوجني …لازم اشتغل ياناس ارحموني .
سلطان : خلاص لك مني وعد اشوف لك وظيفه بس اصبري علي .
بعد مرور سنه استلم خلالها ابوتركي جزء كبير من مبلغ المناقصه بنفس الطريقه الاولى يأتي اتصال على جوال سلطان :
الرجل على الهاتف : الاخ سلطان ؟
سلطان : اي نعم من معي ؟
الرجل : معاك فهد لاحق من وزارة المواصلات .
سلطان : امر اخوي ؟
الرجل : في برقيه عاجله جت الوزاره اليوم من الاماره تطلب التحقيق في انهيار نفق شارع المسروقي ونبيك تحضر باسرع وقت للوزاره .
سلطان : والله مدري ياخوك حنا بعنا المناقصه على شركه ثانيه دق عليهم هم .
الرجل : بس انت المسئول الاول لان المناقصه باسمك والوزاره بتحاسبك انت ومن جهه ثانيه تقدر تقاضي الشركه اللي اشترت المناقصه منك .
سلطان : انت وش تقول ؟ انا وش دخلني ؟
الرجل : لازم تحضر للوزاره اليوم اخوي سلطان .
سلطان : طيب عطني فرصه ساعه واكون عندك .
الرجل : الاماره طلبت سرعة الرد فارجوك خلال ساعه تكون عندي بالمكتب.
يتجه سلطان الى مكتب ابوتركي ويخبره بما حصل :
ابوتركي : طيب وش المطلوب مني ؟
سلطان : وشو اللي وش المطلوب مني يقولك النفق انهار يعني كنك يافايز منت فايز.
ابوتركي : المؤسسه باسمك وانت اللي وقعت الاتفاقيه مع الشركه الثانيه وانت الي استلمت شيك الوزاره وصرفته يعني انا مالي دخل .
سلطان : ابوتركي وش تقول انت ؟؟ انا سويت اللي انت طلبته مني ووقعت على اوراق مدري وش فيها لثقتي فيك .
ابوتركي : انا ماسويت شي لاترمي بلاك علي .
سلطان : لاتنسى انك وقعت على ورقه تثبت انك انت اللي مسوي كل شي وانا مجرد اسم بس واذا رحت الوزاره بقدمها وبتروح بداهيه
ابوتركي : ههههههههههه ياخي احسن مافيك انك بهيم . انا ماوقعت على اوراق والتوقيع اللي على الورقه ماهوب توقيعي يعني لاتتعب نفسك ماحد بيصدقك.
سلطان بحسره : ودي اعرف شي واحد بس..انت ليش اخترتني انا بالذات من بين كل الموظفين ؟!
ابوتركي : اخترتك لانك الرجل المناسب في المكان المناسب
اخترتك لانك
طيب
هاهاهاهاهاه
سلطان : حرام عليك يابوتركي امي وخواتي مالهم احد غيري .
ابوتركي : ياخي لاتحملني ذنبك انا ماقلت لك روح اتفق مع الشركات والعب بفلوس البلد, وعلى فكره ترى الشركه اللي اتفقت معهم باعت المناقصه على شركه ثانيه والشركه الثانيه باعتها على شركه ثالثه واخر مبلغ وصلت له قيمة بيع المناقصه كان 80 مليون ريال فقط يعني الوزاره لو درت عن كل هذا انت بتروح في ستين داهيه .
وازيدك من الشعر بيت ترى آخر شركه استلمت المشروع مؤسسه عاديه حدها تبني ملحق فوق سطح وصاحبها عربي واكيد الحين هرب برى البلد ومارح يكون احد بالواجهه غيرك .
سلطان يبكي : انا وش سويت لك عشان تسوي فيني كذا .
ابوتركي : ياخي هذا بزنزس بززززنس وش بلاك انت .
يخرج سلطان من ابوتركي وهو يبكي فيتصل على الموظف الذي حادثه من الوزاره ويخبره بما حصل فيبلغه بأنه المسئول الاول والاخير عن المناقصه طالما الطرف الاخر غير موجود وهو من سيحاسب ويسجن بسبب اخلاله ببنود الاتفاقيه مع الوزاره .
وبعد عدة تحقيقات مع سلطان يدان بتهمة اهدار المال العام والاخلال ببنود المناقصه ودفع رشاوي ويحكم عليه بالسجن ثلاثين عاما ولايطلق سراحه قبل ان يسدد كامل المبلغ الذي حصل عليه من الوزاره ويقدر ب 700 مليون ريال .
– النهايه –
ملاحظه1 : القصه وهميه وشخصياتها وهميه وبإمكاني وضع نهايه سعيده لها ولكن لا أريد مخالفة الواقع المذكور بين السطور !!!
ملاحظه 2 : تم التطرق للمطلقات بصوره مختصره بناء على اقتراح العضوه
feefa
ردا على قصتي السابقه
مع خالص الشكر لها
واعتذر لعدم الرد على الاعضاء في القصه السابقه لاسباب قاهره واشكركم فردا فردا على اطرائكم الرائع والمشجع للاستمرار .
ملاحظه 3: باذن الله سأشطح مؤقتا بقصتي القادمه بعيدا عن الحزن والكئابه حتى لااسمح لهما بالتمكن من تفكيري
