رسائل المجموعة

قصه : حقي !

بسم الله الرحمن الرحيم
 
((   حقي   ))

قصة وسيناريو وحوار :

Fox

تصميم صورة المقدمه مع خالص الشكر :

 ابوصقر

/
كان خالد جالساً مع صديقه ناصر في منزل صديقهم ابوسلمى

وفي اثناء ذلك سمعوا بالاخبار عن اعلان بنك امريكي افلاسه بسبب الازمه العالميه

وابوسلمى هو كبير المجلس وخالد يأخذ برأيه دائما لكبر سنه .

بعد سماع خبر افلاس البنك ..بدأ الحوار

خالد: ياخي ايش قصة الازمه هذي لسه ماخلصنا منها؟!

ابوسلمى : وين تخلص انت توك بالحمد. والازمه هذي بتمر علي العالم كله بما فيهم حنا تستفرد عضلاتها على الفاضي زيها زي انفلونزا الطيور والخنازير واوباما .

خالد: هههههه تنكت انت؟؟

ابوسلمى : لا ياخوي اتكلم من جد .

خالد: انت صاحي والا ايش ؟؟ كيف تمر علينا  حنا مالنا دخل فيهم .

ابوسلمى : كيف مالك دخل فيهم وانت تتبعهم؟؟

خالد: كيف اتبعهم ياعمي وش تقول انت؟؟

ابوسلمى  :  لما تعلن الشركات والبنوك الامريكيه افلاسها…الدولار بيتأثر ولما الدولار يتأثر ريالك بيتأثر وبتخسر الدوله والشركات والبنوك هنا مثل ماخسرت هذيك البنوك الاجنبيه .

خالد : كيف احنا مرتبطين بالدولار..يعني الحكومه ماتقدر تصرف ريالات الا لما تاخذ اذن من الدولار
والا الريال مبطن بالدولار مثلا ولما تكب عليه موية زهر ينقلب ريال!!! ياعمي تكلم زي الناس والا اسكت.

ابوسلمى  : اقولك خذها مني بتسمع قريب عن البنوك السعوديه اخبار ماهي كويسه

ولو عندك حساب بالبنك ممكن بكره تصبح الصبح ماتلاقي فيه ولاهلله

ولما تسال البنك بيقولك معليش احنا وانتا خسرنا بسبب الازمه العالميه

والموت مع الجماعه رحمه واقلب وجهك .

فيقوم خالد مسرعا من المجلس وهم ينادونه ولكنه لايعبرهم ويبدأ ابو سلمى بالضحك عليه

فيقول ناصر لابوسلمى : ياخي جننت الرجال وانت ماعندك سالفه .

ابوسلمى : خله انا تعمدت اكبر الموضوع وابهره عشان يتأدب ويطلع الالوف اللي مدكنها بالبنك …ماعمره باشر علينا ولا بريال .

يدخل خالد بيته وهو في قمة عصبيته فيشاهد زوجته (ساميه) تشاهد مسلسل تركي  :

خالد: كم مره قلت لك مهند هذا ماابغى اشوف وجهه قفلي التلفزيون والا كسرته على راسك

ساميه : وش بلاك انت انهبلت مهند خلص من زمان هذا مسلسل ميرنا وخليل… خليني اتابع المسلسل وعشاك بيجيك .

خالد: عشى مين ياشيخه انا في ايش وانتي في ايش سكري التلفزيون احسن لك.

ساميه : والله مااسكره الا اذا خلص المسلسل واعلى مافخيلك اركبه .

فيقوم خالد من مكانه ويمسك المزهريه لكسر التلفزيون الا انه يقف امامه ويقول :

يعني خسارة فلوس واثاث. ….بحريقه انتي والسحليه حقك خليه ينفعك .

في صباح اليوم الثاني يأخذ خالد شنطه ثم يهم مسرعا  للذهاب للبنك  وعند خروجه الى الصاله يجد زوجته كما هي لم تتحرك منذ البارحه  :

خالد: بيجيك شلل……..من امس وانتي جالسه قدام التلفزيون,وخلي وجه الكنافه  يجي يشيلك ويعالجك على حسابه .

ساميه : مهند احسن منك يجيب هدايا لزوجته ويدلعها مهوب زيك جلده .

خالد بهمس : الله يخرب بيتك ياناصر يوم نصحتني بالزواج……واللي قاهرني انك الى الحين ماتزوجت .

 ويمر خالد على اكثر من بنك فيجدهم محشورين بالزبائن .

فيضطر للدخول وكان رقمه بعيد جدا ثم يتحدث مع نفسه :

كل ذولي خايفين علي فلوسهم وانا افكر اني سبقت العالم ..هذا وجهي لو لحقت على الفلوس في الزحمه هذي
لكن والله لو وصل دوري وقالي لي الموظف فلسنا بكسر البنك على روسهم …..والا ليش اكسره؟؟؟…. انا اخذ الاثاث وابيعه بالحراج عشان اتعوض .

يجلس خالد منتظراً دوره ويسمع شاب بجواره يتحدث لصديقه :

الشاب لصديقه: يقولون انه حيضرب فوق .

خالد يتدخل:ايوه ايوه حيضرب وحيضربنا معاه.

الشاب لخالد : انت خبير اسهم ؟

خالد : لا انا خبير ازمه.

الشاب : ازمة ايش.

خالد :  انت ماسمعت بالازمه الماليه اللي حصلت بالعالم؟؟

الشاب: الا سمعت.

خالد : واكيد جاي تسحب فلوسك من هنا.

الشاب: لا طبعا جاي اكتتب في اسهم شركة الوطن .

خالد : ياعمي البنوك بتفلس بسبب الازمه وانتا تقول وطن وشعب اغلبه ساكن بالايجار وقروض وديون وحاله رديه.

الشاب : اسكت ياعمي بتودينا بداهيه انا ماقلت هالكلام .

خالد : انا اقرا بين الحروف وانت تبى تسب الحكومه بطريقه غير مباشره  وكلامك وصل للمرور وهم جايين ياخذونك بتهمة كلام غير نظامي .

الشاب لصاحبه: هذا مجنون والا ايش؟؟

خالد : والله انتو المجانين وبكره تقولون خالد قال .

ثم يذهب خالد الى كرسي آخر ويقول الله يخرب بيت الامريكان خرابين بيوت حتى وهم بعيد …. فينتبه لوافد اجنبي بجانبه ينظر اليه مبتسماً …… فيحادثه :

  خالد : انت امريكي؟

الوافد : انا بنقلاديش .

خالد :  طيب تعرف جمع بطاطس؟؟.

الوافد : مافي مألوم .

خالد : جمعها بطاطيس ياخي شغل مخك.

الوافد : يبتسم ويهز راسه  .

 خالد : والله ماحد لاقيها الا انتو يالبنقال شغالين نهب وسرقات ونصب وهات يادب في الفلوس

وبعدين تروح تبني لك قريه في ديرتك وحنا ناكل تبن هنا .

على قولة المثل الفوكسي

قالو للبنقالي اسرق قال مايبغى حرام

الوافد : (لم يفهم كلام خالد فعلق مبتسماً وهو يهز راسه): سعودي واجد كويس .

خالد : ايه كويس طبعا خيرنا لغيرنا مع الاسف

 صدق  الشاعر فوكس يوم قال :

كل مالقيت باب جيت افتحه لقيت الباب مصكوك

مدري رداة الحظ والا الباب خربان .

الوافد : اووووه انتا رقم واجد بعيد ممكن دوام بنك فينيش انتا دور مايجي ….جيب عشره ريال انا يعطي رقم قريب .

خالد : يخخخخرب بيتكم حتى ارقام الانتظار ماسلمت منكم… ومسوي فيها ماتعرف عربي…هات الرقم طيب .

الوافد : جيب فلوس اول

خالد يخفض صوته : انا شيل فلوس من شباك يعطي انتا على طول مافي خوف سعودي واجد كويس.

الوافد : اوكي بابا بس بعدين لازم  جيب فلوس .. انا مشكل كفيل .

خالد يمسك بيد الوافد بقوه وياخذ الرقم وهو يقول : يارجال هات لا افقع وجهك انت وكفيلك..هذا اذا كان كفيلك يدري عنك اصلا .

يأخذ خالد الرقم ويسحب على الوافد  وبعد فتره من الانتظار يصل دوره واثناء وقوفه في الشباك

يبدا الحوار.

خالد للموظف : هات كل الفلوس اللي بحسابي لاتخلي ولاهلله .

الموظف : تبيها كلها كلها .

خالد : ايه كلها ياعمي ماتفهم عربي  .

الموظف : تبيها ريالات عشان تعبي الشنطه والا خمسميات.

خالد : خلها ريالات عشان ماتلفت النظر ,انت عارف الريال عند بعض الهمج مايسوى….. رغم انه راس المال

الموظف ضاحكاً : والله انك صادق

يعطيه رزم الريالات ويضعها  خالد في الشنطه وينظر الى يمينه فيشاهد رجل في الشباك الاخر ينظر اليه

  خالد للرجل : خليك في حالك لو سمحت .

يجلس خالد بالبنك ويتصل بصديقه ناصر ويطلب منه الحضور للبنك لتخوفه من الخروج بالمبلغ وتعرضه للسرقه بالاكراه .

عندما وصل ناصر

ناصر : يلا اطلع انا بمواقف البنك .

خالد : جاي تاخذني من المدرسه انت ووجهك….تعال قدام باب البنك عشان اركب على طول لايشوفني احد شايل الشنطه.

يركب خالد السياره :

ناصر : ارتحت الحين يوم سحبت فلوسك؟

خالد : وين ارتاح وهي بيدي ابغى اخبيها بمحل آمن .

ناصر : مافي احسن من بيتك.

خالد : صاحي انت .تبيني اوديها للمجنونه ساميه والله تشم ريحة الفلوس من بعد خمسين كيلو…. تصدق شكلي بدفنها بالبحر .

ناصر : ياكلها السمك.

خالد : لاياشيخ .

ناصر : اتكلم جد انت ماسمعت بهوامير الاسهم ؟

خالد : الا سمعت بس وش دخلهم بالبحر .

ناصر : الهامور وين يعيش؟؟؟

خالد : في البحر طبعا .

ناصر : هوامير الاسهم قدرو يسرقون فلوس الناس المساكين وهي جالسه في بيتها

مايقدرون على فلوسك وهي في البحر المفتوح على مصراعيه ؟؟!

خالد : لالالا مو لهذي الدرجه ياعمي يعني مو معقوله يخلون ملايين المغفلين بالاسهم ويجون لي عشان ثلاث الاف ريال .

ناصر (باستغراب شديد ): كممممممممممم ؟كمممم ؟؟

خالد : يووه فضحت نفسي…… قول ماشاء الله تكفى .

ناصر : الله يخرب بيت عدوك وجايبني من بيتي ووقف قدام باب البنك عشان ماانسرق ومدري وين اودي فلوسي وبالاخير طلعت ثلاث الاف .

خالد : هالمبلغ اللي موب عاجبك راتب معلمه سعوديه في مدرسه اهليه لاربع شهور.ركز معي اربععععع شهور ماهي بهينه .

ناصر : وين راحت فلوسك اللي جمعتها ووين تودي فلوسك اللي ماتصرف منها ولا هلله يابخيل

 خالد : ياخي انت ماتدري……. انا انطردت من وظيفتي قبل سنه وكنت اعيش على الفلوس اللي جمعتها قبل ومابقى عندي الا هذي وماسك نفسي واعيش بالقطاره حتى تموين البيت صرت اسرقه من بيت ابوي وهو مايدري

ناصر : كيف انطردت وشلون تطلع كل يوم تروح الدوام

خالد : الحقير مديري بالعمل رفض يجدد عقدي قال ايش قال الوظيفه ماتناسبك واكتشفت بعدين انه جايب ولد اخته وعينه مكاني براتب اعلى من راتبي بثلاث الاف ريال ورحت قلبت عاليها واطيها عليه وكل مااقدم في شركه يطلبون مني اسم الشركه اللي اشتغلت فيها عشان الخبره واذا اتصلو على المدير يسالونه عني يقولهم انتبهو توظفونه هذا مجرم هجم علي بالمكتب وحرق حواجبي بالولاعه .

 والحكومه طبعا تعرف الوظايف بالكوم لكن مو لي ولا لك ..يعطونها اللي موب بحاجتها….على قولة عادل امام 🙁 ناس عندهم لحمه بيعزمو ناس عندهم لحمه عشان ياكلو لحمه؟؟!!!!) . 

المهم رحت وقدمت  على الخدمه المدنيه وقالو راجعنا كل عشر سنوات  وهذاني انتظر كملت سنه وباقي تسع سنوات.

ناصر : ياخي خش جامعه بفلوس كمل دراستك واذا تخرجت بتلاقي وظيفه زي الناس .

خالد : اقول لايكثر بس مهندسين ودكاتره جالسين ببيوتهم ماحد وظفهم تبيني انا الاقي

المهم ماعلينا روح بيت الوالد لقيت طريقه اخبي فيها الفلوس

يصل خالد منزل والده ويجده في الحديقه يحتسي القهوه , وبعد السلام وقبلة الرأس

خالد : ابوي انا صار لي كيت وكيت وكيت….

ابوه: وش كيته انت يالخبل وش تقول؟

خالد : لا بس ابي اشوفك مركز معي والا لا…المهم باختصار انا  انطردت من عملي

ابوه: ادري .

خالد : بلل وش دراك؟!!!

ابوه: اشوفك كل يوم جالس على البحر بوقت الدوام

خالد :  حرام عليك يابوخالد وساكت ماتقولي عشان اغير المكان!!! طيب ليه ماقلت لي؟؟؟

ابوه: ماتدخلت عشان ابيك تعتمد على نفسك انت منت صغير ولو تحب السما ماساعدتك بريال الا اذا شفتك تشحذ .

خالد : انا مابيك تساعدني انا ابيك ترضى عني وابي اعطيك هالمبلغ لك انت وامي عشان الله يوفقني والقى وظيفه .

ابوه :  راضي عنك بدون فلوس .

خالد : تكفى خذها اشتر لامي كنب امس عيد ميلادها وبعتبر المبلغ دين عليك واذا قربت اشحذ تدبر نفسك وتعطيني اياه .

ابوه:  خلاص لكن مو تجي كل يوم  تقول عطني خمسه وعشره ريال  ماني بفاضي لك

خالد :لا مارح اخذ منها الا للضروره .

وبعد مرور  تسع سنوات عاش فيها خالد على المره والمره والمره والمره والمره والسلفيات من اصحابه وباع كل اثاث منزله ماعدا الكرسي الذي تجلس عليه ساميه والتلفزيون والدش والثلاث الاف اللي تركها لدى والده انتهت ….

راجع الخدمه المدنيه وقابل المدير :

المدير: ابشرك لقينا لك وظيفه  بتدخلك التاريخ من اوسع ابوابه…لو وافقت عليها بتكون  اول عامل نظافه سعودي وبتحصل على اعلى راتب لعامل نظافه بالعالم وهو مبلغ 1200 ريال وبنصرف لك بدل ريحه 10 ريال  وبدل ذباب 15 ريال وبدل شمس 10 ريال  وبدل احراج 50 ريال وهذا البدل يصرف لك اول ثلاثة اشهر الين يتعود المواطنين عليك وتكتب عنك الجرايد وتصورك المحطات الفضائيه والعالميه.. بعدها بنوقفها عنك .

خالد بحسره : زبال يعني؟؟!!

المدير: لألأ…. عامل نظافه….. زبال هذي تقولها في بيتكم .

خالد : موافق بس بشرط !!

المدير: طرار ومتشرط بعد….تفضل قول…

خالد : تعطيني عشره ريال ارجع فيها البيت وبكره بكون عندك باذن الله .

المدير: بعطيك عشره وبخصمها من اول راتب !! .

يأخذ خالد العشره ريال ويتجه الى اقرب مسجد ويبدا رحلته في الشحاذه

  – النهايه –

استفسارات كثيره تحوم حول سبب اتجاه خالد للشحاذه ….سنعرف اجابتها في قصه جديده باذن الله

انتظروني اذا ودكم

ملاحظه 1 :  الشخصيات بالقصه جميعها وهميه <<احلف بقوه

ملاحظه 2 : احتار كثيرا عند اختيار اسماء للشخصيات.. فمن لديهم الرغبه في ذكر اسمائهم بالقصص القادمه يرجى مراسلتي على الايميل فقط

Fox

مقالات ذات صلة

‫30 تعليقات

  1. ما شاء الله عليك ……. الله يجزاك ألف خير طريقة تجسيدك للواقع في هذه القصة كانت خيال :D………ننتظر الجزء القادم مشكور

  2. بصراحه قصة مشوقه ورائعه جدا :$ احلى مافيها ساميه والكرسي تبعها فيها من الواقع فعلا

  3. هذا الواااقع الي البعض يحااااول انه يخفيه او يتغاااضى عنه في الاعلام وفي كل مكاان الووووضع مزري بجميع المقايس لا وضاايف للخريجين ولا جامعات للطلبه المشكله بعد كل هذا نسمع ان السعوووديه تتبرع للبنان وامريكا ووابناء الو طن *_^ يعطيك العااافيه

  4. الله يعطيك العافيه ……. بصراحه قصه حلوه اعجبتني والله يوفق….. ياريت تكثر لنا من القصص القصيره والحلوه

  5. ما شاء الله تبارك الرحمن القصه روووعه وااصل ابدااعك و إلى الامام دائما و آنه وايد عجبتني القصه وو فعلا كانت ممتعه و تناقش الواقع حتى لو كانت خيال . و نتريا الجزء القادم على احر من الجمر بقنجوف شنو صار بخالد ؟ تقبل تحياتي : دانهـ البحرين

  6. اولاً : اشكر لك اهتمامك وتطرقك لمثل هذه الموظيع ربما نجدها متنفس لنا حتى وانا لم تجد صداها . ثانياً : من المحزن ان نلوم وطن تملاه الخيرات ولكن للاسف مثل ماقلت ( خيرنا لغيرنا ) رابعاً : ارجو لك التوفيق والسـداد

  7. اشكرك خي علي هذه القصه الجميله ولكن لي تقول ان الشخصيات وهميه انا عن نفسي متصور اني خالد في هذه القصه:$

  8. قصه جميله جدا يعطيك العافيه أعتقد إن خالد فيالجزء الثاني بيموت من الجزء2 بيموت من حرارة الشمس وهو يطر 🙁

  9. 😀 قصة حلوة وممتعة الله يعطيك العافية فعلا تتكلم عن الواقع

  10. ابداع مابعده ابداع……تسلم ايد الي مبدعها لي رجاء ….انك تنزل كل اسبوع قصه لا تطول علينا بقصصك الحلوة.

  11. كم من خالدٍ في بلادنا ..:(:(:( اعاننا الله وإياهم …:( مشكور اخوي عالقصة صــــــــــــــراحة روعه .. نننتظر جديدك …

  12. اخواني واخواتي الاعزاء newday الحنونه ماجد سلمان العنزي هايدي انا ما غيري دانه البحرين المـالكي عبدالله العليوة سيد بشير الورده الجمل الحكيم m_uae N حضوركم وردكم على القصه شرف لي وتشجيع كبير للاستمرار اعدكم بكتابة قصه كل اسبوع باذن الله حتى ينضب عقلي . تقبلوا تحياتي

  13. قمة الروعه .. هو ما قراته هنا .. قصه الليمه تجسد الواقع الاليم الذي يعيشه الشباب السعودي سواء ذكور او اناث … اعجبتني بساطة الالفاظ ..ايضا الكلمات العاميه التي تجعل القصه اقرب للقراء واكثر محاكاه لهم … اخي … واصل عطائك … فأمثالك يستحقون المتابعه لك مني اكليل من الورد دمت بحفظ الرحمن …

  14. الصراحه قصة جميله بجمال صاحبها لكن ننتظر منك ان توجد بعض من المواقف الساخرة واتمنى ان تواصل على هذا المنوال اللي في الحقيقة يسعدني شخصيا واكيد ناس غيري وان تكون المواضيع اجتماعية ولك من الحب والتقدير

  15. السلام عليكم اخوي فوكس لن اضيف على ما سبقوني اياه اخواني من اطراءاتهم لك كلمه غير الف شكر لك وعلى التعب الاكثر من رائع قصه حلاوتها بساطتها وروحها المرحه ويغلب عليها محاكة الواقع الف شكر مره اخرى لك عزيزي

  16. مشكور اخوي علي القصه واجد روعه لكن علينا ما ننظر علي الشخص من خلا ل المظهر فقط المظاهر خداعه 8) ونحن بانتظار بقيه القصه 🙂

  17. والله يوم قلت أول عامل نظافة تذكرت اعلان بالجريده يبغون لجامعات عاملين وعاملات نظافة ويشترطون انهم سعوديين الجنسية 🙁 يستغلون الضعوف حسبي الله عليهم والبدلات اللي قلت فيه للمعلمات يعطونها زود فلوس ( بدل اهانه ) يعني ترمي كرامتها وتدخل المدرسه 🙁 يالله لك الحمد بس والله فوقهم يعطيك العافية فوكس وننتظر الجزء الثاني

  18. قــصة تلامس الواقع من زاوية واضحة …. يعطيك الف عافية .. وننتظر مزيدك ..

  19. شكر وتقدير علا المجهود الذي امتعتنا فيه ونحت نكن لك احترامنا وتقديرنا مع خالص الشكر

  20. حياكم الله اخواني واخواتي ليال غيوم يابسه وسام الشامسي البسيط خذاني الشوق مراحب فاطمه حلا الروح ابوزايد المعتد اعجز عن شكركم فقد زرعتو في داخلي حب الاستمرار واتمنى ان اكون عند حسن ظنكم والجزء الثاني من القصه جاهز وسيعرض قريبا باذن الله

  21. مشكور الله يعطيك العافيه قصه رائعه جدا جدا جدا 😀 بس انك حطمتني لمن قلت دكاتره ومهندسين جالسين في البيت مو لاقين وظايف

  22. صحيح ابدعت و جسدت الواقــع بالفعل قصة جميلة جداً/ و ليست فقط في السعودية شكراً لكـ على الإبداع

  23. أصراحه حلوه مشكور والله يعطيك العافيه :oوأصراخع حلوه وايد ومره ثانيه مشكور:D:D:D

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى