رسائل المجموعة

فطورنا مافيه طحينيه !

سلخير جميعكم من اولكم لتاليكم .. وصباحكم بردقانه تهبّل

بداية أعتذر من بعض الإخوه والأخوات بشأن رسايلهم الوارده على بريدي والمتعلقّه بالتعليق على مواضيعي المطروحه  وتأخُري بالرد عليها لانشغالي الدائم وضيق الوقت وارتباطي ببعض الشغلات المتفركشه .. الله يعيننا على هالدنيا وبلاها .. وراح بإذن الله أرد على الجميع بس عطوني شوي نفس وكاسين مويه  

موضوعنا اليوم يمسّ خبر تم عرضه في الشارع السعودي قبل أيام .. نترككم مع هالموضوع البسيط وبلاش نطوّلها وهي قصيره << لاتدفّ طيّب

= = =

فطورنا كالعاده مايخلو من حبيبة القلب ( طحينيه ) مع كم صحـــــن فول وعدس وشويّة جُبُن سايل << مانكثّر جُبُن لأن الجُبُن غالي .. والإقتصاد واجب .. وسوريا أرخص << الاخيره مالها دخل وما أتحمّل تابِعاتها ! 

ولكن وبما أننا شعب عربي يتأثر على طول بأي خبر .. ومايمدي الخَبَر يمدّ رجله إلا ونصف الشعب متراسلين بالرسايل يحذّرون أو ينصحون أو رُبما يهنأون .. والخبر على قَدرَه ووزنه !

قبل أيام وصلتني على الجوال أكثر من رسالة تحذير من طحينيه مُتسرطنه والسرطان يدبي في جنوبها وجوانبها .. ويقولون ( ترى اللي بياكل منها فالله يرحمه ويسكنه الجنّه .. ولاينسَ يكتب وصيّته ) .

ومضمون الرسايل أن خمس أو ست شركات مُصدّره للطحينيه الكامشه صدر بحقّها عِقاب لأنها تبي توديّ البشر في داهيه .. وأن وزارة التجاره ألزمتهم بإتلاف ماعندهم من الطحينيه مع تغريم مبلغ مالي والتشهير بهم و ( اللي مايقدر يشتري طحينيه اليوم ومامعه دراهم .. خبره اليوم ببلاش ) !

قبل فتره كتبت أيضاً موضوع عن رز أبو كاس .. بعد ماوصلتني أكثر من رساله كالعاده على الجوّال تُحذّر من شرائه لأنه راعي رسمي في برنامج تلفزيوني ( وقاطعوه ياجماعه ) و( لاتشترون رزّه ) و ( عليكم بالإندومي تراه أبرك واحسن واوفر ) .. وانا صراحه واعترف بهالشي ( طرت في العجّه ) وارسلت الرساله لكم راعي بقّاله عشان مايقصّر معي ويحاول أنه يأخر سداد دراهمي له بعد فتره ، ولكن تبيّن لي فيما بعد أن الرساله خاطئه من ساسها إلا حدّ راسها ..

ويوم جتني هالمرّه ( رسالة الطحينيه ) .. قلت : ياولد أركد ولا تفكّر ترسلها لأحد .. ثم تبلش وتحطّ شي في ذمّتك .. لكن صار الأمر صحيح .. وان الدعوه متسرطنه وجايبتن العيد فالاوادم !

انا اقول .. ياوزارة التجاره وياغرفتنا التجاريه من زمان ماشفناكم ( تكفشون أحد ناوي بالبشر ) .. وهذا الشي مايُنقص من قدركم .. لكن نحتاج إلى جهود أكبر في مقاومة كُل مايُنتَج لنا ويُتكدّس على الأرفُف في الأسواق والمحلات التجاريه !

أذكر قبل فتره كنت في بقّالة في أقصى ديرتنا .. اكتشفت أن ثلاث أرباع البقّاله [ بضاعه منتهيه صلاحيتها ] .. حتى أن عنده ( شطّه حارّه أم ثلاثة فلافل حمرا ) ويوم شفتها توقعتها ( كتشب ) من سوادن قالبن لونها !

البعض يستغرب تشهيرهم بالشركات .. وانا أقول ( هذا هو الأصل ) .. لأن مثل هالشركات راح تودّي عالم في عذاب طول عمرهم .. على حساب ( كم ريال ) في جيب صاحب الشركة الفلته !

وبودّي أن وزارة التجاره أيضاً تلتفت بتوصيه منها إلى البلديات للقيام بمسؤوليتهم في تنقية المحلات التجاريه من البضائع المُنتهية الصلاحيه والمتفرشخه عندهم سنين طويله وبانتظار زبون يضفّها ويحشرها في بطنه وبطن عياله !

سلام ياطحينيه

:: مُدمن شاهي ::

مقالات ذات صلة

‫7 تعليقات

  1. الطحينيه بجلالة قدر ها صارة مصرطنه تصدق بالله انا اسمع طراطيش كلام و اشاعات من هونا و من هونييك ان الدخان بعد طلع مصرطن بس أغلب الظن انها اشاعات مغرضه من شركة باعشن للحصيرات و الفرشات المتنقله

  2. مانقدر نقول غير مبدع يامدمن ، لاتحرمنا جديدك ياغالي ، والله يكفينا شر الطحينيه

  3. ماشالله عليك ياكاتبنا المبدع مدمن شاهي قدر توصل المعلومه والنصح بشكل مضحك وفريد وساخر أتمنى انك تستمر على هالطريق واللي يعشقون كتاباتك كثير ويحبونها ( مابغى اقول تراي احبها عشان مايجي احد يصفقني ) اكرر شكري لك

  4. ما أقول إلا الله يحفظك يامدمن وترى الاهل يسلمون عليك ويقولون زدنا من هالمواضيع الساخره اللي فقدناها في الاونه الاخيره — شكراً لك

  5. السلام عليكم ، أخوي مدمن شاهي ، جيت أمشي مليون أبغى أقرا مقالك ، لأن كل مقالاتك روعه وكل واحد أحلى من الثانيه ، شكرا لك ، محبك : محمد عبدالله الحربي

  6. اخوي مدمن : الصراحه الطحينيه مصيبه كبرى خاصه انها مستهلكه في كل منزل وبيت ، الله يكفينا شرها وان شالله نفتك منها مثل ماتصرفنا في غيرها من المعلبات المضره ، ربي يوفقك على موضوعك الروعه واللي اسعد دائماً بمتابعة ماتكتب 🙂

  7. الله يسلامك على هذا الموضوع وقناة ام بى سى جابت الخبر والجرايد استغلات فرصة الاعلانات من هذه الشركات بان الخبر غير صحيح وقبضة قيمة الصفحه كامله ومايهمها اشاء الله يصيب السرطان جريدهم وضع اخوك بين الاخبار والارفف ممتلية بالمنتجات وغرفة التجاره والبلاديات نايمين في العسل لانهم يفطرون عدس (على المتضرر الجواء الى اقرب شركة تامين صحى للشترك والكل يستفيد ويقبض وانت المسكين تدفغ والله يستر

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى