بسم الله الرحمن الرحيم
أعضاء قروب أبو نواف مسيكم بالخير
ويا هلا والله كل واحد باسمه :
الكل منا شاف نفق السويدي الأسبوع اللي راح وبعض المنتديات
راحت تنشر صور الحادث وكيف آن بعض الشباب قام بواجب
إنقاذ هالبنات المسيكينات وربعنا نايمين بالعسل الله يخلف والحقيقة
انه لو بيدي شئ لأني ما عندي مفتاح التبن كان وضفت اللي
أنقذهن بدال هالكروش اللي تدربي راسه ومفطحات الليل والنهار.
ماعلينا وش نقول آلا الله يصلح الحال والحقيقة انه أعجبني مقال للأخ
محمد الرطيان بعنوان ( البلد … في نفق السويدي ) يقول فيه :
مجموعه من طالبات الجامعة ينقلهن باص مدرسي , يدخل بهن فجأة
في نفق ممتلئ بمياه الامطار .. كاد الحادث .. لولا لطف الله –
أن يؤدي إلى غرق جميع الطالبات . ( فال الله ولا فالك يارطيان )
حسنا : من المسؤول عن الحادث ؟
هل هي وزارة التربية والتعليم ؟
هل هي أمانة الرياض ؟
هل هي إدارة الصرف الصحي ؟
هل هم المقاولون الذين ( يلهفون ) ملايين الريالات ؟
هل هي وزارة المواصلات والنقل ؟
هل هي الإرشاد الجوي ؟
هل هو الدفاع المدني ؟
على العموم لا تحلم بإجابات كبيره !
سيأتي من يجمع أسئلتك – غير الموقرة – ويرميها في سلة المهملات
ويقول لك الاجابه : المسؤول هو ( السائق ) .. وأولياء أمور الطالبات
الذين لم يعلموا بناتهم السباحة !
وسيضيف في وجهك : انثبر ولا عاد تسال اسأله بايخه !
جريدة الوطن العدد ( 1618 ) .
عاد وأنا أقرى جريدة الوطن أمس العدد (1628)
لقيت العالم كله مختبصه حتى رئيس الهلال الأحمر د- عبدا لرحمن
السويلم مصرح ويقول مسؤولية محاصرة مياه الامطار الأسبوع الماضي
لطالبات في نفق السويدي لا تقع على فرق الهلال الأحمر وإنما تقع على
جهات أخرى تناط بهم مهام الإنقاذ . ( شكله مذرق أو حاس بيومه )
تبون الصراحه الطاسه ضايعه وكل مطره تجي تبين إن هالمسؤلين
يحبون الكريسي أحب من عيالهم والله مايلامون كل يوم يقولون الله لا يجيب
ذيك الساعة اللي مثل ساعة الرشيييييييييييييييييييييد .
ولا يهون الفريق القحطاني مدير الأمن العام يوم طلع علينا أمس ويقول
ترانا مالنا دخل من اللي تسرق سيارته لأنه هو المسؤول ينزل ويخلي
سيارته شغالة ( وإلا سواق ).. وبعدين تحطون الملامة علينا حسكم عينكم
تتصلون علينا ندوره لكم دورها أنت وفكنا من شرك ساده ياخوي ماحد
قالك انزل وخلها مفتوحة ( طيب اخوي ممكن تقولنا واللي منطوله سيارته
بوصط القراش الله يحفظك وشلون … يبلغ وإلا لا ) .
أعجبني تعليق صالح الشيحي يوم يقول ياخذ سيارته لغرفة النوم !
والله اسلم لك بس المشكلة أخاف بعد تنطل عينك عينك !!!
خلاصة الموضوع : شوري عليكم كل واحد ياخذ خواته ويعلمهن المطافش
الله يستر لا يموتن بأحد هالانفاق وإلا لا يدرسن لاجاء المطر يربضن بالبيت
عاد تبي تاخذ الدكتوراه الله اكبر , وصيه مني اشرو اكبر سلسله من ساكو
واربط سيارك لابغيت تنام تراي ما اضمنلك تلقاها إلا كان أمك داعية لك .
وفي الأخير تقبلو تحياتي .
