سفر و سياحة

..:: عين تشربك شوف وعين تظماك .. لا ذبحني ظماك ولا رويتك ::.. فينيسيا ج2

::
::

يسعد لي هالمساااااااااااا
يا هلا والله .. ومليووووووووون غلا
اول شي .. كيفك ؟ … واخباااااااااااارك … اتمنى انك بألف عااااااااافيه
ثاني شي .. شكر كبير كبير كبير .. جدا … لكل اللي تابعوا الحلقه الأولى من التقرير … صراحه كلمات ترد الروووووح .. وهي الدافع اني اكتب الجزء الثاني .. وباقي تفاصيل كل الرحله …
نترك الرسميه شوي ..
مدري وش احس به .. كل ما ابي اكتب كلام رسمي .. اروح اجيب شماغي وكيذا .. إلى الان ما عرفت ايش العلاقه بين الترسيم شماغ وثوب وكيذا .. وبين الكلام الرسمي … هو فيه علاقه .. بس ايش ايش ايش .. مدري ..
المهم ..
اليوم بعون الله .. راح نكمل الجزء الثاني من تقرير رحلتي الى فينيسيا … هالجزء كل ابوه صور .. لا اقصد يعني الصور كثيره … قرقر كثير ما فيه … صور كثير فيه
نبداااااااااااا ؟
اصبر وش نبدا … امورك تمام ؟ … مجهز الجلسه خبث عظيم في هالفيس
مفرحاااااااااتك خليه جنبك … ويمدحون اليوم الهوليستون بالرمان … مع شويه ثلج .. ياااااااااااارباااااااااه ..
ومثل ما حنا متعودين .. جوالاتك الله لا يهينك ع الصامت … والا اقرب درج …
حولك بيبي مسوي ياي عشانها الجزء اللي راح قال بزر … المهم حولك بيبي … ارجفه … والا خله يشرب شراب كحه .. صدقني 4 ثواني الا نايم
نبداااااااااااااااااا ؟
هيااااااااااااااااااا بنا .. لا مو ذا .. ذا
اليوم الثاني لي في فينيسيا … بعد نومه قمت فيها 4231.235.3 مره … عشان هالسرير اللي تروح كل نومتك وانت انواااااااااااع التحكحك … ما يمديك تنقلب ع يمينك .. الا قوه مرش .. اوووووووه وش بيشرح مرش الحين … مرش = يعني يدين كبيره و اظافر طويله شوي وسرعه في الحركه … عاد اذا ما فهمت مو ذنبي صراحه
متعود في كل سفراتي أني اصحى بدري … اما تخيش نوم الى الظهر هذا مو من نظامي صراحه … بعد القومه … قلت بنزل افطر تحت … لأني اذكر يوم احجز الأوتيل .. شايف لهم جلسات تفتح النفس برى .. جلسات تطل ع المويه وكيذا مويه في عينك .. تطل ع نهر فيه مويه .. مو مويه بس ..
المهم لبست وهيك .. وانزل ادور الفطور اللي يطل ع مويه كيفي كيفي
المهم نزلت واروح للمطعم .. مشخص وهيك … قال اي غرفه .. وعطيته رقم الغرفه … وقال يالله اختر من هالاماكن .. قلت اصبر اصبر يابو .. انا رجال ابي افطر برى .. في الجلسات اللي تطل ع المويه .. قال وش مويته بعد انت .. ما فيه افطار برى … قلت اقوووووووووول .. حركات انكم منوميني ع سرير انواع التحكحك .. مشيتها لكم … اما سالفه اني ما افطر برى هذه كثر منها … انت راح تفطرني برى والا كيف ؟
قال وش فيك زعلت … قالها بالايطالي عشانه خايف مني وكيذا … قال ما نقدر نفطرك برى … قلت ليش ؟ .. قال ابد تعال شوف الجلسات اللي برى … قلت يالله قدامي
يوم طلعنا نشوف الطاوالات اللي برى … الا هالمنظر …


قلت هاااااااااااااااااا .. وانا اللي خشتي تصير مثل هالفيس بالضبط ( ) …
قلت وش ذا الحين ؟ قال موزعين ماشميلو ع الطاوله … وش ذا يعني .. هذا ثلج نازل ع الطاولات ولا نقدر نحط فطور برى
واجلس اقولبها في راسي .. يااااااااااااااربيه .. يا شين اذا انت مسكت معاك ع شي .. ومسكت عناد … وتفشل .. ياااااااااربيه وش اقول له الحين … اقوله صايم ؟ .. وش بيفهمه صايم … اقول له
فطوركم وع ؟ .. وش بيشرح له وع … طيب لو اجلس برى .. انا توني ببدايه الرحله … يعني بزكم .. يعني احتمال اتسخن .. يعني احتمال اكمل باقي الرحله والعلاجات بشنطتي … المهم قولبتها قولبتها .. قلت له .. اقول .. كأني اسمع ميوزك جوا ؟ … قال ايه فيه ميوزك ع الخفيف … قلت ايوووووووه اصلا انا متعود في الرياض ما افطر الا ع الميوزك .. وبرى عندكم ما فيه ميوزك هاديه … الله يصلحك تبي تفطرني برى بدون ميوزك … بمشيها لك هالمره يالوردي ….
المهم اني دخلت وافطرت جوا .. وحسيت اني ما تفشلت .. صح ما تفشلت ؟ .. قل صح … ايووووووووووووووه كيذا تمام ..
لا جد كان برد .. حتى شوف …

شوف كيف المويه متجمده
يقولون لك هذا واحد جا بيغسل خشته ويفتح الصنبور .. الحنفيه .. البزبوز .. الا طلع له كيذا ..
حتى يقولون لك > تربّع .. وهذا اذا تربّع يعني راح ينصب
حتى يقولون لك .. فطورهم اذا جو بيعطونك الكوفي والشاهي … ما يصبون لك الكوفي في كوب .. لالالالالا .. يصبونه ع طول في فمك .. لأنه لو حطوه في كوب .. ع طووووول راح يتجمد مثل المويه اللي فوق … فعندهم واحد يشتغل في المطعم .. ماسك بريق بيده .. ويمشي ع الجالسين … ويقول يالله يالله .. افتح فمك يا حبيبي يالله … وابد قبل ما يحط الكوفي .. يرمي داخل خشتك مكعبين سكر .. شفت كيف الذمه بس ؟ … ثم يصب الكوفي بفمك … عاد لو تبي كوفي مع حليب .. ولا خبرته من اول … يجيب لك شوي حليب ويصبه بعد الكوفي في فمك .. ويخليك توقف .. ويبدا يطق طق ع الطاوله ويغني لك ( انا ما خنته تبلاني ) … وتجلس تهز خصرك شوي .. عشان يختلط الكوفي والحليب والسكر ببطنك … واحلى فطور طال عمرك … ترى هالشي في فينيسيا بس .. سبحانه
/

/

بعد ما افطرت .. وهزيت الخصر شوي عشان الكافيه لاتيه اللي ابيه هههههههههههههه … قلت خلني اطلع شوي ..
اول ما تطلع من الاوتيل من الجهه الخلفيه … تشوف هالشي

المحلات وكل الناس هاجده
قلت بتمشى شوي .. الا اشوف هالاشكال ..


وش هاللي مغطين وجيههم م … ؟
وش السالفه ؟
في فينيسيا … يقام كل سنه مهرجان وكرنفال يسمى بكرنفال الأقنعه
هالمهرجان يقال انه من عام 1268 م وهو يقام بالمدينه .. يعني يمكن قبل اكثر من 700 سنه
وكان يهدف الى أن طبقات المجتمع كلهم يكونوا مثل بعض .. لا امير .. ولا ملك .. ولا شيخ .. ولا اقل واحد .. كلهم مثل بعض .. في جو وناسه وسعه صدر ..
وقيل ان المجرمين أول يتهربون من الحكومه ويلبسون هالاقنعه ..
وقيل ان المتهربين من دفع الضرائب برضو يلبسونها ..
قيل و قيل .. بس اللي اعرفه انه شي يوسع الصدر
هالمهرجان يقام كل بدايه فبراير … بس تواريخه بالضبط كل سنه تتغير .. يتأخر يومين ومرات يقدم يومين وهيك .. بس قبلها بفتره يعلنون عن الفتره الرسميه للمهرجان .. ويستمر تقريبا 5 ايام ..
وانا اكيد كنت مضبط رحلتي ع اساس هالمهرجان … واني اوصل من اول يوم .. وألحق ع كل شي
/

/

بعد عرفت ان السالفه فيه استهبال واقنعه وهيك ..
قلت يلزمني اكشخ مثلهم … طبعا كل واحد ولبسه اللي يلفت الانتباه .. وانت بس تخيل .. المدينه 90 % منهم لابسين .. وانواع التمشي .. واللي تبي تصور معه صور .. ولا يهمك .. واللي يبي يشتري هدايا احلى واحلى
المهم وقفت عند احد الكشكات .. وشريت لي كم قناع .. لوزم التخفي ..
اخذت …


و


شي بشخص فيه كل شوي ي .. والباقي بعلقها ببيتي وهيك ..
/

/

خلونا الحين ننزل للشارع .. ونشوف كيف العالم مدهره
فيه ساحه في وسط فينيسيا .. اسمها ساحه سان ماركو … ما عليك نبي نروح لها .. هالساحه فيها كل التجمعات … الكوفيات .. الاحتفالات .. المحلات …
وفي الطريق للساحه … مثل اي مدينه صغيره في اوروبا .. تشوف الممرات اللي تفتح النفس
خلونا الحين نروح للساحه .. ونجلس فيها الى الليل .. ونجلس نصور ونشوف انوااااااااااع الاستهبالات اللي هناك
قبل ما نروح ..
مودك في السفر .. يووووووووه هذا برستيجي .. يوووووووه ما احب الاستهبال .. يووووووه ما احب الوناسه .. يوووه ما احب المشي .. انا انسان اجلس ع كرسي واقزقز اللي مار ورايح .. يوووووه وش هالخرافات
اذا هذا مودك … ارجع الرياض الحين وتذكرتك ع حسابي
نكمل مشينا الى ساحه السان ماركو ..

بدأت الوفود تتوافد ع ساحه السان ماركو و ..
بالطريق للساحه .. لقيت واحد مطقم مع كلبه

عليه لبس بعد ..
طول ما انت تمشي .. عادي جدا توقف اي واحد وتقول ممكن اصورك .. او حتى تتصور انت معاه ..
نشوف هالنظره ..

تقول اخلللللللص علينا صور ..
قلت اصبري بقرب شوي ..


..
بالطريق ايضا …


..
بالطريق برضو ..



انوااااااااااااع التفنن بالاشكال واللبس س
.

لبست ستارتهم وجت

يا عيني
.

هدووووووووء وثبات
.


.

سكون
هذه رااااااااايقه .. شوفو ايش ماسكه ..
.

ماسكه مرايا ..

يمكن فوق ساعه .. وهي بس تشوف شكلها .. وثاااااااااااااابته
.

مطقمين
.


.

فريق واحد
محد نط بينهم وصور ابدااااااااا
..
هذا واحد خبل ..

مهبووووووووووول .. شافني اصور .. قال تعال تعال اضمك واعطيك ورده … طول ما هو يمشي يضحك وبس
.
نشوف قطوتنا


و

ميوووووووووو
اهم شي تقشير الحواجب مدري وش يبي برى لو سمحت
.
ايه صح
بالطريق شفت صفه عجز .. يعني عجوزات .. يعني حريم كبار في السن > لا عاد تشرح شوف …

مهبل
بالله ركز ع الفيسات
شكلهن قايمات من الفجر .. انواع التصلح في نفسهم ..
برضو محد راح بينهم وصور
ايه صح .. فيه واحد خبل خبل … متخبي ورا عامود .. وكل من مر يم العامود .. رووووعه

ددددددي
عاد وقف وشف انواع الصراخ اللي شسمه ..
حسيته شايب .. قربت الكام عليه ..

يوووووووووه كم عمره ذا .. متعرفط كثير
بس يعجبني والله .. موسع صديره ولا همه احد
.

يا عيني ع البنفسج
/

/

ترى كل هاللي فوق .. وانا ع الطريق امشي .. احلى شي المشي
وانت ماشي تشوف برضو محلات تبيع هالفيسات …

و

الاسعار مو وحده .. اللي اقصده .. انه اذا رحت هناك .. مو تشتري وبس .. حاول تمر ع كم محل وتشوف الاسعار .. لأنه عادي تلاقي قناع ب 15 يورو .. ونفس هالقناع بالمحل اللي جنبه ب 13 يورو .. فلذااااااااااااااالك انتبه ..
وصلنا لساحه السان ماركو ..

الساحه كبيرررررررره ه
وحولها محلات وكوفيات .. وكنيسه ..
وحاطين فيها مثل المسرح .. شكل بيكون فيها انواع الادهار ..
بدت تجي بعض الشخصيات تتمشى … وتروح فوق المسرح ..

مشخص مع مريته
افتحو الطريق للإغريق



اهم شي سروال البجامه اللي لابسه

بروووووووووم بروووووووووم

افتحوا الطرررررررريق
وهذا ..

كل قراشيع بيتهم حطها ع صدره ..
بس اعجبني لبسه مع وليده ..
.
جا ملكهم جا جا

يتمخطر في مشيته
هذا اللي يقولون لك …

لو تخمه ببلكه في راسه ما حس بشي ي .. ( تخمه أي تأتيه بغته )
.
نطير شوي فوق .. نشوف كيف الزحمه


طبعا عااااااااااااادي يجي مطر وانت في مكانك عاااااااااااااااادي .. اهم شي الكام ما يجيها شي .. والا الباقي وسع صدرك طال عمرك
.
جا دور الهلاليه > >


تمشي بشوووووووووووووووووويش
.


/

/

في وسط ساحه السان ماركو .. فيه مثل البرج طووووووووووويل .. بوص حضرتك ..

هالبرج .. رابطين فوقه مثل السير الطويل … من فوووووووووق للمسرح تحت ..
طيب وش بيصير ؟
بيعلقون وحده من بناتهم في اعلى البرج .. ومن فوق راح تنزل لين المسرح بشويش بشويش .. وهي نازله تنزل وتستعرض فوق ..
نشوف مع بعض ؟ ..
.
شوف

شوف الدائره الحمرا .. هذه هي بدت تنزل من فوق
.
راح تنطلق …


..
وبدت ..

استعرااااااااااااض
.
بشويش بشويش …

يا عيني ع الروقاااااااااان
المهم ان رقبتي وقتها عورتني وانا اشوفها تنزل وتنزل
طبعا هي راح تنزل بوسط المسرح اللي مجهزينه ..
بوص ع المسرح ..

….
بدت بدت بدت تقرب …

وصلت وصلت
راح تنزل بالمسرح … شوف الشاشه اللي ع المسرح .. هذه الكام تصور البنت اللي كانت طايره فوق
المسرح كان عليه ذوليك الاشياء اللي يمشون وصورناهم فوق ..

بعد ما وصلت المعلقه ..

شوف شكلها ع الشاشه هنااااااااااااااااك ..
طبعا كان بررررررررررررد .. مدري كيف استحملت البرد طول هالوقت فوق .. شكل بجامتها اصليه ما شاء الله <<<
/

/

بعدهااااااااا … بدا الاستهبال ع الستيج

لا يفوتك السنافر اللي ع اليسار

وانواااااااااااع ال … و


بالطبله

هذه ام خدود حمر .. رقصت يمكن 12215.2365 ساعه .. من بدا الشسمه وهي تدهر ..
.
بعد ما خفت الزحمه شوي .. جابوا مثل الكراسي مدري كيف شكلها .. شوف

هذه حطوها بالساحه .. ووجهوها ع المسرح .. اللي ودي يريح ويجلس … وهيك يعني .. ..
طبعا المسرح ما يجلس فاضي .. يا يجيبون فرقه .. او مغني .. او اي حركات … بالعربي ادهااااااااااار في ادهاااااااااار ..
طبعا الساحه فيها كوفيات في كل زاويه … وممكن تجلس برى وتتفرج وانت ترتشف الكابتشينو > وجعني حلقي وانا اكتب ترتشف


.
ايه صح .. كان ذاك اليوم كل شي فيه مميز .. كان الشسمه ..

محد علقها ع الكرسي ابد ..
بعد ما ريحت شوي … وارتشفت الكابتشينو <<< ترى وقسم بالله يبي يقولها مره ثانيه
قلت بروح الأوتيل اريح .. وارجع بالليل .. شكل فيه ادهار برضو ..
بالطريق للاوتيل … قابلني هالمنظر ..

عذبة أنت … كالطفولة كالأحلام ..
كاللحن … كالصباح الجديد …
كالسماء الضحوك .. كالليلة القمراء …
كالورد .. كابتسام الوليد …
.

أنت رسم جميل .. عبقري من فن هذا الوجود ..
أنت تحيين في فؤادي .. ما قد مات …
من أمسي السعيد الفقيد …
وتبثين رقة الشوق والأحلام …
والشدو والهوى في نشيدي …
يالها من وداعة وجمال …
وشباب منعّم أملود …
أنت روح الربيع تختال في الدنيا …
فتهتز رائعات الورود …

/

.
رحت الأوتيل وريحت شوي وهيك … وبالليل رجعت لساحه السان ماركو …
هذا كشك …

يبيع مفرحات .. وهوت شوكوليت .. عاد مع البرد وكيذا .. يا سلااااااااااام ..
.
وانا في طريقي للساحه … الا صادفني هالشكل ..

يا ربااااااااااااااه .. وش يبي ذا
ابد ولا حررررررررركه … واصوره .. قلت ابيه يتبوسم والا شي … يوم شفته ما عطاني وجهه .. قلت بمشي بس
الا شوي
.

طلع الزقاره ولا همه أحد … بلا مهرجان بلا كرنفال بلا هم .. اهم ما عليه زقارته لابوهم لابو مهرجانهم هههههههههههههه
.
المهم ما خفت ابد .. قلت يالله بس اكمل للساحه ..

المسرح تغيير شكله بالليل يل ..
وفيه عرض الساعه 9 تقريبا .. والناس تتجهز له
شوي الا بدت الخرشه .. وجا مطربهم

وبدو بعض الشسمه .. يرقصون مثل حركه انا القطار السريع .. طووووووط طوط

برضو كلن موسعن صدره .. برضو كان فيه مطر وعاااااااااااادي … برضو محد همه احد .. برضو اذا انت من حقين البرستيج ارجع الرياض ع حسابي ..

/

/

/

/
تعبت ؟
طيب يا حلوين … الى كيذا نكون خلصنا من يومنا الثاني .. وحلقتنا الثاني بفينيسيا
انبسطنا فيها كثيرررررررررررر ..
.
الحلقه الجايه ان شاء الله … راح نركب مع هالمملوح ..

ونخليه يلف فينا فينيسيا كلهااااااااااااا
وبالطريق نشكتشك … يعني نصور وكيذا …
وبرضو ناخذ لفه بسيطه ع ابرز معالم هالمدينه الساحره ..
علشان الحلقه الجايه هي اخر حلقه عن فينيسيا … قبل ما نقش عفشنا ونروح لبرشلونه
نمشي ….!!!!! …
أسمع …. نمشي ؟؟؟ … …
لالالالالالا … تمشي فين يا هااااااابيبي …
برضو بما انه حر وكيذا ..

خذ برد ع قليبك …


/

/
يا حلوين … اللي عنده استفسار .. او سؤال او ملاحظه .. وخاصه اسئله كم هو به … او اي شي .. ممكن هون عن طريق المدونه …

/

/

اشوفكم على خير …

دمت في أمان الله وحفظه
دمت بكاااامل عافيتكم ،،،
لك … انت .. بس .. مو لغيرك
.
المايسترو ،،،

ماهو بكفو الوقت حبك يمحيّه …
ياللي تخاف صروف الايام تمحاه …
ارتاح ..مادام المواصل يقوّيه …
انت انت.. وانا انا.. وقلبي هو اياه …
حتى ولو بتغيب ذكراك تكفيه …
ياواحدٍ تكفي عن الناس ذكراه
حبك على رملة خفوقي مواطيه …
ورياح عذلني عنك ما تمسح خطاه …
واللي يعذل القلب عن درب غاليه ..
الله بما يبلا المواليف يبلاه …
اخفيه يا بالفيت والحال يبديه …
ادناة واحد ينظر الحال يقراه …
مخفيه فيه ومعتني ٍ به وحاميه …
من كل عين ٍ ودها تنزل حماه …
قلب ٍ يحبك والهوى الذرب ماليه …
كانك مكذبني ؟؟ بعينك تحلاه …
شرط ٍ تشوفك فيه منت بحواليه …
ويمكن تشوف ديار واماكن ارعاه …
ابغيك بس من المفارق تداريه …
وازهل من يداري شعورك ويدراه …
وحلل وحرم فيه يابرك بلاويه …
وحلّه وراع رضاي ورضاك ورضاه …
ولا انت ردك كل ما ادعيك.. (( لبيه ))
انشهد ان منتوا بفيعيني اشباه …
الحلم ياتيني بزولك واراعيه ..
وفي كل حلم اقوم قبل اتحفاه …
اعشق سميك في البزارين وادعيه
واقبل خطاه الى اخطا واتلقاه …
واسمك يروعني الى مر طاريه …
واحب ملقوف ٍ يسولف وطراه …
وامر بيتك من بعيد ٍ ولا اجيه …
وانا لونه في يدي ما اتعداه …
حتى (تواير) (موتري) تلتفت فيه ..
تبغي تلف ويستحي العقل والجاه …
وصلك يخيط الصدر والبعد يفريه ..
ويابري حالي كان صديت برياه …
ويلي على ادري حبنا ويش تاليه …
وويلي على ادري وش ورى الغيب ويلاه …
عشان اشوف اذا محبتك .. ترفيه …
والله لا اقفي عنّك……. واستغفر الله ..
(محمد بن فطيس )

مقالات ذات صلة

‫9 تعليقات

  1. يااخي انت خطييير..ماشاءالله تبارك الله.. يعني اذا ودك تعطينا خبر كم كلفت الرحله.وكل مدينه على حده..ض1 والله يجزاك خير ويوفقك.. اذا مافيه احراج..انت وش وظيفتك.؟لها دخل بالتقارير اللي تنزلها ولا.؟

  2. ماشاء الله .. لازالت لياقتك الإبداعية .. في أوجهها 😀 أنت بالنسبة لي .. ماجد عبدالله .. التقارير 🙂

  3. B B B B 🙁 تقرير رهيييييب ولقطات ولا أجمل فنااان وربي الله يعطيك الف الف عافيه وننتظر الجزء الثالث

  4. B انت مجنون يا بندر باقي بنشاطك المنقطع النظير وسفراتك العجيبةةة تصويرك يجنن ودقيق حبيت الكابتشينو طالع مشهي 🙁 تقرير ممتع استمتعت في تفاصيل كل صورةة كأني هناك تسلم يدك : : : جاري مشاهدةة الجزء الأولـ

  5. السلام عليكم . اول شي ماشاء الله عليك ابداع بكل شي بس عندي سؤال بسيط الي هو : ممكن تقولي وش هالتأثيرات الرايقه هذي اللي تحطها على صورك؟؟ وشكرا

  6. ههههههههههههه الاخ ياسر الحربي اشوفك ماجد عبدالله ههههههههههه. مايسترو اش الكلام هذا تسافر بس تصور بس تصور . أن الاوان من يصورك ….. مش عاوز مصوراتي ياباشا

  7. آخي الماسيترو آستمر على تقريراتك لآنك مبدع والله. طريقتك في كتابت تقريراتك وتصويرك تخلي القرآ يحس آنه معاك ولابس قناع بعد 😀 شكرآ على مجهودك ،،،

  8. طرحك جميل جدا جدا ولكن صووور متكرره في نفس الموضوع، وللمداعبه

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى