مساع البردقانه ياحلوين ..
مساعكم قراطيس أكثر من قراطيس معرض الكِتاب ..
مساع الخير يابو نبيل وانت واقفن على دار نشرك المخيسه بجناح 143
صباحية يوم السبت .. لبست ثوبي ونطلت عقالي على راسي.. واستقبلت موتري وهممت ووجّهت شمالاً لـ معرض الكِتاب .. الموعد مُهمّ بالنسبه لي .. أجل : ثلاث شهور مارحت لمكتبه وجالسن أجمّع لي شلقة كُتُب عشان خاطره وما أهتمّ فيه أو أعيره أي اهتمام !
اتصلت في فلان وفلان وفلان .. وقلت الوعد بمعرض الكِتاب .. لاأجي هِناك وما ألاقيكم وابدا افرفر لحالي واسحّب رجولي بين الناس كنّي بزر ضايع ..
ياحبني لفلان الاول .. سابقني من صباح الله وفاتحن الباب مع الموظفين من زود الحرص .. عانقته وخمخمته وهمست في أذنه أحبك يارااقل بس لاتصدّق واجد ..
أخذنا جوله في المعرض ..
طبعاً ككُل سنة .. لزوم اشوف الجديد والمعروض وابدا اتفلسف عند ربعي واطرح رايي في الأفضلية .. أقارن بين السنه هذي والسنة اللي فاتت وما أنسَ أطرح توصياتي للسنة الجايه .. أدري أني مواطن صالح ومافيها طقّة عصا .. بس بما أني صالح .. فالصلاح مقرون بالفلسفه الديكتاتوريه اللي تعلمناها من زات الدكتور غازي وزير العمل والبطالة الذكورية !
وسُبحان الله .. مــدري بالصدفه كذا طحت على أقسام ومعارض البزران
.. يالبى قلبهم .. بزاريـــن ماسكين سرى وصافّين طابور وكل واحد طاقّن التكميله والبجامه البيضا ظاهره من ورا الصروال وتسحب بالارض .. مير اخق معهم بشكل لاشعوري وخويي كل شوي ينغزني من وراي ويقول : تراك فشّلتنا واللي يرحم والدينك .. خلنا نروح للمعارض هِناك قبل يأذّن الظهر ثم نبلش .. وكل مانغزني دفّيت يده واستلقيت البزران وخشتي تاسع ثلاثة اوادم .
أخذنا جولة كذا حلوة بالمعرض .. طبعاً يقولون أن يوم السبت للـ رجال حسب الجدول .. ويوم الاحد للـ عوائل .. بس اللي شفته أن الدعوه كانت خليطي واللثامات ماليه الدنيا وهل الخصور المايله متحاشرات بكل دارن فيها المقسوم من الروايات .
ومثل العادة .. النجاح والتميّز لدار عن دار .. واستغرب من بعض دور النشر والتوزيع وبعض المكتبات الكُبرى اللي ماوراهم إلا أنهم يتفرجون على اللي يمرون في الممرات .. كل سنة أشوفهم يجون وماعندهم إلا كم كتاب راصينه على الباترينات !
التنظيم السنة هذي .. روعة وأفضل من العام .. والتقسيم مافيها كلام أنه منتاز المنتاز .. بس الإشكالية في مُخالفة الإدارة لنظام التوزيع .. يعني يوم انكم تقولون يوم السبت للرجال خلوكم ماشين على نظامكم وتنظيمكم .. أما أني أجي والاقي لي كم عباة واشوف فاطمة جالسة تحاشرني على كِتاب أو رواية فهذي يبي لها ليّ غاز يصلى ظهر المسؤول عن المعرض .
دخلت دار معروفة .. ولقيت لي كتاب كنت أدوّر عليه من فترة طويلة .. طبعاً لقيت آخر نسخة منه .. ومن بجاحة ووساعة وجه وحده من البنات قالت لي : الكتاب هذا تبعك ! 
أكيد أن الكتاب إذا صرت شايله أنه تبعي إلييين أردّه لنفس الرف .. أنا كنت أدري وش قصدها وان نيّتها بيضا زي صابونة مسّك 
رديّت عليها وانا مبتسم ابتسامة مُطعّمة بنكهة الـ تميلح
مرّيت على دار كئيبة .. ريحتها زفر وطعهما كشنه محروقة .. تسعه وتسعين في الميه وتسعه من عشرة من كُتُبها روايات مش أد المآم .. ! .. دخلتها وياليتني مادخلت .. حامت كبدي وقامت تقلب كنّها لحمة حاشي بقدر كاتم .. قلت للموظف قبل أطلع من عنده : عندكم غير هالمصفوف .. قال : ان شالله السنة الجاية بننزّل روايات جديدة ! .. قلت الله لايحيي الظالم !
,
إستراحة
,
كاس شاي بالحليب .. كسرة بسكويت فانيلا .. وأكملنا المشي والتمشّي ..
اتصل فيني اخوي الصغير وقال : لاتنسَ تجيب لي لعبة بابا فرحان والعاب تركيبه .. قلت من عيوني يابعد روحي .
سويت يوتيرن في نفس خطّ السير واخذت لاخوي مطلوبه ووصيّت العامل وقلت : احرصوا على البزران لاتجيبون لهم شي مش كويّس تراهم بُكره بيصيرون هم الرياجيل بالدنيا واحنا عاد قد زماننا ولّى!
بصراحة معرض الكتاب ياقماعه السنة هذي يستحق الزيارة والاستفادة منه .. مع أن العام الفائت كان الطرح فيه بشكل أوسع والعين الرقابية كانت نايمه .. السنة هذي مشددين شويّ وكثير من الكُتُب ماراح تلاقونها لأن الرقيب دافّ له حبتين أبيض ومصحصح عسى عمره طويل .
* بقشة صور مليانة قراطيس*
– صورة علوية بمقدر اربعة صانتي لبعض قراطيسي اللي شريتها من المعرض –
– أتركوا حكاية حُب وشوفوا اللي وراه . وماكل كلمة حُب تصير ورديّة !
– لايفوتكم بس حركة عرابجة ثانوية الخوارزمي بحي منفوحة .. أمش يالقلب اللي شاقّه سهم –
– ياشين البزران اذا قاموا يتفلسفون ، يابويا قوم .. حدّك لعبة بابا فرحان
– خميّت لي طابوق والقلب ولهان .. وادميت لي عينن عساها خليفه
صورة مقرّبة لقراطيس المعرض … وفتّح عينك ياحمزة تراي اذا قضيت منها باعطيكياها تكمّل عليها . –
– ورجعنا على حكاية حُب
* خاطِرة :يقول الأستاذ العقاد : إن القراءة لم تزل عندناسُخرة يساق إليها الأكثرون طلباً لوظيفة أو منفعة ، ولم تزل عند أمم الحضارة حركة نفسية كحركة العضو الذي لا يطيق الجمود . أ.هـ ..!
احبكو كلكو
