رسائل المجموعة

صور مقناص حباري..الرس .ساحوق..تقرير مفصل

السلام عليكم
وبارك الله في اخينا ابونواف والقائمين على هذا القروب الناجح
ونتشرف بالمشاركة فيه

كان لنا في اجازة الحج رحلة مميزة مع مجموعة الصافي سلمهم الله من كل مكروه
وتحديدا في (ساحوق) جنوب غرب مدينة الرس بحوالي 150كلم تقريبا
بدأت الرحلة في يوم الثلاثاء الموافق 1427/12/6
على موتري وكان باقي الاخوان سابقين قبل بيوم
وهذى الموتر معبي عفش المنتخب < ضميد عفش

صور

كان اليوم الاول جميل والأجواء طيبة وبدا البحث عن اثرة وتم العثور عليها وتم تتبعها حتى اثرة طيرانها
واستمر البحث ولكن ماالله اراد ان يكون لنا نصيب فيها
وحطينا حيلنا بهالحصني يمسح لنا الشغايا مسح سريع

صور

استمر التجوال لين خطم علينا طير ووقع حولنا واثاريه طير خوينا هاد على شي بس ماقدر خوينا يلحقها لانه طار مع الهوا وابعد

صور

عقله الله , ويوم دعاه عيا لا يجي بالملواح وتقل مابغاه مثل الطير الوحش مثل ماتشوفون

صور

والظاهر والله اعلم انه هاد على شي وباغية وماقدر عليه او راح وخلاه
المهم وقفنا في محل طيب تكينا وحطبنا وشبينا ضونا وزانت السوالف
وودعنا الشمس بهاللقطة الجميلة

صور

سمرنا اول ليله على ذكرى الاثرة وعلى مواصلة البحث بالغد
اصبحنا اليوم الثاني وكان معنا الطل والبراد والسكون وبعض الشخير من مجموعة الرواق وخصوصا الوسطي

صور

واصلنا التجوال والبحث وكل واحد باتجاه وبدا الهواء يزيد علينا شوي شوي لين صار الهواء (صلف) وبعد فترة جاب معه العجاج والسافي
واستمر العجاج ويوم شفنا ان الوضع مطول بحثنا عن ذرا بالجبال او السمر وراح اليوم الثاني متقين العجاج
اصبحنا اليوم الثالث و العجاج هاجد مع الفجر او قبل
عينا من الله خير وافطرنا وشدينا الهمه
وكانت الارض بعد العجاج ممسوحة وصار من السهل تمييز الاثر الجديد وصارت الارض نظيفة من اثرة الغنم والجراذي وام سلم اللي اقلعت بي
واصلنا البحث وكل موتر باتجاه لين نادى راعي الطير ان عنده اثرة جديدة عاد حنا ماصدقنا خبر طق الاحداثي وشب على الموتر
كانت الاثرة جديدة والحبارى عندنا وقاعدين نحتريها تفقع

صور

ارتفع راعي الطير وكفخ طيره ماشاء الله تبارك الله ولا الحبارى تطير وترتفع والطير وراها
ومن هالصور يتضح اللحق واعذروني على عدم دقة الصور لاني ماقدرت آخذ راحتي بالتصوير تعرفون طرد ومناقز وخبة واللي انتم خابرين

صور

ويستمر الطرد واللحق

صور

صور

صور

صور

علقها الطير ماشالله عليه وكان التعليق نادر صراحة والطير لحاق ماشاءالله تبارك الله
وهذي صورة اولى بعد التعليق

صور

صور

صور

صور

وهذي صور جماعية للمجموع الرائعة ادامهم الله
صور

وصور اخرى ومن زوايا اخرى
صور

ابوعزيز اخوان وتعتريهم الفرحة الغامرة ادامها الله على وجوههم دووووووم
صور

وانت مرتز معهم بالغصب وبواسطة بعد هههههههههههههه

صور

بعد ماخذنا وقتنا بالتصوير والوناسة حركنا لم الاثرة نتأكد منها ولا احد الشباب ينادي بالجهاز ( ياجماعه فيه أثرة حبارى ثانية قاطعة مطاريدنا)
هو قاله ولا ماقاله ونتوجه لمه ونبدا من جديد مع حبارى جديدة
ونبدا قص الاثرة
صور

وكان الملاحظ على الحبارى الثانية السرعة لانها (والله اعلم )انها شايفة الهدد وتحاول الفرار
استمرينابقص الاثر وكان صعب شوي لانها في منطقة حزوم واستمرينا بقص الاثر من الساعة 11 صباحا وماكفخ الطير الا الساعة 2 ظهرا
قاطعه مسافة 5كلم تقريبا
وكان من الصعب التصوير لان الطير علقها سريع وكان بعيد عنا شوي
وحرصنا على تخليصها بدري حية كما هوا واضح بالصورة
صور

وتم ذلك بس كانت متعورة شوي وكانت دجاجة

صور

صورة للمزيونة عن قرب

صور

تقل عورنا عيونها من كثر الفلاشات ههههههههه

صور

وهذي بعض الصور الجماعية للمجموعة بعد الهدد الطيب

صور

فيه عنصر داخل عرض بالصورة .. من يعرفة ؟

صور

ضحينا بمحلنا بعدها وعينا من الله خير واستانسنا وتغدينا وبعده قمنا نكمل دورانا وبحثنا
باقة منوعه ومتفرقة
الازرق يتميلح بالحباري على باله قميري : )

صور

تصوير من قوقل ايرث وحنى نهد <مايعرف ينصب ههههههههه

صور

هذا جزا الي مايلبس نعال …. نهاية طريق مسدود ….. نهاية روماتزم ……

صور

كانت هنا حبارى

صور

شموخ مزدوج ….. الطير والذيب

صور

يستاهل الصافي ماشالله تبارك الله

صور

رفست الموت

صور

صور

صور

صور

ولما غابت الشمس شبينا نارنا وتقهوينا وبعدها توجهنا للديرة حاملينا معنا الذكريات الجميلة من الرحلة والأخوة الطيبة التي تشرفت بها

خواطر مكتوبة
1. اترك المكان مثل ماكان
2. اذكر اوراد الصباح والمساء واذكار المكان
3. افزع مع الربع باللي تقدر عليها واللي تعرفه وخلك شقردي
4. اذا كنت صاحب شخير فحاول ان تاخذ حساب الهواء او يكون بينك وبين الربع حاجز او نم بالسيارة : )
5. كثر الملابس في مثل هالاوقات
6. انتبه تنزل من السيارة تطير الشراب بدون ماتعلم ربعك لانهم راح يحسبون عندك أثرة ويجونك طايرين : )
7. تاكد من الاحداثيات عند اعطائها ربعك ماهب تعطيهم احداثي بحايل وانت بالقصيم : )
8. اعتذر من الجميع على قلة الدقة بالصور وكثرة التشويش وذالك راجع لشروط مركز تحميل مكشات 
9. اذكرو الله على الطير وراعيه عن عين وماجرة

اتمنى ان يكون هذ التقرير المبسط والمختصر قد نال اعجابكم واستحسانكم
وبنقدكم وتوجيهكم وملاحظاتكم نتطور

مقالات ذات صلة

تعليق واحد

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى