رسائل المجموعة

صور : قضى دمعي من عيوني .. أبي من عينك أبكي لك

///

الله عليها عودت وانا احسب الغالي نسـى /
الله عليها لي بغت ما يطفي الشمس المسـا /
هلت سحابة وصلها على حياتي وازهـرت /
واهتز قلبي من نبات الحب زهرٍ واكتسـى /

/

السلام عليكم ورحمة الله وبركاته //
صبحهم / مسهم بالخيرات والمسرّات //
عدد النجوم فالمجرّات //
وعدد السكان فالسبع قارات //
وعدد ما سوت أمريكا من غارات //
وعدد ما فالرياض من حارات //
.
من أولها سياسه .. الله يستر هههههه //
~,~
وشسمه وش أخباركم عساكم تزقحون إن شاء الله؟ /
وآخباركم مع هالحرّ المخيس .. اللي لو تشغل عشرين مكيف سبيليت فـ سيارتك مانفع ههههه //
الله يعين البنات اللي فالباصات .. أنواع الخياس والعطورات اللي تفحّ هع هع //
وش ذالجوّ .. أجل درجة الحرارة تصك 48 .. طيب لو كملت ووصلت 50 كان عطونا إجازات ..
أحس فليناها ياأهل الرياض بهالإجازات ههههههه //
<~ فيس يناظر ويضحك على أهل الشرقيه وجدهـ والشمال والجنوب والسويدي ومنفوحه وضواحيهم .. //
/
أجل ذاك اليوم راجع من الدوام العصر .. وأشوف هاك الليموزين مسيكين ذابت سيارته من فوق من حرارة الشمس .. //

/

الله يكفينا وياكم عذاب جهنم بس .. اللهم آمين ../

على طاري جهنم .. يقولون سعر الرز للحين نار .. ماسك على ماهو عليه .. وكل ماله يرتفع ..
الله يخلي التخزين فمخازن هالتجار بس .. //

/

على طاري التجار والأبقار .. //

فيه واحد متهاوش مع زوجته وكانوا بالسيارة ومارّين على مزرعة أبقار ..
قال لزوجته : يقربون لك هذولا ؟
قالت : إيه أهل زوجي !! // ههههه
/
ملاحظه كبر راس واحد أعرفه .. تراني أحبكم <~ لايكثر بس .. //
نروح لفقرات الموزوع ..//

/

][ مدخل ][
.
/
.
تجيني طيف يا عمري.. على جنحان شوقـي لـك
اخاف ارمش من عيوني..! وابعثر جيت وصالـك
~//~
حبيبي لا تجيني قول.. وين انت؟ وانا اجـي لـك
ابيك تقول وين انت.. وعلى عيوني انا اسعى لـك
~//~
وربي فوق روس الشوك.. لا اخلي القلب يمشي لك
واخلي ظلالي يسبقنـي.. قبـل يحضنـي منزالـك
~//~
ثواني بس.. ابتهندم.. من عيونـك وابهـدي لـك
في عينـك ضحكـةٍ حتـى تكحـل عيـن عذالـك
~//~
يقولوا الناس: بغيابي تشب القلـب ويضـوي لـك
حنيني ومن وهج شوقه.. يميـل القلـب لا مالـك
.
//

/

][ طوط طوط ][
.
أحمد يمسك بجواله, ويتصل برقم الشركة الوطنية,
الرد الآلي: طوط طوط مركز العناية بعملاء الهاتف والإنترنت ………. لوجود عملاء آخرين يرجى الإنتظار 10 دقائق ..!
موظف الشركة (1): السلام عليكم معاك فلان الفلاني كيف أقدر أخدمك ../
العميل: لو سمحت إتصالي مفصول من عندكم وودّي الله يعافيك تشوف لي حل معه../
موظف الشركة (1): طيب أنا رفعت لك طلب وأنتظر الدعم الفني خلال 48 ساعه يجي ويصلحه..

/
بعد مرور 48 ساعة على المشكلة الفنية بالخط
أحمد يمسك بجواله, ويتصل برقم الشركة الوطنية,

الرد الآلي: طوط طوط مركز العناية بعملاء الهاتف والإنترنت ………. لوجود عملاء آخرين يرجى الإنتظار 20 دقيقة ..!
العميل (المسكين): السلام عليكم, لو سمحت قدمت طلب على رقمي وأبي تشوف وش صار عليه الله يعافيك..؟/
موظف الشركة (2): إيه الطلب لازال مفتوح .. والدعم الفني مابعد وصل له .. إنطق 48 ساعه ثانيه وإن شاء الله يزين..!/
/
بعد مرور 96 ساعة على المشكلة الفنية بالخط
أحمد يمسك بجواله, ويتصل بنفس رقم الشركة الوطنية,

الرد الآلي: طوط طوط.. مركز العناية بعملاء الهاتف والإنترنت ………. لوجود عملاء آخرين يرجى الإنتظار 40 دقيقه ..!
العميل (المزروف): أخيراً رديتوا .. وشسمه ياخوي قدمت طلب قبل أربع أيام / ………..ألخ
موظف الشركة (3): طيب معليش المشكله على كل الحي ألحين مو بس عليك .. أصبر معنا ويزين إن شاء الله ../
العميل (المزروف): طيب جارنا خطه شغال عادي .. شلون تقول كل الحي فيه مشكله ؟!!
موظف الشركة (3): أحم .. هاهـ .. لا قصدي فيه كباين معينه بس .. بتنحل قريب ../
العميل (المزروف): طيب يعني وش الحل ألحين ؟؟
موظف الشركة (3): أصبر معنا 48 ساعه ثانيه وبـ يزين أو أتصل على الإدارة إذا ماضبط !!!!!/
/
بعد مرور 144 ساعة على المشكلة الفنية بالخط
أحمد يمسك بجواله, ويتصل برقم الإدارة لنفس الشركة الوطنية,

الرد الآلي: طوط طوط .. يرجى الإنتظار 100 دقيقة ..!!
العميل (المنعون خيّرهـ): لو سمحت سالفتي كذا وكذا وكذا .. متى بيجي موظف الدعم الفني طال عمرهـ ؟ وش السواة الله يحفظك ويخليك لعين ترجيك !!؟/
الموظف في الإدارة: أنا رفعت خطاب ثاني للموظف حق الدعم الفني وبيجيك بعد 48 ساعه../
العميل (المنعون خيّرهـ): يعني 200 ساعه بعد !!/
الموظف في الإدارة: معليش إنتظر 48 ساعه ثانيه!!/
العميل (المنعون خيّرهـ): طيب وإذا ماجاء ؟!!/
الموظف في الإدارة: ههههه ردد معي يالييييييييييييل ماطووولك !!
الرد الآلي: عزيزي العميل شكراً لإتصالك ونتشرف بـ خدمتك/ونتفنن بـ بهذلتك/ونستمتع بـ زرفك !!/
طوط طوط طوط طوط

/

][ إعلانات غلط × غلط ][
.
/
هذا غلاف الفلم المعروف 300 .. شوفوا مسكة السيف شلون .. لو دققتوا فيها لقيتوها تركيب بالفوتوشوب .. بس باين أنه مصمم زلابه / هههههه
.
/
وهذي دعاية لاب توب .. وخشة ذالطخما البيضا اللي واقفه ورا ذالزرقا منعكسه فالشاشه هههههه / والله من الفهاوهـ بس ..
.
/
طبعاً هنا مسكة المسدس غلط .. شوفوا شلون العسكري صدز .. /
.
/
هنا صورة الجمهور .. صح المصمم فلتة زمانه يوم قصها بإحترافيه بس ولو ليش تنسخ نفس الخشة جنب بعض يالفاهي /
.
/
هذي واضحه .. 8 قيقا ومنعكسه 4 قيقا / نسوا يعدلونها صح ..
.
/
هذي معليش لو المصمم قدامي قلت له يرحم أمك لعد تصمم غلافات / أجل جبهه هذا كبرها؟ هههههههه
.
/
لمين اليد الخامسه؟ /
.
/
بومبا وخرّ راسك شوي /
ناظروا الظل شلون جاي / قايلين للرجال وقف بس انت كذا ومدّ يدينك جعلها منيب قايل .. وحنا بالفوتوشوب بنركب الشيك /
بس والله يا الظل لاعبن فالصورة لعب / وفاضحهم

/

][ فاصل ][
.
قضى دمعي من عيوني.. ابي من عينك ابكي لـك
ابنثر من ورا عيوني.. دمـوع عيـون ترحالـك
~//~
تعبت اهرب من الاشيا البسيطـه مـن تفاصيلـك
تعبت اسأل زوايا البيت.. عن اول واخر احوالـك
~//~
وحتى الشوق من صبح الدرايش قام يهـدي لـك
عصافير الرضى ترفـرف علـى بيبـان مدخالـك
~//~
هنا ترمي صباح الخير.. قبل لا تروح وادعي لـك
وهنا تضوي مساء الخير.. في عيني مـن هلالـك
~//~
انا من الليل يقطفني.. شعوري لـك واغنـي لـك
انا من الصبح يليّلني الحزن.. مـن لـون موالـك
~//~
حرام الليل ماهو ليل..! اذا مـا كنـت فـي ليلـك
وحرام الصبح ماهو صبح..! اذا ما كنـت فظلالـك
.
//

/

][ قتل online ][
.
/
.
في اليابان فيه لعبه إسمها Maple story
كل شخص يسجل فيها يلعب وكأنه عايش حياة مع الناس بس عن طريق النت .. ويحارب وحوش وياكل ويشرب وكل ابو شي فالعالم .. ماخلوا شي هالجابانيز الله يرجهم../
المهم .. فيه وحدهـ إسمها مزنه شونق بونق .. عمرها 43 كانت مسجله معهم .. <~ قوية مزنه /
كانت متزوجه واحد منهم .. وفجأه وبدون سابق إنذار طلقها ..
عاد أنها يوم طلقها وتروح تقتله في نفس اللعبه ..
ألحين الأخ مناحي رنق بنق رافع عليها قضية عشانها قتلته .. <~ ما مشت مزنه عشان يمشي مناحي /
مناحي متهمها أنها هكر ودخلت على بياناته ولعنت والديه .. /
وإذا ثبتت التهمه عليها بيسجنونها 5 سنين , أو تدفع 5000 دولار كتعويض لهالمسكين ../

مايستفاد:
إتقوا غضب النساء ../
طلقها على النت ذبحته .. أجل لو طلقها صدز وش بتسوي فيه؟!! /

تعليقاتكم؟

/

][ طفاقة حريم ][

/

نقلا عن جريدة اليوم:
اقتباس:
هوى مصعد كهربائي يحمل بداخله 20 سيدة من الدور الثاني إلى الدور الأرضي بمستشفى الولادة بالأحساء مساء أمس الأول.
و تعود تفاصيل الحادث إلى أن مصعد المستشفى – والذي تبلغ طاقته 16 شخصاً – لم يستطع أن يتحمل الحمولة الزائدة به حينما صعدت 20 سيدة بغرض استخدامه للنزول وفور اغلاق باب المصعد هوى سريعاً ليرتطم بقوة كبيرة بأسفل أرضية القبو ، ليسارع رجال الأمن في المستشفى والفنيون بالنزول إلى ( البادروم ) ومحاولة فتح الباب واستطاعوا إخراج المحتجزات بعد تدافعهن مما أدى إلى إصابة امرأتين بكسور ورضوض نقلن على إثرها عن طريق سيارات الإسعاف إلى مستشفى الملك فهد بالهفوف.

التعليق:
يعني ألحين يوم أنه مكتوب أنه يشيل 16 بس .. ليش تركبون يالـ 20 ..!؟
ولا نعفقه زايدهـ وأنا أبي أوصل أول .. هذاكم وصلتوا كلكم مع بعض .. تحت !! /
بعض الناس سبحان الله .. تتعب تقول مخ مافيه سديق .. /
وبعدين يوم أنهم فتحوا لكم المصعد وراكم تراكضون <~ أحس أني جالس قدامهم ألحين وأهاوش .. /
وشسمه الصبر زين .. خاصه فهالمواقف العصيبه ..<~ كيف عصيبه بس /
إلا بسألكم .. ليش الواحد إذا وقف عند باب الأصنصير المصعد وشاف لمبته مولعه وواحد واقف قبله وضاغطها يجي ويضغطها مرهـ ثانيه؟! /
يعني أنت كذا تقول له إستعجل شوي ولا شلون؟ هههههههه /

تعليقاتكم ؟ /

/

الله يشفيكـ يا أم مصعب.. ياسيدة قوم
ويزيل عنكـ كل التعب وإجهادهـ
/~
لو تعبكـ ينشرى .. ماسمت فيه سوم
قلت أنا فداكـ .. وفزت في مزادهـ
/~
ولو عاندكـ المرض وصار محتوم
قلت أنا له , لو الموت مرادهـ
/~
أموت وتحيين وتنزال كل الهموم
وتعيشين حياتكـ وفرحتكـ تصير بزيادهـ
/~
وتذوق عيونكـ طعم الراحة والنوم
وتفرح بكـ أمّكـ .. فرحة أم بالولادة

.
/
.
.
.
لا إله الا الله الحليم الكريم .. لا اله الا الله العلي العظيم ..
لا إله الا الله رب السماوات السبع و رب العرش العظيم ..
اللهم رب الناس أذهب البأس ، اشفها وأنت الشافي ، لا شفاء إلا شفاؤك ، شفاءً لا يغادر سقماً ..
اللهم إني أسألك من عظيم لطفك وكرمك و سترك الجميل أن تشفيها و تمدها بالصحة و العافية ..
اللهم اشفها شفاء ليس بعده سقما ابدا..اللهم خذ بيدها.. اللهم احرسها بعينيك التى لا تنام .. يا مُفرج الكرب يا مُجيب دعوة المُضطرين ..
اللهم البسها ثوب الصحة والعافية عاجلا غير اجلا ياأرحم الراحمين..
اللهم إشفها وإشفِ جميع مرضى المسلمين ..
اللهم آمين .. اللهم آمين .. اللهم آمين .. /
/~
لاتبخلوا عليها وعلى جميع مرضى المسلمين بالدعاء .. فـ ربّ دعوة من أحدكم تكون مستجابه ../
جزاكم الله كل خير ../

/

][ مخرج ][
.
تروح وقلت: احط روحي.. علـى كفـي واناديلـك
نزعت العمر مـن شفـت الغـلا بالـروح نادالـك
~//~
بربك قول: وش سوى الفـراق بوجـه منديلـك؟؟
تسيل الوان طيفي فيـه الـى مـن البكـا سالـك
~//~
حبيبـي لا يبكيـك الفـراق ولا يـهـد حيـلـك
اخاف الدمع من عينك يجفف صورتـي ببالـك..!
~//~
تعال احتاج اسولف لك عـن الايـام واشكـي لـك
وافض غيم الحزن وانثر حنيـن الشـوق بقبالـك
~//~
تعال وحـط فـي قلبـي همـوم الفرقـا واشيلـك
لان القلب ماهو قلب اذا فـي نبضـه مـا شالـك
~//~
وقف دمعي من عيوني.. ابي من عينك ابكي لـك
اخاف ابكي من عيوني..! وابعثر جيت وصالـك..!
.
الشاعر: سالم سيار
.
//

/

في آلختآم .. أشكركم على متابعة الموضوع للأخير …/
وأتمنىآ آن يحوز على رضآكم وينآل ذآئقتكم كل آبوٍكم ../
واللي يبغى يردّ لو على فقرهـ وحدهـ عجبته يجوز ترى .. أوب لازم أحد يفصفص أم الموضوع .. /
اللهم إغفر لي ولكم .. ولوالديّ ووالديكم وأجدادي وأجدادكم وجميع المسلمين والمسلمات الأحياء منهم والأموات (F) / /
سبحانك اللهم وبحمدك , أشهد ألا إله إلا أنت , أستغفرك وأتوب إليك
/
اللَّهُمَّ أَنْتَ رَبِّي ، لا إِلَه إِلاَّ أَنْتَ خَلَقْتَني وأَنَا عَبْدُكَ ، وأَنَا على عهْدِكَ ووعْدِكَ ما اسْتَطَعْتُ ، أَعُوذُ بِكَ مِنْ شَرِّ ما صنَعْتُ ، أَبوءُ لَكَ بِنِعْمتِكَ علَيَ ، وأَبُوءُ بذَنْبي فَاغْفِرْ لي ، فَإِنَّهُ لا يغْفِرُ الذُّنُوبِ إِلاَّ أَنْتَ

/
.
الإستماع للقرآن الكريم
http://www.tvquran.com
.
كتبه وأملاهـ / باء نقطه شين
بدر.الشوق
وفي روآية / أبو س ـعد
منتدى فهاوه
///
عالم من الفضاوهـ
للتواصل:
b.s9@hotmail.com
سلآم

مقالات ذات صلة

‫35 تعليقات

  1. إلا بسألكم .. ليش الواحد إذا وقف عند باب الأصنصير المصعد وشاف لمبته مولعه وواحد واقف قبله وضاغطها يجي ويضغطها مرهـ ثانيه؟! يعني أنت كذا تقول له إستعجل شوي ولا شلون؟ هههههههه آلجوآب/ يعني يومني ضغطته مقصدي بركب معك بآلآنصنصير 8) روعه بدوري آلله لآيحرمنآش من موآضيعك

  2. بدر الدجى ههههههههههه الله مير يصلحك من خلصت قراية لموضوعك وعيوني بس تبلص .. وش السبب تكفى ؟؟ (( بلا والله من هالقلوب اللي ما غير تشّر )) ================= مسيو بدغ <<< خش جو بالثقافة والله يا نا ما غير ألطش من هالكلمات اللي تجيب وهالقصايد يعني خيرك واصل بقوووة ,,,,, فآصلة مبروكل الايميل الجديد اللي رقمه تزعه :$

  3. كلها كوم والخشش المنسوخه كوم هههههههههههههههههههههههههههههههههههههه

  4. Maple story اقوول بدر تبي نروح لليابان نشتريها 🙁 اليابااان ما خلوو شئ مشكوور يالغلا موضوع رائع و مدري كيف اشكرك فيه كله حلو مثلك ننتظر جديدك اخوك \ رايق دايم

  5. آسيك بآلخير مبدعنآ آبو آلسعدي .. آلريآض بدون حر مآتصير آلريآض آلله يخليهآ لنآ :$ موضوعك بطل .. تسلم 8)

  6. يسلموووو ع الموزع الرااائع بس بجد عجيبهـ فقرهـ الفوتوشوب 😀 يسلموووو خيو بدر الشوق

  7. مشكور ع الشعر والصور واهم شي بومبا وعاد كمل الخ من الشكر خخخخخخخخخخ سوداني مافيني من كتب اكثر من كذا :$:$

  8. ما الذي يمكنني قوله ؟ فقط لأشكرك على هيك موضوع خرافي والله من زمان شثير ما علقت على احد .. اجبرت اناملي على التحرك نحو شكرك شكرآ جزيلا كثيرآ مزجى بحب شثير

  9. ههههههههه صراحه نو كومنت كله كوم والاتصالات كوم ثاني وربي حاله تحزن:(

  10. مشكور ياأخ بدر الشوق على هالطرح الرائع..بجد اعجبني موضوعك وخاصة-شركة الإتصالات-اقصد الانفصالات-والله فعلاهذا تعاملهم مع العملاء كأن الشخص يطلبهم روح او عضو من جسد.بصراحه لفت انتباهي تدقيقك على الصور ماشاء الله.لو انا ما انتبهت..تشكر ع الوقفات الحلوه الرائعه في موضوعك استفدنا منها كثير…لاتحرمنا مثل هذه الإيميلات خاصة وانك ما ادري وين تختفي ثم فجأه تظهر…:$

  11. بدر الشوووووق هلاااا والله ويينك افتقدناااك طوولت كثييييييييييير ولاعااد تعودهاا ثانيه <<< تسمع اول شي موضووعك جنااااااان والشعر يخبل ويجنن اكثر واجل تبغى اجاااااااااااازه اييه خذوو اجاازه عشاان تجوون الشرقيه وثاانكس وننتظر موضوووعك

  12. عليك اسلوب يخلي الواحد غصب عن الي خلفوه يقرا موضوعك ماكنت بقرا موضوعك بس شديت كل انتباهي ربي يحفظك ويخليك لاهلك ياخي كلما احاول ارد ع موضوع عاجبني مادري شو اسوي وحتى لو ابي اشارك ف موضوع من عندي ماعرف

  13. بالله أيش رأيكم في مستشفى جامعي وسبعة أدوار ما فيه درج إذا صار حالة طوارئ لا سمح الله عندنا حلين نستنى الأصنصير أو نستنى قدرنا (إلا بسألكم .. ليش الواحد إذا وقف عند باب الأصنصير المصعد وشاف لمبته مولعه وواحد واقف قبله وضاغطها يجي ويضغطها مرهـ ثانيه؟! يعني أنت كذا تقول له إستعجل شوي ولا شلون؟ هههههههه ) يمكن ليش لا

  14. هههههههههههههههههههههه مجنوووووووووووون كله كوم وسالفة البقر اهل زوجها كوم خخخخخخخخخخخخخخخخ :$ زين ماكفخها <<<<<<<< وحده مصدقه 😮

  15. مررره رووعه الايميل يعطيك العافيه وجزاك الله خير على تلاوه القران تحيااتي

  16. كواااااايي مره الموضوع, أول مره أقرأ ايميل كامل من القروب, أسلوبك حلو ماشاء الله, والقصيدة تجنن, ربي يسعدك , خليتني أضحك وأنا ضايق خلقي,!:D شكـــراً باء نقظة شين:)

  17. ههههههههه احلى شي صوور الفووتووشووب عساااك على القوه خيووو

  18. ماشاء الله ما بقو لي كلام حلو اقوله…. بس من جد روووووووووعه ويعطيك الف الف عافيه يا بو الشباب:D

  19. شكرا على الموضوع الاكثر من الرائع … انتظر مواضيعك بشوق… اسئل الله أن يشفي أم مصعب ويستجيب دعوتك

  20. الله يعطيك العافيه خيو على الصور والتعليقات الحلوه ولا تحرمنا من جديدك يا بدر الشوق :D.. (عسى الله ان يشافي مريضكم ومريضنا وجميع مرضى المسلمين يااااااااااااااااااااااااااااااااا رب العالمين . اللهم امين ) … اخوك / prince

  21. B تهاوشت انا والشسمو وكانت الاخلاق قافله بقوه ويمن قريت الايمل ضحكت << احلفي بصراحع روعه الله يعطيك العافيه اسلوبك رهيييب

  22. بدر الشوق والله انك فله وأنا أشهد مير ياخوك وراك حاطن صورة خنزير بري يم اسمك مع ذا الجربوع يعني عاجبك هو وخشته اللي مدري وش تبي ..؟! B B اسمحلي يعني مالك حق ترى مالقيت إلا هالخنزير الله لا يبلانا .. 🙁 يعني يمديك تحط دلفين / تحط صقر / تحط أي صورة أو تكتفي بذا الجربوع المروق :$ لكن تحط خنزيرررررررر …؟!! راجع نفسك ياخي صدز ماله داعي :~ <<حالة نفسية مستعصية بسبة هالخنزير / لا والمصيبة إن هالخنزير مدلعن نفسه شف الوقفة كيف لا تفوتك هي والنظرة .. المهم عاد غيرها وخلك رجالن سنافي 8)..

  23. بصراحه ابدااااااااااااااااااااااااااااااااااااع يسلمووووو ويعطيك العاااااااااااااااااااااااافيه

  24. اخوي بدر الشوق خبر المصعد ماتشوف شي فيه غريب انت بمستشفى ويودونك لمستشفى ثاني حتى لوكان ولادة اكيد فيه طوارئ للحالات الطارئة :$:$:$:$:$:$ ههههههههههههههههههههه

  25. الله يعطيك العافية ,, انا من عادتي أطنش المواضيع الطويلة .. بس كل ما جيت بقفل الصفحة ., تجذب انتباهي فكرة أحلى من اللي قبلها ,, كل المواضيع كانت جميلة … يعطيك العافية أخوي ….أتمنى قراءة المزيد من إبداعاتك ..:D أخوك : Dr. m.z

  26. ما شاء الله عليك….دقيق المراحظة…عيني عليك باردة…ما شاء اللع تبارك الرحمن…لو كنت مكانك ما كنت بلاحظ جزاك الله خيرا على الموضوع الطيب

  27. موضوعك شي ياخوي:D اعوووذ بالله يهالحر 🙁 انت تشتكي بالسياره ماينفع معك التكييف اجل حنا تصدق تخرب بعض مكيفات البيت وماتعتدل الا باانصاص الليالي واذا جبنا عامل يقعد يخرط ويقول كل الناس كذا اليوم حر والشمس تجي اتجاه على مكيفكمB <<فيلسوف فاشل وحنا افشل الي جبناك:D على طاري الباص تصدق انا وخويتي نلصق ببعض من الزحمه والضيق بالباص واذا قلة الزحمه وتوسعنا ارجع الصق مره الثانيه لان احس بالبرد قسما بالله ابرد لان العرق صار بااااارد:$ عاد صديقتي اذا لصقت والمكان وسيع ماتشاور ترمين انا وخشتي رمية التسلاب مع الشنطه لطرف الكرسي عاد يوم غيروا الباصات الحكوميه وصار فيه تكييف وحركات وكل واحد بكرسي جبنا سواق:$ ياحسااافة عمري بس لو جاي هالباص قبل:( عاد الي ينزل من هالباص على طول يتجه نحو الحمام يتروش عقب مانتهيت من ترويشة العرق الي بالباص:D اما مناحي رنق بونق :Dقلعته ليييه يطلق !! وشكرا على الموضوع:)

  28. شكرااااااااااااااااااا كتييييييييييييييييير لكل من كان سبب في توصيل معلومه أو فكره بشكل جمييييييييييل كل هذي امواضيع الشيقه التي تجذب إنتباهي للمزيد من الوقت الجميل مع موقعكم الذاخر الوفير شكرا…….إبراهيم مصر

  29. هههههههه .. موضوع أسعدني كثيرا لولا وجود صور النساء .. الله ييسر أمرك

  30. اليد الخامسه فضيييييحه والشيك بعد لوووووووووووووووووول :~

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى