رسائل المجموعة

صور : الوعد باكر .. لو تأخرتي لايجي باكر!!

][الوعد باكر.. لو تأخرتي لايجي باكر!!][

.
/ / /
.
.
بسم الله الرحمن الرحيم
السلام عليكم ورحمة الله وبركاته /
كيف حالكم صبيان وبنات /
إن شاء الله تزقحون؟؟ /
أول شي/ كل عام وأنتم بخير / <~ حقت العيد
وكل عام وأبونواف وقروب أبونواف أطلق قروب فالعالم وأعضاءه وزواره أطلق ناس فالعالم بخير وطيبين/
والله من زمان مانزلت مواضيع ولاشي, من قبل رمضان
صدق الدنيا قريه صغيرهـ <~ مالها دخل بس سلكوا //

/

وشسمه ثاني شي أبارك للمنتخب الهلالي فوزه المتعود على شقيقه نادي النصر /
خامساً/ أتحمد لسمو سيدي الأمير محمد بن نايف على سلامته, ودمت ذخراً للإسلام والمسلمين / <~وش زود الجرايد يتحمدون وأنا لا؟؟
تاسعاً/ منتخبنا السعودي مهوب ناجح ولاهوب فالح ولاهوب مرتقي الكعب حقه إلمن نغير هالخطط المهروسة ونغير التشكيل من فوق لتحت, قالوها قبلي وقفلوا قنوات .. الله يعين هالموقع بس!! //
وعاشت أبوظبي /
رابعاً/ خذوها نصيحة مني, خاصة للشباب المقبلين على وظايف وكذا, دايماً إختر الوظيفة اللي تحس البيئه فيها سليمه وصحيّه ونظيفه وكلش!!
بمعنى أخوياك اللي فالدوام يطلعون أطلق ناس, لايصير لكم مثلي أنا وأبوهنود ذاللي دابلن تسبدي فالدوام
كل ماسويت شي يبتسم في خشتي ويضحك وإذا ضحكت في خشته رد علي: what mr.bader what what?? //
يعني زي اللي يقول وشو وشو يامستر بدر وشو وشو <<بيلخمني //
والقهر أنه من وراي يروح للمدير ويقول بدر سوا وبدر قال وبدر مدري وشو وبدر فصخّ فالحمام (وأنتو بكرامه) //
مدري وش يبي هالإنسان في حياتي مدري من وين طلع لي!!! //
((إمتياااااااااااااااااااا ااااااز أطللللللللللللللللع منهااااااااااااااااا يامخييييييييييييييس))
هاني ياصديقي فالدوام, شدّ حيلك واصبر, وياسر أنت وخويك إمتياز ترى عايشين جوّ بالسوالف, طه أحلى مافيك تطنيشك, جابر شخبار حرب العصابات بس؟ // هههههه
معليش ع الشطحه بس أخوياي يقولون أكتب أسامينا فالموضوع الجاي <~لايكثر انت وياهم بس خخخخ //
على طاري لايكثر, إنتبهوا لبزارينكم ولحد ياخذ ذاللقاحات, الدعوة كلها مؤامرات في مؤامرات, والوقاية من هالمرض بفعل الأسباب وبيدّ رب العالمين, والمفروض وزارة الصحة ووزارة التربية والتعليم يوفرون المعقمات والصابون وبقية المستلزمات الصحية فالمدارس والجامعات.
قال الله تعالى: ((قل لن يصيبنا إلا ماكتب الله لنا))
الله يحمينا من شرّ هالأمراض والآفات, ويجعل من أصابته تكفيراً له, اللهم آمين /
على طاري الإصابات, الله يعطيه العافيه ويهديه الرائد إبراهيم أبوشراره ذاللي يطلع كل صبحيه فالإم بي سي إف أم, إذا قال أن الجسر المعلق فاضي يعني زحمه, واذا قال خريص زحمه يعني فاضي ههههههه يارب تضبط معه صح لو مرهـ..! //
أحس أني طوّلت ذالمره فالمقدمة بس والله من شوقي لكم ووحشتكم ووووآلخ… //
المهم عندي لغز فكروا فيه والحل موجود في فقرات الموضوع..
وشو الشي اللي تدوّر عليه وتدوّر عليه وتدوّر عليه وتموت لما تلقاه, وإذا لقيته ترميه؟؟/ /
تابعوني.. / <~ وش عنده قناة الرأي!! //
.

/
.
][مَدخ َـل][
.
/
.
الوعد باكر..!!
لو تأخرتي.. لايجي باكر!!
~//~
ما أبي باكر بدونك..
أحبسيني في عيونك..
وأوعديني بعد باكر..!!
~//~
//
.

/
.
][ مكه في رمضان ][
.
/

ياطيبه ياطيبه ياهوى العيانا/
إشتئنا لك والهوى نادانا/
.
(بداية الرحلة)

/

قررت أنا والوالده الله يحفظها ويطوّل في عمرها ناخذ عمره فالعشر الأواخر من رمضان /
كان الطيران فُل ولازم تحجز من شهر, لكن الحمدلله تسهلت من عند رب العالمين /
المهم كانوا العالم منهبلين عشان إنفلونزا الخنازير في مكه وفالحرم بالذات, بس الحمدلله ماسمعنا أي حاله, رغم أنه حسب الإحصائيات وصل عدد اللي فالحرم والتوسعه 4 ملايين شخص
قل لن يصيبنا إلا ماكتب الله لن /
.
(في مطار جدهـ)

/

نزلنا من الطياره قبل آذان المغرب بنص ساعه, وطبعاً كعادة أصحاب اللموزينات والكدادين فالمطار يستقبلونك برحابة صدر ويأشر لك ويجي يشيل شنطتك ويقول تاكسي يالطيّب //
أنا أول ماشفتهم أرتعت الصراحة, عندنا فالرياض بس ما يسحبون الشناط وينشب في حلدزك إلا أنا بوصلك .! //
طلعنا برا المطار على أمل أننا نركب تاكسي, كل الليموزينات يقولون 160ريال, وأنا وياهم مكاسر على عشرة أريل (أريل جمع ريال)!!
آخر شي جاني واحد شباب فلاوي على قولة أهل جدهـ.. وقال بوصلك بـ 140ريال للحرم وخلال نص ساعه بس!!
تحمست طبعاً , مو عشان النص ساعه بس عشان العشرين ريال خخخخ //
المهم ركبنا معه ويطير بنا طيران اللهم ياكافي <عجيّز
مابقى تريله ما لفّ عليها, ومابقى سياره ما شطفها, ومابقى آدمي ما أرتاع من سواقته!!
وصلنا بحمد الله بعد ساعه وعشر دقايق مو مصدقين أنه ماصار لنا شيء, بس الحمدلله ع سلامتنا!! //
.
(في الفندق)
وصلنا الفندق الحمدلله بعد الآذان بدقايق, كان فيه بوفيه مفتوح مجاني, حطينا عفشنا فالغرفة ونزلنا نفطر, والله لايورّيكم .. مجاعة أفريقيا كلها هناك!!
كنت أعتب على البوفيه المفتوح فالأعراس, لكن ألحين أعتب على البوفيه المفتوح في كل مكان.
تجي وحده تغرف بيدّها, وإذا مسكت الملعقه عشان تذوق طعم الشوربه بس!! //
وإلا تصب عصير برتقال وتذوقه همّن تصب عليه عصير كرّاث!! // خخخ
أنواع الحواق الله يكرّم النعمه بس!!
أكلنا اللي تيسّر لنا, وطلعنا نرتاح فالغرفه. /
.
(في الحرم)
بعد صلاة العشاء رحنا الحرم نقضي عمرتنا, وكان اللي يشوف الزحمه يقول صعبه يمشي, بس الحمدلله رب العالمين سهلها علينا وصرنا نمشي بكل سهولة ويسر رغم وجود فئه كبيرة من الدول العربية والفارسية المجاورة كان لها تأثير واضح في الزحمه لمخالفاتهم الواضحه فالزحام والتبطح والتسدح!! //
بعد قضاء الطواف والسعي (واسأل الله أن يتقبلهما خالصاً لوجهه سبحانه)
وكعادة كاميرتي البثره رحت أصوّر لكم بعض اللقطات من المسعى والمطاف والكعبة ولقطات أخرى, يارب تعجبكم. /

/
.
/
.
/
.
/
.
/
.
/
.
/
.
(خلاقين بالعرق)
فاليوم اللي بعده رحنا المحلات اللي ع الشارع, كان فيه محل ملابس وأبو هنود يبيع فيه,
المشهد اللي للحين عجزت أستوعبه أن الهندي وجهه معرّق وتعبان مرهـ, وكان جنبه قميص نسائي معلق ع الباب للعرض, أخذ طرف القميص ومسّح العرق اللي في وجهه وجزء من صدرهـ <<يحب الوصف الدقيق للأمانه هههههه //
طبعاً حامت تسبدي منه ومن محلّه , وهاوشته لكن لاحياة لمن تنادي بحكم الزحمه اللي حولن!! //
.
(مساويك كويس ورخيص)
في محل جنب المحل حق الملابس كان لبيع الخردوات والخرابيط, يعني يبيع كلش, مرّت وحده من الحريم العرب وكانت كرشتها سابقتها كيلو قدام //
تسأل بكم سعر هالمساويك (كانت حزمة مساويك مربوطه) قال لها بعشرة ريال حطّت حزمة المساويك في فمّها وقامت تعضّها وتذوقها بعدين رجعتها وقالت مايستاهل هالمبلغ ومشت في طريقها!! //
والبائع طبعاً ماحرّك ساكن لأنه أوصخ منها ويهمّه المال أكثر من أي شيء ثاني!! //
.
(أطرف مشهد)
أحد اللقطات الطريفة اللي صارت قدامي بس ما أقدر أصوّرها, لذلك رسمتها لكم رسم كاريكاتيري متواضع بس يارب يوضّح المشهد اللي صاير!! //

/
.
(الفندق والتمر)
قبل نطلع للمطار في طريقنا للعودة إلى دولة الرياض <~ صارت دولة ماشاء الله خخخ
كان الفندق ينزل كراتين تمر وحطها عند الباب, فجأه تجمعوا العالم عند البوابة الرئيسية (من الجنسيات المختلفه والمتخلفه), وكلن يبي ياخذ كرتون <~ والله من الشفاحه خخخخ //
الموهم دخلوا دفعه وحده واللي يدفّ السكيورتي واللي يدف العسكري وكلن لقط له كرتون وهجّوا خخخخ
مسكين راعي الفندق وقسماً رحمته..!
نصيحة لكل صاحب فندق, بتدخل الكراتين دخلها للمطبخ علاطول فيه ناس مشافيح ماقد شافوا خير,,

/
.
/
.
(صور متفرقة من هون ومن هونيك)

/

قهر رحنا جدهـ ومكه وماذقنا البيك!! /

/

هذا المسكين اللي جاي يوزع تمر بغوا ينزلونه من سيارته ويزرفونها لو انه مادعس خخخ//
واحد من ذاللي وقفوا السياره وقف قدام السياره يعني اصدمني عشان تمشي // وصدمه طبعاً على خفيف هع هع

/

هذي اللعبه فـ محلات ابو داوود مدري بن داوود مدري وش إسم أمه //
البزر عوّره ظهره ورزها خخخخخخ //

/

لقطة في التوسعة والزحمه اللي فيها.. /

/

آخر لقطة قبل نرجع /
.
(تنويه)
– جزى الله الملك عبدالله كل خيرٍعلى خدمته للحرمين الشرفين وتوسعاته المشهودة والملاحظة لمن زار الحرم المكي الشريف.
– رجال الأمن لهم فضل بعد الله في تسهيل العمرة على ملايين وآلاف الأشخاص الذين جاؤوا من كافة البلدان الإسلامية.
– اللهم تقبّل منا عمرتنا, وإغفر لنا ذنوبنا.
– يارب اللي ماراح الحرم في رمضان هالسنه أن ربّي يكتب له ويسهل له أداء العمره في رمضان القادم.
.
* مايستفاد:
1- اللي يبغى العمرهـ في رمضان يحجز من قبل التذاكر والسكن ويعقد النيّه وربّي بيسهل له كل شيء.
2- لو فرقت 10 أو 20 ريال, خذ الليموزين اللي تحسّ أن سواقته راكده , صح محد صاير له شي غير المكتوب, بس إفعل الأسباب وأشتر راحتك وسلامتك. //
3- لو تبغين يا آنستي/سيدتي تشترين ملابس ولاشي, لاتاخذين من حقت العرض, خذي شي بغلافه جديد ومن المستودع!! أو تخيّلي عرق أبوهنود كله في خلاقينتس هالميبّسه!! //
4- لو بتشتريـ/ـن مساويك إشتروها من مصدرها الموثوق, مثلاً الصيدليات تبيع مساويك نظيفه جداً وطبيّه. //
5- عند الطواف أو السعي إنتبه من كل سمين وكل جفس أو عربجي, بعضهم يفهم أن الطواف ودفّ وقتال ومن يوصل أوّل؟ //
6- وقت الفطور أو السحور, حاول تجهزّ نفسك مبكر, يعني اللي بيتسحر 3 الفجر يطلع من بيته 1 ويالله يمديه!! //
7- لاعمرك تشيل جركل مويه على راسك وحولك بزارين, بيصير لك مثل خويتنا اللي فوق خخخخ.
. //
.

/
.

][ع ـائلة م ـاروكو][
.
/
.

/
.
][فـاص ِـل][
.
أنا ظلّي تحت شمسك..
لو تغيبي ماهو ظلّي..
وأنتي إسمك ياحياتي..
يهمس لـ بعضي لكلي..
~//~
أهـ ياضعفي وغروري..
أعدلي فيني وجوري..
أصدقي وراعي شعوري..
وأوعديني بعد باكر..!!
~//~
//
.

/
.
][أثاث (1) ديكورات][
.
هالفقرة بحاول أقدم جزء منها في كل موضوع, وكل جزء يختص بنوع معين من الأثاث والديكور.. /
يعني ذالمره ببدأ بالجلسات والكنب فالصالات والمجالس, يعني بعض الأشياءات من إختياري ويارب تعجبكم,, /
واللي يبغى زيادة أو تفاصيل إضافية مستعد لخدمتكم والتعاون معكم إن شاء الله, /
أنا مجهز مكتبة كاملة لكل أنواع الأثاث والغرف في المنزل, إذا لقيت تفاعل خلال هالفقره بكمل باقي الأجزاء بإذن الله.. /
واللي محتاج إستشارات في تصميم بيت العمر أو شقه أو أي شيء إن شاء الله أكون فالخدمة../
.
/
.
/
.
/
.
/
.
/
.
/
.
/
.
/
.

/
.
][ج ـواب اللـ غ ـز][
.
وشو الشي اللي تدوّر عليه وتدوّر عليه وتدوّر عليه وتموت لما تلقاه, وإذا لقيته ترميه؟؟//
.
.
/
.
/
.
/
.
/
.
/
.
/
.
/
.
///
.

/
.
][مَـ خ ـرَج][
.
هذا طيفك في عيوني..
مارسمته .. لاوربّي..!!
واللي يصرخ في ضلوعي..
هذا صوتك ماهو قلبي..
~//~
أهـ ياشمعة وجودي..
أشعلي نارك في عودي..
أهجري قلبي وعودي..
وأوعديني بعد باكر..!!
~//~
//
الأمير الشاعر: بدر بن عبدالمحسن
.

/

خ ـتاماً .. أتمنى أن تحوز الفقرات على رضاكم .. وتنال حسن ذائقتكم كل أبوكم ..
/
اللهم إغفر لي ولكم .. ولوالديّ ووالديكم .. وأجدادي وأجدادكم ..
اللهم إشفِ أم مصعب .. وعافها وأعف عنها يارب العالمين .. وإشفِ جميع مرضى المسلمين .. اللهم آميييييين..
/
سبحانك اللهم وبحمدك , أشهد ألا إله إلا أنت , أستغفرك وأتوب إليك
/
اللَّهُمَّ أَنْتَ رَبِّي ، لا إِلَه إِلاَّ أَنْتَ خَلَقْتَني وأَنَا عَبْدُكَ ، وأَنَا على عهْدِكَ ووعْدِكَ ما اسْتَطَعْتُ ، أَعُوذُ بِكَ مِنْ شَرِّ ما صنَعْتُ ، أَبوءُ لَكَ بِنِعْمتِكَ علَيَ ، وأَبُوءُ بذَنْبي فَاغْفِرْ لي ، فَإِنَّهُ لا يغْفِرُ الذُّنُوبِ إِلاَّ أَنْتَ
/
اللهم صلي على محمد وعلى آل محمد كما صلّيت على إبراهيم وعلى آل إبراهيم إنك حميد مجيد
وبارك على محمد وعلى آل محمد كما باركت على إبراهيم وعلى آل إبراهيم في العالمين إنك حميد مجيد
/
كتبه وأملاهـ / باء نقطه شين
بدر.الشوق
وفي رواية / أبو س ـعد
/
للتواصل:
b.s9@hotmail.com
/
ســـلام
/
.
/ / /

مقالات ذات صلة

‫19 تعليقات

  1. هههههههههههههههههههه ،، الموضوع لحاله كووم ،، واللغز كووم ثاني ههههـ ،، مثل مايقولون للطارق التايب ،، يأخي انت كيف تلعب ، ابي اقولك يأخي انت كيف تكتب ،، والله اني اقرآ موضوعك اكثر من مرهـ وما أطفش هع ،، الله يقوييييييييك ؟. بس لغزك كلام ،، والله ماطرآ على بآلي الأجأية هع هع

  2. تسلم يمينك علي روعه التقرير وجبه خفيفه ثقيله المحتوي وسعت صدورنا بالشطحات الحلوه عساك عالقوه

  3. رايح تعتمر أو رحلة سياحية؟؟؟؟؟؟؟؟؟؟؟؟؟؟ بترك لك الجاب لتتأمل فيه

  4. والله يابدر انا ما احب اسم بدر بس انت غيير اسلوبك غير ومواضيعك غير ولغزك غير بقووة غير

  5. شي شي :$ وقسم بالله الحرم هالرمضان تشوفه مليان وهو فاضي العايله الكريمة كلها اعتمرت == ماروكو ما أرضى عليها << أجل أنتِ من ؟ == الجواب :×

  6. انا مااعماني الا هالقلوب الي بالموضوع احاول اركز بؤبؤ عيناي ينبض معاها خخخخخ موضوع شطحات جداً رائع… عمرهـ مقبولهـ.. متشكر أؤي ياتيمون

  7. اسأل الله العظيم رب العرش العظيم أنه يسعدقلبك وينولك اللي في بالك ولا يجعل للحزن طريق لقلبك ابدعت واضحكت وفرفحتنا الله يسعدك دنيا وآخره آمين

  8. يا خي خطيييييييييير من جد .. كل ابو دايم اتابع موضوعاتك .. تعجبني مخارجك تطلع لـ بعيد هههههههههههههه وتعليقاتك تزيد الموضوع جمال .. كل يوم اكتب < عجبها الوضع ههههههههههه كلش كوم والا ذاك اللي نصب عليكم .. وقال اوصلكم بنص ساعة هههه وقلبها عليكم دبل عشر دقايق هـــع والا خلاقين بالعرق يييييييع > عاد انا اموت في جلابيات مكة احسها مرررريحة > الحين كرهتها .. عاد الله يعينك دبر لي جلابيات 🙁 والا المساويك > خخخخخخخخخخخخخخخخ زين علمتنا > ابوي الله يخليه يحب يشيل من مساويك مكة مرة سألنا ابوي ليش تجيب مساويك كثيرة من مكة مع ان عندنا بالرياض .. قال : احسها زينة لانها من الحرم < ياحبي لابوي خخخخ يارب ماننحرمش من المواضيع دي .. ويارب يتقبل دعااائك ودعـاااء المسلمية .. قلب ينبض ملطوش من الموضوع < هع

  9. ايميل حلو تخيلت البزران اللي طيحو جيك موية زمزم بس ما أدري ليه عندي إحساس إن اللي ماسك العصا واحد اسمه بدر الشوق ههههههه الله يوسع صدرك بالعافية

  10. يعطيك العافية بدر بصراحة انت حلاة هالشبكة ولايهونون البقية <<بينكرش خخخخخ8) بالنسبة للاثاث والديكور بدعت اخوي لا خلا ولا عدم تسلم يمينك مرة ثانية 😀

  11. وآنت طيب وبخير يآرب ع طول …في كل آلمنآسبآت رمضآن العيد اليوم آلوطني فوز آلهلآل < الآخيرة مدري وش دخلهآ مشي 🙁 وعمره مقبولة لك يآرب ..صور رآئعه بصرآحة آنا رحت وصورت بس صورك تظل الآفضل .. آيميل عن جد يفتح آلنفس في وقت كثر زخم آلموآضيع التي تكآد تكون متشآبة في آلنمطيه دآئمآ تتحفنآ بجديدك بدر كلمات آلفآصل كآنت غآية في الآختيار ينم عن ذآئقة شعرية فآئقة آع ـذرني يمكن مآ آعطيت الآيميل حقة في التعليق لآنو نمر بظرف محزن 🙁 آطيب تحية وننتظر جديدك القآدم لآ هنت

  12. مررراحب بكل الشوق والوفااهلا هلابك يابدرالاشواق ايميل حلووخاطرة حلوة (الوعدباكر)

  13. شكر خاص الى السيد بدر الشوق على الخف الجيد في التعليق وحسة المرهف في رسم الصور :$:$:$

  14. سلام عليكم اسعد الله اقواتكم اسجل اعجابي بمواضيع وشخصية بدر الشوق وفي انتظار جديدهـ

  15. السلام عليكم موضوعك اكثر من رائع بالنسبه لصاحب محل الملابس وبياع الخرده االكلمه اللي اقدر اقولها وووووووووووووووووووووووووووع وبقوه بصراحه شي يقرف وبالنسبه للاثاث اتمنى منك تكمل الصور ويعطيك العافيه. وشكرا….. لاالـــــــــــــــه الااللــــــــه… اللهم صلـــــــــتي عــلــى نبيك محمد…..

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى