بسم الله الرحمن الرحيم
السلام عليكم ورحمة الله وبركاته 
صباحكم/ مساءكم معطرّ بريح المسك والفول والياسمين..
حيّ الله أطلق قروب فالعالم قروب أبونواف
شخباركم إن شاء الله تزقحون وطيبين وكلش؟؟
تراكم ماوشحتوني أبد أبد.. 
على طاري الوحشه.. :$
ترى وشسمه أعتذر بخصوص بعض المواضيع اللي أنزلها تقلّ ردودي فيها.. لظروفي النتيـّه البايخه.. 
بس وقسماً أني أنبسط على كل رد وكل كلمة, وأنا أول من يستفيد منها..
على طاري الفايدة, بعض الأشخاص ينتقدوني من خلال الأسماء اللي أكتبها فـ مواضيعي, بس أحب أنوّه أنها من الخيال ولا أعرف أحد بهالأسامي ولاشي.. يعني أقرب إسم يجي ع بالي أكتبه.
هالتنويه حبيت أقوله بعد ماجت رساله من وحده الله يهديها تقول أني كاتب أسماء بناتها كلهم في موضوع واحد وأني أستهزئ فيهم!!
لاتعليق!!
وشسمه .. على طاري التعليقات .. أبشركم إمتياز أبوهنوّد سافر, وسوينا إحتفال فالدوام بعد خخخخ!!
وعقبال خويه ريكي قولوا آمين بس ..
,
إيه صح قبل أنسى, لايفوتكم ذالإعلان البطل جابه لي أبوحوط أطلق لاعب بوكسنق فالعالم هههه
يالبى قلبك بس..
واااااااااوك ياحظهم عندهم بلاك بيري فستقي
وشفاف بعد كثر منها <<اللي كاتب الإعلان موب مصدق أنه شفاف بعد ههههه
,
نروح لفقرات الموزوع , وعلى بركة الله إنطلقت الجياد..
][مدخ ـل][
ألين اليوم وأنا عندي أمل فيهم..!
ولا مرّ يوم إلا في تحرّيهم..!
ولو طال إنتظاري.
سنين وسنين وسنين!!
أكيد بيوم ألاقيهم!!
][رفقاً بالقوارير][
(المشهد الأول)
الهنوف: هاني ياخوي ودني السوق الله يخليك بس نص ساعه.
هاني: وشوله سوق توني موديك.
الهنوف: آخر مره وديتني قبل شهرين ومحتاجه ملابس وأغراض خاصة.
هاني: ياليييييييل ذالأغراض اللي ماتخلص, وش بتشترين طيب؟؟
الهنوف: ياخي أغراض بنات!! وش فيك علي ياخي؟؟
هاني: بتقولين ولا أنطقي مافيه روحه!!
الهنوف: طيب بنطق .. شكراً ياخوي.
(بعد فترهـ)
الهنوف تعالج في أحد المستشفيات النفسية!!
(المشهد الثاني)
فهده: فهد ياخوي ممكن توديني لعرس صديقتي الليلة؟؟
فهد: ماشاء الله من هي ذاللي بتعرس؟؟
فهده: هذي سوسن صديقتي فالجامعه؟؟
فهد: هاه .. لا لا .. مافيه .. وشوله ؟؟ مايحتاج تروحين باركي بالجوال.!!
فهده: وش فيك أختبصت وأرتبكت ..؟
فهد: لا مافيني شي .. بس ذالبنت سمعتها موب زينه مرهـ!!
فهده: وأنت وش يدريك عنها؟؟
فهد: هاه !! أسمع الناس يقولون!!
فهده: الله يستر عليها بس وعلى بنات المسلمين .. قل لي ليش ماتوديني؟؟
فهد: بس مافيه روحه.. موب لازم ذالعرس.. الجاي أوديك ان شاء الله!!
فهده: طيب ياخوي .. شكراً !!
(بعد فترهـ)
إلقاء القبض على فهدهـ مع شخص غريب في حالة خلوة غير شرعية!!
(المشهد الثالث)
مشاعل: مشعل ياخوي تسمح لي أروح مع صديقاتي المطعم اللي جنبنا؟
مشعل: وشوله؟؟ مايحتاج!! ناديهم يتعشون هنا فالبيت!!
مشاعل: مايصلح يامشعل لأني معزومه وكلها ساعه وراجعه ان شاء الله.
مشعل: قلت لأ يعني لأ .. معصي ..!
مشاعل: طيب خلنا نطلع أنا وياك نتمشى ونتعشى وعلى حسابي بعد.. بس خلنا نطلع تكفى!!
مشعل: هههههههههههه ضحكتيني والله.
مشاعل: ليش وش قايله عشان تضحك؟؟
مشعل: طيب إفرضي لو أحد من أصدقائي شافنا وش بيقول عننا؟؟
مشاعل: عادي مافيها شي أخ وأخته طالعين يتعشون!!
مشعل: أوووف منيب فاضي لتس بـ يبدأ الشوط الثاني.
مشاعل: تكفىىىىىىىىىىىىىىىىىى!!!!
مشعل: هاتي شاهي وخليه سكر زيادهـ تكفييين.. هههه أروح معها قالت !!
مشاعل: أبشر ياخوي, وشكراً لك.
(بعد فترهـ)
مشعل يتابع الشوط الثاني ع التلفزيون مع فريقه المفضل, ومشاعل تتابع الشوط الثاني بالجوال مع ……!!
(المشهد الرابع)
إيمان: أيمن ياخوي عطني مفاتيح السيارة بروح الدوام مع السواق.
أيمن: تخيلي بس؟؟ لأ مافيه!!
إيمان: ليش طيب؟؟
أيمن: حرام .. فيها خلوه شرعيه!!
إيمان: طيب قم ودني!!
أيمن: هاه .. لا لا انا مشغول .. بمرّ صديقي سيارته خربانه.
إيمان: طيب أنا أختك .. أولى منه.
أيمن: يختي ماتفهمين قلت لا.. وبعدين هو صديقي لازم أوديه وأجيبه ..!!
إيمان: طيب والدوام بيفصلوني على كثر غياباتي وتأخراتي.
أيمن: أحسن.. مايحتاج دوام.. أجلسي فالبيت أحسن لتس ولنا.
إيمان: طيب وشهاداتي ؟؟ ماخذتها عشان أعلقها في غرفتي!!
أيمن: ألووو .. هلا خالد .. يالله جاي جاي ألحين مسافة الطريق بس!!
(بعد فترهـ)
إيمان .. خرجت ولم تعد حتى كتابة هذا الموضوع!!!
* مايستفاد:
1- يقول النبي صلى الله عليه وسلم ((رفقاً بالقوارير)), فهن كالقوارير ينكسرون بسهولة وبسرعة.. (وينك ياللي تقول الإسلام مايحفظ حقوق المرأة؟؟)
2- كما تدين تدان .. ومن طقّ باب الناس, طقوّا بابه..!!
3- الضغط يولّد الإنفجار!!
4- لم يفُـت الوقت بعد .. يمكنك التعويض عنها!!
* ملاحظة:
لستُ من المنادين بتحرير المرأة بمفهوم الليبراليين, ولستُ من المتشددين المتعصبّين, بل أنا ممن يشجعون على أن تأخذ المرأة حقوقها كاملة وأن تكون وِفق مفهوم وضوابط وتعاليم الإسلام.!!
][صفر إلى مية][
وحدهـ تقول لزوجها: حبيبي أبي تشتري لي هديه بس تكون غير..
قال لها: آمري تدللي يانظر عيني ويابعد تسبدي وش تبغين بس؟
هي حطّت في بالها هالهدية:
قالت: أبي شي ينطلق من صفر إلى مية في ثلاث ثواني!!
اليوم اللي بعده رجع لها الزوج اللطيف وجاب لها هالهدية:
ويالله ينفع فيها!! ههههههه
][فاص ـل][
ألين اليوم وقلبي دقته أسرع.
ألين اليوم وردي بالندى يدمع.
ولاأدري الندى من وين؟؟
يمكن مثلي يرجيهم!!
][إختبارات×إختبارات][
(في ساحة المدرسة
هند: خلاص ياغدوره اللي أتفقنا عليه اليوم تغششيني لأني ماذاكرت شي!!
غدير: أبشري هنودتي كم عندي من هند أنا.
هند: وهـ فديتك ياقلبي بس.. ماراح أنسى لك هالمعروف أبداً.
غدير: وش دعوهـ ماسويت الا الواجب.. بتاخذين الفل مارك إن شاء الله.
(في قاعة الإمتحان
هند: غدورهـ جواب السؤال الأول وشو؟؟
غدير: حرام!!
هند: غديرووهـ مو هذا اللي أتفقنا عليه.
غدير: أدري .. بس حراام حرااااام.
هند: ياربيييه .. أخلصي وش الجواب يالخايسه؟؟
غدير: أقول لك حرااااااااااااام ماتفهمييييين!!
هند: وش ذالطوع اللي نزل فجأه يالدبااااا.
غدير: أووووف .
هند: طيب إسمعي يالشينه .. جواب السؤال الثاني وشو؟؟
غدير: من غشنا فليس منا.
هند: يالييييييييييييييل رجعت لموّالها ذالعجييييز .. أخلصيي أقوووول.
غدير: أقول لك من غشنا فليس منااا!! ماتفهمييين أنتي بلا هبببببل!!
هند: طيب أوررريك يالمفهيييييه.. خلينا نطلع بس.
(بعد الإمتحان
هند: تعالي يالخايسه.. ألحين وراك قلبتي علي فالاختبار؟؟
غدير: ماقلبت ياقلبي.. علمتك كل الأجوبه وربي.
هند: وش علمتيني وحنا من دخلنا وانتي حرام وحرام.
غدير: إيه يادلخه جواب السؤال الأول حكم قطع صلة الرحم حرام.
هند: طيب والثاني؟؟
غدير: الدليل من السنه على تحريم الغش!!
هند: يوووووووووووووووووووووووو ووووووهـ قهررررررررررررررر (وجه يبتسي)
* مايستفاد:
1- الغش حرام!!
2- من غشنا فليس منا!!
][ رسم فني بالذباب + حومة تسبد ][
الله مرجيحه, التذكرة بعشره من يبي يركب؟ ههههههه
شوفوا اللي تحت ع اليسار, يعني أني شايل معكم
حركات بعض الناس يسوونها دايم اذا جاء وقت الشيل <~ أبد مو منهم ههههه
اللي فوق يبون الحمام رجال ونساء, بس ضابطها إبن اللذينا
والثانيه يبربرون مع بعض بعد ماخلصوا من العشاء
الله يحوّم تسبودهم
شاليهات الهاف مون هههههه
رحلة السلام العالمي للحشرات
ترجموا عاد أنتو <~ توهّق
هادي صوعان معهم <<اللي خذ المركز الأول في سباق الجري
والقفز عاد مدري مين خذها, بس الظاهر أنها وحده مغربيه!!
أطول ذبابه فالعالم
][مـ خ ـرج][
ألين اليوم وأنا أتخيل لقانا كيف؟!
ألين اليوم أدوّر وش بقول وكيف؟!
ولا أدري أبتدي من وين؟؟
يمكن عمري يكفيهم!!
خ ـتاماً .. أتمنى أن تحوز الفقرات على رضاكم .. وتنال حسن ذائقتكم كل أبوكم .
اللهم إغفر لي ولكم .. ولوالديّ ووالديكم .. وأجدادي وأجدادكم .
اللهم إشفِ أم مصعب .. وعافها وأعف عنها يارب العالمين .. وإشفِ جميع مرضى المسلمين .. اللهم آميييييين.
سبحانك اللهم وبحمدك , أشهد ألا إله إلا أنت , أستغفرك وأتوب إليك
اللَّهُمَّ أَنْتَ رَبِّي ، لا إِلَه إِلاَّ أَنْتَ خَلَقْتَني وأَنَا عَبْدُكَ ، وأَنَا على عهْدِكَ ووعْدِكَ ما اسْتَطَعْتُ ، أَعُوذُ بِكَ مِنْ شَرِّ ما صنَعْتُ ، أَبوءُ لَكَ بِنِعْمتِكَ علَيَ ، وأَبُوءُ بذَنْبي فَاغْفِرْ لي ، فَإِنَّهُ لا يغْفِرُ الذُّنُوبِ إِلاَّ أَنْتَ
اللهم صلي وسلم على سيدنا ونبينا محمد وعلى آله وصحبه آجمعين.
كتبه وأملاهـ / باء نقطه شين
بدر.الشوق
وفي رواية / أبو س ـعد
b.s9@hotmail.com
ســـلام
