.
.
وفـ كل مناسبه يافيمتو .
هنوك المهنيين
تشاركنا في كل افراحنا
على ذكرانا مجتمعين ..
طعمه ولقاء وحلاوته
دايما تزيد حلاوته ..
طعمك ولونك يافيمتو
بالبهجه مرتبطيين ..
.
.
اول شي باركوا لي خلصت تدريبي يوم الاثنين اول يوم رمضان , وخلصت ذالبصمة اللي ابصمها يوم واسحب عشر هع
بهذلتني جننتني , ليت معي واسطه وما ابصم مثل خويي فالدوام الاطخم مهند
بس سبحان الله .. ربي خلق وفرق بينه وبين مهند تركيا .. يعني وش جاب لـ جاب ..
نجي للموضوع الرئيسي .. انا ماحب ولا اعرف اكتب مقدمات .. لذلك جالس اهذري عليكم وابثركم بمهندنا .. يلا نطس
][ مدخل ][
لي ثلاث سنين ما جاني خبر
وا عنا قلب المولع وا عناهـ
كنّ يوم الناس للعاشق شهر
لا رساله ولا كتاب ولا وصاهـ
اتصبر يا معين اللي صبر
واتحرى غايةَ القلبِ ومناهـ
الهوى يا اهل الهوى كله خطر
خلو المفتون يشبع من هواهـ
التمنـّي والتوجّد والسهر
ضرّني والقلب جاهـ اللي كفاهـ
][صدمني وبكى .. سبقني واشتكى][
قبل اسبوعين كنت رايح لاحد المستشفيات عندي مراجعه , الموهم فالطريق كنت ماشي ومالي وما للشيطان طاري
وقفت عند اشارة طريق الملك عبدالله تقاطع الملك فهد , متجه غرب
الموهم كان واحد راعي كامري بزر توهـ لابس حفاظته جنبي على يميني , وانا ماسك اليسار , ومسموح لي اروح سيدهـ (سيدهـ = قدام)
ولعت الاشارة ومشينا , انا اللي ع اليسار وهو اللي ع اليمين ,
فجاه بدون اي مقدمات لف علي الدلخخخخ ويصقع سيارتي , انا اشرت له بيدي وقلت رح مسامحك( ابي الحق على
توني مشيت ويمشي ذالمفهي , ويلف علي فوسط الشارع , ويوقف بالعرض وينزل ..
الموهم جاني يقول :
وش فيكـ انت شاري الشارع تمسك يسار وتروح سيدهـ , لايكون شارع ابوك , لا وبعد كل هذا تروح تنحاش , ترى انت هارب ..
التفت عليه وقلت :
طيب دق على كفيلي يسفرني خخخخ
الموهم رفع صوته وقال كلامن ماينقال ابد ..
زبدت له وقلت :
ان تسان عندك شي دق ع المرور ويجي ونتفاهم , وان تسان ماوراك الا الهياط فـ وخر عن وجهي وراي موعد ومنيب
الموهم ماكملنا دقايق وجت سيارة المرور , وتوه بيتكلم وينط ذالمريوح فـ خشة العسكري , هذا لف علي وهذا صدمني وهذا وهذا ..!
عجبني العسكري يوم قال :
قل لا اله الا الله .. واصبر نسمع من الطرفين بهدوء ,
شرحنا له الحادث , وقال الخطا على راعي الكامري 100%
عاد عصّب وقال:
ليش وش ذا الظلم اول مره اسمع بذالقوانين , يصدمني وتقول الغلط علي ..!؟
يوم استدعى ضابط ويوم وصل قعد يهايط عليه راعي الكامري , وزبّد له الضابط واكله شحم
جيت عند ذالولد قلت :
انا قايل لك من اول ان الغلط عليك ورح مسامحك ماتسمع الحكي , وسوا نفسه ماسمع شي وطنش ..!
شوي الضابط نادى ذالولد
الضابط : وين بطاقتك ؟
الضابط : طيب رخصتك؟
الضابط : والتامين ؟
الضابط : طيب الاستمارة ؟
الضابط : طيب ليش مظلل سيارتك كلها .. ممنوعه التظليله كذا ..؟!
يوم جا الضابط وسوا بعض التحريات عن هالولد , جا الولد لسيارة الضابط يقول :
ياخي انا صدمت هنا عند ذالاشارة خمس مرات , وكلها نفس الطريقه امسك يمين واروح يسار , والخطا عليهم ..!
انا الصراحه ماقدرت امسك نفسي , وجلست اضحك فوجه الضابط , حتى اللي جالس مع الضابط جلس يضحك عليه
اما ذالسطعه نايمه من جد , لو بيمشيها على اختي نوره مامشت هع هع
الموهم راح وسجل محضر مدري وشو عن الحادث , وقال لي تتنازل؟
قلت لا والله , هالورع قليل ادب ويبي له من يربيه , وخله يصلح سيارتي(مع ان سيارتي ما جاها الا مخش بسيط بس )
واستقعدت له والله , مع اني داري انهم بيودونه للحجز المن يجي واحد يكفله ,,
ما كملت دقايق الا وتنزل ذيك العجيز من الكامري , (انا ماشفتها لان السيارة كانت مظلله) ,
طبعا معروف هي وش جايه بتقول , جت تتعذر عن ولدها وتطلب السماح وزي كذا , ومع صعوبة الموقف , صعبه اني برفض طلب هالعجيز الكبيرهـ , قلت لها خلاص مسامحه بس بشرط , يجيني ويتاسف عن الحركة قليلة الادب اللي سواها , ويعتذر مني ..
مايستفاد :
2/ قبل تسوي اي حادث (كانك تدري انت وخشمك) , تاكد ان معك تامينك ورخصتك وبطاقتك واستمارتك … ولاتظلل
][ هندي حارة جيراننا ][
تذكرون سالفة ذالهندي ؟؟
طيب اللي ما يذكرها يرعص على اسمي ويشوف موضوعي اللي راح .. فيه سالفتهـ
الموهم .. طلعت يوم الربوع العصر , بشتري رز مصري (ذاك اللي يسوون به جريش مدري سليق)
عاد مرّيت من الحارة اللي قبالنا , سمعت ان عندهم سوبر ماركت مخفض ,
وانا رايح كان هونيك حفريات وقلق , عاد وقزّيت لي ذاك الهندي اللي يمشي وشايل معه كرتون وكيس , ويطري علي سالفة كومار خوينا في الموضوع اللي راح
رحت جنبه ومدّيت يدي وسلمت ,, وما رفع يده ..
قربت زياده وسلمت مره ثانيه , ولا رد علي ,, مستغرب ومعذور اصلا على ذاللي شايله
جيت ووقفت قدام وجهه بالعرض بسيارتي , ومديت يدي مره ثالثه هههههههههه
عاد صورته ولا ضبطت الصوره , صارت موشوشه شووي ,,
ما يستفاد :
4/ كيس الرز المصري كان بـ 12 وصل 30 ريال ,, وغيره وغيره وغيره …. الخ .. (حسبي الله على المتسببين في رفع
][ ولا تسرفوا ][
ابو صالح : صالح ياولدي .. رح اشتر ذبيحة وكيسين رز …. وخذ هذي ثلاث مية ريال ..
صالح : وين يايبه .. وش تسوي الثلاث مية ريال .. ما تجيب لك ولا دجاجتين ذاليومين .. كل شي مرتفع سعرهـ .. وكيس الرز وصل 350 ريال ..!
ابو صالح : طيب زدها من عندك واشتر الذبيحة والرز والخضار والفاكهه من كل نوع .. ولاتنسى الببسي .. عشان اليوم فيه عزيمه سحور ومانبي نتفشل ..
صالح : ليش مين اللي بيجي يبه ؟؟
ابو صالح : بيجي ابو خالد وابوعبدالله ..
صالح : بس يبه ؟؟
ابو صالح : ايه بس .. ولازم ابيّض الوجه .. عشان بكرا مايقولون ابوصالح بخيل ولا مايقوم بالواجب ..!
ظاهره انتشرت في الخليج العربي للاسف .. وبين ابناء المسلمين ..
الاسراف باسم الكرم والبذخ ..!
يقول الله سبحانه وتعالى: {ان المبذرين كانوا اخوان الشياطين وكان الشيطان لربه كفورا}
تعليقاتكم
][رمضانيات ][
رسائل رمضانية
شهر رمضان
هدايا رمضانية سخية
وقفات رمضانية
وقفات واحكام لشهر رمضان
فتاوى رمضانية – 1
فتاوى رمضانية – 2
فتاوى رمضانية – 3
فتاوى رمضانية نسائية
][ صور و تـعليق ][
][ مخرج ][
هلّ دمعي فوق خدّي وانتثر
قلبي المجروح وين القى دواهـ
الحبيب ان غاب زوله او حضر
ما يحب القلب محبوبٍ سواااهـ
من بحر جدهـ الى شرق الخبر
في الحضر والبدو ما نلقى حلاهـ
شوفة المحبوب والروض الخضر
تنعش القلب المشكى وتغذاهـ
ارتجي ارميه بلامات القدر
ولا اختلف دامي على قيد الحياهـ
في جميع الناس ملكت النظر
ما نسى حبي وقلبي ما نساهـ
واتقدم مرهـ اخرى بالتهنئه لابونواف ولموسعن صدرهـ وجميع اعضاء وزوار ومتابعي القروب بالشهر الكريم
طلب صغير اتمنى ان لا تبخلوا علي فيه .. دعواتكم لـ جدتي بالشفاء العاجل ,, وعودتها للسعودية بالسلامه يارب .. اللهم امين ..
سبحانك اللهم وبحمدك , اشهد الا اله الا انت , استغفرك واتوب اليك
اللَّهُمَّ انْتَ رَبِّي ، لا الَه الا انْتَ خَلَقْتَني وانَا عَبْدُكَ ، وانَا على عهْدِكَ ووعْدِكَ ما اسْتَطَعْتُ ، اعُوذُ بِكَ مِنْ شَرِّ ما صنَعْتُ ، ابوءُ لَكَ بِنِعْمتِكَ علَيَ ، وابُوءُ بذَنْبي فَاغْفِرْ لي ، فَانَّهُ لا يغْفِرُ الذُّنُوبِ الا انْتَ
كتبه / باء نقطه شين
بدر.الشوق
.
.
منتدى فهاوه
:للتواصل
b.s11@hotmail.com
